અટ્ઠપઞ્ઞાસતિમ પરિચ્છેદ

લોકસાસન સંગહકરણો

૧. વિચિનિત્વા કુલીને સો, જને સબ્બે સમાદિય;

સકારક્ખાય યોજેસિ, યથાચારં મહીપતિ.

૨. ઉચ્ચં પુલત્થિનગરે, પાકારં કારયી થિરં;

નેકગોપુરસંયુત્તં, યુધાકમ્મસુરઞ્જિતં.

૩. સમન્તાયતવિત્થિણ્ણ-ગમ્ભીરપરિખાયુતં;

ઉચ્ચપત્થણ્ડિલોપેતં, દુપ્પધંસમરાતિહિ.

૪. ઉપસમ્પદકમ્મસ્સ, ગણપૂરકભિક્ખૂનં;

અપ્પહોનેકભાવેન, સાસનઠિતિમાનસો.

૫. અનુરુદ્ધનરિન્દસ્સ, સહાયસ્સાથ સન્તિકં;

રામઞ્ઞવિસયં દૂતે, પેસેત્વા સહપાભતે.

૬. તતો આણાપયિત્વાન, પિટકત્તયપારગે;

સો સીલાદિગુણાવાસે, ભિક્ખવો થેરસમ્મતે.

૭. તે ઉળારાહિ પૂજાહિ, પૂજયિત્વા નરિસ્સરો;

પબ્બજ્જા ઉપસમ્પત્તિ, કારયિત્વા અનેકસો.

૮. પિટકત્તયઞ્ચ બહુસો, કથાપેત્વા સવણ્ણનં;

લઙ્કાયો’સક્કમાનં સો, જોતયી જિનસાસનં.

૯. પુતત્થિનગરસ્સન્તો, પદેસસ્મિં તહિં તહિં;

વિહારે કારયિત્વાન, બહુકે સુમનોહરે.

૧૦. ભિક્ખવો તત્થ વાસેત્વા, નિકાયત્તયવાસિનો;

પચ્ચયેહિ ઉળારેહિ, સન્તપ્પેસિ ચતૂહિપિ.

૧૧. ફલિકત્થમ્ભકચારુ-પાકારપરિખાયુતં;

પઞ્ચભૂમકપાસાદ-પવરે નો’પસોભિતં.

૧૨. સમસન્તા વાસપન્તીહિ, સુભાહિ સુવિરાજિતં;

નિરકિણ્ણમસમ્બાધ વરભાસુર ગોપુરં.

૧૩. વિહારં કારયિત્વાન, વત્થુત્તયપરાયનો;

નિકાયત્તયવાસિસ્સ, ભિક્ખુસઙ્ઘસ્સ’દાસિસો.

૧૪. સઙ્ઘસ્સ પાકવટ્ટત્થં, રટ્ઠં દત્વા’ળિસારકં;

સકલં સન્નિવાસીહિ, નેત્તિકેહિ સહેવ સો.

૧૫. નેકસતાનિભિક્ખૂનં, વાસયિત્વાન તત્થ સો;

સતતં સમ્પવત્તેસિ, ઉળારં ચતુપચ્ચયં.

૧૬. દાટ્ઠાધાતુઘરંચારુ, કારયિત્વા મહારહં;

દાઠાધાતુસ્સ નિચ્ચં સો, મહામહમકારયિ.

૧૭. ગણસઙ્ગણિકા’પેતો, પોત્થકં ધમ્મસઙ્ગણિં;

પરિવત્તેસિ સોપાતો, સુન્દરે ધમ્મમન્દિરે.

૧૮. નચ્ચાદિગન્ધમાલાદિ-નેકપૂજમ્પવત્તિય;

સીરેન સદ્ધાસમ્બન્ધો, સમ્બુદ્ધમભિવન્દતિ.

૧૯. જમ્બુદીપાગતે ચાગ, સૂરો સો ભુવિરિસૂરયો;

તપ્પેસિ ધનદાનેન, દાનિયેનેક સો વિભૂ.

