છપઞ્ઞાસતિમ પરિચ્છેદ

અનુરાધપુરાભિગમનો

૧. યુવરાજપદે તસ્સ, ઠિતસ્સા’થ નયઞ્ઞુનો;

અહૂ વિજયબાહૂતિ, નામં સબ્બત્થ પાકટં.

૨. મહાઞ્ઞણો નિજાણાય, તત્થ ભેરિં ચરાવિય;

ઠપેન્તો સચિવે’નેકે, પતિરૂપે પદન્તરે.

૩. ચોળાનં મદ્દનત્થાય, રાજરટ્ઠાધિવાસિનં;

ચતુરો ચતુરોપાયે, યો જયં તત્થ સો વસી.

૪. ચોળરાજા સુણિત્વા તં, પુળત્થિનગરે ઠિતં;

સેનાપતિમ પેસેસિ, દત્વાન બલવાહનં.

૫. સેનિન્દં કાજરગ્ગામ-સમીપં સમુપાગતં;

દુપ્પસય્હં વિદિત્વાન, ગિરિદુગ્ગમગા તતો.

૬. સેનિન્દો કાજરગ્ગામં, વિલુમ્પિત્વાન વેગસા;

તત્થ વત્થુમસક્કોન્તો, સદેસં પુન રાગમિ.

૭. તતો મહાદિપાદો’પિ, આગમ્મ મલયા લહું;

મહતા બલકાયેન, સિપ્પત્થલકમાવસિ.

૮. રાજા રામઞ્ઞવિસયે, રાજિનો સન્તિકં જને;

પેસેસિ બહુકેસારં, ધનજાતઞ્ચ’નપ્પકં.

૯. વિચિત્તવત્થકપ્પૂર-ચન્દનાદીહિ વત્થૂહિ;

પરિપુણ્ણા ચ નાવાયો, નેકાતિત્થે સમોસટા.

૧૦. ધનજા તેહિ નેકેહિ, કરોન્તો ભટસઙ્ગહં;

તતો તમ્બલગામમ્હિ, નિવસિત્થ મહબ્બલો.

૧૧. અઞ્ઞમઞ્ઞવિરુદ્ધત્તા, રાજારટ્ઠાધિવાસિનો;

ઉપગ્ગમ્મ જના સબ્બે, કરં નો દેન્તિ સબ્બસો.

૧૨. વિપક્ખાચોળરાજસ્સ, ભિન્દન્તા’ણં મદુદ્ધતા;

આયુત્તકે વિહિંસેન્તો, યથાકામં ચરન્તિ ચ.

૧૩. તં સુત્વા ચોળભૂપાલો, સમ્પકોપવસીકતો;

સેનં મહન્તિં દત્વાન, પેસેસિ સચિવં નિજં.

૧૪. મહાતિત્થે’વહિણ્ણો સો, તત્થ તત્થ બહૂજને;

ઘાતેન્તો સવસે કત્વા, રાજારટ્ઠાધિવાસિનો.

૧૫. અનુક્કમેન ગન્ત્વાન, ખરાણો રોહણં તદા;

અજ્ઝોત્થરિ સસેનો સ, ભિન્નો વેલોવસાગરો.

૧૬. રઞ્ઞો પચ્ચત્થિકા હુત્વા, રવિદેવચલવ્હયા;

ઉભો દમિળસેનિન્દ-વસં યાતા મહબ્બલા.

૧૭. મહાપક્ખબલોપેતે, તે પસ્સિય ચમૂપતિ;

રોહણં સકલં ખિપ્પં, મઞ્ઞિત્થ સકહત્થગં.

૧૮. એકાદસમ્હિ સો વસ્સે, રાજા ચોળાભિભૂતિયા;

પલુટ્ઠપબ્બતે દુગ્ગં, પવિધાય તહિં વસી.

૧૯. ચોળસેના તદાસેલં, સમન્તા સમ્પરિક્ખિપિ;

તત્થો’ભયેસં સેનાન-મહૂ ભિંસનકં રણં.

૨૦. રઞ્ઞો ભટા વિનાસેત્વા, સબ્બં તં દમિળં બલં;

પલાયન્તં મહાચોળ-સામન્તઞ્ચાનુબન્ધિય.

