સટ્ઠિમ પરિચ્છેદ

કુમારોદયો

૧. રોહણે નિવસિત્થા’વ, જયબાહુમહીપતિ;

મિત્તાવ્હા રાજિની ચેવ, તદા કાલમકંસુ તે.

૨. સિરીવલ્લભજાયા’થ, જનેસિ સુગલા દુવે;

માણભરણકં પુત્તં, પુત્તિં લીલાવતિમ્પિ ચ.

૩. માણાભરણભૂપાલ-દેવી’પિ રતનાવલી;

મિત્તં પભાવતિઞ્ચાપિ, અલભી ધીતરો દુવે.

૪. પસ્સન્તસ્સ ઉભો તાયો, ધીતરો વીરબાહુનો;

તદા મહાદિપાદસ્સ, એવં આસિ વિતક્કિતં.

૫. લોકાભિસમ્મતે સબ્બ-ભૂપાલન્વયમુદ્ધનિ;

વિસુદ્ધે સોમવંસમ્હિ, અભિજાતા મયં પન.

૬. પિહનીયતરાકારા, સબ્બસત્તિસમુન્નતા;

નાનાવિજ્જાસુ નિપુણા, હત્થિઅસ્સાદિસુક્ખમા.

૭. તથા પેકાકિના વે’તે, તયો વિક્કમબાહુના;

પરાજયં પરિભવં, પાપિતા બહુસો રણે.

૮. સૂનુનો સુસમત્થસ્સ, વિસોધેતુ મિમં મલં;

ન દિસ્સતે પાતુભાવો, અહો નો અપ્પપુઞ્ઞતા.

૯. જનવાદકિલિટ્ઠેન, રાજત્તેનાપિ કિં મમ;

ઇદાનિ વિસયાસઙ્ગં, હિત્વા કલ્યાણકમ્મસુ.

૧૦. અપ્પમત્તસ્સ સતતં, નેતબ્બા વાસરા’ઇતિ;

નિય્યાતેત્વા અમચ્ચાનં, સબ્બં રજ્જવિચારણં.

૧૧. તહિં સત્ત’ટ્ઠમાસઞ્હિ, વસં રત્તિયમેકદા;

દેવરાજઘરેસેય્યં, કપ્પેસિ સીલસંયતો.

૧૨. તતો પચ્ચૂસકાલમ્હિ, દેવપુત્તં મહિદ્ધિકં;

વિચિત્તવત્થાભરણં, ગન્ધમાલાવિભૂસિતં.

૧૩. ઉળારતરરૂપેન, દેહોભાસેન અત્તનો;

ઓભાસેન્તં અસેસા’સા, સૂરિયઞ્ચ ન ભુગ્ગતં.

૧૪. વદન્તં સુપિને એવં, અદક્ખિ દરણીપતિ;

પસીદસ્સુ મહાભાગ, પિતોભવ મહિપતિ.

૧૫. ધઞ્ઞલક્ખણસમ્પન્નો, ઇચ્છિતત્થસ્સસાધકો;

વિનીતો લોકકુહર-બ્યાપિતેજો પરક્કમો.

૧૬. આણબલયસોકિત્તિ-ભાસુરો સગ્ગુણાકરો;

લોકસાસનસંવુદ્ધિ-કરો પુત્તવરો તવ.

૧૭. લબ્ભીસ્સતે મહારાજ, ન ચિરસ્સેવ સમ્પતિ;

પુત્તદારાધિવુત્થં તં, પુરં ખિપ્પં પયાહીતિ.

૧૮. પબુજ્ઝિત્વાન સઞ્જાત-પીતિવેગોથ રત્તિયા;

વિભાતાય તતોપોઙ્ખ-ગામં ગઞ્છિનરુત્તમો.

૧૯. યથા દિટ્ઠપ્પકારન્તં, કથેસિ સુપિનં સુભં;

મહેસી પમુખાનં સો, અમચ્ચાનં મહીપતિ.

૨૦. સદ્ધિં મહેસિયા તત્થ, પત્થેન્તો પુત્તમુત્તમં;

ચિન્તોન્તો દાનસીલાદિં, સુભં નાનપ્પકારકં.

૨૧. અથેકદિવસંકાલે, પચ્ચૂસે સુપિને પન;

સબ્બલક્ખણસમ્પન્નં, સબ્બસેતં મનોહરં.

૨૨. દન્તીપોતવરં દન્તં, કણ્ણે ગણિયપેમતો;

પવિસન્તમિવત્તાનં, સેય્યાગબ્ભં મહેસિયા.

૨૩. સમ્પસ્સિય પબુજ્ઝિત્વા, ઉટ્ઠાય સયનાવરા;

સઞ્જાતપીતિપામોજ્જ-વેગપીણિતમાનસો.