૨૦. સદ્ધમ્મકથિકાનં સો, પૂજા કત્વાન નેકસો;

દેસાપેસિચ સદ્ધમ્મં, સદાધમ્મગુણે રતો.

૨૧. તિક્ખત્તું સો તુલાભાર-દાનં દિનેસુ દાપયિ;

ઉપોસથં વોપવસિ, સુવિસુદ્ધમુપોસથે.

૨૨. અદા દણ્ડિસ્સરં દાન-મનુસંવચ્છરં વિભૂ;

પિટકત્તયં લિખાપેત્વા, ભિક્ખુસઙ્ઘસ્સ દાપયિ.

૨૩. મહગ્ઘમણિમુત્તાદિ-રતનાનિ સપેસિય;

જમ્બુદીપે મહાબોધિં-નેકક્ખત્તુમ પૂજયિ.

૨૪. કણ્ણાટભૂમિપાલેન, ચોળરઞ્ઞા ચ પેસિતા;

દૂતામહન્તમાદાય, પણ્ણાકારમિધાગતા.

૨૫. અદ્દસંસુ મહીપાલં, તતો સો તુટ્ઠમાનસો;

તેસં ઉભિન્નં દૂતાનં, કત્તબ્બં સાધુકારિય.

૨૬. તેસુ આદો’વ કણ્ણાટ-દૂતેહિ સહ પેસિય;

દૂતે સકીયે કણ્ણાટ-નિકટં સારપાભતે.

૨૭. અત્તનો વિસયં પત્તે, ચોળો સીહળ દૂતકે;

સહસા કણ્ણનાસાસુ, પાપયિંસુ વિરૂપતં.

૨૮. સમ્પત્તવિપ્પકારાકે, ઇધાગન્ત્વાન રાજિનો;

કથયિંસુ તદા સબ્બં, ચોળેન કતમત્તનિ.

૨૯. ઉદ્દિપિતાભિમાનો સો, સકલામચ્ચમજ્ઝગો;

અવ્હાય દમિળે દૂતે, ઇતિ ચોળસ્સ સન્દિસિ.

૩૦. સેનં વિના’વ એકસ્મિં, દીપે મજ્ઝે મહણ્ણવે;

બાહાબલપરિક્ખાવા, હોતુનો દ્વન્દયુદ્ધતો.

૩૧. બલં સન્નય્હ સકલં, રજ્જે તુય્હં મમા’થ વા;

તવા’ભિમત દોસમ્હિ, સઙ્ગામો વા કરીયતં.

૩૨. મયા વુત્તક્કમેનેવ, વત્તબ્બો વો જનાધિપો;

ઇતિ વત્વાન તે દૂતે, ઇત્થલઙ્કાર મણ્ડિતે.

૩૩. વિસ્સજ્જિય લહુંચોળ-મહીપાલસ્સ સન્તિકં;

તતો સેનઙ્ગમાદાય, અનુરાધ પુરં ગમિ.

૩૪. મત્તિકાવાટતિત્થે ચ, મહાતિત્થે ચ પેસયી;

ચોળરટ્ઠં’વ ગન્ત્વાન, યુજ્ઝિતું દ્વે ચમૂપતિ.

૩૫. સજ્જન્તેસુ ચમૂપેસુ, નાવાપાથેય્યકાનિ ચ;

યુદ્ધત્થાય બલં ચોળ-રટ્ઠપેસનકારણા.

૩૬. તદા તિંસતિમે વસ્સે, વેળક્કારસનામકા;

બલકાયા તહિંગન્તુ-મનિચ્છન્તા વિરોધિનો.

૩૭. મારેત્વાન ઉભો સેના-નાથે મત્તગજાવિય;

સમન્તતો વિલુમ્પિંસુ, પુલત્થિપુરમુદ્ધતા.

