એકસટ્ઠિમ પરિચ્છેદ

સઙ્ખત્થલિપુરાભિગમનો

૧. સુત્વા દ્વે ભાતરો અઞ્ઞે, જેટ્ઠસ્સો પરતિંસદા;

ખિપ્પં સરટ્ઠા આગમ્મ, કારેસું અન્તિમં વિધિં.

૨. અથ કિત્તિસિરિમેઘો, રટ્ઠં જેટ્ઠસ્સ ભાતુનો;

અત્તાધીનં કરિત્વાન, આમન્તિય કણિટ્ઠકં.

૩. દત્વા રટ્ઠદ્વયં અઞ્ઞં, વત્થું તત્થેવ આદિસિ;

સો’પિ જેટ્ઠસ્સ ભાતુસ્સ, વચનં સમ્પટિચ્છિય.

૪. સમાદાય કુમારઞ્ચ, દેવિઞ્ચ રતનાવલિં;

ધીતરો દ્વે ચ ગન્તાન, મહા નામહુલં પુરં.

૫. સમગ્ગા નિવસં તત્થ, કુમારસ્સ સિખામહં;

કારેત્વા પરિહારેન, વડ્ઢેસિ મહતા સદા.

૬. તતો સો દેવિયા જેટ્ઠં-ધીતરં મિત્તનામિકં;

દાતુકામો સપુત્તસ્સ, સહામચ્ચેહિ મન્તયિ.

૭. કાલિઙ્ગન્વયસમ્ભૂતા, પાયેનખલુ ભૂમિપા;

સામિભાવં ગતા અસ્મિં, લઙ્કાદીપમ્હી ભૂયસો.

૮. કાલિઙ્ગગોત્ત સમ્ભૂત, ગજબાહુસ્સ દાતવે;

ગૂળરૂપેન દેવી’યં, યદિ પેસેય્ય ધીતરં.

૯. ભિય્યો વિવાહસમ્બદ્ધો, બલવા સો ભવિસ્સતિ;

મય્હં એસો નિરાલમ્બો, પુત્તો હેહીતિ સબ્બથા.

૧૦. તસ્મા મે સુનૂનો એસા, દાતું યુત્તા કુમારિકા;

એવં સતિ વતમ્હાકં, વડ્ઢિયે’વ સિયા ‘‘ઇતિ’’.

૧૧. દેવીપિ સુત્વા તં સબ્બ-માદિચ્ચન્વય મણ્ડના;

સબ્બથા તમનિચ્છન્તિ, ઇદમાહ મહીપતિં.

૧૨. ઘાતેત્વા સકલે યક્ખે, કુમારો વિજયવ્હયો;

લંકાદીપમિમં’કાસિ, મનુસ્સાવાસકં સદા.

૧૩. તતો પભુતિ અમ્હાકં, ઘટેસું વિજયન્વયં;

કાલિઙ્ગવંસજેહેવ, સમ્બન્ધં કત્વ પુબ્બકં.

૧૪. અઞ્ઞભૂપાલ સમ્બન્ધો, સુતપુબ્બો પિનત્થિનો;

સોમવંસ સમુમ્ભૂતે, ઠપેત્વા ધરણિસ્સરે.

૧૫. તુય્હં જાતોતિ અમ્હાકં, સમ્બન્ધો સો કથં સિયા;

અરિયન્વય સમ્ભૂત, કુમારેન સહામુના.

૧૬. એવં સો દેવિયા તાય, નેકસો વારયન્તિયા;

પસય્હસક પુત્થસ્સ, તં કુમારિમદાપયિ.

૧૭. સો અનેકગુણોદાર- ભરિયાનુગતો તતો;

રઞ્જયન્તો જને સબ્બે, જનકસન્તિકે વસિ.

૧૮. એકવીસતિં વસ્સાનિ, રજ્જં વિક્કમ બાહુસો;

અનુભોત્વા યથાકમ્મં, કાયભેદા ગતો પરં.

