સત્તચત્તાલીસતિમ પરિચ્છેદ

પઞ્ચરાજકો

૧. અચ્ચયે પિતુનો રાજા, ઉપરાજા અહોસિ સો;

સમત્થો સક્કુમિત્તાનં, કાતું નિગ્ગહ સંગહે.

૨. સેના નામસિ સપ્પઞ્ઞા, મહેસી તસ્સ રાજિનો;

ખુદ્દપુત્તા પીયા’તીવ, રઞ્ઞો કલ્યાણદસ્સના.

૩. અદાસિ યુવરાજત્તં, જેટ્ઠપુત્તસ્સ અત્તનો;

આદિપાદે’પરેકાસિ, રાજિનીપિ ચ ધીતરો.

૪. દત્વા ઠાનન્તરં રાજા, તેસં તેસં યથારહં;

જનં સઙ્ગહવત્થૂહિ, સઙ્ગહેસિ ચતૂહિપિ.

૫. અથ કેનાપિ સો ગન્ત્વા, હેતુના મણિહીરકં;

વસન્તો કિર અસ્સોસિ, પચ્ચન્તો કુપિતો ઇતિ.

૬. તતો સેનાપતિઞ્ચેવ, જેટ્ઠપુત્તઞ્ચ અત્તનો;

ગન્ત્વા સાધેથ તં દેસ-મીતિ પેસેસિ સજ્જુકં.

૭. તેસુ તત્થોપયાતેસુ, પિસુના ભેદચિન્તકા;

વત્વા યંકિઞ્ચિ ભિન્દિંસુ, તે ઉભોપિ નરાધિપે.

૮. તતો દ્વે વેરિનો હુત્વા, દેસં ગણ્હિતુમારભું;

રાજા સુત્વા ખણેનેવ, દુરતિસ્સ મુપાગમિ.

૯. તે ઉભો તત્થ ઘાતેત્વા, તેસં સબ્બં સમાદિય;

હન્ત્વા તં પક્ખિયે સબ્બે, પુળત્થિનગરં ગમિ.

૧૦. તદા રોહણદેસમ્હિ, ભોગાધિપતિનો સુતો;

દાઠાસિવાદિપાદસ્સ, મહિન્દો નામ ખત્તિયો.

૧૧. પિતુનો સો’પરિજ્ઝિત્વા, રઞ્ઞો સન્તિકમાગમા;

દિસ્વા રાજાપિ સન્તુટ્ઠો, તં સઙ્ગણ્હિ યથારહં.

૧૨. તેન મેત્તિં થિરં કાતું, ધીતરં દેવ નામિકં;

તસ્સ દત્વાન પાહેસિ, બલં રોહણમેવસો.

૧૩. સો ગન્ત્વા રાજસેનાય, મદ્દાપેત્વાન રોહણં;

જમ્બુદીપં પલાપેત્વા, પિતરં રોહણં લભિ.

૧૪. મહાવિહારે કારેસિ, સલાકગ્ગં થિરં સુભં;

ખોલક્ખિયમુનિન્દસ્સ, પરિહારાય દાપયિ.

૧૫. મહાનામવ્હયં ગામં, પૂજયિત્વા યથાબલં;

વડ્ઢમાનદુમિન્દસ્સ, જિણ્ણં ગેહઞ્ચ કારિય.

૧૬. રુક્ખણત્થાય તસ્સા;દા, કોટ્ઠાગામં બહુદયં;

નીલારામસ્સ પાદાસિ, કાળુસ્સં નામ ગામકં.

૧૭. લોહરૂપસ્સ પાદાસિ, આરામસ્સ ચ ગામકં;

જિણ્ણઞ્ચ પટિસઙ્ખાસિ, પટિમાયો ચ કારયિ.

૧૮. પાસાદે ચેતિયો ચેવ, વિહારે ચ અનપ્પકે;

પુળત્થિનગરે’કાસિ, વેજ્જસાલં મહાદયો.