૨૪. તાયં વેલાયમેદાસુ-સેય્યાગબ્ભં મહેસિયા;

પવિસ્સસુપિનં તસ્સા, યથાદિટ્ઠં પકાસયી.

૨૫. અહમ્પિ તાદિસં હત્થિ-પોતકં સયનં મમ;

પદક્ખિણં કરિત્વાન, ઠિતં સોણ્ડે સમાદિય.

૨૬. આકડ્ઢિત્વાન સયનં, સમારોપિય પેમતો;

આલિઙ્ગિં સુપિનમ્હીતિ, દેવી ચાપિ તમબ્રવી.

૨૭. ઉભો તે અઞ્ઞમઞ્ઞસ્સ, દિટ્ઠમેવં પકાસિય;

ઉટ્ઠાપેસું પહટ્ઠાવ, વીતનિદ્દારુણં તદા.

૨૮. તતો પાતો ઉપટ્ઠાતુ, મુપયાતં પુરોહિતં;

નેમિત્તકે ચ પુચ્છિંસુ, સુનિત્વા તે પમોદિતા.

૨૯. ન ચિરસ્સેવ પુત્તસ્સ, ધઞ્ઞલક્ખણસાલિનો;

ઉપ્પત્તિયા અવસ્સં’વ, ભવંતબ્બન્તિ કિત્તયું.

૩૦. તં સુણિત્વા અમચ્ચા ચ, તથા નગરવાસિનો;

અવિન્દિંસુ જનિન્દો ચ, સબ્બેપીતિ મહુસ્સવં.

૩૧. તતો પટ્ઠાય સોત્થાનં, પત્થયં પત્થિવોભુસં;

ભિક્ખુસઙ્ઘેન બહુસો, ભણાપેસિ પરિત્તકં.

૩૨. મણિમુત્તાદિકં ચિત્તં, મહગ્ઘમનુવાસરં;

પરિચ્ચજિ દાનમુખે, યાચકાનમનેકસો.

૩૩. પુરોહિતાદિવિપ્પેહિ, વેદવેદઙ્ગવિઞ્ઞૂહિ;

વત્તાપેસિ ચ હોમાદિ-વિધાનં સોત્થિ સમ્મતં.

૩૪. સુવિનટ્ઠે વિહારે ચ, ધાતુગબ્ભે ચ વાપિયો;

જિણ્ણા ચ પટિસઙ્ખત્તું, યોજયી રાજકપ્પિકે.

૩૫. દિનં નયન્તે કલ્યાણ-કમ્મેને’વં નરિસ્સરે;

ન ચિરં સણ્ઠહિ ગબ્ભ-વરો કુચ્છિમ્હિ દેવિયા.

૩૬. તતોવગમ્મ તં હટ્ઠ-પહટ્ઠો સો નરિસ્સરો;

મહન્તં દેવિયા ગબ્ભ-પરિહારમદાપયિ.

૩૭. પરિપક્કગબ્ભા દેવી, કમેન જનયીસુકં;

સમયે ભદ્દનક્ખત્ત-મુહુત્તેનભિલક્ખિતે.

૩૮. સુપ્પસન્ના અસેસા ચ, દિસાયો તંખણે અહુ;

સમીરણે ચ વાસિંસુ, સુગન્ધિમુદુસીતલા.

૩૯. દન્તીનં કોઞ્ચનાદેન, હયાનં હેસિતેન ચ;

રાજઙ્ગણં તદાજાતં, મહાકોલાહલા કૂલં.

૪૦. અચ્છેરાતિસયે એવં, પાતુભૂતે અનેકધા;

દિસ્વા તં વિમ્હયપ્પત્તો, માણભરણભૂપતિ.

૪૧. સુત્વા નિજસ્સ પુત્તસ્સ, તદા સઞ્જાતસાસનં;

અમતેનાભિસિત્તોવ, પીતિપુણ્ણમનોરથો.

૪૨. મોચાપેત્વા તદા કારા-ઘરે બદ્ધે બહૂજને;

દાનં ઉળારં સમણ-બ્રાહ્મણાનં પદાપયિ.

૪૩. અમચ્ચપમુખા ચાપિ, જનાપુરનિવાસિનો;

કદલીતોરણાદીહિ, રાજધાની મનેકધા.

૪૪. અલઙ્કરિત્વા સકલં, સુમણ્ડિતપસાધિતા;

છણં મહન્તં વત્તેસું, કતિપાહં મનોરમં.

૪૫. વેદે વુત્તવિધાનેન, જાતકમ્માદિકં વિધિં;

સબ્બં સમાપયિત્વાન, કુમારસ્સા’વનીપતિ.

૪૬. પુરોહિતાદયો વિપ્પે, તતો લક્ખણપાઠકે;

આણાપેત્વાન સક્કાર-સમ્માનવિધિપુબ્બકં.

