અટ્ઠમ પરિચ્છેદ

પણ્ડુવાસુદેવાભિસેકો

૧. વિજયો સો મહારાજા, વસ્સે અન્તિમકે ઠિતો;

ઇતિ ચિન્તયિ ‘‘વુદ્ધો’હં, ન ચ વિજ્જતિ મે સુતો.

૨. કિચ્છેન વાસિતં રટ્ઠં, નસ્સેય્ય મમ અચ્ચયે;

આણાપેય્યં રજ્જહેતુ-સુમિત્તં ભાતરં મમ.

૩. અથા’મચ્ચેહિ મન્તેત્વા, લેખં તત્થ વિસજ્જયિ;

લેખં દત્વાન વિજયો, ન ચિરેન દિવઙ્ગતો.

૪. તસ્મિં મતે અમચ્ચા તે, પેક્ખન્તા ખત્તિયાગમં;

ઉપતિસ્સગામે ઠત્વાન, રટ્ઠં સમુનુસાસિસું.

૫. મતે વિજયરાજમ્હિ, ખત્તિયાગમના પુરા;

એકં વસ્સં અયં લંકા-દીપો આસિ અરાજકો.

૬. તસ્મિં સીહપુરે તસ્સ, સીહબાહુસ્સ રાજિનો;

અચ્ચયેન સુમિત્તો સો, રાજા તસ્સ સુતો અહુ.

૭. તસ્સ પુત્તા તયો આસું, મદ્દરાજસ્સ ધીતુયા;

દૂતા સીહપુરં ગન્ત્વા, રઞ્ઞો લેખં અદંસુ તે.

૮. લેખં સુત્વાન સો રાજા, પુત્તે આમન્તયી તયો;

અહં મહલ્લકો તાતા, એકો તુમ્હેસુ ગચ્છતુ.

૯. લંકં નેકગુણં કન્તં, મમ ભાતુસ્સ સન્તકં;

તસ્સ’ચ્ચ યેન તત્થેવ, રજ્જં કારેતુ સોભનં.

૧૦. કણિટ્ઠકો પણ્ડુવાસુ-દેવો રાજકુમારકો;

‘‘ગમિસ્સામીતિ ચિન્તેત્વા, ઞત્વા સોત્થિ ગતમ્પિ ચ.

૧૧. પિતરા સમનુઞ્ઞાતો, દ્વત્તિંસામચ્ચ દારકે;

આદાય આરુહી નાવં, પરિબ્બાજકલિઙ્ગવા.

૧૨. મહાકન્દરનજ્જા તે, મુખદ્વારમ્હિ ઓતરં;

તે પરિબ્બાજકે દિસ્વા, જનો સક્કરિ સાધુકં.

૧૩. પુચ્છિત્વા નગરં એત્થ, ઉપયન્તં કમેન તે;

ઉપતિસ્સ ગામં સમ્પત્તા, દેવતા પરિપાલિતા.

૧૪. અમચ્ચા’નુમતો’મચ્ચો, પુચ્છિ નેમિત્તકા તહિં;

ખત્તિયા’ગમનં તસ્સ, સો બ્યાકાસિ પરંપિ ચ.

૧૫. સત્તમે દીવસેયેવ, આગમિસ્સતિ ખત્તિયો;

બુદ્ધસાસન મેતસ્સ, વંસજો’વ ઠપેસ્સતિ.

૧૬. સત્તમે દિવસેયેવ, તે પરિબ્બાજકે તહિં;

પત્તે દિસ્વાન પુચ્છિત્વા, અમચ્ચા તે વિજાનિય.

૧૭. તં પણ્ણુવાસુદેવં તે, લંકારજ્જેન અપ્પયું;

મહેસિયા અભાવાસો, ન તાવ અભિસેચયિ.

૧૮. અમિતોદનસક્કસ્સ, પણ્ડુસક્કો સુતો અહુ;

ઞત્વા વિનાસં સક્યાનં, સો આદાય સકં જનં.

૧૯. ગન્ત્વા અઞ્ઞાપદેસેન, ગઙ્ગાપારં તહિં પુરં;

માપેત્વા તત્થ કારેસિ, રજ્જં તસ્સ સુતે લભિ.

૨૦. ધીતા કણિટ્ઠિતા આસિ, ભદ્દકચ્ચાન નામિકા;

સબ્બલક્ખણસમ્પન્ના, સુરૂપા અભિપત્થિતા.

૨૧. તદત્થં સત્તરાજાનો, પણ્ણાકારે મહારહે;

પેસેસું રાજિનો તસ્સ, ભીતો રાજૂહિ સો પન.

૨૨. ઞત્વાન સોત્થિગમનં, અભિસેકફલમ્પિ ચ;

સહદ્વત્તિંસ ઇત્થીહિ, નાવં આરોપિયા’સુતં.

૨૩. ગઙ્ગાય ખિપિ ગણ્હાતુ, પહુ મે ધીતરં ઇતિ;

ગહેતું તે ન સક્ખિંસુ, નાવાસાપન સીઘગા.

૨૪. દુતિયે દિવસેયેવ, ગોણાગામક પટ્ટનં;

પત્તાપબ્બજિતા કારા, સબ્બા તા તત્થ ઓતરું.

૨૫. પુચ્છિત્વા નગરં એત્થ, તા કમેનોપયન્તિયો;

ઉપતિસ્સગામં સમ્પત્તા, દેવતા પરિપાલિતા.

૨૬. નેમિત્તકસ્સ વચનં, સુત્વા તત્થા’ગતા તુ તા;

દિસ્વા અમચ્ચો પુચ્છિત્વા, ઞત્વા રઞ્ઞો સમપ્પયિ.

૨૭. તં પણ્ડુવાસુદેવં તે, અમચ્ચા સુદ્ધબુદ્ધિનો;

રજ્જે સમભિસિઞ્ચિંસુ, પુણ્ણસબ્બમનોરથં.

૨૮. સુભદ્દકચ્ચાન મનોમરૂપિનિં;

મહેસીભાવે અભિસિઞ્ચિય’ત્તનો;

સહગતા તાય પદાસિ અત્તના;

સહાગતાનં વસિ ભૂમિપો સુખન્તી.

સુજનપ્પસાદ સંવેગત્થાય કતે મહાવંસે

પણ્ડુવાસુદેવાભિસેકો નામ

અટ્ઠમો પરિચ્છેદો.