૩૮. પુત્તેહિ તીહિ સહિતં, રાજિનો ચ કણીયસિં;

ગણિત્વા સહસા રાજ-પાસાદં ચાપિ ઝાપયું.

૩૯. રાજા નિક્ખમ્મ ખિપ્પં સો, ગન્ત્વા દક્ખિણપસ્સકં;

સેલે વાતગિરિવ્હસ્મિં, સારં ભણ્ડં ઠપાપિય.

૪૦. વીરબાહુપરાજેન, સીહવિક્કમસાલિના;

મહતા ચ બલોઘેન, સમન્તા પરિવારિતો.

૪૧. પુલત્થિપુરમાગમ્મ, વત્તેન્તો દારુણં રણં;

પલાપેસિ ખણેનેવ, બલકાયે સમાગતે.

૪૨. મારિતાન ચમૂપાન-મટ્ઠિસઙ્ઘાટધિટ્ઠિતં;

પરિક્ખિપિત્વા ચિતકં, વેરિભૂતે બલાધિપે.

૪૩. બન્ધયિત્વાન ખાણુમ્હિ, પચ્છા બાહં સુબન્ધનં;

પરિતો વિપ્ફુરન્તીહિ, અગ્ગિજાલાહિ ઝાપયિ.

૪૪. ઘાતેત્વા તત્થ માનીતં, ગામાનિ ધરણીપતિ;

અકાસિ લઙ્કાવસુધં, સબ્બથા વીતકણ્ટકં.

૪૫. યુજ્ઝિતું સહ ચોળેન, રાજા અત્તકતાવધિં;

અનતિક્કમ્મ સો પઞ્ચ-ચત્તાલીસમ્હિ વચ્છરે.

૪૬. સન્નદ્ધં બલમાદાય, ગન્ત્વા સાગરપટ્ટનં;

તસ્સાભિગમનં પસ્સં, કઞ્ચિકાલં તહિં વસં.

૪૭. અનાગતત્તા ચોળસ્સ, તસ્સ દૂતે વિસ્સજ્જિય;

પુનાગન્ત્વા વસીરાજા, પુલત્થિનગરે ચિરં.

૪૮. મહાહેળિ સરેહરુ, મહાદત્તિકનામિકા;

કટુન્નરૂપણ્ડવાપી, કલ્લગલ્લિક નામિકા.

૪૯. એરણ્ડેગલ્લવાપી ચ, દીઘવત્થુકવાપિકા;

મણ્ડવાટકવાપી, ચ, કિત્તગ્ગબોધિપબ્બતા.

૫૦. વલાહસ્સ મહાદારુ, ગલ્લકુમ્ભીલસોબ્ભકા;

પત્તપાસાણવાપી ચ, વાપી ચ કાણનામિકા.

૫૧. એતા ચઞ્ઞા ચ સો છિન્ન-મરિયાદા વાપિયો બહૂ;

બન્ધાપેસિ સદાદીન-સત્તે બદ્ધ હિતાસયો.

૫૨. ભૂમિન્દો કન્દરા-ગઙ્ગા-નદીસુ ચ તહિં તહિં;

સુભિક્ખં કારયી રટ્ઠં, બન્ધેત્વા’વરણાનિ સો.

૫૩. વિહારા’ભયચારિત્ત-ભેદિનિં મહિસંસક;

પરિહારે સબ્બસોચ્છિજ્જ-ગાહયિત્વા ગલમ્હિ તં.

૫૪. પુરમ્ભા બહિ કારેત્વા, મહાસઙ્ઘં ખમાપિય;

પકાસેસિ ચ લોકસ્સ, સઙ્ઘગારવમત્તનો.

૫૬. મહાગામે નિકાયાનં, તિતયે ચોળનાસિતે;

ધાતુગબ્ભે ચ બન્ધેસિ, થૂપારામદ્વયે’પિ ચ.

