દ્વિસટ્ઠિમપરિચ્છેદ

પરમણ્ડલાભિગમનો

૧. અત્તનાભિમતસ્સા’સુ, જાતદેસસ્સ પત્તિયા;

સમ્પુણ્ણમનસઙ્કપ્પો, દુસ્સઙ્કપવિવજ્જિતો.

૨. વજિરૂપમોરુપઞ્ઞા, બલેન ગુરુસન્તિકે;

લહું બહુઞ્ચ ગણ્હન્તો, સિપ્પજાતમનેક કં.

૩. જિનાગમેસુ નેકેસુ, કોટિલ્લા દીસુ નીતિસુ;

સદ્દસત્થે ચ કાવેય્યે, સનિઘણ્ડુક કેટુભે.

૪. નચ્ચગીતેસુ સત્થેસુ, હત્થિસિપ્પાદિકેસુ ચ;

ધનુ ખગ્ગાદિનેકેસુ, સત્થેસુ ચ વિસેસતો.

૫. પારપ્પત્તો વિનીતત્તો, પિતુ રઞ્ઞો સમાચરિ;

અધિપ્પાયાનુકુલં’વ, સદા ભત્તિપુરસ્સરો.

૬. તદા સદા દરાચાર-ગુણારાધિતમાનસો;

પિયેન વિય મિત્તેન, તેન સદ્ધિં મહીપતિ.

૭. ઉય્યાનજલકીળાદિ-સુખં નાનપ્પકારકં;

અનુભોત્વા સદેસસ્મિં, સઞ્ચરન્તો તહિં તહિં.

૮. એકદાસઙ્ખસેનાધિ-પતિના દળ્હભત્તિના;

સરટ્ઠસીમા રક્ખાય, યો જિતેન બલીયસા.

૯. અજ્ઝાવુત્થસ્સ ચ બલત્થ-લિનમસ્સ ચ સન્તિકં;

ગામસા’ગઞ્છિ સુત્વાન, તમત્થં ધજિનીપતિ.

૧૦. ગામં તં સાધુકં સજ્જુ, સજ્જાપેત્વા સપુત્તકં;

પચ્ચુગ્ગન્ત્વા મહીપાલં, પણમિત્વા ઠિતો તદા.

૧૧. પિતા પુત્તો ઉભો તસ્સ, સમ્ભાસિય પિયં વચો;

નેકધા’રાધિતા તેન, તં ગામં સમુપાગગું.

૧૨. તહિં કતિચિ ભૂપાલો, વાસરે વીતિનામિય;

સેનાપતિં સમાહૂય, ઇદં વચનં મબ્રવિ.

૧૩. પુત્તો મે દાનિવયસિ, ઠિતો’ પનયનારહે;

તસ્સોપનયનં કાતું, મહોપકરણં લહું.

૧૪. સજ્જેતબ્બન્તિ તં સુત્વા, સોપિ સેનાધિનાયકો;

સબ્બુપકરણં ખિપ્પં, મઙ્ગલત્થં સુસજ્જયિ.

૧૫. સુગન્ધ દીપપુપ્ફાદિ-વત્થૂહિ દિવસત્તયં;

પુબ્બકારં કરિત્વાન, મહન્તં રતનત્તયે.

૧૬. વેદિકાચારદક્ખેહિ, દ્વિજેહિ પુથુવીપતિ;

સમ્પભાવાનુ રૂપંવ, મઙ્ગલં તં સમાપિય.

૧૭. પરક્કમકુમારેન, તેન સદ્ધિં સમારભિ;

વસન્તકીળં મહતિં, સામચ્ચો કીળિતું તદા.

૧૮. રાજા કિત્તિ સિરીમેઘો-રોહણે વસતો તદા;

સિરીવલ્લભનામસ્સ, સભાતુ મરણમ્પિ ચ.

૧૯. માણભરણનામસ્સ, રજ્જલાભઞ્ચ દેવિયા;

મિત્તાય પટિલાભઞ્ચ, સિરીવલ્લભસૂનુ નો.

૨૦. રોહણાગતદૂતેહિ, સુણિત્વા સકભાતુનો;

કાલક્રિયાય સઞ્જાત-સોકવેગં સુદુસ્સહં.

૨૧. મિત્તાયતનયુપ્પત્તિ પવત્તિં સવણેન તં;

વિનેય્ય વિરતો તમ્હા, વસન્તસમયુસ્સવા.

૨૨. નિવત્તેત્વાન તત્થેવ, સેનાનિં સઙ્ખનામકં;

પુત્તેન સહ સો સઙ્ખ-ત્થલિ નામં પુરં ગમિ.

