સક્કસંયુત્ત

વતપદસુત્ત

પુચ્છા – સક્કસંયુત્તે પનાવુસો વતપદસુત્તં ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ સક્કસ્સ ભિક્ખવે દેવાનમિન્દસ્સ પુબ્બે મનુસ્સભૂતસ્સ સત્ત વતપદાનિ સમત્તાનિ સમાદિન્નાનિ અહેસું, યેસં સમાદિન્નત્તા સક્કો સક્કત્તં અજ્ઝગાતિ એવમાદિના ભન્તે ભગવતા ભાસિતં.

સક્કસ્સ ભિક્ખવે દેવાનમિન્દસ્સ પુબ્બે મનુસ્સભૂતસ્સ ઇમાનિ સત્ત વતપદાનિ સમત્તાનિ સમાદિન્નાનિ અહેસું.

માતાપેત્તિભરં જન્તું, કુલે જેટ્ઠાપચાયિનં;

સણ્હં સખિલસમ્ભાસં, પેસુણેય્યપ્પહાયિનં;

મચ્છેરવિનયે યુત્તં, સચ્ચં કોધાભિભું નરં;

તં વે દેવા તાવતિંસા, આહુ ‘‘સપ્પુરિસો’’ઇતિ.

દલિદ્દસુત્ત

પુચ્છા – દલિદ્દસુત્તં પનાવુસો કત્થ કં આરબ્ભ કથઞ્ચ ભાસિતં. વિસ્સજ્જના. રાજગહે ભન્તે સમ્બહુલે ભિક્ખૂ આરબ્ભ ‘‘ભૂતપુબ્બં ભિક્ખવે અઞ્ઞતરો પુરિસો ઇમસ્મિંયેવ રાજગહે મનુસ્સદલિદ્દો અહોસિ મનુસ્સકપણો મનુસ્સવરાકો, સો તથાગતપ્પવેદિતે ધમ્મવિનયે સદ્ધં સમાદિયિ, સીલં, સુતં, ચાગં, પઞ્ઞં સમાદિયી’’તિ એવમાદિના ભન્તે ભગવતા ભાસિતં.

યસ્સ સદ્ધા તથાગતે, અચલા સુપ્પતિટ્ઠિતા;

સીલઞ્ચ યસ્સ કલ્યાણં, અરિયકન્તં પસંસિતં.

યજમાનસુત્ત

પુચ્છા – યજમાનસુત્તં પનાવુસો ભગવતા કત્થ કં આરબ્ભ કિસ્મિં વત્થુસ્મિં કથઞ્ચ ભાસિતં.

વિસ્સજ્જના – રાજગહે ભન્તે સક્કં દેવાનમિન્દં આરબ્ભ ભાસિતં. સક્કો ભન્તે દેવાનમિન્દો ભગવન્તં ગાથાય અજ્ઝભાસિ–

‘‘યજમાનાનં મનુસ્સાનં, પુઞ્ઞપેક્ખાન પાણિનં;

કરોતં ઓપધિકં પુઞ્ઞં, કત્થ દિન્નં મહપ્ફલ’’ન્તિ.

તસ્મિં ભન્તે વત્થુસ્મિં–

‘‘ચત્તારો ચ પટિપન્ના, ચત્તારોચ ફલે ઠિતા;

એસ સઙ્ઘો ઉજુભૂતો, પઞ્ઞાસીલસમાહિતો;

યજમાનાનં મનુસ્સાનં, પુઞ્ઞપેક્ખાન પાણિનં;

કરોતં ઓપધિકં પુઞ્ઞં, સઙ્ઘે દિન્નં મહપ્ફલં’’ન્તિ.

એવં ખો ભન્તે ભગવતા ભાસિતં.

યજમાનાનં મનુસ્સાનં, પુઞ્ઞપેક્ખાન પાણિનં,

કરોતં ઓપધિતં પુઞ્ઞં, કત્થ દિન્નં મહપ્ફલં–

ચત્તારો ચ પટિપન્ના, ચત્તારો ચ ફલે ઠિતા;

એસ સઙ્ઘો ઉજુભૂતો, પઞ્ઞાસીલસમાહિતો;

યજમાનાનં મનુસ્સાનં, પુઞ્ઞપેક્ખાન પાણિનં;

કરોતં ઓપધિકં પુઞ્ઞં, સઙ્ઘે દિન્નં મહપ્ફલં–

ગહટ્ઠવન્દનાસુત્ત

પુચ્છા – ગહટ્ઠવન્દનાસુત્તં પનાવુસો ભગવતા કત્થ કં આરબ્ભ કથઞ્ચ ભાસિતં.

વિસ્સજ્જના – સાવત્થિયં ભન્તે સમ્બહુલે ભિક્ખૂ આરબ્ભ ‘‘ભૂતપુબ્બં ભિક્ખવે સક્કો દેવાનમિન્દો માતલિં સઙ્ગાહકં આમન્તેસી’’તિ એવમાદિના ભન્તે ભગવતા ભાસિતં.

તં નમસ્સન્તિ તેવિજ્જા, સબ્બે ભુમ્માચ ખત્તિયા;

ચત્તારો ચ મહારાજા, તિદસાચ યસસ્સિનો;

અથકો નામ સો યક્ખો, યં ત્વં સક્ક નમસ્સસિ–

અહઞ્ચ સીલસમ્પન્ને, ચિરરત્તસમાહિતે;

સમ્માપબ્બજિતે વન્દે, બ્રહ્મચરિયપરાયને.

યે ગહટ્ઠા પુઞ્ઞકરા, સીલવન્તો ઉપાસકા;

ધમ્મેન દારં પોસેન્તિ, તે નમસ્સામિ માતલિ.