૫૭. માતુયા’ળાહણઠાને, તથેવ પિતુનોપિ ચ;

અકા પઞ્ચ મહાવાસે, તથા બુદલવિટ્ઠિયં.

૫૮. પણ્ડવાપી ચ પાઠીનો, રક્ખચેતિયપબ્બતો;

તથેવ મણ્ડલગિરિ-મધુત્થલવિહારકો.

૫૯. ઉરુવેલવ્હયો દેવ-નગરે ચ વિહારકો;

મહિયઙ્ગણવિહારો ચ, સીતલગ્ગામલેણકં.

૬૦. જમ્બુકોલવિહારો ચ, તથેવ ગિરિકણ્ડકો;

કુરુન્દિયવિહારો ચ, જમ્બુકોલકલેણકં.

૬૧. ભલ્લાતકવિહારો ચ, તથેવ પરગામકો;

કાસગલ્લવ્હયો ચન્દ-ગિરિવ્હય વિહારકો.

૬૨. વેલગામવિહારો ચ, મહાસેનવ્હગામકો;

વિહારો ચા’નુરાધમ્હિ, પુરે બોધિઘરં તથા.

૬૩. ઇચ્ચેવમાદયોનેકે, વિહારે ચ બહૂ વિભૂ;

પટિસઙ્ખરિજિણ્ણે સો, ગામે ચા’દા વિસું વિસું.

૬૪. સમન્તકૂટ સેલત્થં, મુનિન્દપદલઞ્જનં;

પણમત્થાય ગચ્છન્તા, મનુસ્સા દુગ્ગમઞ્જસે.

૬૫. સબ્બે મા કિલમન્તૂ’તિ, દાનવટ્ટાય દાપયિ;

સાલિક્ખેત્તાદિસમ્પન્નં, ગિલીમલયનામકં.

૬૬. કદલીગામમગ્ગે ચ, હૂવરળઞ્જસે તથા;

ગામે દત્વાન પચ્ચેકં, સાલાયો ચાપિ કારયિ.

૬૭. અનાગતે તં ભૂપાલા, મા ગણ્હન્તૂ’તિ લેખિય;

અક્ખરાનિ સિલાથમ્ભે, પતિટ્ઠાપેસિ ભૂમિપો.

૬૮. ગામં અન્તરવિટ્ઠિઞ્ચ, તથા સઙ્ઘાટગામકં;

સિરિમણ્ડગલારામઞ્ચ, અદાસો લાભવાસિનં.

૬૯. વનજીવકભિક્ખૂન-મદા સો ચતુપચ્ચયે;

બન્ધૂનમ્પિ ચ સો તેસં, ભોગગામે પદાપયિ.

૭૦. પાવારગ્ગિકપલ્લાનિ, વિવિધે ઓસધેપિ ચ;

સીતે ઉતુમ્હિ બહુસો, ભિક્ખુસઙ્ઘસ્સ દાપયિ.

૭૧. અદા સબ્બપરિક્ખારે, પરિક્ખારે તથાત્થ સો;

નેકવારેસુ સક્કચ્ચં, ભિક્ખુસઙ્ઘસ્સ બુદ્ધિમા.

૭૨. સઙ્ઘસ્સ પાકવટ્ટત્થં, ભિક્ખૂનં લાભવાસિનં;

વેય્યાવચ્ચકરાનઞ્ચ, પૂજેતું ચેતિયાદિકં.

૭૩. પદિન્ના પુબ્બરાજૂહિ, યે ગામા રોહણે બહૂ;

તેપિ સબ્બે અનૂને સો, યથાપુબ્બં ઠપેસિ ચ.

૭૪. અદાસિ પિઠસપ્પીન-મુસભે બલિનો બહિ;

ભત્તં ચા’દાસિ સો કાક સોણાદીનં દયાપરો.

૭૫. અદાસિનેકતા વેય્ય-કારકાનં મહાકવી;

સદ્ધિં પવેણિગામેહિ, વિત્તજાતમનપ્પકં.