૨૩. પરક્કમકુમારેન, તેન સદ્ધિં તહિં સુખં;

વસતો તસ્સ ભૂપસ્સ, વસ્સમેકમતિક્કમિ.

૨૪. માણાભરણભૂપસ્સ, દેવી ચાપિ પભાવતી;

લભિત્થ દુતિયા કિત્તિ-સિરી મેઘવ્હયં સુતં.

૨૫. સુણિત્વા તઞ્ચ સો અમ્હં, વંસો જાતો મહા’’ઇતિ;

અહુ કિત્તિસિરીમેઘો, તદા અત્તમનો ભુસં.

૨૬. લંકાદીપોપભોગેક-હેતુના મહતા સતા;

અસાધારણભૂભેન, ચોદિતો પુઞ્ઞકમ્મુના.

૨૭. કુમારો સો’થ પિતરા, પિયમિત્તે વિયત્તનિ;

કરિયમાનં સસ્નેહં, મહન્તં ચો’પલાલનં.

૨૮. સચિવાનમનેકેસં, ભયભત્તી પુરસ્સરં;

ક્રિયમાનમુપટ્ઠાનં, ન મઞ્ઞન્તો તિણાયપિ.

૨૯. લંકાદીપમિમં સબ્બ મેકચ્છત્તો પસોભિતં;

ખિપ્પં કારેતુકામો સો, સયં ઇતિ વિચિન્તયિ.

૩૦. કેસ અક્ખક ગીવટ્ઠિ-દાઠા પત્તાન મેવ ચ;

પદચેત્ય મહાબોધિ-સાખાનઞ્ચાપિ સત્થુનો.

૩૧. ચતુરાસીતિસહસ્સાનં, ધમ્મક્ખન્ધાન મેવ ચ;

સમ્માસમ્બુદ્ધકપ્પાનં, આધારત્તા ચ નિચ્ચસો.

૩૨. આકરત્તા ચ નેકેસં, મણિમુત્તાદિવત્થૂનં;

સમ્મતોપિ વિસિટ્ઠોતિ, દીપોનાતિ મહા અયં.

૩૩. તયો મે પિતરો ભૂપા, માતુલોપિ ચ સબ્બથા;

એકચ્છત્તેન વત્તેતુ, મસમત્થા વિભજ્જિ’મં.

૩૪. ભુઞ્જન્તા એત્તકેનેવ, કતકિચ્ચા મયં ઇતિ;

મઞ્ઞન્તા વિગતચ્છન્દા’ભિસેકમ્હિ કુલોચિતે.

૩૫. રટ્ઠેસકે સકેયેવ, ઇસ્સેરં સમ્પવત્તયું;

કસિકમ્માદિકં ગામ-ભોજકા વિય નિસ્સિતા.

૩૬. તેસુ કિત્તિસિરિ મેઘં, પેત્તેય્યં મે ઠપેત્વ તે;

અગમંસુ યથાકમ્મં, સેસા ભૂપતયો તયો.

૩૭. મચ્ચાનં પરમં આયુ, વતે’દાનિ પરિત્તકં;

બાલાયુવાનો વુદ્ધા ચ, ઇમે સત્તા’નુપુબ્બસો.

૩૮. પાપુણિસ્સન્તિ મરણ-મીતિ’યં નિયમોપિ ચ;

ન હેવ અસ્મિં લોકસ્મિં, સંવિજ્જતિ કદાચિપિ.

૩૯. તસ્મા સરીરકે અસ્મિં, ભઙ્ગુરે સારવજ્જિતે;

હીળિતે સારદસ્સીહિ, અપેક્ખં હિત્વા સબ્બથા.

૪૦. પિહનિયે યસોદેહે, ચિરટ્ઠાયિમ્હિ સબ્બદા;

અમ્હાદિસેહિ કત્તબ્બો, રાજપુત્તેહિ આદરો.

૪૧. ઉમ્મગ્ગજાતકાદીસુ, ચારિત્તઞ્ચાપિ ભૂમિસુ;

વિહિતં બોધિસત્તેન, વીરભાવાદિનિસ્સિતં.

૪૨. રામાયણભારતાદિ-લોકિયાસુ કથાસુપિ;

રામસ્સ વિક્કમઞ્ચેવ, તસ્સ રાવણઘાતિનો.

૪૩. દુયોધનાદિરાજાનો, હન્ત્વાયુદ્ધે પવત્તિતં;

વિક્કમાતિ સયઞ્ચેવ, પઞ્ચન્નં પણ્ડુસૂનૂનં.

૪૪. ઇતિહાસકથાયઞ્ચ, દેવાસુરરણે પુરા;

દુસ્સન્તાદિમહીપેહિ, કતઞ્ચ ચરિતબ્ભૂતં.

