અટ્ઠચત્તાલીસતિમ પરિચ્છેદ

એકરાજકો

૧. તતો તસ્સા’નુજો સેનો, છત્તં ઉસ્સાપયી પુરે;

પિયં’વ પુત્તં પસ્સન્તો, સત્તે સબ્બે મહાધનો.

૨. ચરિયં પુબ્બરાજૂનં, સમાચરિ યથાભતં;

અપુબ્બમ્પિ ચ વત્તેસિ, ચરિયં ધમ્મસંહિતં.

૩. ભિક્ખૂનં ભિક્ખૂનીનઞ્ચ, ઞાતીનં દીપવાસિનં;

મચ્છાનં મિગપક્ખીનં, કત્તબ્બં સ સમાચરિ.

૪. મહિન્દં પરતીરં સો, ગતં યોજિયમારયિ;

એવં સો સુવિસોધેસિ, રજ્જપચ્ચત્થિકે’ખિલે.

૫. મહાદાનં પવત્તેસિ, યાચકાનં ધનેસિનં;

ભિક્ખૂનં બ્રાહ્મણાનઞ્ચ, મનુઞ્ઞં રાજભોજનં.

૬. અહેસું અનુજાતસ્સ, મહિન્દો કસ્સપો તથા;

ઉદયોતિ તયો તેસુ, મહિન્દો યુવરાજકો.

૭. હુત્વા તસ્સાનુવત્તન્તો, સક્કચ્ચં તમુપટ્ઠહિ;

સઙ્ઘાનામાસિ રાજસ્સ, ભરિયા તસ્સ રાજિની.

૮. કીળનત્થં સમુદ્દસ્સ, ગતે રાજિનિ પટ્ટનં;

ઉદયો આદિપાદોસો, ઓહીનો નગરે તદા.

૯. નાલનામં ગહેત્વાન, ધીતરં માણિલાનિયા;

રક્ખિતં રાજરક્ખાય, પુળત્થિનગરં અગા.

૧૦. રાજા તસ્મિં અકુજ્ઝિત્વા, સન્ધિં કત્વા અકુપ્પિયં;

મહાદીપાદં પેસેત્વા, તોસત્વા તં ઇધાનયિ.

૧૧. એવં સમગ્ગા તે આસું, તતો પટ્ઠાય ખત્તિયા;

રક્ખન્તા સાસનં લોકં, વસિંસુ સુસમાહિતા.

૧૨. તતો કેનચિ કાલેન, પણ્ડુરાજા મહાબલો;

જમ્બુદીપા ઇધા’ગમ્મ, દીપ ગણ્હિતુમારભિ.

૧૩. રાજા સુત્વા મહાસેનં, પેસુયિત્થ તદન્તિકં;

અમચ્ચાનં વિવાદેન, થદ્ધોતારો નારાધિપો.

૧૪. પણ્ડુરાજા વિનાસેન્તો, સબ્બં તં દેસમુત્તરં;

ખન્ધાવારં નિવેસેસિ, મહાતાલિતગામકે.

૧૫. વસન્તા દમિળા એત્થ, બહવો યે તહિં તહિં;

સબ્બે તં પક્ખિયાહેસું, તતો સો બલવા અહુ.

૧૬. તત્થ ગન્તા મહાસેના, રઞ્ઞો યુજ્ઝિતુમારભિ;

હત્થિક્ખન્ધગતો પણ્ડુ-રાજાપિ સમુપાવિસિ.

૧૭. અહુ દમિળસેનાસા, પસ્સન્તિ સામિનો મુખં;

સમ્પત્તબલહુસ્સાહા, તદત્થે ચત્તજીવિતા.

૧૮. દીપસેના તુ સામિન-મભાવેન નિરુસ્સુક્કા;

યુજ્ઝન્તિ પરિભિન્દિત્વા, પલાયિત્થ તતો તતો.

