એકપઞ્ઞાસતિમ પરિચ્છેદ

પઞ્ચરાજકો નામ

૧. યુવરાજા તદા હુત્વા, રાજા દપ્પુળનામકો;

ઠપેસિ ઓપરજ્જમ્હિ, આદિપદં સનામકં.

૨. મરિચવટ્ટિવિહારસ્સ, ગામં દત્વા તતો પુરે;

ચારિત્તં પુબ્બરાજૂનં, રક્ખિત્વાન મહિં ઇમં.

૩. અભુત્વા દીઘકાલઞ્હિ, પુબ્બકમ્મેન અત્તનો;

રાજા સો સત્તમે માસે, પવિટ્ઠો પચ્ચુનો મુખં.

૪. ઉપરાજા અહુરાજા, દપ્પુળો તદનન્તરં;

ઉદયસ્સાદિપાદસ્સ, યુવરાજપદં અદા.

૫. તદા ચોળભયા પણ્ડુ-રાજં જનપદં સકં;

ચજિત્વા નાવમારુય્હ, મહાતિત્થમુપાગમિ.

૬. આણાપેત્વાન તં રાજા, દિસ્વા સન્તુટ્ઠમાનસો;

મહાભોગં અદા તસ્સ, નિવાસેસિ પુરા બહિ.

૭. ચોળરાજેન યુજ્ઝિત્વા, ગહેત્વા પટ્ટનદ્વયં;

પણ્ડુરાજસ્સ દમ્મીતિ, સન્નદ્ધે લઙ્કરાજિનિ.

૮. કેના’પિ કરણીયેન, ખત્તિયા દીપવાસિનો;

અકંસુ વિગ્ગહં ઘોરં, પાપકમ્મેન પણ્ડુનો.

૯. પણ્ડુરાજે’ત્થ વાસેન, કમ્મં નત્થીતિ ચિન્તિય;

ઠપેત્વા મકુટાદીનિ, ગતો કેરળસન્તિકં.

૧૦. વિગ્ગહે નિટ્ઠિતે રાજા, મહામેઘવને તદા;

મહાબોધિઘરસ્સા’દા, ગામં નગરસન્તિકે.

૧૧. આવાસં રક્ખકો નામ, તસ્સ સેનાપતી અકા;

થૂપારામસમીપમ્હિ, ઇળઙ્ગો રાજનામકં.

૧૨. કતં તં પુબ્બરાજેહિ, રાજા સો પરિપાલિય;

પત્તો દ્વાદસમં વસ્સં, યથાકમ્મમુપાગમિ.

૧૩. ઉદયો યુવરાજા’સિ, લંકાવાસીનમિસ્સરો;

સેનનામાદિપાદં સો, ઓપરજ્જે’ભિસેચયિ.

૧૪. રઞ્ઞો ભીતા તદામચ્ચા, પવિસિંસુ તપોવનં;

રાજોપરાજા ગન્ત્વાન, તેસં સીસાનિ છેદયું.

૧૫. તેન કમ્મેન નિબ્બિન્ના, યતયો તન્નિવાસિનો;

હિત્વા જનપદં રઞ્ઞો, તદાગચ્છિંસુ રોહણં.

૧૬. તદા જાનપદા ચેવ, નાગરા ચ બલાનિ ચ;

કુપિતા ચણ્ડુવાતેન, સાગરો વિય કમ્પિતો.

૧૭. રતનપાસાદમારુય્હ, વિહારે અભયુત્તરે;

સન્તાસેત્વાન રાજાનં, દસ્સેત્વાન વિભીસિકં.

૧૮. ઉપત્થમ્ભકમચ્ચાનં, વિગ્ગહસ્સ તપોવને;

તદા સીસાનિ છિન્દિત્વા, કવાતેન નિપાતયું.

૧૯. તં સુત્વા યુવરાજા ચ, આદિપાદો ચ તં સખા;

ઉલ્લઙ્ઘિત્વાન પાકારં, સીઘં ગચ્છિંસુ રોહણં.

૨૦. બલકાયોનુબન્ધિત્વા, યાવ કણ્હનદીતટા;

અલાભેન ચ નાવાનં, તિણ્ણત્તા તેસમાગમિ.

૨૧. રાજપુત્તાગતા તત્થ, વને અભયભેદિનો;

યતીનં પુરતો તેસં, નિપજ્જિત્વા ઉરેન તે.

૨૨. અલ્લવત્થા’લ્લકેસા ચ, પરિદેવિત્થ’નેકધા;

કન્દીત્વા રોદનં કત્વા, ખમાપેસું તપસ્સિનો.

૨૩. ખન્તિમેત્તાનુભાવેન, તેસં સાસનસામિનં;

પુઞ્ઞોદયો અહુ તેસં, ઉભિન્નં દીપસામિનં.

૨૪. યુવરાજબલઞ્ચેવ, નિકાયત્તયવાસિનો;

ગમિંસુ તેસમાનેતું, સન્તિભૂતે મહાબલે.

૨૫. રાજપુત્તા ઉભો બ્યત્તા, પણ્ડિતા પંસુકૂલિનો;

યાચિત્વા તેસમાદાય, અગમંસુ સકં પુરં.

૨૬. ભિક્ખૂનં પુરતો મગ્ગં, રાજાગન્તા ખમાપયિ;

આદાય તે વનં તેસં, નેત્વા રાજઘરં ગતો.

૨૭. તતો પટ્ઠાય ચારિત્થં, પાલેત્વા પુબ્બરાજુનં;

રાજા સો તતિયે વસ્સે, યથાકમ્મમુપાગમિ.

