૧૦. ભિક્ખુનિક્ખન્ધક

પુચ્છા – અટ્ઠહિ આવુસો ગરુધમ્મેહિ ઉપસમ્પદા ભગવતા કત્થ અનુઞ્ઞાતા, કસ્સ અનુઞ્ઞાતા, કિસ્મિઞ્ચ વત્થુસ્મિં અનુઞ્ઞાતા.

વિસ્સજ્જના – વેસાલિયં ભન્તે મહાપજાપતિયા ગોતમિયા અનુઞ્ઞાતા, મહાપજાપતિ ભન્તે ગોતમી સૂનેહિ પાદેહિ રજોકિણ્ણેન ગત્તેન દુક્ખી દુમ્મના અસ્સુમુખી રુદમાના બહિદ્વારકોટ્ઠકે અટ્ઠાસિ, અથ ખો ભન્તે આયસ્મા આનન્દો મહાપજાપતિં ગોતમિં તં કારણં પુચ્છિત્વા ભગવન્તં ચતુક્ખત્તું યાચિ માતુગામસ્સ તથાગતપ્પવેદિતે ધમ્મવિનયે આગારસ્મા અનાગારિયં પબ્બજ્જં, તસ્મિં ભન્તે વત્થુસ્મિં અનુઞ્ઞાતા.

પુચ્છા – ભિક્ખૂહિ આવુસો ભિક્ખુનિયો ઉપસમ્પાદેતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – વેસાલિયં ભન્તે મહાપજાપતિં ગોતમિં આરબ્ભ અનુઞ્ઞાતં, મહાપજાપતિ ભન્તે ગોતમી ભગવન્તં એતદવોચ ‘‘કથાહં ભન્તે ઇમાસુ સાકિયાનીસુ પટિપજ્જામી’’તિ, તસ્મિં ભન્તે વત્થુસ્મિં અનુઞ્ઞાતં.

પુચ્છા – એકતો ઉપસમ્પન્નાય આવુસો ભિક્ખુનિસઙ્ઘે વિસુદ્ધાય ભિક્ખુસઙ્ઘે ઉપસમ્પાદેતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ અનુઞ્ઞાતં, સમ્બહુલા ભન્તે ભિક્ખૂ ભિક્ખુનીનં અન્તરાયિકે ધમ્મે પુચ્છિંસુ, ઉપસમ્પદાપેક્ખાયો વિત્થાયિંસુ, મઙ્કૂ અહેસું, ન સક્ખિંસુ વિસ્સજ્જેતું, તસ્મિં ભન્તે વત્થુસ્મિં અનુઞ્ઞાતં.

પુચ્છા – ભિક્ખુનિક્ખન્ધકં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – ભિક્ખુનિક્ખન્ધકં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે દ્વે આપત્તિયો.