ચતુપઞ્ઞાસતિમ પરિચ્છેદ

છ રાજકોનામ

૧. કત્વા વિક્કમ્મ બાહૂ’તિ, નામ ભૂપાલસૂનુતો;

તસ્સાણાય પવત્તિંસુ, સાદરં સીહળા ખિલા.

૨. સો રાજા દમિળે હન્તું, ધનં સઞ્ચિય’નેકાધા;

સઙ્ગહં સેવકાનઞ્ચ, કુરુમાનો યથોચિતં.

૩. અલઙ્કારકિરીટાનિ, છત્તસીહાસનાનિ ચ;

કારયિત્વા’ભિસેકત્થં, સચિવેહા’ભિયાચિતો.

૪. ન યાવ રાજરટ્ઠસ્સ, ગહણં હોતિ તાવ મે;

છત્તુસ્સાપનકમ્મેન, કિં તેના’તિ વિવારિય.

૫. સતં નરસહસ્સાનં, સઙ્કલેત્વા મહબ્બલો;

સઙ્ગામારબ્ભ કાલમ્હિ, વાતરોગાભિપીળિતો.

૬. યુજ્ઝિતું સમયો નેતિ, દ્વાદસે વચ્છરે લહું;

ઉપેચ્ચ દેવનગરં, ગઞ્છિદેવસહબ્યતં.

૭. કિત્તિનામો ચ સચિવો, સેનાપચ્ચમધિટ્ઠિતો;

રજ્જત્થિકો દિનાનટ્ઠ, નિજાણં સમ્પવત્તયિ.

૮. ઘાતેત્વા તં મહાલાન-કિત્તિનામો મહબ્બલો;

પત્વા’ભિસેકં ભુઞ્જન્તો, દેસં તં રોહણવ્હયં.

૯. સંવચ્છરમ્હિ તતિયે, ચોળયુદ્ધે પરાજિતો;

સહત્થેન સકં સીસં, છિન્દિત્વા સહસા મરિ.

૧૦. તદાપિતે કિરીટાદિ-ધનસારં સમાદિય;

પેસેસું દમિળા ચોળ-મહીપાલસ્સ સન્તિકં.

૧૧. ભયા સરટ્ઠં હિત્વા’થ, દુટ્ઠદેસે વસં તદા;

એકો વિક્કમપણ્ડૂતિ, વિસ્સુતો પત્થિવત્તજો.

૧૨. વિઞ્ઞાતલઙ્કાવુત્તન્તો, દેસમાગમ્મ રોહણં;

કાળતિત્થે વસં વસ્સ-મેકં રજ્જમકારયિ.

૧૩. રામન્વયસમુબ્ભૂતો, તદાયુજ્ઝ પુરાગતો;

જગતી પાલનામેન, વિસ્સુતો ભૂભુજત્તજો.

૧૪. રણે વિક્કમપણ્ડુતં, ઘાતાપેત્વા મહબ્બલો;

તતો ચત્તારિ વસ્સાનિ, રજ્જં કારેસિ રોહણે.

૧૫. તમ્પિ ચોળારણે હન્ત્વા, મહેસિં ધીતરા સહ;

વિત્તસારઞ્ચ સાકલં, ચોળરટ્ઠમપેસયું.

૧૬. રાજા પરક્કમો નામ, પણ્ડુરાજસુતો તતો;

અકા વસ્સદ્વયં ચોળા, ઘાતેસું તમ્પિ યુજ્ઝિય.

૧૭. ઇમે ભુસં લોભબલાભિભૂતા,

ગતા અસેસા વિવસા વિનાસં;

ઇચ્ચેવમઞ્ઞાય સદા સપઞ્ઞો,

તણ્હક્ખયેયેવ રતિં કરેય્ય.

સુજનપ્પસાદસંવેગત્થાય કતે મહાવંસે

છ રાજકો નામ

ચતુપઞ્ઞાસતિમો પરિચ્છેદો.