૧૯. ઓતરિત્થમહાસેના, પણ્ડુરાજાસ્સ તઙ્ખણે;

મારસેનાવ ગચ્છન્તિ, વિચુણ્ણેન્તિ મહાજનં.

૨૦. રાજા સેનાય ભિન્નત્તં, સુક્કા સબ્બં સમાદિય;

હત્થસારં પુરં હિત્વા, મલયાભિમુખો ગતો.

૨૧. તતો હત્થિં સમારુય્હ, યુવરાજા મહિન્દકો;

યુજ્ઝન્તો સકસેનાય, પલાતત્તં સમેક્ખિય.

૨૨. એકેનમે ન સક્કા વે, સબ્બે એતેહિ મારિતું;

એતેસં ન ચ નીચાનં, હત્થેસુ મરણં સુખં.

૨૩. તસ્મા વરં મે મરણં, મયા એવેતિ ચિન્તિય;

હત્થિક્ખન્ધગતોયેવ, છિન્દિ સો સીસમત્તનો.

૨૪. તં દિસ્વા બહવો સીસે, તત્થ છિન્દિંસુ સેવકા;

તં દિસ્વા દમિળી સેના, હટ્ઠતુટ્ઠા પમોદિસા.

૨૫. એતં સબ્બં સમેક્ખિત્વા, આદાપાદો સકસ્સપો;

તુરઙ્ગવરમારુય્હ, સુસન્નદ્ધો મહાયુધો.

૨૬. વિહારમુપસઙ્કમ્મ, અભયં એકકોવ સો;

તાદિસમ્પિ મહાસેનં, ઓગાહેત્વા વિદારયિ.

૨૭. સુપણ્ણો વિય ગણ્હન્તો, ભૂજગેન સલિલાલ યે;

સો તં સબ્બં નિવત્તેસિ, અત્તાનઞ્ચ સુગોપયિ.

૨૮. અસ્સો એકોવ દિસ્સિત્થ, તુરઙ્ગાવલિસન્નિભો;

અત્તનો સો જનં કઞ્ચિ, અપસ્સન્તો’નુગામિનં.

૨૯. કિં મે એકેન વેરિનં, પૂરિતેન મનોરથં;

કાલન્તરેહં જીવન્તો, પૂરેસ્સં મે મનોરથં.

૩૦. તસ્મા ગન્તુંવ યુત્તન્તિ, નિમ્ફોટેત્વા મહાબલં;

નિબ્ભયોવ મહાયોધો, કોણ્ડિવાતમુપાગમિ.

૩૧. પણ્ડુરાજા મહાસેના, અગ્ગહેસિ તતો પુરં;

સીસં તં યુવરાજસ્સ, પણ્ડુરાજસ્સ દસ્સયું.

૩૨. સો તં દિસ્વા ચ ઝાપેત્વા, રાજૂનં પણ્ડુદેસિનં;

સબ્બમાળાહને કિચ્ચં, તસ્સ કાતું નિયોજયિ.

૩૩. સબ્બં સારં હરાપેસિ, ભણ્ડાગારમ્હિ રાજિનો;

અગ્ગણ્હિત્થ ગહેતબ્બં, વિહારે નગરેપિ ચ.

૩૪. પાસાદે રતને સબ્બે, સોવણ્ણંસત્થુબિમ્બકં;

સિલામય મુનિન્દસ્સ, ચક્ખુભૂક મણિદ્વયં.

૩૫. તથા સોવણ્ણપટ્ટે ચ, થૂપારામમ્હિ ચેતિયે;

સુવણ્ણ પટિમાયો ચ, વિહારેસુ તહિં તહિં.

૩૬. સબ્બં ગહેત્વા નિસ્સારં, લઙ્કાદીપ મકાસિ સો;

છડ્ડયિત્થ પુરં રમ્મ, યક્ખભક્ખિત રૂપકં.

