૮. ચીવરક્ખન્ધક

જીવકવત્થુ

પુચ્છા – ગહપતિચીવરં આવુસો સાદિયિતું ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – રાજગહે ભન્તે જીવકં કોમારભચ્ચં આરબ્ભ અનુઞ્ઞાતં, જીવકો ભન્તે કોમારભચ્ચો ભિક્ખૂનં ગહપતિચીવરં અનુજાનિતું ભગવન્તં યાચિ, તસ્મિં ભન્તે વત્થુસ્મિં અનુઞ્ઞાતં.

પુચ્છા – છ આવુસો રજનાનિ ભગવતા કત્થ અનુઞ્ઞાતાનિ, કિસ્મિં વત્થુસ્મિં અનુઞ્ઞાતાનિ.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ અનુઞ્ઞાતાનિ, સમ્બહુલા ભન્તે ભિક્ખૂ છકણેનપિ પણ્ડુમત્તિકાયપિ ચીવરં રજિંસુ, ચીવરં દુબ્બણ્ણં હોતિ, તસ્મિં ભન્તે વત્થુસ્મિં અનુઞ્ઞાતાનિ.

પુચ્છા – અચ્છિન્નકાનિ આવુસો ચીવરાનિ ધારેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – રાજગહે ભન્તે સમ્બહુલે ભિક્ખૂ આરબ્ભ પઞ્ઞત્તં, સમ્બહુલા ભન્તે ભિક્ખૂ અચ્છિન્નકાનિ ચીવરાનિ ધારેસું દન્તકસાવાનિ, તસ્મિં ભન્તે વત્થુસ્મિં પઞ્ઞત્તં.

પુચ્છા – કદા આવુસો ભગવા અનુઞ્ઞાસિ છિન્નકં સઙ્ઘાટિં છિન્નકં ઉત્તરાસઙ્ગં છિન્નકં અન્તરવાસકં.

વિસ્સજ્જના – દક્ખિણાગિરિતો ભન્તે પચ્છાગતકાલે ભગવા અનુઞ્ઞાસિ છિન્નકં સઙ્ઘાટિં છિન્નકં ઉત્તરાસઙ્ગં છિન્નકં અન્તરવાસકં.

પુચ્છા – અગ્ગળં ચ આવુસો તુન્નઞ્ચ ઓવટ્ટિકઞ્ચ કણ્ડુસકઞ્ચ દળ્હીકમ્મઞ્ચ ભગવતા કત્થ અનુઞ્ઞાતં, કં આરબ્ભ કિસ્મિં વત્થુસ્મિં અનુઞ્ઞાતં.

વિસ્સજ્જના – બારાણસિયં ભન્તે અઞ્ઞતરં ભિક્ખું આરબ્ભ અનુઞ્ઞાતં, અઞ્ઞતરો ભન્તે ભિક્ખુ અગ્ગળં અચ્છુપેસિ, તસ્મિં ભન્તે વત્થુસ્મિં અનુઞ્ઞાતં.

પુચ્છા – વસ્સિકસાટિકા ચ આવુસો આગન્તુકભત્તઞ્ચ ગમિકભત્તઞ્ચ ગિલાનભત્તઞ્ચ ગિલાનુપટ્ઠાકભત્તઞ્ચ ગિલાનભેસજ્જઞ્ચ ધુવયાગુ ચ ભિક્ખુનિસઙ્ઘસ્સ ઉદકસાટિકાચાતિ ઇમા અટ્ઠ ભગવતા કત્થ અનુઞ્ઞાતા, કં આરબ્ભ કિસ્મિં વત્થુસ્મિં અનુઞ્ઞાતા.

વિસ્સજ્જના – સાવત્થિયં ભન્તે વિસાખં મિગારમાતરં આરબ્ભ અનુઞ્ઞાતા, વિસાખા ભન્તે મિગારમાતા ભગવન્તં અટ્ઠવરાનિ યાચિ, તસ્મિં ભન્તે વત્થુસ્મિં અનુઞ્ઞાતા.

