પઞ્ચપઞ્ઞાસતિમ પરિચ્છેદ

રોહણારાતિ વિજયોનામ

૧. લોકનામો ચમૂનાથો, મક્ખકુદ્રૂસવાસિકો;

સચ્ચપટિઞ્ઞો ધીતિમા, ચોળદપ્પવિઘાતનો.

૨. અભિભૂય જને પત્વા, રજ્જં રોહણમણ્ડલે;

વસી કાજરગામમ્હિ, ચારિત્તવિધિકોવિદો.

૩. અહુ તદા કિત્તિનામો, રાજપુત્તો મહબ્બલો;

તસ્સ વંસાદિસમ્પત્તી, નુપુબ્બેન પવુચ્ચતે.

૪. સુતો કસ્સપભૂપસ્સ, માણનામેન વિસ્સુતો;

આદિપાદો અહુ ધીરો, સદાચારવિભૂસિતો.

૫. તસ્સા’થ જેટ્ઠકો ભાતા, માણવમ્મો મહામતિ;

ગોકણ્ણકસમીપટ્ઠ-નદીતીરે નિસીદિય.

૬. કતમન્તુપચારો સો, યથાવિધિમસેસતો;

અક્ખમાલં ગહેત્વાન, મન્તં જપ્પિતુમારભિ.

૭. કુમારો કિર ભત્તગ્ગે, પાતુરાસિ સવાહનો;

સિખણ્ડિ મુખતુણ્ડેન, બલિપટ્ટં વિખણ્ડિય.

૮. સચ્છિદ્દકે નાળિકેર-કપાલે વિચ્ચુનોદકે;

લૂખે જલમપસ્સન્તો, જપન્તસ્સ મુખંગતો.

૯. તતો ભાવિનિં સિદ્ધિ, મપેક્ખં નયનં સકં;

તસ્સોપનેસિ, નિબ્ભિજ્જ, સોપિ તં સહસાપિચિ.

૧૦. કુમારો તસ્સ સન્તુટ્ઠો, કુમારસ્સાભિપત્થિતં;

વરં પદાય નભસા, રાજમાનો ગતો તતો.

૧૧. ભિન્નેકનયનં દિસ્વા, સચિવાતં પરો દિસું;

વરલાભં પકાસેત્વા, સમસ્સાસેસિ સો જને.

૧૨. તતો સો સચિવાતસ્સ, સન્તુટ્ઠારાધયિંસુ તં;

અનુરાધપુરં પત્વા, ભિસેકો કારિયો ઇતિ.

૧૩. અત્થો કો મમરજ્જેન, વિકલઙ્ગસ્સ સમ્પતિ;

તપોકમ્મં કરિસ્સામિ, પબ્બજ્જમુપગમ્મહં.

૧૪. કણિટ્ઠો માણનામો ચ, લઙ્કારજ્જં કમાગતં;

પાલેતુ ઇતિ સો રજ્જં, સમ્પત્તં સમ્પટિક્ખિપિ.

૧૫. વિઞ્ઞાતચિત્તસઞ્ચારા, સચિવા તસ્સ સબ્બથા;

વત્તુમેતં કણિટ્ઠસ્સ, પેસેસું પુરિસે તદા.

૧૬. સુત્વા તં સીઘમાગમ્મ, પસ્સિત્વા સકભાતરં;

પતિત્વા પાદમૂલમ્હિ, બહું કન્દિય રોદિય.

૧૭. જેટ્ઠેન ભાતરા સદ્ધિ-મનુરાધપુરં ગતો;

મકુટં તત્થ ધારેસિ, જેટ્ઠચિત્તાનુવત્તકો.

૧૮. તતો’ભયગિરિં ગન્ત્વા, પબ્બજ્જં સકભાતુનો;

યત યો તત્થ યાચિત્થ, બહુમાનપુરસ્સરં.