૩૭. રાજા’પિ રક્ખં દત્વાન, મહામગ્ગે તહિં તહિં;

ગઙ્ગાદ્વય મુખે વાસં, કપ્પેસિ પરિસઙ્કિતો.

૩૮. પણ્ડુરાજા તતો સદ્ધિં, કાતું સીહળસામિના;

અમચ્ચે તત્થ પેસેસિ, દિસ્વા તે સીહલાધિપો.

૩૯. સુણિત્વા સાસનં તેસં, સબ્બં તં સમ્પટિચ્છિય;

દૂતાનં કારયિત્વાન, યથાકામેન સઙ્ગહં.

૪૦. હત્થિદ્વયં સદત્વાન, સબ્બમાભરણમ્પિ ચ;

તસ્સ પેસેસિ દૂતેસો, અત્તનોપિ હિતાવહે.

૪૧. પણ્ડુરાજા સિતં સબ્બં, દિસ્વા સન્તુટ્ઠમાનસો;

નિય્યાતેત્વાન દૂતાનં, તદહેવ મહાપુરં.

૪૨. નિક્ખમિત્વા પુરા ગન્ત્વા, ન ચિરેનેવ પટ્ટનં;

તત્થ આરુય્હ નાવં સો, સક દેસ મુપાગમિ.

૪૩. તતો આગમ્મ નગરં, સીલામેઘો મહીપતિ;

યથાઠાને ઠપેત્વાન, દીપં વસિ સમાહિતો.

૪૪. ભાતરં દુતિયં કત્વા, ઉદયં નામ ખત્તિયં;

મહાદીપાદં તસ્સા’દા, સોગત્થં દક્ખિણં દિસં.

૪૫. સોપિ ખો ન ચિરેનેવ, કત્વા પુઞ્ઞં યથારહં;

રોગેનેકેન સમ્ફુટ્ઠો, પવિટ્ઠો મચ્ચુનો મુખં.

૪૬. કસ્સપો આદિપાદોપિ, પુલત્થિનગરે વસં;

યોજેત્વા પણ્ડુરાજેન, અહોસિ કિર મારિતો.

૪૭. તદા કસ્સપનામસ્સ, પુત્તા આસું મહારહા;

આદિપાદસ્સ ચત્તારો, ધઞ્ઞલક્ખણ સઞ્ઞુતા.

૪૮. યો સેનં સબ્બપઠમો, સેનો નામ કુમારકો;

સૂરો વીરો મહુસ્સાહો, રાજભારક્ખમો સમો.

૪૯. રાજા મહાદીપાદત્તં, તસ્સ દત્વા યથાવિધિં;

ભોગત્થં દક્ખિણં દેસં, સવાહન મુપાદિસિ.

૫૦. રોહણાધિપતિસ્સા’સું, પુત્તા કિત્તગ્ગબોધિતો;

ચત્તારો ધીતરો તિસ્સો, દસ્સનેય્યા મનોરમા.

૫૧. તદા જેટ્ઠસુતં તસ્સ, મહિન્દં નામ ખત્તિયં;

પિતુચ્છા મારયિત્વાન, દેસં ગણ્હિ સસાધનં.

૫૨. ભાતરો તે તયો તસ્મિં,

સંરુટ્ઠા ભાતુ ઘાતને;

આદાય ભગીની તિસ્સો,

રઞ્ઞો સન્તિકમાગમું.

૫૩. રાજાપિ દિસ્વા તેતીવ, મમાયન્તો દયાલુકો;

સબ્બે દેવકુમારેવ, સુખં વડ્ઢેસિ પેમવા.

૫૪. તતો કસ્સપનામં સો, તેસં જેટ્ઠં નરિસ્સરો;

દેસં તં ગણ્હ યાહીતિ, દત્વા બલમપેસયિ.

૫૫. સો’પિ ગન્ત્વાન તં હન્ત્વા, રોહણં કસિણમ્પિ તં;

કત્વા હત્થગતં તત્થ, વસિત્થ નિરુપદ્દવો.

