૯૧. ય્વાદો ન્તુસ્સ

યોઆદીસુ ન્તુસ્સ અ હોતિ. ગુણવન્તઇતિ અકારન્તા ટા+ટેઆદેસા હોન્તિ, ગુણવન્તા. ‘‘ટટાઅં ગે’’તિ ટાદયો, ભો ગુણવ ગુણવા ગુણવં, ગુણવન્તો ગુણવન્તા. ‘‘ન્તસ્સ ચ ટ વં+સે’’તિ અંસેસુ ન્તસ્સ ટો વા, ગુણવં ગુણવન્તં, ગુણવન્તે. ‘‘તો+તા+તિ+તા સ+સ્મા+સ્મિં+નાસૂ’’તિ તાઆદયો હોન્તિ, ગુણવતા ગુણવન્તેન, ગુણવન્તેહિ ગુણવન્તેભિ. ‘‘લક્ખણિકપટિપદોત્તેસુ પટિપદોત્તસ્સેવ ગહણં, ન લક્ખણિકસ્સા’’તિ ઞાયા ‘‘ન લક્ખણિકસ્સા’’તિ વુત્તબ્યત્તિપક્ખ+મનપેક્ખિત્વા ‘‘અતો’’તિ રસ્સાકારજાતિયા પેક્ખિતત્તા ગુણવન્તેનાતિ ‘‘અતેના’’ ત્ય+નેન સિજ્ઝતિ. જાતિ=સામઞ્ઞં, બ્યત્તિ=વિસેસો. ગુણવતો ગુણવસ્સ ગુણવન્તસ્સ, ‘‘તં નંમ્હિ’’તિ નંમ્હી તં વા, ગુણવતં ગુણવન્તાનં. ગુણવતા ગુણવન્તા ગુણવન્તમ્હા ગુણવન્તસ્મા. ગુણવતિ ગુણવન્તે ગુણવન્તમ્હિ ગુણવન્તસ્મિં, ગુણવન્તેસુ. ‘‘ન્તસ્સ ચ ટ વા’’તિ યોગવિભાગા યોસુ ચ ન્તુસ્સ વા ટાદેસે કતે યોસ્સ ટા, ‘‘ચક્ખુમા અન્ધિતા હોન્તિ’’, ‘‘વગ્ગુમુદાતીરિયા ભિક્ખુ વણ્ણવા’’ ઇચ્ચાદી હોન્તિ.

એવં ગણવા કુલવા ફલવા યસવા ધનવા સુતવા ભગવા હિમવા બલવા સીલવા પઞ્ઞવા ઇચ્ચાદી.