૧૯. તતો તે યતયો તસ્સ, પબ્બજ્જમુપસમ્પદં;

અકંસુ વિકલઙ્ગસ્સ, સિક્ખાપદનિરાદરા.

૨૦. પરિવેણમુત્તરોળ-મુળારં તસ્સ કારિય;

કત્વા તં પરિવેણસ્સ, સામિકં ધરણી પતિ.

૨૧. ભિક્ખૂનં છસતં તત્થ, વિધાય તદધીનકં;

પરિહારે અદા તસ્સ, પેસ્સવગ્ગે ચ પઞ્ચ સો.

૨૨. સમપ્પેસિ ચ સો નાના-સિપ્પકમ્મવિચક્ખણે;

જને ચાકા તદાયત્તે, સો દાઠાધાતુરક્ખિયે.

૨૩. તસ્સેવાદકરા’હેસું, ભિક્ખૂ’ભયગિરિમ્હિ તે;

રાજા ચ લોકં પાલેસિ, સમ્મા તસ્સાનુસિટ્ઠિયા.

૨૪. જના તબ્બંસજા કેચિ, તં રજ્જનિરપેક્ખકા;

નિવસિંસુ યથાકામં, મહાસામિ પદંસિતા.

૨૫. એતસ્સ માણવમ્મસ્સ, રઞ્ઞો ધમ્મનયઞ્ઞુનો;

અગ્ગબોધિકુમારાદિ-પુત્તનત્તુક્કમાગતે.

૨૬. વંસે વિસુદ્ધે જાતસ્સ, ભૂપાલન્વયમુદ્ધનિ;

સમાસોળસકઙ્કાયં, સમ્મા રજ્જાનુસાસિનો.

૨૭. મહીપસ્સ મહિન્દસ્સ, દુવે માકુલધીતરો;

દેવલા લોકિકા ચાતિ, નામતો વિસ્સુતા સુભા.

૨૮. એતાસુ દ્વીસુ ધીતાસુ, લોકિકા માતુલત્તજં;

પટિચ્ચ રાજતનયં, સુભં કસ્સપનામકં.

૨૯. સા મોગ્ગલ્લાન લોકવ્હે, પુત્તે દ્વે લભિ સોભને;

તેસુ જેટ્ઠસુતો લોક-સાસનાધારકોવિદો.

૩૦. મહાસામીતિ પઞ્ઞાતો, સઙ્ઘુપાસનપાલયો;

નેકસારગુણાવાસો, વાસં કપ્પેસિ રોહણે.

૩૧. દાઠોપતિસ્સ રાજસ્સ, નત્તા સુગતસાસને;

પબ્બજ્જૂપગતો સદ્ધો, ધુતવા સીલસંવુતો.

૩૨. પહિતત્તો વિચિત્તોસો, પન્તસેનાસને વસી;

ગુણં સબ્બત્થ વણ્ણેસું, તસ્મિં દેવા પસીદિય.

૩૩. ગુણં સુણિત્વા લંકિન્દો, તદા સબ્બત્થ પત્થટં;

ઉપસઙ્કમ્મ તં નત્વા, કાતુમત્તાનુસાસનં.

૩૪. આરાધયમનિચ્છન્તં, યાચિત્વાન પુનપ્પુનં;

આનીય વાસયિત્વા તં, પાસાદે સાધુકારિતે.

૩૫. યતિસ્સરસ્સ વસતો, કત્થ રાજાગુણપ્પિયો;

તસ્સાનુસિટ્ઠિમગ્ગટ્ઠો, લોકં ધમ્મેન પાલયિ.

૩૬. ઉદ્દિસ્સારાધનં સમ્મા, લંકિન્દેન કતં તદા;

સેલન્તરાભિનિક્ખમ્મ, યતિન્દો સો દયાનુગો.

૩૭. યતો ભિક્ખૂ સમૂહેત્વા, વાસં કપ્પેસિ યત્થ સો;

સેલન્તરસમૂહો’તિ, વિક્ખ્યાતિં સો તતો ગતો.

