એકૂનપઞ્ઞાસતિમ પરિચ્છેદ

રાજદ્વયદીપનો

૧. એવં તસ્મિં મતે તસ્સ, કાતબ્બં સાધુકારિય;

મહાદીપાદો સેનવ્હો, આદાય બલવાહનં.

૨. આગમ્મ નગરં રાજા, અહોસિ ધરણી તલે;

આદિકપ્પમ્હિ રાજૂનં, દસ્સન્તો ચરિયં પિય.

૩. સદ્ધો મહાધનો સૂરો, મુત્તચાગી નિરાલયો;

યાચયોગો મહાભોગો, સમ્પન્નબલવાહનો.

૪. કિત્તિયા’મલભૂતાય, તથા તેજો ગુણેન ચ;

સન્નિપાતંવ સો ચન્દ-સૂરિયાનં નિદસ્સયિ.

૫. અસઙ્કિણ્ણ ગુણાકિણ્ણો, સુવિચિણ્ણ ગુણાગુણો;

નિત્થિણ્ણપાપો નિબ્બિણ્ણ-સંસારો સારદસ્સનો.

૬. ભરિયા તસ્સ યા આસિ, સઙ્ઘાતં સો ભિસેચયિ;

મહેસીભાવે દત્વાન, પરિહારં યથાભતં.

૭. મહિન્દં નામ સપ્પઞ્ઞં, કણિટ્ઠં ભાતરં સકં;

દત્વા દક્ખિણભાગં સો, ઓપરજ્જે’ભિસેચયિ.

૮. અન્તેપુરે’પરજ્ઝિત્વા, સો રઞ્ઞા અવધારિતે;

સપુત્તદારો વુટ્ઠાય, અઞ્ઞાતો મલયં અગા.

૯. ઉપ્પજ્જિત્થ તદા પુત્તો, રઞ્ઞો સઙ્ઘાય દેવિયા;

દસ્સેન્તો’વ પનાદસ્સ, કુમાર રૂપમત્તનો.

૧૦. રાજા તં જાતમત્તં’વ, દિસ્વા સન્થુટ્ઠમાનુસો;

સિદ્ધત્થં લુમ્બિનીજાતં, રાજા સુદ્ધોદનો વિય.

૧૧. ધઞ્ઞપુઞ્ઞગુણૂપેતો, ઠપેત્વા દીપમેકકં;

જમ્બુદીપે’પિ કસિણે, રજ્જયોગ્ગોતિ મે સુતો.

૧૨. નામદાન દિનેયેવ, પરિહારેન સબ્બસો;

ઓપરજ્જે ભિસિઞ્ચિત્વા, દક્ખિણં દેસમસ્સ’દા.

૧૩. યુવરાજાપિ મલયે, વસન્તો’વ મહીપતિં;

આરાધેત્વા ઉપાયેન, અનુઞ્ઞતો સભાતરા.

૧૪. નિકાયત્તય વા સીહિ, સદ્ધિં ભિક્ખૂહિ આગતો;

દિસ્વા રાજાનમેત્થેવ, સન્ધીં’કાસિ અકુપ્પિયં.

૧૫. યા તસ્સ યુવરાજસ્સ, ભરિયા તિસ્સા નામિકા;

રાજિની સા વિજાયિત્થ, ધીતરં સઙ્ઘનામિકં.

૧૬. કિત્તિનામા’પરાયા ચ, ભરિયા સાપિ ખો પન;

વિજાયિ પુત્તે ચત્તારો, તથા એકઞ્ચ ધીતરં.

૧૭. તદા રાજાપિ ચિન્તેત્વા, એવં સતિ કણિટ્ઠકો;

નિસ્સઙ્કો મયિ હોતીતિ, સમ્મા મન્તીહિ મન્તિય.

૧૮. ધીતરં યુવરાજસ્સ, સુરૂપિં રૂપનામિકં;

કસ્સપસ્સ’ત્ત પુત્તસ્સ, વિવાહં કારયિ બુધો.

