સત્તપઞ્ઞાસતિમ પરિચ્છેદ

સંગહકરણોનામ

૧. લઙ્કારક્ખાય સચિવે, બલિનો યોધસમ્મતે;

પટિપાટિં સમુદ્દિસ્સ, સમન્તા સન્નિયોજયિ.

૨. અભિસેકમઙ્ગલત્થાય, પાસાદાદિમનેકતં;

કિચ્ચં સમ્પાદનીયન્તિ, સચિવં સન્નિયોજિય.

૩. વન્દનીયે’ભિવન્દન્તો, પદેસેનેકકેતહિં;

નેત્વા માસત્તયં ગઞ્છિ, પુલત્થિનગરં પુન.

૪. વિસ્સુતો આદિમલય-નામેન બલનાયકો;

ઉજુપચ્ચત્થિકો હુત્વા, મહીપાલસ્સ સબ્બસો.

૫. ગઙ્ગા મત્થયુ’પાગઞ્છિ, બલં સબ્બં સમાદિય;

અન્દૂતિ વિસ્સુતં મન્દ-પઞ્ઞો ગામં પુરન્તિકે.

૬. લંકિસ્સરો તહિં ગન્ત્વા, ઉદ્ધરિત્વા તમુદ્ધતં;

પુલત્થિનગરં ગઞ્છિ, વસે વત્તિય તં બલં.

૭. યુવરાજપદંયેવ, સિતો સન્તો લિખાપયિ;

સો સત્તરસવસ્સાનિ, સપ્પઞ્ઞો નરસત્તમો.

૮. તતો’નુરાધનગર-મભિગમ્મ યથાવિધિં;

અનુભોત્વા વિધાનઞ્ઞૂ, અભિસેકમહુસ્સવં.

૯. અટ્ઠિતો પાપધમ્મેસુ, સુટ્ઠિતો સેટ્ઠકમ્મનિ;

સો અટ્ઠારસમં વસ્સં, લિખાપયિ સુસણ્ઠિતો.

૧૦. તતો આગમ્મ નિવસિ, પુલત્થિનગરે વરે;

સો સિરીસઙ્ઘબોધી’તિ, નામધેય્યેન વિસ્સુતો.

૧૧. અનુજં સો વીરબાહુ-મોપરજ્જે નિવેસિય;

દત્વાન દક્ખિણં દેસં, તં સઙ્ગણ્હિ યથાવિધિં.

૧૨. કણિટ્ઠસ્સાથ ભાતુસ્સ, જયબાહુસ્સ ભૂભુજો;

આદિપાદપદં દત્વા, રટ્ઠં ચા’દાસિ રોહણં.

૧૩. ઠાનન્તરાનિ સબ્બેસ-મમચ્ચાનં યથારહં;

દત્વા રજ્જે યથાઞાયં, કરં યોજેસિ ગણ્હિતું.

૧૪. ચિરસ્સં પરિહીનં સો, દયાવાસો મહીપતિ;

પવત્તેસિ યથાધમ્મં, ઠિતધમ્મો વિનિચ્છયં.

૧૫. એવં સમુદ્ધટાનેક, રિપુકણ્ટકસઞ્ચયે;

નિચ્ચં રજ્જં પસાસેન્તે, લઙ્કંસમ્માનરિસ્સરે.

૧૬. છત્તગ્ગાહકનાથો ચ, ધમ્મગેહકનાયકો;

તથેવ સેટ્ઠિનાથો ચ, ઇચ્ચેતે ભાતરો તયો.

૧૭. રઞ્ઞો વિરોધિતં યાતા, ફલાતા જમ્પુદીપકં;

લઙ્કં વીસતિમે વસ્સે, એકેનૂને સમોતરું.

૧૮. તે સબ્બે રોહણં રટ્ઠં, સબ્બં મલયમણ્ડલં;

સબ્બં દક્ખિણપસ્સઞ્ચ, સહસા પરિવત્તયું.

૧૯. નિપુણો રોહણં ગન્ત્વા, તથા મલયમણ્ડલં;

નિઘાતેન્તો બહૂ તત્થ, તત્થ પચ્ચત્થિકે જને.

૨૦. સમ્માવુપસમેત્વા તં, ઠપેત્વા સચિવે તહિં;

દક્ખિણો દક્ખિણં દેસં, સયં ગન્ત્વા મહબ્બલો.

૨૧. પેસેત્વા સમણીભાતુ-વંસજં સચિવં તદા;

ગાહેત્વા સમરેઘોરે, વીરો તે સકવેરિનો.

૨૨. સમારોપિયસૂલમ્હિ, લઙ્કં વિગતકણ્ટકં;

કારેત્વાન નિરાતઙ્કં, પુલત્થિપુરમાગમિ.

૨૩. વસન્તી ચોળવિસયે, જગતિપાલરાજિની;

ચોળહત્થા પમુઞ્ચિત્વા, સદ્ધિં ધીતુ કુમારિયા.

૨૪. લીલાવત્યાભિધાનાય, નાવામારુય્હ વેગસા;

લંકાદીપમ્હિ ઓતિણ્ણા, પસ્સિ લંકિસ્સરં તદા.

૨૫. સુત્વા વંસક્કમં તસ્સા, સો ઞત્વા સુદ્ધવંસતં;

લીલાવતિં મહિસિત્તે, અભિસિઞ્ચિ નરિસ્સરો.

૨૬. સા તં પટિચ્ચ રાજાનં, મહેસી ધીતરં લભિ;

નામં યસોધરાતિ’સ્સા, અકાસિ ધરણી પતિ.

