દ્વિપઞ્ઞાસતિમ પરિચ્છેદ

તિરાજકોનામ

૧. તતો લઙ્કાભિસેકં સો, પત્વા સેનો કમાગતં;

મહિન્દસ્સાદિપાદસ્સ, યુવરાજપદં અદા.

૨. પઞ્ઞો મહાકવી બ્યત્તો, મજ્ઝત્તો મિત્તસત્તુસુ;

યુત્તો દયાય મેત્તાય, રાજા સો સબ્બદા અહુ.

૩. કાલં દેવો’નતિક્કમ્મ, સમ્મા ધારાભિવસ્સતિ;

રટ્ઠે તસ્મિં વસન્તા’સું, સુખિતા નિબ્ભયા સદા.

૪. સુત્તન્તં લોહપાસાદે, નિસિન્નો વણ્ણયી તદા;

નિકાયત્તયવાસીહિ, રાજા સો પરિવારિતો.

૫. દાઠધાતુકરણ્ડં સો, નાનારતનભૂસિતં;

અકા ચતુવિહારેસુ, ધાતુપૂજા ચ’નેકધા.

૬. પરિવેણં સિત્થગામં, કારેત્વા વુત્થમત્તના;

લોકં પુત્તંવ પાલેત્વા, તિવસ્સેન દિવઙ્ગતો.

૭. યુવરાજા મહિન્દો સો, રાજાસિ તદનન્તરં;

મહાપુઞ્ઞો મહાતેજો, મહાસેનો મહાયસો.

૮. એકચ્છત્તં અકા લઙ્કં, ઘાતેત્વા ચોરુપદ્દવં;

અકંસુ તમુપટ્ઠાનં, નિચ્ચમણ્ડલનાયકં.

૯. વિજ્જમાનેપિ લઙ્કાયં, ખત્તિયાનં નરાધિપો;

કાલિઙ્ગચક્કવત્તિસ્સ, વંસે જાતં કુમારિકં.

૧૦. આણાપેત્વાન તં અગ્ગ-મહેસિં અત્તનો અકા;

તસ્સા પુત્તા દુવે જાતા, ધીતા એકા મનોરમા.

૧૧. આદિપાદે અકા પુત્તે, ધીતરં ચોપરાજિનિં;

ઇતિ સીહળવંસઞ્ચ, પટ્ઠપેસિ સભૂપતિ.

૧૨. બલકાયં ઇમં દેસં, મદ્દનત્થાય વલ્લભો;

પેસેસિ નાગદીપં સો, સુત્વા તં ભૂપતિ ઇધ.

૧૩. બલં દત્વાન સેનવ્હ-રાજસેનાપતિં તદા;

વલ્લભસ્સ બલેને’સ, યુજ્ઝિતું તત્થ પેસયિ.

૧૪. ગન્ત્વા સેનાપતી તત્થ, બલેને’તસ્સ રાજિનો;

યુજ્ઝિત્વા તં વિનાસેત્વા, ગણ્હિ સો યુદ્ધમણ્ડલે.

૧૫. અસક્કેન્તો ઇમં જેતું, રાજા નં વલ્લભાદયો;

રાજાનો મિત્તસમ્બન્ધં, લંકિન્દેન અકંસુ તે.

૧૬. ઇચ્છેવં રાજિનો તેજો, જમ્બુદીપમવત્થરિ;

પત્થરિત્વાન લંકાયં, ઉલ્લઙ્ઘિત્વાન સાગરં.

૧૭. સદ્ધમ્મં કથાયન્તાનં, કત્વા સમ્મા ન મુત્તમં;

ધમ્મં સુત્વાન સો રાજા, પસન્નો બુદ્ધસાસને.

૧૮. રાજા સો સન્નિપાતેત્વા, પંસુકૂલિકભિક્ખવો;

યાચિત્વા અત્તનો ગેહં, આણાપેત્વાન સાધુકં.

૧૯. આસનં પઞ્ઞપેત્વાન, નિસીદાપિય ભોજનં;

દાપેસિ વિપુલં સુદ્ધં, સદા એકદિને વિય.

૨૦. અનેકબ્યઞ્જનં રાજા-રઞ્ઞકાનં તપસ્સિનં;

પેસેસિ ભોજનં સુદ્ધં, મહગ્ઘં વિપુલં સદા.

૨૧. વેજ્જેવ પેસયિત્વાન, વિલાનાનં તપસ્સિનં;

સન્તિકં સો દયાવાસો, તિકિચ્છાપેસિ નિચ્ચસો.

૨૨. ગુળાનિ ઘનપાકાનિ, લસુણાનં રસાનિ ચ;

તમ્બુલમુખવાસઞ્ચ, પચ્છભત્તે અદા સદા.

૨૩. પત્તેસુ પૂરયિત્વાન, લસુણં મરિચમ્પિ ચ;

પિપ્ફલિસઙ્ગીવેરાનિ, ગુળાનિ તિફલાનિ ચ.

૨૪. ઘતં તેલં મધુઞ્ચાય, પાપુરત્થરણાનિ ચ;

પંસુકૂલિકભિક્ખૂનં, પચ્ચેકં સબ્બદા અદા.

