તિવઞ્ઞાસતિમ પચ્છેદ

લંકાવિલોપોનામ

૧. મહિન્દો તં કણિટ્ઠો સો, રાજપુત્તો તદચ્ચયે;

ઉસ્સાપિય સેતચ્છત્ત-મનુરાધપુરે વરે.

૨. સેન સેનાનીના’નીત દેસન્તરજના કુલે;

તત્થ વાસમકપ્પેસિ, કિચ્છેન દસવચ્છરે.

૩. અપેતનીતિ મગ્ગસ્સ, મુદુભૂતસ્સ સબ્બસો;

ઉપ્પાદભાગં નાદંસુ, તસ્સ જાનપદા તદા.

૪. અચ્ચન્તં ખીણચિત્તો સો, વસ્સમ્હિ દસમે વિભૂ;

વુત્તિદાનેન નાસક્ખિ, સઙ્ગહેતું સકં બલં.

૫. અલદ્ધ વુત્તિનો સબ્બે, કેરળા સહિતા તતો;

ન વુત્તિદાનં નો યાવ, હોતિ માતાવ ભુઞ્જતુ.

૬. ઇતિ રાજઘરદ્વારે, સાહસેકરસા ભુસં;

ચાપહતા નિસીદિંસુ, સન્નદ્ધછુરિકાયુધા.

૭. હત્થસારં સમાદાય, તે વિવઞ્ચિય ભૂપતિ;

ઉમ્મગ્ગતો વિનિગ્ગમ્મ, તુરિતો રોહણં અગા.

૮. સીદુપબ્બતગામમ્હિ, ખન્ધવારં નિબન્ધિય;

ભાતુ જાયમ્મ હેસિત્તે, ઠપેત્વા સો તહિં વસી.

૯. ન ચિરસ્સેવ તસ્સાય, મતા યસમહીપતિ;

મહેસિત્તે નિવેસેસિ, સકભાતુસ્સ ધીતરં.

૧૦. દેવિયા તાય સઞ્જાતે, સુતે કસ્સપનામકે;

અજ્ઝાવુત્તં વિહાયા’થ, ખન્ધાવારં મહીમતિ.

૧૧. કારયિત્વાન નગરં, કપ્પગલ્લકગામકે;

અધિપચ્ચં પવત્તેન્તો, રોહણે સુચિરં વસી.

૧૨. તતો સેસેસુ ઠાનેસુ, કેરળા સીહળા તદા;

કણ્ણાટા ચ યથાકામ-માધિપચ્ચં પવત્તયું.

૧૩. અથસ્સ વાણિજો એકો, પરતીરં ઇધાગતો;

ગન્ત્વા પવત્તિં લંકાય, ચોળરઞ્ઞો નિવેદયિ.

૧૪. સોતં સુણિત્વા પેસેસિ, લંકાગહણમાનસો;

બલં મહન્તં બલવા, તં ખિપ્પં લંકમોતરિ.

૧૫. પટ્ઠાયો તિણ્ણઠાનમ્હા, વિહેઠેન્તં બહૂ જને;

અનુક્કમેન તં ચોળ-બલં રોહણમજ્ઝગા.

૧૬. છત્તિંસે રાજિનો વસ્સે, મહેસિં રતનાનિ ચ;

મકુટઞ્ચ કમાયાતં, સબ્બમાભરણં તથા.

૧૭. અમૂલિકઞ્ચવજિર-વલયં દેવદત્તિયં;

અચ્છેજ્જચ્છુરિકં છિન્ન-પટ્ટિકા ધાતુકઞ્ચ તે.

૧૮. પવિટ્ઠં વનદુગ્ગમ્હિ, ભયાતઞ્ચ મહીપતિં;

જીવગ્ગાહમગણ્હિંસુ, સન્ધિલેસમ્પદસ્સિય.

૧૯. મહીપાલં ધનં તઞ્ચ, સબ્બં હત્થગતં તતો;

પેસયિંસુ લહું ચોળ-મહીપાલસ્સ સન્તિકં.

૨૦. નિકાયત્તિતયે ધાતુ-ગબ્ભે લંકાતલે ખિલે;

મહારહે સુવણ્ણાદિ-પટિબિમ્બે ચ’નપ્પકે.

૨૧. ભિન્દિત્વા સહસા સબ્બે, વિહારે ચ તહિં તહિં;

યથો જોહારિનો યક્ખા, લઙ્કાયં સારમગ્ગહું.

૨૨. તે ચોળા રાજરટ્ઠં તં, પુલત્થિપુરનિસ્સિતા;

રક્ખપાસાણકણ્ડવ્હ, ઠાનાવધિમભુઞ્જિસું.

૨૩. તં કુમારકમાદાય, કસ્સપં રટ્ઠવાસિનો;

વડ્ઢેન્તિ ચોળભયતો, ગોપયન્તા સુસાદરા.

૨૪. ચોળરાજા કુમારં તં, સુત્વા દ્વાદસવસ્સિકં;

ગહણત્થાય પેસેસિ, મહામચ્ચે મહાબલે.

૨૫. ઊનં પઞ્ચસહસ્સેન, યોધલક્ખં સમાદિય;

સબ્બં તે રોહણં દેસં, સઙ્ખોભેસુ મિતો તતો.

૨૬. કિત્તિનામો’થ સચિવો, મક્ખકુદ્રૂસવાસિકો;

મુદ્ધનામો તથામચ્ચો, મારગલ્લકવાસિકો.

૨૭. ઉભોપિ તે મહાવીરા, યુદ્ધોપાયવિચક્ખણા;

ચોળસેનં વિનાસેતુ-મચ્ચન્તકતનિચ્છયા.

૨૮. પલુટ્ઠગિરિનામમ્હિ, ઠાને દુગ્ગે નિવેસિય;

કત્વા છમાસં સઙ્ગામં, હનિંસુ દમિળે બહૂં.

૨૯. હતાવસિટ્ઠા ચોળાતા, રણે તસ્મિં ભયદ્દિતા;

પલાયિત્વા યથાપુબ્બં, પુલત્તિપુરમાવસું.

૩૦. કુમારો જયિતો દિસ્વા, ઉભો તે સચિવે તદા;

હટ્ઠતુટ્ઠો ‘‘વરં તાતા, ગણ્હથા’’તિ સ ચબ્રવી.

૩૧. બુદ્ધો પવેણિગામં સો, વરં યાચિત્થ કિત્તિકો;

સઙ્ઘિકં ગહિતં ભાગં, વિસ્સજ્જેતું વરં વરિ.

૩૨. રાજપુત્તવરાલદ્ધ-વરા’મચ્ચવરા તદા;

નિદ્દરા સાદરા વીરા, પાદે વન્દિંસુ તસ્સ તે.

૩૩. રાજા દ્વાદસવસ્સાનિ, વસિત્વા ચોળમણ્ડલે;

અટ્ઠતાલીસવસ્સમ્હિ, મહિન્દો સો દિવંગતો.

૩૪. પમાદ દોસાનગતેન એવં,

લદ્ધા’પિ ભોગાનનથિરા ભવન્તિ;

ઇચ્ચપ્પમંદં હિતમાસસાનો,

નિચ્ચં સુવિઞ્ઞૂસુસમા ચરેય્ય.

સુજનપ્પસાદસંવેગત્થાય કતે મહાવંસે

લંકાવિલોપો નામ

તિપઞ્ઞાસતિમો પરિચ્છેદો.