૧૯. તથા પણ્ડા વિયઞ્ચેવ, ભોગગામસમાયુતં;

પિટ્ઠસપ્પિનમન્ધાનં, સાલાયો ચ તહિં તહિં.

૨૦. પોત્થકેસુ લિખાપેત્વા, અટ્ટે સમ્મા વિનિચ્છિતે;

રાજગેહે ઠપાપેસિ, ઉક્કોટનભયેન સો.

૨૧. નાગવડ્ઢનનામસ્સ, ભોગગામે બહૂ અદા;

લેખે’પુબ્બે ન વારેત્વા, પાલેત્વા પુબ્બસાસનં.

૨૨. પિતરા ચ મહાદાનં, પુઞ્ઞમઞ્ઞમ્પિ વા કતં;

સબ્બં તમવિનાસેત્વા, નિચ્ચં સો રક્ખિ સાદરો.

૨૩. મહેસી ચ મહારઞ્ઞો, પુઞ્ઞાનિ બહુકારયિ;

કણ્ટકં ચેતિયં કાસિ, દેવી ચેતિયપબ્બતે.

૨૪. કારેત્વા જયસેનઞ્ચ, પબ્બતં ગામિકસ્સદા;

ભિક્ખુસઙ્ઘસ્સ સા ગામં, મહુમ્મારઞ્ચ તસ્સ દા.

૨૫. સિલામેઘવ્હયં કત્વા, ભિક્ખુનીનમુપસ્સયં;

સિલામેઘવ્હયે દાસિ, ભિક્ખુનીનઞ્ચ પચ્ચયે.

૨૬. ગામાયે’સું પુરાકીતા, વિહારો તત્થ સાધનં;

દત્વા તે મે ચયિત્વાન, વિહારસ્સેવ દાપયિ.

૨૭. છાદયિત્વા મહારુક્ખે, સબ્બે ચેતિયપબ્બતે;

નાનારાગે ધજે ચેવ, પટાકાયો ચ પૂજયિ.

૨૮. પુબ્બારામકભાગમ્પિ, પાસાદં પટિસઙ્ખરિ;

ઉસ્સાનવિટ્ઠિં દુબ્ભોગં, સુભોગં તસ્સ કારયિ.

૨૯. વિહારં ગિરિભણ્ડઞ્ચ, નટ્ઠં પાકતિકં કરિ;

ભોગગામે ચ દાપેસિ, ભિક્ખૂનં તન્નિવાસિનં.

૩૦. અમ્બુય્યાનમ્હિ આવાસં, કત્વા દપ્પુળપબ્બતં;

ભિક્ખૂનં તિસતસ્સા’દા, સમ્પન્નચતુપચ્ચયં.

૩૧. કારેત્વા નીલગલ્લઞ્ચ, આરામં સો મનોરમં;

દકવારં બહુપ્પાદં, તસ્સ દાપેસિ કારિય.

૩૨. અરિકારિ વિહારે ચ, પટિસઙ્ખાસિ જિણ્ણકં;

સલાકગ્ગઞ્ચ પાસાદં, અપુબ્બંયેવ કારયિ.

૩૩. વાહદીપે સકારેસિ, સેનગ્ગબોધિપબ્બતં;

ધમ્મં તીસુ નિકાયેસુ, વાચયિત્થ બહુસ્સુતે.

૩૪. ગણ્હાપેસિ ચ ભિક્ખૂનં, અયોપત્તેસુ ગણ્ઠિકે;

પુઞ્ઞન્તિ વુત્તં સબ્બં સો, ન કિઞ્ચિ પરિવજ્જયિ.

૩૫. કુલીનાનમનાથાનં, ઇત્થીનં’દા પિળન્ધનં;

ભોજનં ભોજનત્થીનં, બહુ સો દાસિ રત્તિયં.

૩૬. ગુન્નં સસ્સાનિ પાદાસિ, કાકાદીનઞ્ચ ભત્તકં;

તણ્ડુલઞ્ચ કુમારાનં, મધુફાણિતસંયુત્તં.

