બ્રહ્મસંયુત્ત

ગારવસુત્ત

પુચ્છા – બ્રહ્મસંયુત્તે આવુસો પોરાણેહિ મહાકસ્સપથેરાદીહિ ધમ્મસંગાહકથેરવરેહિ દુતિયં સંગીતં ગારવસુત્તં કત્થ કથઞ્ચ સમુપ્પન્નં.

વિસ્સજ્જના – ઉરુવેલાયં ભન્તે સમુપ્પન્નં. ભગવા ભન્તે ઉરુવેલાયં વિહરતિ નજ્જા નેરઞ્જરાય તીરે અજપાલનિગ્રોધમૂલે પઠમાભિસમ્બુદ્ધો. અથ ખો ભગવતો રહોગતસ્સ પટિસલ્લીનસ્સ એવં ચેતસો પરિવિતક્કો ઉદપાદિ ‘‘દુક્ખં ખો અગારવો વિહરતિ અપ્પતિસ્સો, કં નુ ખ્વાહં સમણં વા બ્રાહ્મણં વા સક્કત્વા ગરું કત્વા ઉપનિસ્સાય વિહરેય્ય’’ન્તિ.

અથ ખો ભન્તે ભગવતો એતદહોસિ ‘‘અપરિપુણ્ણસ્સ ખો સીલક્ખન્ધસ્સ પારિપૂરિયા અઞ્ઞં સમણં વા બ્રાહ્મણં વા સક્કત્વા ગરું કત્વા ઉપનિસ્સાય વિહરેય્યું, ન ખો પનાહં પસ્સામિ સદેવકે લોકે સમારકે સબ્રહ્મકે સસ્સમણબ્રાહ્મણિયા પજાય સદેવમનુસ્સાય અત્તના સીલસમ્પન્નતરં અઞ્ઞં સમણં વા

બ્રાહ્મણં વા, યમહં સક્કત્વા ગરું કત્વા ઉપનિસ્સાય વિહરેય્યું.

અપરિપુણ્ણસ્સ ખો સમાધિક્ખન્ધસ્સ;

અપરિપુણ્ણસ્સ ખો પઞ્ઞાક્ખન્ધસ્સ;

અપરિપુણ્ણસ્સ ખો વિમુત્તિક્ખન્ધસ્સ.

અપરિપુણ્ણસ્સ ખો વિમુત્તિઞાણદસ્સનક્ખન્ધસ્સ પારિપૂરિયા અઞ્ઞં સમણં વા બ્રાહ્મણં વા સક્કત્વા ગરું કત્વા ઉપનિનિસ્સાય વિહરેય્યં. ન ખો પનાહં પસ્સામિ સદેવકે લોકે સમારકે સબ્રહ્મકે સસ્સમણબ્રાહ્મણિયા પજાય સદેવમનુસ્સાય અત્તના વિમુત્તિઞાણદસ્સનસમ્પન્નતરં અઞ્ઞં સમણં વા બ્રાહ્મણં વા, યમહં સક્કત્વા ગરું કત્વા ઉપનિસ્સાય વિહરેય્યં. યંનૂનાહં ય્વાયં ધમ્મો મયા અભિસમ્બુદ્ધો, તમેવ ધમ્મં સક્કત્વા ગરું કત્વા ઉપનિસ્સાય વિહરેય્ય’’ન્તિ. એવં ખો ભન્તે ભગવતો ચેતસો પરિવિતક્કવસેન ઉપ્પન્નં.

યે ચ અતીતા સમ્બુદ્ધા, યે ચ બુદ્ધા અનાગતા;

યો ચેતરહિ સમ્બુદ્ધો, બહૂનં સોકનાસનો;

સબ્બે સદ્ધમ્મગરુનો, વિહંસુ વિહરન્તિ ચ;

તથાપિ વિહરિસ્સન્તિ, એસા બુદ્ધાન ધમ્મતા.

તસ્મા હિ અત્તકામેન, મહત્તમભિકઙ્ખતા;

સદ્ધમ્મો ગરુકાતબ્બો, સરં બુદ્ધાન સાસનં.

અઞ્ઞરતબ્રહ્મસુત્ત

પુચ્છા- તત્થાવુસો પોરાણકેહિ મહાકસ્સપાદીહિ ધમ્મસંગાહકથેરવરેહિ પઠમં સંગીતં અઞ્ઞતરબ્રહ્મસુત્તં કત્થ કં આરબ્ભ કિસ્મિં વત્થુસ્મિં કેન કથઞ્ચ ભાસિતં.

વિસ્સજ્જના – બ્રહ્મલોકે ભન્તે અઞ્ઞતરં બ્રહ્માનં આરબ્ભ આયસ્મતા મહામોગ્ગલ્લાનત્થેરેન ભાસિતં. અઞ્ઞતરસ્સ ભન્તે બ્રહ્મુનો એવરૂપં પાપકં દિટ્ઠિગતં ઉપ્પન્નં હોતિ ‘‘નત્થિ સો સમણો વા બ્રાહ્મણો વા, યો ઇધ આગચ્છેય્યા’’તિ. તસ્મિં ભન્તે વત્થુસ્મિં–

અજ્જાપિ તે આવુસો સા દિટ્ઠિ, યા તે દિટ્ઠિ પુરે અહુ;

પસ્સસિ વીતિવત્તન્તં, બ્રહ્મલોકે પભસ્સરન્તિ;

એવં ખો ભન્તે આયસ્મતા મહામોગ્ગલ્લાનત્થેરેન ભાસિતં.

અજ્જાપિ તે આવુસો સા દિટ્ઠિ, યા તે દિટ્ઠિ પુરે અહુ;

પસ્સસિ વીતિવત્તન્ત, બ્રહ્મલોકે પભસ્સરં-હુ–

ન મે મારિસ સા દિટ્ઠિ, યા મે દિટ્ઠિ પુરે અહુ;

પસ્સામિ વીતિવત્તન્તં, બ્રહ્મલોકે પભસ્સરં;

સ્વાહં અજ્જ કથં વજ્જં, અહં નિચ્ચોમ્હિ સસ્સતો હુ–

તેવિજ્જા ઇદ્ધિપત્તા ચ, ચેતોપરિયાય કોવિદા;

ખીણાસવા અરહન્તો, બહૂ બુદ્ધસ્સ સાવકા-હુ–

અરુણવતીસુત્ત

પુચ્છા – તત્થાવુસો અરુણવતીસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ‘‘ભૂતપુબ્બં ભિક્ખવે રાજા અહોસિ અરુણવા નામ. રઞ્ઞો ખો પન ભિક્ખવે અરુણવતો અરુણવતી નામ રાજધાની અહોસી’’તિ એવમાદિના ભન્તે ભગવતા અરુણવતી સુત્તં ભાસિતં.

આરમ્ભથ નિક્કમથ, યુઞ્જથ બુદ્ધસાસને;

ધુનાથ મચ્ચુનો સેનં, નળાગારંવ કુઞ્જરો;

યો ઇમસ્મિં ધમ્મવિનયે, અપ્પમત્તો વિહસ્સતિ;

પહાય જાતિ સંસારં, દુક્ખસ્સન્તં કરિસ્સતિ-હુ–