તિસટ્ઠિમ પરિચ્છેદ

સેનાપતિવધો

૧. નિજાયુધદુતિયસ્સ, નિક્ખમન્તસ્સ તસ્સ હિ;

તં ખણં પુરતો કો’પિ, સઙ્ખસદ્દો સમુગ્ગતો.

૨. તતો નેકનિમિત્તઞ્ઞૂ, કુમારો તં સુણિ ત્વ સો;

નિપ્ફજ્જિસ્સતિ સઙ્કપ્પો, ખિપ્પં યેવેતિ મોદવા.

૩. તત્થ તત્થ નિયુત્તાનં, રક્ખકાનમજાનતં;

નિક્ખમિત્વા પુરાવીત-ભયો સીહપરક્કમો.

૪. વેગેન મગ્ગં ગન્ત્વાન, પઞ્ચગાવુતમત્તકં;

બદલત્થલગામસ્સ, પદેસેનાતિ દૂરકે.

૫. ગામ મેકમુપાગઞ્ચિ, પિલિં વત્થૂતિ સઞ્ઞિતં;

જનાનં સન્નિપાતાય, નિજાનં સો કતાવધિ.

૬. નિજાગમનતો પુબ્બં, પટિમગ્ગે નિસીદિતું;

પટિલદ્ધનિયોગાનં, યેચિ દેવાગતે તદા.

૭. તહિં ઠિતે સો પસ્સિત્વા, એત્તકા કિન્નુ આગતા;

ઇતિ પુચ્છિ કુમારોથ, તેપિ તં ઇદ મબ્રવું.

૮. લોકપ્પવત્તિં સકલં, જાનન્તેનાપિ સામિના;

કિમેવ મુચ્ચતે મચ્ચુ-ભયં કેસં ન વિજ્જતિ.

૯. બાલાતાનુગતો સામિ, ઠિતો વયસિ ઈદિસે;

અજ્જાપિ હિ મુખે તુય્હં, ખીરગન્ધો પવાયતિ.

૧૦. ન હેવત્થિ વિસું વિત્ત-જાતં સઙ્ગહિતં તવ;

તદઞ્ઞા ચોપકરણ-સામગ્ગી નેવ વિજ્જતે.

૧૧. ચિરમ્પરિચિતત્તેહિ, દળ્હં સારુળભત્તિહિ;

વિના’મ્હેહિ વિસું કેવા’નુગન્તારો જનાતુવં.

૧૨. કિઞ્ચાગતાનમમ્હાકં, પિતા તુય્હં નરિસ્સરો;

કારેસ્સતિ ઇદં નામ, સબ્બથા નેવ ઞાયતે.

૧૩. અમ્હાકમન્તરામગ્ગે, સઙ્ખો નામ ચમૂપતિ;

મહબ્બલો મહાવીરો, રજ્જસીમં તમાવસં.

૧૪. પચ્ચત્થિતે ઠપેત્વઞ્ઞે, એતે કતિપયા મયં;

અઞ્ઞમઞ્ઞમ્હિ નિયત-માસઙ્કી હદયા ભુસં.

૧૫. અરુણુગ્ગમવેલા ચ, સમાસન્નતરાધુના;

ઇતિ ભીતિં પકાસેસું, પચ્ચેકં હદયસ્સિતં.

૧૬. નિસમ્મ તેસં વચનં, વિધાય મધુરં સિતં;

વીતસઙ્કો કુમારો સો, મુખાને’સં વિલોકિય.

૧૭. ચરિત્વાપિ મયા સદ્ધિ-મેતે’હો કાલમેત્તકં;

ન જાનિંસુ મમં સબ્બે, યેસઞ્હિ ભયમિદિસં.

૧૮. ઇતિ વત્વા ભયં તેસં, વિનોદેતુ મુપટ્ઠિતં;

સીહનાદં તદા’કાસિ, મહન્તં સીહવિક્કમો.

૧૯. તિટ્ઠન્તુ માનુસા સબ્બે, મયિ હત્થગતાયુધે;

સક્કો દેવાનમિન્દોપિ, કુપિતો કિં કરિસ્સતિ.

૨૦. બાલોતિ મં ચિન્તય તં, જાતા વો કુમતીદિસી;

પરિક્ખીયતિ તે જાણા, નવયો’તિ ન કિં સુતં.

૨૧. અજ્જેવ કાતુમેકેન, કમ્મુના ચિન્તિતેન મે;

સદેસપર દેસટ્ઠા, ભયભત્તી યથામયિ.

૨૨. કરિસ્સન્તિ યથા વેદં, ભયં તુમ્હે જહિસ્સથ;

તથા રત્તિયમેતાય, વિભાતામય ખણેન મે.

