૨. પારિવાસિકક્ખન્ધક

પુચ્છા – પારિવાસિકસ્સ આવુસો પકતત્તાનં ભિક્ખૂનં અભિવાદનાદીનિ સાદિયન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે પારિવાસિકે ભિક્ખૂ આરબ્ભ પઞ્ઞત્તં, પારિવાસિકા ભન્તે ભિક્ખૂ સાદિયિંસુ પકતત્તાનં ભિક્ખૂનં અભિવાદનાદીનિ, તસ્મિં ભન્તે વત્થુસ્મિં પઞ્ઞત્તં.

પુચ્છા – પારિવાસિકેન આવુસો ભિક્ખુના કતિસુ વત્તેસુ સમ્મા વત્તિતબ્બં.

વિસ્સજ્જના – પારિવાસિકેન ભન્તે ભિક્ખુના ચતુનવુતિયા વત્તેસુ સમ્મા વત્તિતબ્બં.

પુચ્છા – પારિવાસિકં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – પારિવાસિકં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે એકા આપત્તિ.