૧૯. તતો ગજભુજો ઠિતં, સમ્પન્નબલવાહનં;

રજ્જં હત્થગતં કત્વા, પુલત્તિનગરે વસી.

૨૦. તતો કિત્તિસિરીમેઘ, સિરીવલ્લભ ભૂમિપા;

વુત્તન્ત મેતં વિઞ્ઞાય, એવં સમનુચિન્તયું.

૨૧. તસ્સ વિક્કમ બાહુસ્સ, વુદ્ધભાવેન નેકધા;

મૂલરજ્જાધિપચ્ચં તં, અમ્મં નિન્દાકરં ન હિ.

૨૨. તદત્થજસ્સ બાલસ્સ, મૂલરજ્જં પસાસનો;

ઉપેક્ખણં પનમ્હાકં, નેવાનુચ્છવિકં વત.

૨૩. તે સોયાવ સરજ્જમ્હિ, બદ્ધમૂલો ભવિસ્સતિ;

પસય્હ તાવ તં રજ્જં, વટ્ટતિ ગણ્હિતું ઇતિ.

૨૪. વેલક્કાર બલં સબ્બં, ભિન્દિંસુ ધન દાનતો;

ઠપેત્વા સેવકે કેચિ, તસ્સબ્ભન્તરિકે તદા.

૨૫. ગજબાહુ મહીપાલે, વિરત્તા રટ્ઠવાસિનો;

ઉભિન્નં રાજૂનં દૂતે, પેસયું નેકસો તતો.

૨૬. રજ્જં સાધેત્વા દસ્સામ, એકીભૂતા મયં પન;

ઉપત્થમ્ભકભાવો’વ, કાતબ્બો કેવલં ઇતિ.

૨૭. તતો દ્વે ભાતુકા સેનં, સકં સન્નય્હ વેગસા;

ઉભતો મુખતો તસ્સ, રટ્ઠમજ્ઝમુપાગમું.

૨૮. પહિણિંસુ ચ તે દૂતે, તતો ગજબોહુવ્હયો;

ભૂમિપાલો નિજામચ્ચે, સન્નિપાતિય મન્તયિ.

૨૯. વેળક્કારબલં સબ્બ-મુજુપચ્ચત્તિકં અહુ;

રાજાનો દ્વે ચ નો રટ્ઠં, સઙ્ગામત્થમુપાગતા.

૩૦. પઠમં તેસુ પક્ખસ્સ, એકસ્સ બલિનો ભુસં;

મુખભઙ્ગે કતે ખિપ્પં, તતો અઞ્ઞે સુસાધિયા.

૩૧. ઇતિ નિચ્છિય સેનઙ્ગં, સબ્બમાદાય અત્તનો;

સિરિવલ્લભરાજાભિ-મુખં યુદ્ધા’યુપાગમિ.

૩૨. સિરિવલ્લભરાજાપિ, સઙ્ગામ મહિભિંસનં;

પાતો પટ્ઠાય સાયન્હ-કાલં યાવ પવત્તયં.

૩૩. અસક્કુણન્તો’ભિભવં, વિધાતું તસ્સ કઞ્ચિપિ;

તતોવ સો નિવત્તિત્વા, સકં રટ્ઠં ગતો લહું.

૩૪. ગજબાહુસ્સગોકણ્ણ-સચિવેન પરાજિતો;

અગા રટ્ઠં સકં કિત્તિ-સિરિમેઘો’પિ ભૂપતિ.

૩૫. ગજબાહુનરિન્દોપિ, સઙ્ગામે તમ્હિ કિઞ્ચિપિ;

પરિહાનિમસમ્પત્તો, પુના’ગમ્મ પુરન્તિકં.

૩૬. બલનાથે વિનિગ્ગય્હ, સાપરાધે બહૂ બલી;

રટ્ઠં વૂપસમેત્વાન, પાવેક્ખિ નગરં સકં.