૪૭. નિયોજેસિ કુમારસ્સ, લક્ખણાનં પટિગ્ગહે;

સાધકં સકલં તસ્સ, યત્થપાદાદિલક્ખણં.

૪૮. ઉપધારિય મહામચ્ચ-ગણમજ્ઝગતસ્સ તે;

રાજિનો દેવિયા ચાપિ, પકાસેસું પમોદિતા.

૪૯. લઙ્કાદીપં ઠપેત્વાન, જમ્બુદીપતલમ્પિ ચ;

એકચ્છત્તઙ્કિતં કત્વા-નુભોત્તું નિપુણો ઇતિ.

૫૦. તે સન્તપ્પિય ભોગેહિ, ભિય્યો પુચ્છિત્થ સાદરં;

સન્દિસ્સમાનં યંકિઞ્ચિ, અરિટ્ઠં અત્થિ નત્થી’તિ.

૫૧. દીઘાયુકો કુમારો’યં, કિઞ્ચિ પઞ્ઞાયતે વત;

જનકારિટ્ઠયોગો’તિ, તે મહીપતિનો’બ્રવું.

૫૨. તસ્સારિજનસમ્મદ્દિ-પતાપભુજયો ગતો;

સો પરક્કમબાહૂ’તિ, અન્વત્થનામમગ્ગહી.

૫૩. કણ્ણવે ધમહઞ્ચેવ, અન્નુપાસનમઙ્ગલં;

કારાપિય વિધાનઞ્ઞૂ, યથાવિધિમસેસતો.

૫૪. રઞ્ઞો વિક્કમબાહુસ્સ, સપુત્તુપ્પત્તિસાસનં;

વત્તું સદૂતે પેસેસિ, પુલત્થિનગરં તદા.

૫૫. તેહિસો ભાગિનેય્યસ્સ, મહાભાગત્તનમ્પિ ચ;

જનકારિટ્ઠયોગઞ્ચ, સુત્વા વિક્કમબાહુસો.

૫૬. ધઞ્ઞં વિજયરાજાદિ-રાજમાલાય નાયકં;

મણિંવ ભાસુરં મય્હં, ભાગિનેય્યં જનેસિસો.

૫૭. હાનિ યાકાચિસતતં, યથા તસ્સ ન હેસ્સતિ;

તથા મમન્તિકેયેવ, કુમારો એત્થ વડ્ઢતં.

૫૮. અલદ્ધં લભિતું લાભં, લદ્ધઞ્ચ પરિરક્ખિતું;

સબ્બથા ન સમત્થોયં, પુત્તો ગજબાહુ મમ.

૫૯. સૂરભાવાદિયુત્તો’પિ, મહિન્દવ્હપરોસુતો;

નિહીનો માતુગોત્તેન, ન રજ્જસ્સ રહો મમ.

૬૦. ઠિતસ્સ વિક્કજાતેન, નેકસો સઞ્ચિતેન મે;

રજ્જસ્સ ભાગિનેય્યો’વ, કામં ભાગી ભવિસ્સતિ.

૬૧. ઇતિપેસેસિ દૂતે સો, આનેતું તં કુમારકં;

કુમારા ભરણં દત્વા, સેસં સારઞ્ચુપાયનં.

૬૨. સબ્બં દૂતમુખા સુત્વા, વીરબાહુ મહીપતિ;

તસ્સેતં વચનં યુત્તં, વુત્તં મેહિત બુદ્ધિયા.

૬૩. તથાપિ ચ નિજારિટ્ઠ-પટિકારત્થમીદિસં;

ઓરસં પુત્તરતનં, પેસેતું ના’નુરૂપકં.

૬૪. કિઞ્ચ તત્થ કુમારમ્હિ, નીતે વિક્કમ બાહુનો;

પક્ખો લદ્ધમહાવાહ-બલો વિય હુતાસનો.

૬૫. અચ્ચુન્નતેન મહતા, તેજસા સઞ્જલિસ્સતિ;

હાનિરેવ વતમ્હાકં, મહતી હેસ્સતે ભુસં.

૬૬. ઇતિ હત્થે ગતાનં સો, દૂતાનં થનયં સકં;

અપેસેત્વા વિસજ્જેસિ, પસાદિય મનેન સો.

૬૭. સપુત્તદારેહિ સમગ્ગવાસં,

નરાદિનાથો નિવસં તહિંસો;

તિબ્બેન ફુટ્ઠો મહતાગદેન,

રજ્જેન સદ્ધિં વિજહિત્થ દેસં.

સુજનપ્પસાદસંવે ગત્થાય કતે મહાવંસે

કુમારોદયો નામ

સટ્ઠિમો પરિચ્છેદો.