પુચ્છા – ભગવતા આવુસો માતાપિતૂનં દાનં અનુજાનિત્વા સદ્ધાદેય્યં વિનિપાતેન્તસ્સ દુક્કટં કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે અઞ્ઞતરં ભિક્ખું આરબ્ભ પઞ્ઞત્તં, અઞ્ઞતરસ્સ ભન્તે ભિક્ખુનો બહું ચીવરં ઉપ્પન્નં અહોસિ, સો ચ તંચીવરં માતાપિતૂનં દાતુકામો અહોસિ, તસ્મિં ભન્તે વત્થુસ્મિં પઞ્ઞત્તં.

માતાપિતરોતિ ખો ભિક્ખવે દદમાને કિં વદેય્યામ, અનુજાનામિ ભિક્ખવે માતાપિતૂનં દાતું, ન ચ ભિક્ખવે સદ્ધાદેય્યં વિનિપાતેતબ્બં, યો વિનિપાતેય્ય આપત્તિ દુક્કટસ્સ –

પુચ્છા – અઞ્ઞત્ર વસ્સં વુટ્ઠેન આવુસો અઞ્ઞત્ર ચીવરભાગં સાદિયન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે આયસ્મન્તં ઉપનન્દં સક્યપુત્તં આરબ્ભ પઞ્ઞત્તં, આયસ્મા ભન્તે ઉપનન્દો સક્યપુત્તો અઞ્ઞત્ર વસ્સં વુટ્ઠો અઞ્ઞત્ર ચીવરભાગં સાદિયિ, તસ્મિં ભન્તે વત્થુસ્મિં પઞ્ઞત્તં.

પુચ્છા – અનાથકં આવુસો ભિક્ખું ગિલાનં ન ઉપટ્ઠહન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે અઞ્ઞતરં ભિક્ખું આરબ્ભ પઞ્ઞત્તં, ભગવતિ ભન્તે સાવત્થિયં વિહરતિ અઞ્ઞતરસ્સ ભિક્ખુનો કુચ્છિવિકારાબાધો અહોસિ, સો સકે મુત્તકરીસે પલિપન્નો સયિ, તસ્મિં ભન્તે વત્થુસ્મિં પઞ્ઞત્તં.

પુચ્છા – નગ્ગિયં આવુસો તિત્થિયસમાદાનં સમાદિયન્તસ્સ થુલ્લચ્ચયં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે અઞ્ઞતરં ભિક્ખું આરબ્ભ પઞ્ઞત્તં, અઞ્ઞતરો ભન્તે ભિક્ખુ નગ્ગિયં તિત્થિયસમાદાનં સમાદિયિ, તસ્મિં ભન્તે વત્થુસ્મિં પઞ્ઞત્તં.

પુચ્છા – સબ્બનીલકાનિ વા આવુસો ચીવરાનિ સબ્બપીતકાનિ વા સબ્બલોહિતકાનિ વા સબ્બમઞ્જિટ્ઠકાનિ વા સબ્બકણ્હાનિવાતિ એવરૂપાનિ ચીવરાનિ ધારેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે છબ્બગ્ગિયે ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ સબ્બનીલકાદીનિ ચીવરાનિ ધારેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – કઞ્ચુકં વા આવુસો વેઠનં વા ધારેન્તસ્સ દુક્કટં ભગવતા કત્થ પઞ્ઞત્તં, કં આરબ્ભ કિસ્મિં વત્થુસ્મિં પઞ્ઞત્તં.

વિસ્સજ્જના – સાવત્થિયં ભન્તે છબ્બગ્ગિયેવ ભિક્ખૂ આરબ્ભ પઞ્ઞત્તં, છબ્બગ્ગિયા ભન્તે ભિક્ખૂ કઞ્ચુકમ્પિ ધારેસું વેઠનમ્પિ ધારેસું, તસ્મિં ભન્તે વત્થુસ્મિં પઞ્ઞત્તં.

પુચ્છા – ચીવરસઞ્ઞુત્તં પુચ્છિસ્સં, સનિદાનં સનિદ્દેસં. સમુક્કટ્ઠપદાનં આવુસો કતિ આપત્તિયો.

વિસ્સજ્જના – ચીવરસઞ્ઞુત્તં વિસ્સજ્જિસ્સં, સનિદાનં સનિદ્દેસં. સમુક્કટ્ઠપદાનં ભન્તે તિસ્સો આપત્તિયો.