૨૭. મેરુકન્દરરટ્ઠેન, સદ્ધિં રાજા સધીતરં;

વીરવમ્મસ્સ પાદાસિ, સા લભિ ધીતરો દુવે.

૨૮. સમાનનામિકા જેટ્ઠા, સા માતા મહિયા અહુ;

સુગલા નામિકા આસિ, તાસુ દ્વીસુ કણિટ્ઠિકા.

૨૯. કાલિઙ્ગધરણીપાલ-વંસજં ચારુદસ્સનં;

તિલોકસુન્દરં નામ, સુકુમારં કુમારિકં.

૩૦. કાલિઙ્ગરટ્ઠતો રાજા, આણાપેત્વા ચિરટ્ઠિતિં;

નિજવંસસ્સ ઇચ્છન્તો, મહેસિત્તે’ભિ સેચયિ.

૩૧. સુભદ્દા ચ સુમિત્તા ચ, લોકનાથવ્હયાપિ ચ;

રતનાવલી રૂપવતી, ઇતિમા પઞ્ચ ધીતરો.

૩૨. પુત્તં વિક્કમબાહુઞ્ચ, સા લભી ધઞ્ઞલક્ખણં;

સમ્પત્તા સા પજવુદ્ધિં, હરન્તિ રાજિનો મતં.

૩૩. ઇત્થાગારેસુ સેસેસુ, વીતા સમકુલઙ્ગના;

ગબ્ભો જાતુમહીપાલં, તં પટિચ્ચ ન સણ્ઠહિ.

૩૪. અથેકદિવસં રાજા, અમચ્ચગણમજ્ઝગો;

પિલોકિયઠિભા સબ્બા, ધીતરો પટિપાટિયા.

૩૫. ધીતુ નવમવસેસાનં, ઠપેત્વા રતનાવલિં;

ધઞ્ઞલક્ખણસમ્પન્ન-પુત્તસ્સુપ્પત્તિસુચકં.

૩૬. લક્ખણં લક્ખણઞ્ઞૂ સો, અપસ્સં પેમચેગવા;

રતનાવલિમાહૂય, તસ્સા મુદ્ધનિ ચુમ્બિય.

૩૭. તેજોગુણેહિ ચાગેહિ, ધિયા સૂરત્તનેન ચ;

ભૂતે ચ ભાવિનો ચેવ, સબ્બે ભૂપે’તિસાયિનો.

૩૮. નિચ્ચં લઙ્કં નિરાસઙ્ક-મેકચ્છત્તકમેવ ચ;

પવિધાતું સમત્થસ્સ, સમ્માસાસનતાયિનો.

૩૯. સોભનાનેકવત્તસ્સ, ઇમિસ્સા કુચ્છિહેસ્સતિ;

પુત્તસ્સુપ્પત્તિઠાનન્તિ, મુદુતો સો સમબ્રવિ.

૪૦. યાવન્તસ્સાપિખોચોળ-મહીપાલસ્સ નેકસો;

કુલાભિમાની રાજા સો, અદત્વાન કણીયસિં.

૪૧. આણાપેત્વા પણ્ડુરાજં, વિસુદ્ધત્વયસમ્ભવં;

અનુજં રાજિનિં વસ્સ, મિત્તવ્હયમદાસિસો.

૪૨. સામાણભરણં કિત્તિ, સિરી મેઘાભિધાનકં;

સિરિવલ્લભનામઞ્ચ, જનેસિ તનયે તયો.

૪૩. સુભદ્દ વીરબાહુસ્સ, સુમિત્તં જયબાહુનો;

મહતા પરિહારેન, પાદાસિ ધરણી પતિ.

૪૪. અદાસિ માણાભરણે, ધીતરં રતનાવલિં;

લોકનાથવ્હયં કિત્તિ સિરિમેઘસ્સ’દાસિસો.

૪૫. રૂપત્યભિધાનાય, ધીતુયો પરતાયહિ;

સરીરિવલ્લભસાદા, સુગલવ્હ કુમારિકં.

૪૬. મધુકણ્ણવભીમરાજ, બલક્કાર સનામકે;

મહેસી બન્ધવેરાજ-પુત્તે સીહપુરાગતે.

૪૭. પસ્સિત્વાન પહીપાલો, તદા સઞ્જાતપીતિકો;

તેસં પાદાસિ પચ્ચેકં, વુત્તિં સો અનુરૂપકં.

૪૮. તે સબ્બે લદ્ધસક્કાર સમ્માનાધરણીપતિં;

આરાધયન્તા સસતં, નિવસિંસુ યથારુચિં.

૪૯. એતેસં રાજપુત્તાનં, સુન્દરિવ્હં કણિટ્ઠકં;

અદા વિક્કમબાહુસ્સ, નિજવંસઠિતટ્ઠિકો.

૫૦. ભિય્યો વિક્કમબાહુસ્સ, તતો લીલાવતિં સતિં;

સહ ભોગેન પાદાસિ, તદા બન્ધુ હિતેરતો.

૫૧. વિધાય એવં સજને જનિન્દો;

નિસ્સેસતો ભોગસમપ્પિતો;

દયાપરો ઞાતિજનાતમત્થં;

સમાચરી નીતિપથાનુરૂપં.

સુજનપ્પસાદસંવેગત્થાય કતે મહાવંસે

સંગહકરણો નામ

સત્તપઞ્ઞાસતિમો પરિચ્છેદો