૨૫. ચીવરાદીનિ સબ્બાનિ, પરિક્ખારાનિ ભૂપતિ;

કારાપેત્વાન દાપેસિ, ભિક્ખૂનં પંસુકુલિનં.

૨૬. રાજા મહાવિહારસ્મિં, એકેકસ્સ હિ ભિક્ખુનો;

પચ્ચેકં નવવત્થાનિ, ચીવરત્થાય દાપયિ.

૨૭. નિકાયત્તયવાસીનં, ભિક્ખૂનં લાભવાસિનં;

તુલાભારમદા દ્વીસુ, વારેસુ સમહીપતિ.

૨૮. રાજા સો નાગતેભોગં,

રાજાનો સઙ્ઘભોગતો;

ન ગણ્હન્તૂનિ પાસાણે,

લિખાપેત્વા નિધાપયિ.

૨૯. કથાપેત્વાન બુદ્ધસ્સ, સરણાનિ ગુણેનવ;

અનાથેહિ ચ તેસઞ્ચ, ભત્તવત્થાનિ દાપયિ.

૩૦. દાનસાલં કરિત્વાન, હત્થિસાલકભૂમિયં;

યાચકાનં અદા દાનં, તેસઞ્ચ સયનાસનં.

૩૧. વેજ્જસાલાસુ સબ્બાસુ, ભેસજ્જં મઞ્ચકઞ્ચ સો;

ચોરાનં બન્ધનાગારે, નિચ્ચં ભત્તાનિ દાપયિ.

૩૨. વાનરાનં વરહાનં, મિગાનં સુનખાન ચ;

ભત્તં પૂવઞ્ચ દાપેસિ, દયાવાસો યથિચ્છકં.

૩૩. રાજા ચતુવિહારેસુ, કત્વા સો વીહિરાસયો;

યથિચ્છિતેન ગણ્હન્તુ, અનાથા ઇતિ દાપયિ.

૩૪. નાનાપૂજાહિ પૂજેત્વા, કત્વા મઙ્ગલમુત્તમં;

કથાપેસિ ચ ભિક્ખૂહિ, બ્યત્તેહિ વિનયં તદા.

૩૫. થેરેન ધમ્મમિત્તેન-સિત્થગામકવાસિના;

પૂજયિત્વાન કારેસિ, અભિધમ્મસ્સ વણ્ણનં.

૩૬. દાઠાનાગા’ભિધાનેન, થેરેના’રઞ્ઞવાસિના;

લંકાલંકારભૂતેન, અભિધમ્મં કથાપયિ.

૩૭. પટ્ટકઞ્ચુકપૂજાહિ, હેમમાલિકચેતિયં;

નચ્ચગીતેહિ ગન્ધેહિ, પુપ્ફેહિ વિવિધેહિ ચ.

૩૮. દીપમાલાહિ ધૂપેહિ, પૂજયિત્વાન’નેકધા;

તસ્સ વત્થાનિ ભાજેત્વા, ભિક્ખૂનં દાપયી સયં.

૩૯. સદા સો અત્તનો રજ્જે, ઉય્યાનેસુ તહિંતહિં;

આણાપેત્વાન પુપ્ફાનિ, પૂજેસિ રતનત્તયં.

૪૦. પાસાદં ચન્દનં નામ, કાતું મરિચવટ્ટિયં;

અકારમ્ભઞ્ચ ભિક્ખૂનં ભોગગામે ચ દાપયિ.

૪૧. કેસધાતું નિધાપેત્વા, કરણ્ડં રતનેહિ સો;

કારયિત્વાન પૂજેસિ, ઠપેત્વા તત્થ ભૂપતિ.

૪૨. સોણ્ણરજતપટ્ટેહિ, થૂપારામમ્હિ ચેતિયં;

છાદાપેત્વા યથારજ્જં, પૂજં કારેસિ ભૂપતિ.

૪૩. તસ્મિં ધાતુઘરે રાજા, સોણ્ણદ્વારમકારયિ;

પજ્જલન્તં સિનેરુંવ, રંસીહિ સૂરિયસ્સ સો.

૪૪. ઝાપિતં ચોળરાજસ્સ, બલેન પદલઞ્છને;

ચતુન્નં ચેતિયાનં સો, રમનીયં ઘરં અકા.

૪૫. ઝાતં નગરમજ્ઝમ્હિ, દાઠાધાતુઘરં અકા;

ધમ્મસઙ્ગણીગેહઞ્ચ, મહાપાળિઞ્ચ ભૂપતિ.

૪૬. તમ્બૂલમણ્ડપં કત્વા, તત્થ સુઙ્કં મહીપતિ;

ભિક્ખૂનં થેરવંસે સો, ભેસજ્જત્થાય દાપયિ.

૪૭. ઉપસ્સયં કરિત્વાન, મહામઙ્ગલનામકં;

થેરવંસમ્હિ જાતાનં, ભિક્ખુનીનં અદાપયિ.

૪૮. માતુલોદયરાજેન, આરદ્ધં સાધુના તદા;

નિટ્ઠાપેસિ મહીપાલો, પાસાદં મણિનામકં.

