૫૭. લ્તુ

તેનાતિ યતો લ્તુઇતિ વિસેસનત્તેન વત્તુમિચ્છિતસ્સ પચ્ચયસ્સ ગહણં, તેનાતિ અત્થો, પચ્ચયસ્સ ગહણા તદાદિગહણં લબ્ભતે… ‘‘પચ્ચયગ્ગહણે યતો સો વિહિતો, તદાદિનો ગહણ’’ન્તિ ઞાયા, વિસેસનત્તેન વત્તુમિચ્છિતત્તા તદન્તગ્ગહણં… ‘‘વિધિબ્બિસેસનન્તસ્સા’’તિ (૧-૧૩) વચનતોતિ મનસિ નિધાયાહ- ‘યતો’ઇચ્ચાદિ, સો ક્રિયત્થો આદિ યસ્સ સો તદાદિ, સો પચ્ચયો-ન્તો યસ્સ સમુદાયસ્સ સો તદન્તો, તાદિસસ્સ તદા દિતદન્તસમુદાયવિસેસ(સ્સ) ગહણં, ન તુ તદન્તમત્તસ્સેત્યત્થો, નનુ ચ ‘લ્ત્વી’તિ વિસેસનત્તેન વત્તુમિચ્છિતે ભવતુ ‘‘વિધિબ્બિસેસનન્તસ્સા’’તિ તદન્તસ્સ ગહણં, પચ્ચયગ્ગહણેન પન તદાદિનો ગહણં કથં સિયા વચનાભાવાત્યાહ-‘તદવિનાભાવિત્તા’તિ, યતો વિહિતો, તેન વિના ન ભવતિ સીલેનાતિ તદવિનાભાવી, તસ્સ ભાવો તસ્મા. ‘‘પચ્ચયગ્ગહણે યતો સો વિહિતો તદાદિનો ગહણ’’ન્તિ ઞાયસ્સ યત્થ પચ્ચયગ્ગહણં તત્થ સાધારણત્તા ‘તદાદિનો’તિ વુત્તં, તદાદિસમુદાયસ્સ ગહણે પનેત્થ વિસેસો ન દિસ્સતિ… અધિકત્તાતિ [અધિગતન્તાવાતિ (પોત્થકે)] આદીસુ વિસેસદસ્સનાસમ્ભવા, ‘તુંસ્મા લોપો ચિચ્છાયં તે’’ ત્યત્ર (૫-૪) તુ દિસ્સતિ વિસેસો, વક્ખતિહિ તત્થ ‘‘તુંતાયેતવે ભાવે ભવિસ્સતિ ક્રિયાયં તદત્થાય’’ન્તિ (૫-૬૧) તુંપચ્ચયં વક્ખતિ’’ચ્ચાદિ.