૩૮. તતો પટ્ઠાય વાસેત્વા, રત્તિયં દેવપલ્લિયં;

દેવતાનુમતં ભિક્ખું, મૂલઠાને ઠપેન્તિ હિ.

૩૯. મૂલત્તમાવસન્તાનં, યતીનમનુસાસના;

લંકિસ્સરા પવત્તન્તિ, પાલેન્તા લોકસાસનં.

૪૦. તસ્સ દાઠોપતિસ્સસ્સ, વંસજં રાજપુત્તકં;

બોધિં પટિચ્ચ તબ્બંસા, બુદ્ધનામા કુમારિકા.

૪૧. અલત્થ લોકિતં નામ, ધીતરં વરલક્ખણં;

કાલેન સા પદિન્ના’સિ, મોગ્ગલ્લાનસ્સ ધીમતો.

૪૨. સા તં પટિચ્ચ કિત્તિઞ્ચ, મિત્તં નામ કુમારિકં;

મહિન્દં રક્ખિતં ચાપિ, લતિત્થ ચતુરો પજા.

૪૩. અહુ જેટ્ઠસુતો ધીરો, વીરો તેરસવસ્સિકો;

કતહત્થો વિસેસેન, ધનુસિપ્પમ્હિ સો તતો.

૪૪. કથં લઙ્કં ગહેસ્સામિ, દૂરેત્વા’રાતિ કણ્ટકં;

ઇતિ ચિન્તાપરોગામે, મૂલસાલવ્હયે વસી.

૪૫. એકો મહાબલો વીરો, બુદ્ધરાજોતિ વિસ્સુતો;

વિલોમવત્તી હુત્વાન, લોકસેનાનિનો તદા.

૪૬. પલાતો ચુણ્ણસાલવ્હં, ખિપ્પં જનપદં તહિં;

કિત્તાદિકે જને નેકે, વસે વત્તિય સબ્બથા.

૪૭. સદ્ધિં બન્ધૂહિ સઙ્ગામ-સૂરેહિ બહુકેહિ સો;

મલયાચલપાદેસુ, વસી દુપ્પસહો તદા.

૪૮. તસ્સ’ન્તિકમુપાગમ્મ, સંવચ્છરિકનાયકો;

સઙ્ઘો નામ કુમારસ્સ, સરૂપં સાધુવં બ્રવિ.

૪૯. મહાસામિસ્સ તનયો, જેટ્ઠો કિત્તિ સનામકો;

ધઞ્ઞલક્ખણસમ્પન્નો, સમ્પન્નમતિવિક્કમો.

૫૦. જમ્બુદીપેપિ તં રજ્જં, કત્તુમેકાતપત્તકં;

સમત્થોતિ વિચિન્તેપિ, લઙ્કાદીપમ્હિ કા કથા.

૫૧. તસ્સ સો વચનં સુત્વા, સેવિતબ્બો કુમારકો;

ઇતિ નિચ્છિય પેસેસિ, કુમારસ્સ’ન્તિકં જને.

૫૨. સુણિત્વા સો વચો તેસં, નિવત્તનભયા વિભૂ;

અજાનહં પિતુન્નં સો, વીરો ધનુસહાયકો.

૫૩. ગેહા નિક્ખમ્મ પસ્સન્તો, સુનિમિત્તાનિનેકધા;

અગાલહું સરીવગ્ગ-પિટ્ઠિગામં મહામતિ.

૫૪. તહિં સો નિવસં વીરો, પેસયિત્વા સસેવકે;

વિપક્ખાધિટ્ઠિતં જેસિ, બોધિવાલવ્હગામકં.

૫૫. તતો’ભિમાની સેનાની, સેનં સો તત્થ પેસયિ;

સા પરિક્ખિપતં ગામં, સઙ્ગામાય સમારભી.