૫૬. અથ સો ભાતરો દ્વે’પિ, સેનઞ્ચ ઉદયં તથા;

પક્કોસિત્વાન, ભાજેત્વા, દેસં તેહિ સહાવસિ.

૫૭. રાજા તા સાધુ વડ્ઢેત્વા, વયપત્તાસુ તીસુ સો;

રાજકઞ્ઞાસુ ધઞ્ઞાસુ, દેવચ્છરસૂ રૂપિસુ.

૫૮. ઠપેત્વા રાજિનિ ઠાને, ઉપરાજસ્સ દાપયિ;

સઙ્ઘનામં મહાભોગં, દત્વા રજ્જસરિક્ખકં.

૫૯. કણિટ્ઠો ઉપરાજસ્સ, મહિન્દો નામ ભાતુકો;

અત્થિ સબ્બગુણોપેતો, સબ્બસત્થવિસારદો.

૬૦. તસ્સા’દાસિ દુવે રાજા, રાજકઞ્ઞા મનોહરા;

તિસ્સવ્હકિત્ત નામઞ્ચ, દત્વા ભોગં યથારુચિં.

૬૧. એવં કરોન્તો ઞાતીનં, સંગહં સો યથારહં;

આરાધેન્તો ચ દાનાદિ-સઙ્ગહેહિ મહાજનં.

૬૨. રાજા દસયિ રાજૂનં, ધમ્મેહિ સમુપાગતો;

સમાચરન્તો પુઞ્ઞાનિ, પરિભુઞ્જિત્થ મેદિનિં.

૬૩. પંસુકૂલિક ભિક્ખૂનં, કત્વા’રિટ્ઠમ્હિ પબ્બતે;

મહાભોગં અદારામં, નિમ્મિતં વિય ઇદ્ધિયા.

૬૪. પરિહારઞ્ચ તસ્સદા, રાજારહમસેસતો;

આરામિકે ચ બહવો, દાસે કમ્મકરેપિ ચ.

૬૫. પાસાદં સોવ કારેસિ, વિહારે જેતનામકે;

અનેકભૂમિં ભૂમિન્દો, બુદ્ધભૂમિગતાસયો.

૬૬. વડ્ઢેત્વા તત્થ કારેત્વા, સબ્બ સોવણ્ણયં જિનં;

સણ્ઠપેત્વા મહાભોગં, વસાપેસિ ચ ભિક્ખવો.

૬૭. મહાદિ પરિવેણમ્હિ, કારેસિ સુમનોહરં;

પાસાદ મગ્ગિસન્દંડ્ઢં, તસ્મિંયેવ વિહારકે.

૬૮. કત્વા વીરઙ્કુરારામં, વિહારે અભયુત્તરે;

મહાસઙ્ઘિક ભિક્ખૂનં, થેરિયાનઞ્ચ દાપયિ.

૬૯. પુબ્બારામઞ્ચ કારેસિ, સમ્પન્ન ચતુપચ્ચયં;

સદ્ધિં સો સઙ્ઘનામાય, દેવિયાપિ ચ અત્તનો.

૭૦. મહાવિહારેતાયેવ, સદ્ધિં કારેસિ ભૂમિપો;

આવાસં સઙ્ઘસેનવ્હં, મહાભોગં મહામતિ.

૭૧. કારેત્વા સબ્બસોવણ્ણં, કેસધાતુ કરણ્ડકં;

મહાપૂજં પવત્તેસિ, રજ્જં વિસ્સજ્જિ ઉત્તમો.

૭૨. ચેતિયસ્સ ગીરિસ્સાદા, કાણવાપિં બહુદયં;

ભિક્ખૂનં દિપવાસીનં, દાપેસિ ચ તિચીવરં.

૭૩. પુલત્થિ નગરે કાસિ, વાપિયો થુસવાપિયા;

સેનગ્ગબોધિમાવાસં, ગામારામિક સઞ્ઞુતં.