પઞ્ઞાસતિમ પરિચ્છેદ

દ્વિરાજકોનામ

૧. તતો રજ્જે પતિટ્ઠાય, કસ્સપો દક્ખિણં દિસં;

અદા કસ્સપનામસ્સ, યુવરાજસ્સ ધીમતો.

૨. અગ્ગાભિસેકં દાપેસિ, યુવરાજસ્સ ધીતુયા;

રાજકઞ્ઞાય તિસ્સાય, ભરિયાયે’વ અત્તનો.

૩. યાચકાનઞ્ચ સિપ્પીનં, આગતાનં તતો તતો;

દાનં દણ્ડિસ્સરં નામ, સદા દાપેસિ ભૂપતિ.

૪. આદિપાદો મહિન્દો સો,

વસન્તો રોહણે તદા;

ગહેતું રાજિનોરટ્ઠ-

માદાય બલમાગતો.

૫. તં સુત્વા કુપિતો રાજા, બલં પેસેસિ અત્તનો;

યુજ્ઝિત્વા તં પરાજેસિ, મહિન્દો સો મહાભટો.

૬. તતો રાજા નિવત્તેતું, પિતરં તસ્સ પેસયિ;

કસ્સપં યુવરાજં તં, સો ગન્ત્વા પુત્તસન્તિકં.

૭. નાનાધમ્મકથોપેતં, વત્વા યુત્તિમનેકધા;

સઙ્ઘામતો નિવત્તેત્વા, પુત્તં સો પુનરાગમિ.

૮. આદિપાદો તુ સો પચ્છા, ઘાતેત્વા મણ્ડલાધિપે;

કુદ્ધેજનપદે દિસ્વા, અગમાસિ પુરન્તિકં.

૯. ભિક્ખુસઙ્ઘો તમાનેત્વા, દસ્સેસિ વસુધાધિપં;

દત્વા સો ધીતરં તસ્સા, પેસેસિ પુન રોહણં.

૧૦. નીહરિત્વાન દુસ્સીલે, નિકાયત્તયવાસીસુ;

ગાહાપેસિ નવે ભિક્ખૂ, આવાસે તત્થ તત્થ સો.

૧૧. દ્વયાભિસેકજાતેન, આદિપાદેન સુનુના;

મહાવિહારે બોધિમ્હિ, પંસું વડ્ઢેસિ પૂજયં.

૧૨. અકાસિ ચ નિકાયેસુ, તીસુ બિમ્બે સિલામયે;

સોવણ્ણયે રંસિજાલે, છત્તં ચૂળામણિં તથા.

૧૩. અભયગિરિવિહારમ્હિ, પાસાદં સકનામકં;

કત્વા તત્થ નિવાસેત્વા, ભિક્ખુ ગામમદાપયિ.

૧૪. મહિયઙ્ગણવિહારસ્મિં, ગામં સો ચેતિયસ્સ’દા;

સવત્થં પટિમાભત્તં, સબ્બભિક્ખૂન દાપયિ.

૧૫. થલે જલે ચ સત્તાનં, અદાસિ અભયં તદા;

ચારિત્તપુબ્બરાજૂનં, પરિપાલેસિ સબ્બદા.

૧૬. તસ્સ સેનાપતિ સેનો, ઇલઙ્ગોરાજવંસજો;

થેરિયાનં અકા’વાસં; થૂપારામસ્સ પચ્છતો.

૧૭. ધમ્મારુચિકભિક્ખૂનં, ધમ્મારામમકારયિ;

તથા સાગલિકાનઞ્ચ, કસ્સપસેનનામકં.

૧૮. હદયુણ્હાભિધાનં સો, કત્વા ચેતિયપબ્બતે;

પરિવેણં અદાધમ્મ-રુચિકાનઞ્ચ ભિક્ખૂનં.

૧૯. આરામિકાનં ભિક્ખૂનં, આરામેસુ તહિં તહિં;

એકમેકં કુટિં કત્વા, દાપેસિ ચ ચમૂપતિ.

૨૦. રત્તમાલગિરિસ્મિં સો, કત્વા રમ્મં તરં સુભં;

કુચિં અદા સાસનસ્સ, સામિકાનં તપસ્સિનં.

૨૧. મહાવિહારે કારેત્વા, પવિવેણં વરં અદા;

પંસુકૂલિકભિક્ખૂનં, સમુદ્દગિરિનામકં.

૨૨. વાસં અરઞ્ઞે કારેત્વા, અત્તનો વંસનામકં;

મહાવિહારે ભિક્ખૂનં, વને નિવાસતં અદા.

૨૩. વિહારેસૂ ચ જિણ્ણેસુ, નવકમ્મમકારયિ;

દાપેસિ અગ્ગલં સબ્બ-ભિક્ખૂનં જિણ્ણચીવરે.

૨૪. તિસ્સારામં કરિત્વાન, ભિક્ખૂનીનમુપસ્સયં;

મરિચવટ્ટિમહાબોધિ, પરિહારે નિવેસયિ.