૫૬. કુમારો તેહિ યુજ્ઝન્તો, સુભટો પટુવિક્કમો;

દિસાસુ વિકિરીસબ્બે, તુલં ચણ્ડોવ માળુતો.

૫૭. ચુણ્ણસાલં જનપદં, ગન્ત્વા ઠાનવિદૂ તદા;

તહિં વસં વસેકાસિ, સબ્બં મલયમણ્ડલં.

૫૮. તદાપિ સેનં સેનિન્દો, પેસેત્વા અસકિં સકં;

અભિભૂતિમસક્કોન્તો, કાતું દુમ્મનતં ગતો.

૫૯. મક્ખકુદ્રુસવાસિસ્સ, સચિપસ્સાથ કિત્તિનો;

સુતો મહબ્બલો દેવ-મલ્લોતિ વિદિતો તદા.

૬૦. સહિતો બન્ધુમિત્તેહિ, બહૂ રોહણવાસિનો;

સમાદાયા’ભિગન્ત્વાન, કુમારં પસ્સિ સાદરો.

૬૧. બન્ધિય છુરિકં છેકો, સો પન્નરસવસ્સિકો;

આદિપાદપદં તત્થ, સમ્પાપુણિ મહાયસો.

૬૨. તતો હિરઞ્ઞમલય, મુપાગમ્મ મહબ્બલો;

તહિં રેમુણસેલમ્હિ, ખન્ધાવારં નિબન્ધયિ.

૬૩. તત્થાપિ સેનં પેસેત્વા, સઙ્ગામેન્તો ચમૂપતિ;

અલદ્ધવિજયો છન્દં, પુનયુદ્ધે જહિતતો.

૬૪. લોકનામો ચમૂનાથો, લોકં હિત્વા સકં તદા;

અહુ વસ્સમ્હિ છટ્ઠેસો, પરલોકપરાયનો.

૬૫. તદા કસ્સપનામેકો, કેસધાતુકનાયકો;

જને’ભિભૂયવત્તેસિ, નીજાણં રોહણે તદા.

૬૬. સુત્વા તં ચોળસામન્તો, પુળત્થિનગરા તદા;

નિક્ખમ્મ યુદ્ધસનદ્ધો, ગન્ત્વા કાજરગામકં.

૬૭. કેસાધાતુ તતો યુદ્ધે, ભિન્દિત્વા દમિળં બલં;

રક્ખપાસાણસીમાયં, ઠપેત્વા રક્ખિયે જને.

૬૮. પટિલદ્ધજયુદ્દામો, મહાસેના પુરક્ખતો;

પુનરાગમ્મ પાવેક્ખિ, વીરો કાજરગામકં.

૬૯. તદાદિપાદો સુત્વાન, સબ્બં સુત્થીરધાતુકો;

કેસધાતું નિઘાતેતું, બલં સન્નય્હિ વેગસા.

૭૦. પવત્તિં તં સુણિત્વા સો, સાભિમાનો ભુસંતતો;

સમત્તં બલમાદાય, સિપ્પત્થલકમાગમા.

૭૧. પઞ્ચયોજનરટ્ઠાદિ-વાસિકેસુ બહૂજને;

સમાદાય સમાસન્ને, રાજપુત્તે સુદુજ્જયે.

૭૨. વિરત્તતઞ્ચ સો ઞત્વા, બહુન્નં રટ્ઠવાસિનં;

દુક્કરં એત્થ યુદ્ધન્તિ, ગતો સો ખદિરઙ્ગણિં.

૭૩. મહાસેનાય ભૂપાલ સુતો સોળસવસ્સીકો;

ખિપ્પં વાપેક્ખિ સો વીત-દરો કાજરગામકં.

૭૪. છમ્માસમનુભોત્વાન, રોહણં રુટ્ઠમાનસો;

કેસધાતુકનાથોપિ, સઙ્ગામત્થાય તત્થગા.