૧૯. દક્ખિણં દેસમસ્સેવ, કણિટ્ઠસ્સ સદાપયિ;

રાજપુત્તસ્સ પાદાપિ, પચ્ચેકં ભોગમત્તનો.

૨૦. રજ્જમ્હિ સબ્બં તસ્સેવ, પરિભોગાય દાપયિ;

કેવલન્તુ વિચારેસિ, દીપં દીપ હિતાવહો.

૨૧. તેસં સંવાસમન્વાય, ઉભિન્નં પુઞ્ઞકમ્મિનં;

ધઞ્ઞપુઞ્ઞગુણૂપેતા, વિજાતા પુત્તધીતરો.

૨૨. કત્વા સબ્બોપહારેન, દાઠાધાતુ મહામહં;

આરુય્હ વરપાસાદં, રતનવ્હં મહીપતિ.

૨૩. તદા સોવણ્ણયસ્સાપિ, સમ્બુદ્ધસ્સ પુરા ઠિતં;

સુઞ્ઞં પિટ્ઠં સયં દિસ્વા, કસ્મા એવન્તિ સંવદિ.

૨૪. તતો અમચ્ચા આહંસુ, નાજાનાસિ મહીપતિ;

મહાપિતુનરિન્દસ્સ, કાલે તવ નરિસ્સરં.

૨૫. પણ્ડુરાજા ઇધાગમ્મ, દીપમેતં વિનાસિય;

સબ્બં સારગતં દીપે, સમાદાય ગતો ઇતિ.

૨૬. તં સુત્વા લજ્જિતો રાજા, સયં વિય પરાજિતો;

તદહેવ નિયોજેસિ, અમચ્ચે બલસઙ્ગહે.

૨૭. તદા’વ કિર આગઞ્છિ, પણ્ડુરાજકુમારકો;

પરિભૂતો સરાજેન, રજ્જત્થં કત નિચ્છયો.

૨૮. રાજા દિસ્વા’તિ સન્તુટ્ઠો, કત્તબ્બં તસ્સ કારિય;

મહાતિત્થ મુપાગમ્મ, પટ્ટનં સેમત્રસો.

૨૯. મહન્તં બલકાયઞ્ચ, તસ્સોપકરણાનિ ચ;

અનુનં પટિયાદેત્વા, દેવસેનંવ સજ્જિતં.

૩૦. પણ્ડુરાજકુમારેન, સદ્ધિં સેનાપતિ સકં;

ગન્ત્વા તં પણ્ડુરાજાનં, હન્ત્વાનિકમિતો પુરા.

૩૧. રતનં સબ્બમાદાય, દત્વા રજ્જં ઇમસ્સ ચ;

ન ચિરેનેવ એહીતી, ઉય્યોજેસિ મહાયસો.

૩૨. સોપિ એવં કરોમીતિ, પટિસ્સુત્વા મહીપતિં;

વિન્દિત્વા બલમાદાય, નામમારુય્હ તં ખણે.

૩૩. પરતીરં તતો ગન્ત્વા, સંવુળહ બલવાહનો;

વિનાસયન્તો પચ્ચન્તં, વારેસિ મધુરં પુરં.

૩૪. દ્વારાનિ પિદહિત્વાન, પચ્છિન્દિત્થ ગતાગતં;

તતો અગ્ગિં ખિપાપેસિ, ગોપુરટ્ટાલ કોટ્ઠકે.

૩૫. એવં સીહળસેનાય, પવિટ્ઠાય સકં પુરં;

સબ્બં વિલુમ્પમાનાય, સેનઙ્ગં ઘાતયન્તિયા.

૩૬. પણ્ડુરાજા નિસમ્મેતં, સમાદાય સકં બલં;

વેગસા તં સમાગમ્મ, યુદ્ધં કાતું સમારભિ.

૩૭. અસમ્પુણ્ણ બલત્તા સો, વિદ્ધો સલ્લેન ભૂપતિ;

હત્થિક્ખન્ધગતોયેવ, વિહાય પુરમત્તનો.