૨૫. અનુરાધપુરે ચેવ, પુલત્થિનગરેપિ ચ;

ઉપસગ્ગરોગનાસાય, વેજ્જસાલાપિ કારયિ.

૨૬. અત્તના કતવાસનં, ભોગગામે ચ દાપયિ;

તથારામિકગામે ચ, પટિમાભરણઞ્ચ સો.

૨૭. ભેસજ્જગેહં કારેસિ, નગરે તત્થ તત્થ સો;

પંસુકૂલિકભિક્ખૂનં, ભત્તં વત્થઞ્ચ દાપયિ.

૨૮. ખન્ધીકતે અમોચેસિ, તિરચ્છાનગતે બહૂ;

કપણાનઞ્ચ દાપેસિ, મહાદાનં ચમૂપતિ.

૨૯. વિચિત્તં બ્યઞ્જનં ભત્તં, યાગું વિવિધખજ્જકં;

કત્વા સૂકરરૂપઞ્ચ, ગુળં ભિક્ખૂનં દાપયિ.

૩૦. એવામાદીનિ પુઞ્ઞાનિ, કત્વા સેનાય નાયકો;

સેનો કિત્તિન્દુપાદેહિ, સબ્બા ઓભાસયી દિસા.

૩૧. તસ્સેવ ઞાતકો કત્વા, નાયકો રક્ખસવ્હયો;

સવારકમ્હિ ગામમ્હિ, વિહારં સુમનોહરં.

૩૨. મહાવિહારવાસીનં, સારાનં પટિપત્તિયા;

ભિક્ખૂનં સો અદા સાધુ, ઠપેત્વા વત્તમુત્તમં.

૩૩. સેનો નામ મહાલેખો, મહાલેખકપબ્બતં;

મહાવિહારે કારેસિ, ભિક્ખૂનં વાસમુત્તમં.

૩૪. ચોળરાજાભિધાનો, ચ, અમચ્ચો તસ્સ રાજિનો;

પરિવેણં અકારમ્મં, નટ્ઠં તં સુપ્પતિટ્ઠિતં.

૩૫. રાજા તીસુ નિકાયેસુ, રૂપકમ્મમનોરમં;

મણ્ડપાનિ વિચિત્તાનિ, વેજયન્તો પમાનિ ચ.

૩૬. કારેત્વા ધાતુપૂજાયો, કત્વા જનમનોહરા;

યથા કમ્મં ગતો ઠત્વા, વસ્સાનિ દસસત્ત ચ.

૩૭. દ્વયાભિસેકસઞ્જાતો, યુવરાજાથ કસ્સપો;

આસિ લદ્ધાભિસેકો સો, લંકારજ્જેકમાગતે.

૩૮. સદ્ધો આગતમગ્ગોવ, સાભિઞ્ઞો વિય પઞ્ઞવા;

વત્તા સો મરમન્તિવ, ચાગવા ધનદો વિય.

૩૯. બહુસ્સુતો ધમ્મકથી, સબ્બસિપ્પવિસારદો;

યુત્તાયુત્તવિચારાય, નિપુણો નયકોવિદો.

૪૦. અચલો ઇન્દલીલો’વ, ઠિતો સુગતસાસને;

પરપ્પવાદિવાતેહિ, સબ્બેહિ’પિ અકમ્પિયો.

૪૧. માયાસાઠેય્યમાનાદિ, પાપાનઞ્ચ અગોચરો;

ગુણાનં આકરો સબ્બ-રતનાનં વસાગરો.

૪૨. ભૂમિચન્દો નરિન્દો સો, વંસે જાતસ્સ અત્તનો;

દપ્પુળસ્સાદીપાદસ્સ, યુવરાજપદં અદા.

૪૩. રજ્જં દસહિ ધમ્મેહિ, ચતુસઙ્ગહવત્થૂહિ;

કરોન્તો પરિપાલેસિ, લોકં નેત્તંવ અત્તનો.

૪૪. સો ધેત્વા સાસનં સબ્બં, ધમ્મકમ્મેન સત્થુનો;

ગહેત્વા નવકે ભિક્ખૂ, અકાસા’વાસપૂરણં.

૪૫. દુટ્ઠગામણિરાજેન, કતં મરિચવટ્ટિકં;

નટ્ઠં વિહારં કારેત્વા, નાનાઆવાસ ભૂસિતં.

૪૬. થેરવંસજભિક્ખૂનં, અદા કત્વા મહામહં;

તેસં પઞ્ચસતાનઞ્ચ, ભોગગામે ચ દાપયિ.

૪૭. તત્થ સો તુસિતે રમ્મે, દેવસઙ્ઘપુરક્ખતં;

મેત્તેય્યં લોકનાથં તં, દેસેન્તં ધમ્મમુત્તમં.

૪૮. દસ્સેન્તો વિય લોકસ્સ, વિહારે સબ્બસજ્જિતે;

નિસિન્નો મણ્ડપે રમ્મે, નાનારતનભૂસિતે.