૩૭. રટ્ઠે સકે સકેયેવ, તતો પભૂતિ ભૂમિપા;

અઞ્ઞોઞ્ઞમિત્તે સમ્બન્ધં, વિધાય વિહરિંસુ તે.

૩૮. તતો પરક્કમભુજો, ધરણી પાલનન્દનો;

મેધાવીનેકસિપ્પેસુ, સિક્ખમાનો સુસાધુકં.

૩૯. વિચારક્ખમપઞ્ઞત્તા, કિચ્ચા કિચ્ચેસુ નેકસો;

અચ્ચુળારાસયત્તા ચ, મહાભાગત્તનેન ચ.

૪૦. અત્તનો માતુભગિની, સહવાસ સુખમ્હિ ચ;

અલગ્ગમાનસોનેક, બલાકીળારસેસુ ચ.

૪૧. સૂરભાવાદિસંયુત્તા, રાજપુત્તા તુ માદિસા;

પચ્ચન્તે ઈદિસે દેસે, કથં નામ વસિસ્સરે.

૪૨. જાતદેસઞ્ચ મે દાનિ, યુવરાજપભોગિયં;

ગમિસ્સામીતિ નિગ્ગઞ્છિ, તમ્હા પરિજનત્થિતો.

૪૩. કમેન સન્તિકં સઙ્ખ-નાયકત્થલિસઞ્ઞિનો;

ગામસ્સાગા અહિં કિત્તિ-સિરિમેઘો નિસમ્મ તં.

૪૪. અભાવા રજ્જ દાયાદ-સમાનસ્સ’ત્રજસ્સ મે;

એકાકી’હન્તિ યો ચિત્ત-સન્તાપો સન્તતં ગતો.

૪૫. જેટ્ઠંવ ભાતરં મય્હં, તં દેહપટિબિમ્બકં;

દટ્ઠું મે સત્તતં પુઞ્ઞં, મહન્તમુદિતંતિચ.

૪૬. પામુજ્જવેગવસગો, નગરં તં મનોહરં;

અલઙ્કારા પયિત્વાન, તોરણાદીહિ નેકધા.

૪૭. ગન્ત્વા પટિપથંયેવ, બલોઘપરિવારિતો;

નરિન્દો તિથિનક્ખત્ત-વિસેસે સુભસમ્મતે.

૪૮. અનઞ્ઞસાધારણતં, સમ્પત્તેહિ ગુણેહિ ચ;

લક્ખણેહિ ચ સબ્બેહિ, કલ્યાણેયિ સુસંયુતં.

૪૯. દિસ્વા કુમારં સન્તુટ્ઠો, આલિઙ્ગિત્વાન પેમતો;

ઉરે કત્વાન ચુમ્બિત્વા, મત્થકમ્હિ પુનપ્પુનં.

૫૦. જનસ્સ બલતો તસ્સ, પસ્સતો લોચનેહિ સો;

સન્તોસ અસ્સુધારાયો, વસ્સાપેન્તો નિરન્તરં.

૫૧. મનુઞ્ઞમેક મારુય્હ, વાહનં સહ સૂનુના;

ભેરિનિ દેન પૂરેન્તો, દિસા દસ સમન્તતો.

૫૨. પવિસિત્વા પુરં તત્થ, અલઙ્કારે મનોરમે;

દસ્સયન્તો સપુત્તસ્સ, પાવિસિ રાજમન્દિરં.

૫૩. લદ્ધા તતો કઞ્ચુકી-સુપકાર,

વગાદિનેકે પરિચારકે સો;

નાનાગુણા રાધિતમાનસસ્સ,

વસીસકાસે પિતુનો સુખેન.

સુજનપ્પસાદસંવેગત્થાય કતે મહાવંસે

સઙ્ખત્થલિપુરાભિગમનો નામ

એકસટ્ઠિમો પરિચ્છેદો.