૩૭. એવં પુઞ્ઞાનિ કત્વાન, નરિન્દો સો સપારિસો;

ભુત્વા પઞ્ચસુ વસ્સેસુ, મેદિનિં સમ્પરિચ્ચજિ.

૩૮. તતો તસ્સ સુતો આસિ, સીહળાનં રથેસતો;

સબ્બરૂપગુણોપેતો, મહિન્દો નામ ખત્તિયો.

૩૯. સો ધમ્મિકસીલામેઘો, ઇચ્ચાસિ ધરણીતલે;

ધમ્મદીપો ધમ્મધજો, સુદ્ધધમ્મપરાયનો.

૪૦. પુબ્બકેહિ નરિન્દેહિ, કતં ધમ્મપથાનુગં;

સબ્બં કાસિ અહાપેત્વા, અધમ્મં તુ વિવજ્જયિ.

૪૧. રાજારતનપાસાદે, કાતું સો નવકમ્મકં;

સબ્બકાલેસુ દાપેસિ, ગેટ્ઠુમ્બદકવારકં.

૪૨. જિણ્ણઞ્ચ પટિસઙ્ખાસિ, પુઞ્ઞકમ્મમકાસિ ચ;

રજ્જં કત્વાન ચતૂસુ, વસ્સેસુ નિધનં ગતો.

૪૩. અગ્ગબોધિ તતો રાજા, છત્તં ઉસ્સાપયિ પુરે;

કારેન્તો સબ્બસત્તાનં, હિતં સુખમસેસતો.

૪૪. ધાતુપૂજં સકારેસિ, સત્થુસબ્બગુણારહં;

પિતામહકતસ્સા’પિ, સમ્બુદ્ધસ્સ મહામહં.

૪૫. ઉદયગ્ગાદિબોધિઞ્ચ, પરિવેણં સકારયિ;

નામં ગહેત્વા પિતુનો, અત્તનો ચ નરાધિપો.

૪૬. સભોગં પરિવેણઞ્ચ, કત્વા તં ભૂતનામકં;

સકાચરિયકસ્સા’દા, ભિક્ખૂનં તિસતસ્સ ચ.

૪૭. રાજસાલાય દાપેસિ, ચૂળવાપિયગામકં;

ગામદ્વયઞ્ચ દાપેસિ, કાળૂલમલ્લવાતકે.

૪૮. પવેસં વિનિવારેસિ, ઉપોસથદિનેસુ સો;

મચ્છમંસસુરાદીનં, અન્તોનગરમત્તનો.

૪૯. ભિક્ખૂ વા ચેતિયે વા સો, વન્દિત્વા નિક્ખમં તતો;

વાલુકા હા વિનસ્સન્તુ, ઇતિ પાદેસુ વોધયી.

૫૦. યં યં સોવગ્ગિયં કમ્મં, કમ્મં નિસ્સરણવહં;

વત્થુત્તયે પસન્નો સો, કમ્મં તં સબ્બમાચરિ.

૫૧. માતુપટ્ઠાનનિરતો, રત્તિન્દિવમહોસિસો;

ગન્ત્વા તસ્સા ઉપટ્ઠાનં, પાતોવ કિર ભૂપતિ.

૫૨. સીસં તેલેન મક્ખેત્વા, ઉબ્બટ્ટેત્વાન જલ્લિકં;

નખે વિસુદ્ધે કત્વાન, નહાપેત્વાન સાદરં.

૫૩. અચ્છાદેત્વા નવં વત્થં, સુખસમ્ફસ્સમત્તનો;

વત્થં છડ્ડિતમાદાય, પેલ્લેત્વા સયમેવ તં.

૫૪. તસ્સ તોયેન સિઞ્ચિત્વા, સીસં સમકુટં સકં;

ગન્ધમાલાહિ તં સમ્મા, ચેતિયં વિહ પૂજિય.

૫૫. નમસ્સિત્વાન તિક્ખત્તું, કત્વા તં સો પદક્ખિણં;

દાપેત્વા પરિસાય’સ્સા, વત્થાદીનિ યથારુચિં.