૪૯. નગરેહિ ચ સબ્બેહિ, ભિક્ખૂહિ પરિવારિતો;

બુદ્ધલિલાય લંકિન્દો, અભિધમ્મ મભાસયિ.

૫૦. સોણ્ણપટ્ટે લિખાપેત્વા-ભિધમ્મપિટકં તદા;

ધમ્મસઙ્ગણિકં પોત્થં, નાનારતન ભૂસિતં.

૫૧. કત્વા નગરમજ્ઝમ્હિ, કારેત્વા હેમમુત્તમં;

તં તત્થ ઠપયિત્વાન, પરિહારમદાપયિ.

૫૨. સક્કસેનાપતિટ્ઠાનં, દત્વા પુત્તસ્સ અત્તનો;

પરિહારે નિયોજેસિ, તત્થ તં ધમ્મપોત્થકે.

૫૩. અનુસંવચ્છરં રાજા, પુરં દેવપુરી વિય;

વિભૂસિતાય સેનાય, સજ્જેત્વા પરિવારિતો.

૫૪. દેવરાજાવ સોભન્તો, સબ્બાભરણભૂસિતો;

હત્થિખણ્ડે નિસીદિત્વા, ચરન્તો પુરવીથિયં.

૫૫. મહતા પરિહારેન, નેત્વા તં ધમ્મસઙ્ગહં;

અત્તના કારિતં રમ્મં, વિહારં સબ્બસજ્જિતં.

૫૬. તત્થ ધાતુગતે રમ્મે, નાનારતનભૂસિતે;

મણ્ડપે ધાતુપિઠસ્મિં, પતિટ્ઠાપિય પૂજયિ.

૫૭. ગન્થાકરપરિવેણં, મહામેઘવને અકા;

નગરે વજ્જસાલા ચ, તેસં ગામે ચ દાપયિ.

૫૮. ભણ્ડિકપરિવેણઞ્ચ, સિલામેઘઞ્ચ પબ્બતં;

કત્વા’ભયગિરિસ્મિં સો, તેસં ગામમદાપયિ.

૫૯. જોતિવનવિહારસ્મિં, રાજા લઙ્કાય નાયકો;

ભત્તગ્ગસ્સ અદા ગામં, તથા’ભયગિરિમ્હિ ચ.

૬૦. દક્ખિણગિરિનામસ્સ, વિહારસ્સ ચ દાપયિ;

ગામં કતઞ્ઞુભાવેન, રાજા પરમધમ્મિકો.

૬૧. સક્કસેનાપતિ રમ્મં, પરિવેણં સુમાપિય;

અદાસિ સહગામેહિ, થેરિયાનં સનામિકં.

૬૨. ભરિયા વજિરા તસ્સ, તેસંયેવ અદાપયિ;

પરિવેણં કરિત્વાન, સગામં સકનામકં.

૬૩. ઉપસ્સયં કરિત્વાન, સા એવ પદલઞ્છને;

ભિક્ખૂનીનં અદા થેર-વંસે સબ્બત્થ પૂજિતે.

૬૪. સક્કસેનાપતિ માતા, દેવા’રઞ્ઞક ભિક્ખૂનં;

થેરવંસપ્પદીપાનં, અકા’વાસં સનામકં.

૬૫. સા એવ પટિબિમ્બસ્સ, સત્થુ મરિચવટ્ટિયં;

ચૂળામણિં પાદજલં, અકા છત્તઞ્ચ ચીવરં.

૬૬. રાજા રાજાલયેયેવ, રાજવંસં સનામકં;

અકાસિ પાળિકં નામ, પાસાદં સુમનો હરં.

૬૭. પૂજેસિ રાજિની નામ, રાજિનો ભરિયા’પરા;

પટ્ટકઞ્ચુકપૂજાય, હેમમાલિક ચેતિયં.

૬૮. તસ્સા પુત્તોસિ સિદ્ધત્થો, નામ ઇસ્સરિયે ઠિતો;

સુતો મલયરાજાતિ, રૂપેન મકરદ્ધજો.

૬૯. રાજા તસ્મિં મતે કત્વા, સાલં ભિક્ખુનમુત્તમં;

દાનવટ્ટં પટ્ઠપેત્વા, તસ્સ પત્તિમદા તદા.

૭૦. એવં ધમ્મેન કારેન્તે, રજ્જં લઙ્કાદીપે તદા;

ચોળરાજેન યુજ્ઝિત્વા, પણ્ડુરાજા પરાજિતો.

૭૧. પણ્ણાકારાનિ નેકાનિ, બલં સન્ધાય પેસયિ;

રાજાલંકિસ્સરો સદ્ધિં, મન્તેત્વા સચિવેહિ સો.

૭૨. સન્નય્હ બલકાયં સો, સક્કસેનાપતિં સકં;

બલસ્સ નાયકં કત્વા, મહાયિત્થમુપાગમિ.

૭૩. વિજયં પુબ્બરાજૂનં, વત્વા વેલાતટે ઠિતો;

ઉસ્સાહં જનયિત્વાન, નાવં આરોપયી બલં.