૪૫. ઉમ્મૂલિતવતો તસ્સ, નન્દવંસનરિસ્સરે;

ચારક્કદ્વિજસેટ્ઠસ્સ, સુત્વા બુદ્ધિબલમ્પિ ચ.

૪૬. સબ્બા નેતાનિ લોકમ્હિ, યાવજ્જદિવસા ભુવિ;

તેસં અસન્નિધાનેપિ, સુપ્પસિદ્ધિં ગતાનિ હિ.

૪૭. સુલદ્ધં જીવિતં તેસં, અસાધારણમીદિસં;

ચરિતાતિસયં કત્તું, સમત્થા હોન્તિ યે ભુવિ.

૪૮. જાયિત્વા ખત્તવંસમ્હિ, ખત્તવીરવરોધિતં;

યદિહં ન કરિસ્સામિ, મોઘા મે જાતિ હેસ્સતિ.

૪૯. તેસમબ્ભધિકા કાલ-સમ્પદાયેવ કેવલં;

મયા તે અધિકા કિન્તુ, પઞ્ઞાદીહીતિ ચિન્તિય.

૫૦. પિતુરાજા ચ મે’દાનિ, પચ્છિમે વયસિટ્ઠિતો;

યદિદં પેત્તિકં રજ્જં, મમ હત્થગતબ્ભવે.

૫૧. રાજલક્ખિવ સો પેત-ચેતસો મે પમાદતો;

યથિચ્છિતઞ્ચે ન ભવે, મહતી જાનિ મે ભુસં.

૫૨. એત્થેવ નિવસન્તો’હં, ચરાપિય સકે વરે;

પરમણ્ડલવુત્તન્તં, જાનેય્યં યદિ તત્તનો.

૫૩. રન્ધં પચ્ચત્થિકાનન્તુ, પકાસેતું રથાતથં;

અધિપ્પાયાનુરૂપં મે, સમત્થા વા ન વાચરા.

૫૪. યે કેચિ’ધ જના સન્તિ, સબ્બે તે મમ સમ્મુખા;

બલીયત્તં’વ સત્તૂનં, કથયન્તિ અનેકસો.

૫૫. પચ્ચેકરટ્ઠસામીહિ, પિતુભૂપેહિ તિહિપિ;

એકીભૂય કરિત્વાન, સત્તક્ખત્તું મહાહવં.

૫૬. સાધેતું દુક્કરં રટ્ઠં, ભવતે કાકિના કથં;

સિસુના ગણ્હિતું સક્કા, ખુદ્દરજ્જો પભોગિના.

૫૭. સુકરં મૂલભૂતસ્સ, તસ્સ રજ્જસ્સ સાધનં;

ઇતિ દુચ્ચિન્તંતં તુય્હં, દૂરે તબ્બમિદં’’ઇતિ.

૫૮. કણ્ણે તત્થસલાકાયો, પવેસેન્તા’વ નેકસો;

મહન્તત્તં કથેન્તે’વં, બહુધા પરમણ્ડલે.

૫૯. અજાનનં યથાભૂતં, વદન્તાનં કુબુદ્ધિનં;

સબ્બમેતં વચો જાતુ, સદ્ધાતબ્બં સિયા ન હિ.

૬૦. લેસેનેકેન ગન્ત્વાન, ખિપ્પં’વ પરમણ્ડલં;

સરૂપં તત્થ ઉસ્સામિ, અહમેવેતિ ચિન્તયિ.

૬૧. યદિ મે પીતુભૂપાલો, વિઞ્ઞાયેતં વિતક્કિતં;

અભિજાતસ્સ પુત્તસ્સ, વંસજોતિકરસ્સ મે.

૬૨. ગતસ્સ સત્થુ વિસય-મનત્થોપિ સિયા ઇતિ;

અનુકમ્પાધિયા મય્હં, ગમનં વારયિસ્સતિ.

૬૩. મનોરથસ્સ સંસિદ્ધિ, સબ્બથા મેન હેસ્સતિ;

તસ્મા નિગુળરૂપેન, ગમનં ભદ્દકં ઇતિ.

૬૪. લદ્ધાન રત્તિયમ થેકદિનં ખણઞ્ઞૂ,

સો તાદિસં ખણમખીણતરોરૂપાયો;

જાનાતિ નો સકપિતાગમનં તથાતં,

ગેહા’ભિનિક્ખમિતથા ચતુરો કુમારો.

સુજનપ્પસાદસંવેગત્થાય કતે મહાવંસે

પરમણ્ડલાભિગમનો નામ

દ્વિસટ્ઠિમો પરિચ્છેદો.