૨૮. લંકાભિસેકં પત્વાન, સેનો સો મતિમા તતો;

ઉદયં આદિપાદં તં, યુવરાજં અકા સખં.

૨૯. કહાપણસહસ્સં સો, દુગ્ગતાનં ઉપોસથે;

હોતુ’પોસથિકો દત્વા, યાવજીવં નરાધિપો.

૩૦. પટિમા ભત્તવત્થાનિ, ભિક્ખૂનં ધરણી પતિ;

અદા દણ્ડિસ્સરં દાનં, યાચકાનઞ્ચ સિપ્પીનં.

૩૧. ઠાને કત્થચિ સિપ્પીનં, પાસાદેસુ મનોહરે;

કારેત્વા ભોગગામે ચ, અદાપેસિ મહામતિ.

૩૨. કહાપણસહસ્સં વા, દત્વા પઞ્ચસતાનિ વા;

લઙ્કાયં જિણ્ણકાવાસે, નવકમ્મમકારયી.

૩૩. ચત્તાલીસસહસ્સાનિ, અભયુત્તરચેતિયે;

સિલાપત્થરણત્થાય, દાપેસિ ચ મહીપતિ.

૩૪. મહાવાપીસુ લંકાયં, જિણ્ણનિદ્ધમને અકા;

નવકમ્મઞ્ચ મરિયાદં, થિયં પાસાણપંસુના.

૩૫. અકા રાજઘરે રમ્મં, માલાગેહં મહારહં;

ઠપિતં પુનરાજૂહિ, દાનં સમ્માપવત્તયિ.

૩૬. કતં મલયરાજેન, અમચ્ચેન’ગ્ગ બોધિના;

પરિવેણં નાગસાલં, દિસ્વા ગામ મદા તદા.

૩૭. કત્વા ચતુવિહારેસુ, રૂપકમ્માનિ સાધુકં;

મણ્ડપાનિ ચ રમ્માનિ, ધાતુપૂજં અકા સદા.

૩૮. એવમાદીનિ પુઞ્ઞાનિ, અનેકાનિ અનેકધા;

કત્વા સો નવમે વસ્સે, યથાકમ્મમુપાગમિ.

૩૯. લંકાભિસેકં પત્વાન, યુવરાજોદયો તતો;

સેનનામાદિપાદં સો, ઓપરજ્જે’ભિ સેચયિ.

૪૦. નિદ્દાલુ મજ્જપો આસિ, રાજા પાપેન જન્તુનં;

ચોળો પમત્તતં તસ્સ, સુત્વા સન્તુટ્ઠમાનસો.

૪૧. પણ્ડુદેસાતિસેકં સો, પત્તુકા મેત્થ પેસયિ;

મકુટાદીનમત્થાય, ઠપિતાનંવ પણ્ડુના.

૪૨. તાનિ નાદાસિ સો રાજા, તેન ચોળો મહબ્બલો;

બલં સન્નય્હ પેસેસિ, બલક્કારેન ગણ્હિતું.

૪૩. તદા સેનાપતિ એત્થ, પચ્ચન્તે કુપિતે ગતો;

આણાપેત્વાન તં રાજા, યુજ્ઝનત્થાય પેસયિ.

૪૪. હતો સેનાપતિ તત્થ, યુજ્ઝિ ન રણે મતો;

કકૂટાદીનિ આદાય, રાજા સો રોહણં અગા.

૪૫. ગન્ત્વા ચોળબલં તત્થ, અલભિત્વા પવેસનં;

નિવત્તિત્વા સકં રટ્ઠં, અગમાસિ ઇધતા ભયા.

૪૬. તતો સેનાપતિટ્ઠાને, વિદુરગ્ગં તુ નાયકં;

ઠપેસિ રાજા લંકિન્દો, તેજવન્તં મહામતિં.

૪૭. પચ્ચન્તં ચોળરાજસ્સ, ઘાતેત્વા સો ચમૂપતિ;

આણાપેસિ ઇતો નીતં, દસ્સેત્વાન વિભીસિતં.

૪૮. તતો દાપેસિ સો સબ્બ-પરિક્ખારં મહારહં;

પંસુકૂલિકભિક્ખૂનં, સબ્બેસં દીપવાસિનં.

૪૯. મહાવિહારે લંકિન્દો, પટિબિમ્બસ્સ સત્થુનો;

જલન્તં મણિરંસીહિ, અકા ચૂળામણિં તદા.

૫૦. ઓરોધા વિદુરા તસ્સ, પાદજાલેન પૂજયિ;

મણીહિ પજ્જલન્તેહિ, પટિમં તં સિલામયં.

૫૧. ઝાપિતં ચોળરાજસ્સ, બલેન મણિનામકં;

પાસાદં કાતુમારદ્ધો, ચુતો વસ્સમ્હિ અટ્ઠમે.

૫૨. પઞ્ચેતે વસુધાધિપા વસુમહિં એકાતપત્તઙ્કિતં;

ભુત્વા નિગ્ગહસઙ્ગહેહિ સકલં લોકં વસે વત્તિય;

યા તા મચ્ચુવસં સપુત્તવણિતા સામચ્ચમિત્તાનુગા;

ઇચ્ચેવં સતતં સરન્તુ સુજના હાતું પમાદં મદં.

સુજનપ્પસાદસંવેગત્થાય કતે મહાવંસે

પઞ્ચરાજકો નામ

એકપઞ્ઞાસતિમો પરિચ્છેદો.