૨૩. ઉન્નતે દસ્સયિસ્સામિ, બુદ્ધિ સાહસવિક્કમે;

અનુધાવતિ મં તાત, સેતેહિ યદિ વો ભયં.

૨૪. પુરતો હોથ તુમ્હેહિ, વત્વા તે ગહિતાયુધો;

સાહસેકરસો વીરો, તમ્હા નિક્ખમ્મ ગામતો.

૨૫. ઉદયા’ચલસીસટ્ઠં, જેતુમાદિચ્ચમણ્ડલં;

અપરં રવિ બિમ્બંવ, પચ્છિમા સા મુખોદિતં.

૨૬. તેજસા પસરન્તેન, જનાનં પવિકાસયં;

નેતમ્બુજવનં પાતો, બદલત્થલિમાગમિ.

૨૭. જઘસઙ્ખસ્સરેના’થ, સેના નાથો પબુજ્ઝિય;

સઞ્જાતસમ્ભમો ઞત્વા, રાજપુત્તમુપાગતં.

૨૮. સદ્ધિં બલેન મહતા, પધુગ્ગમ્મકતાદરો;

પણામમુચિતં કત્તુ-માનતો વસુધાતલે.

૨૯. અમ્હાકમેસજીવન્તો, કિં નામત્થં કરિસ્સતિ;

મારેતબ્બો’ધુનેવેતિ, પસ્સન્તે સમુખં ભટે.

૩૦. નેવા’દિટ્ઠાપરાધસ્સ, મરણં પુરિસો ચિતં;

વધો વિરોધે સક્કા’તિ, ઇઙ્ગિતેન નિવારિય.

૩૧. સેનાપતિસ્સ સો હત્થં, ગહેત્વા સીહસન્નિભો;

ભાસન્તો મધુરં વાચં, તસ્સેવા’ગઞ્છિ મન્દિરં.

૩૨. અથસ્સ ગમનં રઞ્ઞો, ભવિતબ્બમજાનતા;

સરૂપં યાવ જાનામિ, તાવસ્સેતે સહાગતા.

૩૩. યથા ન સહિતા હોન્તિ, ઠપેતબ્બા વિસું વિસું;

કુમારો’વ મમાગારે, વસતૂ’તિ વિચિન્તિય.

૩૪. તથા સેનાપતિ કત્વા, વઞ્ચેતું તં મહામતિં;

દસ્સેત્વા’તિ થીસક્કારં, રઞ્ઞો દૂતે સ પેસયિ.

૩૫. કુમારો’થ વિદિત્વાન, તેન તં વઞ્ચનં કતં;

કત્તબ્બમેત્થા’કત્વાહ, મુદાસીનો ભવે યદિ.

૩૬. ઇચ્છિતત્થસ્સ નિપ્ફત્તિ, ન મે જાતુ ભવિસ્સતિ;

અયં તાવા’ધુનાવસ્સં, મારેતબ્બોતિ ચિન્તિય.

૩૭. સહાગતં પયોજેત્વા, ઘાતાપયિ ચમૂપતિં;

હતો સેનાધિનાથો’તિ, મહન્તં ખુભિતં અહુ.

૩૮. સેનાનાથભટો એકો, સુત્વા સેનાપતિં હતં;

મારણં સામિનો મય્હં, કિં નિમિત્તમીતિ બ્રવિ.

૩૯. નેત્તિં સપાણી સહસા, કુમારં ઠિતમેકકં;

અભિદાવિ સસામિસ્સ, પરિચત્તત્તજીવિનો.

૪૦. કુમારસ્સ મુખં દિસ્વા, વેધમાનો ભયેન સો;

પુરે ઠાતુમસક્કોન્તો, પાદમૂલે તતો સયિ.

૪૧. ગણ્હથે’તન્તિવચના-કુમારસ્સ પુરેતરં;

તસ્સેવેકો સહચરો, ભટમેતં વિઘાતયિ.

૪૨. નિયોગં મે વિના તેન, કતં કમ્મં ન યુજ્જતિ;

ઇતિ દણ્ડનમેતસ્સ, કારાપેસિયથોચિતં.

૪૩. અથ તં કાલયમ્ભૂત-સઙ્ખોભમતિભિંસનં;

ભમુક્ખિપનમત્તેન, રાજપુત્તો સમં નયિ.

૪૪. વીરો યસોધરધનો ધિતિમા કુમારો;

વીરોપકારચતુરો વરકિત્તિસારો;

સેનિન્દસઞ્ચિતમનપ્પધનં ભટાનં;

સબ્બં વિસજ્જયિ યથારુચિયા ગહેતું.

સુજનપ્પસાદસંવેગત્થાય કતે મહાવંસે

સેનાપતિવધો નામ

તિસટ્ઠિમો પરિચ્છેદો.