૨૧. ગહેત્વાન સિરં તસ્સ, ગામસ્મિં તમ્બવિટ્ઠિકે

સદ્ધિં વાહનયાનેહિ, સારભૂતધનેહિ ચ.

૨૨. તહિં તં સકલં ભણ્ડં, નેત્વા રઞ્ઞો પદસ્સિય;

પુળત્થિનગરં ગન્તું, કાલો ઇતિ સમબ્રવું.

૨૩. મહીપાલોપિ તં સુત્વા, સચિવાનં વચો તદા;

મહતા બલકાયેન, પુલત્થિનગરં ગતો.

૨૪. પવત્તિમેતં સકલં, સુત્વા ચોળનરિસ્સરો;

તિબ્બકોપવસંયાતો, ભૂપાલગહણત્થિકો.

૨૫. સામં ખિપ્પં સમાગમ્મ, વીરો સાગરપટ્ટનં;

ભિય્યોપિ મહતિં સેનં, લંકાદીપમપેસયી.

૨૬. તં વિજાનિય ભૂમિન્દો, સેનિન્દં પેસયી સકં;

બલં મહન્તં દત્વાન, ચોળસેનાય યુજ્ઝિતું.

૨૭. ગચ્છમાનો ચમૂનાથો, સો’નુરાધપુરન્તિકે;

સદ્ધિં દમિળસેનાય, વત્તેસિ તુમુલં રણં.

૨૮. પતિંસુ તસ્મિં સઙ્ગામે, ભૂપાલસ્સ નરા બહૂ;

ભિય્યોપિ દમિળાયત્તા, જાતા તં રટ્ઠવાસિનો.

૨૯. વિહાય ધરણીપાલો, પુલત્થિનગરં તદા;

વિલ્લિકાબાણકં રટ્ઠં, સમ્પાપુણિય વેગસા.

૩૦. નિહચ્ચામચ્ચયુગલં, તં રટ્ઠાધિટ્ઠિતં તદા;

તહિં વાસમકપ્પેસિ, સભટે સન્નિપાતયં.

૩૧. અત્તાનમનુબન્ધન્તં, સુત્વા ચોળચમૂપતિં;

ગન્ત્વા વાતગિરિં નામ, સમયઞ્ઞૂ સિલુચ્ચયં.

૩૨. ઉપચ્ચકાય સેલસ્સ, તત્થ દુગ્ગં નિવેસિય;

રણં કરોન્તો તેમાસં, દમિળે પટિબાહયિ.

૩૩. કેસધાતુકનાથસ્સ, મારિતસ્સ પુરારણે;

ભાતા કણિટ્ઠો સમ્પત્ત, મહાપક્ખબલો તદા.

૩૪. મારણં સકભાતુસ્સ, સરન્તો રુટ્ઠમાનસો;

સકલં પરિવત્તેસિ, ગુત્તહાલકમણ્ડલં.

૩૫. અથો લંકિસ્સરો તત્થ, ખિપ્પં ગન્ત્વા મહબ્બલો;

ઠાને મચ્ચુત્થલે નામ, ખન્ધાવારં નિબન્ધિય.

૩૬. ખદિરઙ્ગણિદુગ્ગમ્હા, પલાપેત્વાન તં રણે;

ઠાના કુબુલગલ્લા ચ, યુજ્ઝન્તો તં પલાપયિ.

૩૭. વિહાય પુત્તદારાદિ-સબ્બં નેકધનં બલં;

પલાયમાનો સો રટ્ઠં, ચોળાયત્ત મગાલહું.

૩૮. તદા નરિસ્સરો તત, તસ્સ સબ્બં સમાદિય;

ગન્ત્વા તમ્બલગામમ્હિ, નવં દુગ્ગં નિવેસિય.

૩૯. અનુક્કમેન ગન્ત્વાન, મહાનાગહુલવ્હયે;

પુરેવસી સુસજ્જેન્તો, બલં ચોળેહિ યુજ્ઝિતું.

૪૦. તતો રાજા સમવ્હાય, સચીવે દ્વે મહબ્બલે;

પેસેસિ દિક્ખિણં પસ્સં, વસં નેતું તહિં જને.

૪૧. સમ્પેસેસિ મહામચ્ચ-યુગલં કક્ખલં વિભૂ;

ચોળદપ્પવિનાસાય, તતો વેલા મહાપથે.

