નવમ પરિચ્છેદ

અભયાભિસેકો

૧. મહેસી જનયી પુત્તે, દસ એકઞ્ચ ધીતરં;

સબ્બજેટ્ઠો’ભયો નામ, ચિત્તાનામ કનિટ્ઠિકા.

૨. પસ્સિત્વા તં વિયાકંસુ, બ્રાહ્મણા મન્તપારગા;

‘‘રજ્જહેતુ સુતો અસ્સા, ઘાતયિસ્સતિ માતુલે’’.

૩. ઘાતેસ્સામિ કનિટ્ઠિન્તિ, નિચ્છિતે ભાતરા’ભયો;

વારેસિ કાલે વાસેસું, ગેહં તં એકથુણિકે.

૪. રઞ્ઞો ચ સિરિગબ્ભેન, તસ્સ દ્વારમકારયું;

અન્તો ઠપેસું એકઞ્ચ, દાસિં નરસતં બહિ.

૫. રૂપેનુ’મ્માદયી નરે, દિટ્ઠમત્તાવ સાયતો;

તતો ઉમ્માદચિત્તા’તિ, નામં સોપપદં લભિ.

૬. સુત્વાન લંકાગમનં, ભદ્દકચ્ચાનદેવિયા;

માતરા ચોદિતા પુત્તા, ઠપેત્વે’કઞ્ચ આગમું.

૭. દિસ્વાન તે પણ્ડુવાસુ-દેવં લઙ્કિન્દમાગતા;

દિસ્વાન તં કનિટ્ઠિઞ્ચ, રોદિત્વા સહ તાય ચ.

૮. રઞ્ઞા સુકતસક્કારા, રઞ્ઞો’નુઞ્ઞાય ચારિકં;

ચરિંસુ લંકાદીપમ્હિ, નિવસુઞ્ચ યથારુચિં.

૯. રામેન વુસિતઠાનં, રામગોણન્તિ વુચ્ચતિ;

ઉરુવેલા’નુરાધાનં, નિવાસા ચ તથા તથા.

૧૦. તથા વિજિતદીઘાયુ-રોહણાનં નિવાસકા;

વિજિતગામો દીઘાયુ-રોહણન્તિ ચ વુચ્ચતિ.

૧૧. કારેસિ અનુરાધો સો, વાપિં દક્ખિણતો તતો;

કારાપેત્વા રાજગેહં, તત્થ વાસમકપ્પયી.

૧૨. મહારાજા પણ્ડુવાસુ-દેવો જટ્ઠસુતં સકં;

અભયં ઉપરજ્જમ્હિ, કાલે સમભિસેચયિ.

૧૩. દીઘાયુસ્સ કુમારસ્સ, તનયો દીઘગામણિ;

સુત્વા ઉમ્માદચિત્તં તં, તસ્સં જાતકુતૂહલો.

૧૪. ગહેત્વા’પતિસ્સ ગામં, તં અપસ્સિ મનુજાધિપં;

અદા સહોપરાજેન, રાજુપટ્ઠાનમસ્સસો.

૧૫. ગવક્ખાભિમુખટ્ઠાને, તં ઉપેચ્ચ ઠિતં તુસા;

દિસ્વાન ગામિણિં ચિત્તા, રત્તચિત્તા’હ દાસિકં.

૧૬. ‘‘કો એસો’’તિ તતો સુત્વા,

માતુલસ્સ સુતોઇતિ;

દાસિં તત્થ નિયોજેસિ,

સદ્ધિંકત્વાન સો તતો.

૧૭. ગવક્ખમ્હિ ડસાપેત્વા, રત્તિં કક્કટયન્તકં;

આરુય્હ છિન્દયિત્વાન, કવાટં તેન પાવિસિ.

૧૮. તાય સદ્ધિં વસિત્વાન, પચ્ચૂસેયેવ નિક્ખમિ;

એવં નિચ્ચં વસી તત્થ, છિદ્દાભાવા અપાકટો.

૧૯. સા તેન અગ્ગહી ગબ્ભં, ગબ્ભે પરિણતે તતો;

માતુ આરોચયી દાસી, માતા પુચ્છિય ધીતરં.

૨૦. રઞ્ઞો આરોચયી રાજા, અમન્તેત્વા સુતે’બ્રહ્મા;

પોસિયોસો’પિ અમ્હેહિ, દેવ તસ્સેવ તં ઇતિ.

૨૧. પુત્તો ચે મારયિસ્સામ, ત’ન્તિ તસ્સ અદંસુ તં;

સા સૂતિકાલસમ્પત્તે, સૂતિ ગેહઞ્ચ પાવિસિં.

૨૨. સઙ્કિત્વા ગોપકં ચિત્તં, કાલવેલઞ્ચ દાસકં;

તસ્મિં કમ્મે નિસ્સાયા’તિ, ગામણિ પરિચારકે.

૨૩. તે પટિઞ્ઞં અદેન્તે તે, રાજપુત્તા અઘાતયું;

યક્ખા હુત્વાન રક્ખિંસુ, ઉભો ગબ્ભે કુમારકં.

૨૪. અઞ્ઞં ઉપવિજઞ્ઞં સા, સલ્લક્ખા પેસિ દાસિયા;

ચિત્તા સા જનયી પુત્તં, સા ઇત્થિ પન ધીતરં.

૨૫. ચિત્તં સહસ્સં દાપેત્વા, તસ્સા પુત્તં સકમ્પિ ચ;

આણાપેત્વા ધીતરં તં, નિપજ્જાપેસિ સન્તિકે.

૨૬. ધીતા લદ્ધા’તિ સુત્વાન, તુટ્ઠા રાજસુતા અહું;

માતા ચ માતુમાતા ચ, ઉભો પન કુમારકં.

૨૭. માતામહસ્સ નામઞ્ચ, જેટ્ઠસ્સ માતુલસ્સ ચ;

એકં કત્વા તમકરું, પણ્ડુકાભયનામકં.

૨૮. લંકા પાલો પણ્ડુવાસુ-દેવો રજ્જમકારયિ;

તિંસ વસ્સમ્હિ જાતમ્હિ, મતો સો પણ્ડુકાભયે.

૨૯. તસ્મિં મતસ્મિં મનુજાધિપસ્મિં,

સબ્બે સમાગમ્મ નરિન્દપુત્તા;

તસ્સાભયસ્સાભયદસ્સ ભાતુ,

રાજાભિસેકં અકરું ઉળારાતિ.

સુજનપ્પસાદ સંવેગત્થાય કતે મહાવંસે

અભયાભિસેકો નામ

નવમો પરિચ્છેદો.