૩૮. પલાયિત્વા ગતઠાને, જીવિતં નિજમેસ્સજિ;

ભરિયાવ’સ્સ તેનાસિ, સમ્પત્તા જીવિતક્ખયં.

૩૯. તતો સીહળસેનાસા, પવિટ્ઠા નિબ્ભયા પુરં;

તત્થ સબ્બં વિલુમ્પિત્થ, દેવા’સિરપુરં યથા.

૪૦. સેનાપતિ તતો રાજ-ગેહે ભત્તં સમેક્ખિય;

દીપાનિતમિમમ્હા ચ, તત્રટ્ઠઞ્ચ મહારહં.

૪૧. સારં સબ્બંસમાદાય, દેસે ચ નગરે ઠિતં;

કત્વા ઇસ્સરિયં તત્થ, વસેવત્તિય અત્તનો.

૪૨. પણ્ડુરાજ કુમારં તુ, તત્થ રજ્જે’ભિ સિઞ્ચિય;

કારેત્વા પરિહારઞ્ચ, દેસં તસ્સ સમપ્પિય.

૪૩. યથારુચિં ગહેત્વાન, હત્થિઅસ્સે નરે’પિ ચ;

તત્થ તત્થ યથા કામં, વસન્તો અકુતો ભયો.

૪૪. સમુદ્દ તટમાગમ્મ, ઠત્વા તત્થ યથાસુખં;

કીળન્તો વિય નાવં સો, સમારુય્હ વિસારદો.

૪૫. મહાતિત્થ મુપાગમ્મ, વન્દિત્વા ધરણી પતિં;

તં સાસનં નિવેદેત્વા, સારં દસ્સેસિ આહટં.

૪૬. રાજા સાધૂતિ વત્વાન, કારેત્વા તસ્સ સઙ્ગહં;

સદ્ધિં સેનાય આગન્ત્વા, પકટ્ઠાય સકં પુરં.

૪૭. જયપાનં પિવિત્વાન, કત્વા વિજયમઙ્ગલં;

મહાધાગં પવત્તેત્વા, યાચકાનં યથા રુચિં.

૪૮. સબ્બં પાકતિકં કાસિ, સારં દીપે નિરાલયો;

સોવણ્ણ પટિમાયો ચ, યથાઠાને ઠપાપયિ.

૪૯. સુઞ્ઞં રતનપાસાદે, પિટ્ઠં પૂરેસિ સત્થુનો;

કાસિ રક્ખપિધાનેન, નિબ્ભયં ધરણીતલં.

૫૦. તતો પટ્ઠાય દીપંસો, અરીનં દુપ્પધંસિયં;

કત્વા વડ્ઢેસિ ભોગેહિ, ઉત્તરાદિકુરું પિય.

૫૧. ખિન્ના પુબ્બસ્સ રાજસ્સ, કાલે દીપમ્હિ પાણિનો;

નિબ્બુતા તં સમાગમ્મ, ઘમ્મા વિય વલાહકા.

૫૨. તસ્સ વીસતિમે વસ્સે, વિહારે અભયુત્તરે;

નિક્ખમિત્વા ગતા હેસું, પંસુકૂલિક ભિક્ખવો.

૫૩. યુવરાજા મહિન્દો સો, ધુમરાજસ્સ સત્થુનો;

કારાપયિ ઘરં રમ્મં, દસ્સનેય્યં મનોરમં.

૫૪. બોધિગેહં કરોન્તો તં, દિસ્વા વડ્ઢકીનો તદા;

વંસેન સાખં આહચ્ચ, ભિજ્જન્તં વરબોધિયા.

૫૫. કિન્તુ કાતબ્બમેત્થાતિ, યુવરાજં નિવેદયું;

સો તં તં મુપસંકમ્મ, મહાપૂજાય પૂજિય.

૫૬. સચે સત્થા, હિતત્થાય, સમ્ભૂતો સબ્બપાણિનં;

લદ્ધું પુઞ્ઞસ્સ’નગ્ઘસ્સ, ઘરસ્સ કરણેતિ’ધ.