૪૯. પરિવેણાનિ ચત્તારિ, તસ્મિં જેતવને તદા;

કારાપયિંસુ ચત્તારો, અમચ્ચા તસ્સ રાજિનો.

૫૦. રઞ્ઞો કિત્તિસમાદેવી, કિત્તિનામા મનોરમા;

પરિવેણં અકારામં, થૂપારામસ્સ પચ્છતો.

૫૧. સા તસ્મિં પરિવેણે ચ, અકા કપ્પાસગામકે;

ચીવરચેતિયે ચેવ, તિસ્સો પોક્ખરણી સુચિ.

૫૨. દ્વાદસરતનાયામં, ધજં સોણ્ણમયઞ્ચ સા;

પૂજેસિ પુઞ્ઞસમ્ભારં, હેમમાલિક ચેતિયે.

૫૩. ગિહીનં વજ્જસાલઞ્ચ, પુત્તો તસ્સા પુરેઅકા;

ગુણવાસક્કસેનાની, ભિક્ખૂનઞ્ચ પુરાબહિ.

૫૪. રાજા ચતુવિહારેસુ, દિબ્બપાસાદસન્નિભે;

મણ્ડપે કારયિત્વાન, ધાતુપૂજા અનેકધા.

૫૫. વસ્સમેકમતિક્કમ્મ, કારાપેત્વા મહીપતિ;

ચારિત્તં પુબ્બરાજૂનં, પરિપાલેસિ સાધુકં.

૫૬. એવમાદીનિ પુઞ્ઞાનિ, ઉળારાનિ અનેકધા;

કત્વા સોળસમે વસ્સે, રાજા સો તિદિવં ગતો.

૫૭. જાતો પટિચ્ચ તં રાજં, સેના દ્વાદસવસ્સિકો;

કાલિઙ્ગદેવિયા પુત્તો, પત્તરજ્જો તદા અહુ.

૫૮. ઉદયસ્સ કનિટ્ઠસ્સ, યુવરાજપદં અદા;

પિતુ સેનાપતિ સેનો, તસ્સ સેનાપતિ અહુ.

૫૯. પચ્ચન્તં બલમાદાય, ગતે સેનાપતિમ્હિ સો;

માતરા સહ વત્તન્તં, કણિટ્ઠં તસ્સ ભાતરં.

૬૦. મારાપેત્વા મહામલ્લં, અકા સેનાપતિં તદા;

અમચ્ચં ઉદયં નામ, સકં વચનકારકં.

૬૧. તં સુત્વા કુપિતો હુત્વા, સેનો સેનાપતિ તદા;

બલમાદાય આગઞ્છિ, ગણ્હિસ્સામીતિ સત્તવો.

૬૨. સુત્વાન તં મહીપાલો, કતવન્તં વાચમત્તનો;

રક્ખામિ તં અમચ્ચન્તિ, ગતો નિક્ખમ્મ રોહણં.

૬૩. તસ્સ માયા નિવત્તિત્વા, યુવરાજઞ્ચ રાજિનિં;

આદાય કુપિતા તેન આણાપેસિ ચમૂપતિં.

૬૪. તાય સો સઙ્ગહીતોવ, દમિળે સન્નિપાતિય;

દત્વા જનપદં તેસં, પુટત્થિનગરે વસી.

૬૫. યુજ્ઝિતું તેન સો રાજા, બલં પેસેસિ રોહણા;

સેનાપતિ વિનાસેસિ, સબ્બં તં રાજિનો બલં.

૬૬. દમિળા તે જનપદં, પીળેત્વા રક્ખસા વિય;

વિલુમ્પિત્વાન ગણ્હન્તિ, નરાનં સન્તકં તદા.

૬૭. ખિત્તા મનુસ્સા ગન્ત્વાન, રોહણં રાજસન્તિકં;

નિવેદેસું પવત્તિં તં, મન્તેત્વા સચીવેહિ સો.

૬૮. રક્ખિતું સાસનં રટ્ઠં, તમ્પહાય ચમૂપતિં;

સન્ધિં કત્વાન સેનેન, પુળત્થિનગરં અગા.

૬૯. મહેસિં અત્તજં કત્વા, પાલેતું વંસમત્તનો;

પુત્તં ઉપ્પાદયિત્વાન, કસ્સપં નામ ઉત્તમં.

૭૦. વસન્તે તત્થ લંકિન્દે, અહિતા વલ્લભા જના;

અલભન્તા સુરં પાતુ-મારિયા તસ્સ સન્તિકે.

૭૧. મજ્જપાને ગુણં વત્વા, પાયેસું તં મહીપતિં;

પિવિત્વા મજ્જપાનં સો, મત્તબ્યાળો અહુ તદા.

૭૨. આહારાનં ખયં પત્વા, ચજિત્વા દુલ્લભં પદં;

મતો સો દસમે વસ્સે, તરુણોયેવ ભૂપતિ.

૭૩. ઇતો વિદિત્વા ખલુપાપમિત્ત-

વિધેય્યભાવં પરિહાનિ હેતું;