૫૬. સહત્થેનેવ ભોજેત્વા, ભોજનં તં મહારહં;

ભુત્થાવસેસં ભુઞ્જિત્વા, સમાકિરિયમત્થકે.

૫૭. ભોજેત્વા પરિસં તસ્સા, રાજભોજનમુત્તમં;

સજ્જેત્વા વાસગેહઞ્ચ, સુગન્ધપરિવાસિતં.

૫૮. સહત્થા પઞ્ઞપેત્વાન, સયનં તત્થ સાધુકં;

પાદે ધોવિય મક્ખેત્વા, ગન્ધતેલેન સણ્હકં.

૫૯. સમ્બાહેન્તો નિસીદિત્વા, કત્વા નિદ્દમુપેતકં;

કત્વા પદક્ખિણં મઞ્ચં, તિક્ખત્તું સાધુવન્દિય.

૬૦. આરક્ખકે નિયોજેત્વા, દાસેકમ્મકરેપિ ચ;

તસ્સા પિટ્ઠિમકત્વાન, અપક્કમેવ પિટ્ઠિતો.

૬૧. ઠત્વા અદસ્સને ઠાને, તિક્ખત્તું પુન વન્દિય;

સન્તુટ્ઠો તેન કમ્મેન, સરન્તો તં પુનપ્પુનં.

૬૨. ગેહં યાતિ સજીવન્તં, એવમેવ ઉપટ્ઠહિ;

એકદા દાસવાદેન, વન્દિત્વા દાસમત્તનો.

૬૩. તેનત્તનો કથાપેસિ, ખમાપેતું સયં વચો;

અત્તાનં ભિક્ખુસઙ્ઘસ્સ, દાપયિત્વાન માતરા.

૬૪. ધનમત્થગ્ઘનં ઞત્વા, ભુજિસ્સો આસિ બુદ્ધિમા;

એવં પુઞ્ઞપરો હુત્વા, કત્વા દીપસ્સ સઙ્ગહં.

૬૫. એકાદસહિ વસ્સેહિ, દેવલોકમુપાગમિ;

તસ્સાનુજો દપ્પુળો’થ, રાજા હોસિ તદચ્ચયે.

૬૬. સબ્બં પુબ્બકરાજૂનં, ચરિયં સો સમાચરિ;

તદા મહિન્દનામસ્સ, પુત્તારોહણસામિનો.

૬૭. પિતરા નિહટા’ગઞ્છું, રાજાનં માતુલં સકં;

સો તે દિસ્વા પવત્તિં તં, સુત્વા દત્વા મહાબલં.

૬૮. પાહેસિ પિતરા યુદ્ધં, કાતું બન્ધુ હિતે રતે;

મહિન્દોપિ તથાભાવં, વિદિત્વા રોહણાધિપો.

૬૯. યુદ્ધં પટિપદેયેવ, તેસં’કાસિ મહાબલો;

તે ઉભોપિ પલાયિંસુ, દત્વા સેનાય નાયકં.

૭૦. પુનાગન્ત્વા મહીપાલં, સેવમાના ઇધા’વસું;

પિતાપિ તેન સન્તુટ્ઠો, અઞ્ઞેન સકબન્ધુના.

૭૧. યુજ્ઝન્તો મરણં ગઞ્છિ, ઞાતિસોપિ મતો કિર;

તદા’દા ભાગિનેય્યસ્સ, રાજા કિત્તગ્ગબોધિનો.

૭૨. સબ્બરૂપગુણોપેતં, ધિતરં દેવ નામિકં;

સો દપ્પુળં ઠપેત્વાન, સેવત્થં તસ્સ રાજિનો.

૭૩. સયં સેનઙ્ગમાદાય, રોહણં સમુપાગમિ;

રોહણાધિપતિ હુત્વા, સબ્બાકારસમપ્પિતો.

૭૪. પુત્તધીતાહિ વડ્ઢેન્તો, વાસં તત્થેવ કપ્પયિ;

રાજાકાસિ દુમિન્દસ્સ, ઘરં જિણ્ણં નવં થિરં.