૪૨. પેસિતા દક્ખિણં પસ્સં, અમચ્ચા’મે મહબ્બલા;

મુહુન્નરુગ્ગમદુગ્ગં, બદળત્થલમેવ ચ.

૪૩. વાપીનગરદુગ્ગઞ્ચ, બુદ્ધગામકમેવ ચ;

તિલગુલ્લં મહાગલ્લં, મણ્ડગલ્લકમેવ ચ.

૪૪. અનુરાધપુરઞ્ચાતિ, ગહેત્વાન કમેન તે;

વત્તેન્તા સવસે રટ્ઠં, મહાતિત્થમુપાગતા.

૪૫. પેસિતા સચિવાદ્વેતુ, તતો વેલા મહાપથે;

વિલુમ્પન્તા છગામાદિ-ખન્ધાવારે તહિં તહિં.

૪૬. પુલત્થિનગરાસન્નં, કમેના’ગમ્મ પેસયું;

દૂતે રાજન્તિકખિપ્પ-માગન્તું વટ્ટતીતિહ.

૪૭. દિસાસા દ્વીસુ યાનેહિ, સચિવેહિ પવત્તિતં;

વિક્કમાતિ સયં સુત્વા, કાલઞ્ઞૂ સો મહીપહિ.

૪૮. સીઘં સન્નય્હ સેનઙ્ગં, સમગ્ગં વિદિકોવિદો;

ઉમ્મૂલનાયચોળાનં, પુરાતમ્હા’ભિનિક્ખમિ.

૪૯. ગચ્છં ગઙ્ગાય મહિય-ઙ્ગણથૂપન્તિકે વિભૂ;

સેનાનિવેસં કારેત્વા કઞ્ચિકાલં તહિં વસી.

૫૦. કમેનાગમ્મ ઠાનઞ્ઞૂ, પુળત્થિનગરન્તિકે;

બન્ધાપેસિ મહાવીરો, ખન્ધાવારં થિરં વરં.

૫૧. તત્થ તત્થ ઠિતા સૂરા, ચોળા યે કક્ખલા’ખિલા;

પુલત્થિનગરે યુદ્ધં, કાતું સન્નિપતિંસુ તે.

૫૨. નિક્ખમ્મ નગરા ગન્ત્વા, ચોળા બહિ મહારણં;

કત્વા પરાજિતા ભીતા, પવિસ્સ નગરં સકં.

૫૩. ગુત્તા સેસપુરદ્વારા, ગોપુરટ્ટાલનિસ્સિતા;

મહાહવં બહુસ્સાહા, પવત્તેસું ભયાવહં.

૫૪. દિયડ્ઢમાસં યુજ્ઝન્તિ, નગરં તમુપરુન્ધિય;

સાધેતું નેવસા’સક્ખિ, ભૂપાલસ્સ મહાચમૂ.

૫૫. મહારઞ્ઞો મહાવીરા, મહાસૂરા મહબ્બલા;

મહાભટા મહામાના, રવિદેવચલાદયો.

૫૬. ઉલ્લઙ્ઘિત્વાન પાકારં, પવિસ્સ સહસા પુરં;

ખણેન દમિળે સબ્બે, મૂલઘચ્ચમઘાતયું.

૫૭. એવં લદ્ધજયો રાજા, તદા વિજયબાહુસો;

ચરાપેસિ નિજાણાય, ભેરિં ભૂરિમતિપુરે.

૫૮. તં સુત્વા સકસેનાય, વિનાસં ચોળભૂપતિ;

સીહળા બલવન્તોતિ, ભિય્યો સેનં ન પાહિણિ.

૫૯. વીરો અસેસનિહતુદ્ધટ ચોળસેટ્ઠો;

વિઞ્ઞૂ સુસાધુટ્ઠપિતાખિલરાજરટ્ઠો;

ઇટ્ઠન્નુરાધપુરસેટ્ઠમતીવ હટ્ઠો;

વસ્સમ્હિ પઞ્ચદસમે ગમિ રાજસેટ્ઠો.

સુજનપ્પસાદસંવેગત્થાય કતે મહાવંસે

અનુરાધપુરાભિગમનો નામ

છપ્પઞ્ઞાસતિમો પરિચ્છેદો