૫૭. સાખા ગચ્છં તુ ઉદ્ધંવ, કાતું સક્કા યથાઘરં;

એવમારાધયિત્વાન, વન્દિત્વા સઙ્ઘરં ગતો.

૫૮. તદા સાખા દુમિન્દસ્સ, રત્તિયં ઉદ્ધમુગ્ગમિ;

તતો કમ્મકરા સબ્બં, આરોચેસું સસામિનો.

૫૯. યુવરાજા’તિ સન્તુટ્ઠો, ભાતુરઞ્ઞો નિવેદિય;

મહાપૂજાય પૂજેસિ, વિસ્સજ્જિય બહુધનં.

૬૦. તથા મહિન્દસેનવ્હં, પરિવેણઞ્ચ કારિય;

સઙ્ઘસ્સા’દા સભોગં સો, પુઞ્ઞા પુઞ્ઞાનિચાચીનિ.

૬૧. અદા સપરિસં ભત્તં, વત્થં છત્તમુપાહનં;

તથા ગમિયભત્તઞ્ચ, નહાનઞ્ચ સભત્તકં.

૬૨. એવં ખુદ્દાનુ ખુદ્દાનિ, કત્વા પુઞ્ઞાનિ સો વિભૂ;

રઞ્ઞો તેત્તિંસવસ્સમ્હિ, યથાકમ્મમુપાગમિ.

૬૩. અથ રાજા મતેતસ્મિં, કણિટ્ઠમુદયં સકં;

તસ્સ ઠાને ઠપેત્વાન, સબ્બં તસ્સેવ તસ્સદા.

૬૪. તુલાભારસ્સ દાનેન, દીનાનાથે સતપ્પયિ;

ધમ્મકમ્મેન સોધેસિ, નિકાયત્તયમેકતો.

૬૫. સોણ્ણથાલીસહસ્સં સો, મુત્તાહિ પરિપૂરિય;

ઠપેત્વા મણિમેકેકં, તસ્સોપરિ મહારહં.

૬૬. બ્રાહ્મણાનં સહસ્સસ્સ, સુદ્ધે રતનભાજને;

ભોજેત્વા ખીરપાયાસં, દાપેત્વા હેમસુત્તકં.

૬૭. તથા નવેહિ વત્થેહિ, અચ્છાદેત્વા યથારુચિં;

સન્તપ્પેસિ મહન્તેન, પરિહારેન પુઞ્ઞવા.

૬૮. ભિક્ખૂનં દીપવાસીનં, અદાસિ ચ તિચીવરં;

અદા સબ્બાસમિત્થીનં, વત્થઞ્ચ સુમનોહરં.

૬૯. કારેત્વા લોહપાસાદં, વેજયન્તસરિક્ખકં;

વડ્ઢેસિ પટિમં તત્થ, સુવણ્ણઘટકોટ્ટિમં.

૭૦. સુત્વા ઉપોસથાગાર-ભાવં સબ્બ મહેસીનં;

તુચ્છો યં નેવ હોતૂતિ, વાસં સઙ્ઘસ્સ તં અકા.

૭૧. ભોગગામે ચ તસ્સદા, રક્ખકે ચ નિયોજયિ;

ભિક્ખૂ દ્વત્તિંસમત્તાહિ, વસન્તૂતિ નિયામયિ.

૭૨. ગઙ્ગાય મરિયાદં સો, કારેસિ મણિમેખલં;

તોયનિદ્ધમનઞ્ચાકા, મણિહીરકવાપિયા.

૭૩. કટ્ઠુન્તનગરે ચેવ, કાણવાપિંચ બન્ધયિ;

વેજ્જસાલઞ્ચ કારેસિ, ચેતિયમ્હિ ગિરિમ્હિ સો.

૭૪. બુદ્ધગામવિહારઞ્ચ, વિહારં મહિયઙ્ગણં;

કૂટતિસ્સ વિહારઞ્ચ, ભોગગામે ન વડ્ઢયિ.