છચત્તાલીસતિમ પરિચ્છેદ

૧. …વાસં-કત્વા સુલભપચ્ચયં;

દાસિ ધમ્મરુચિનં સો, રાજિની દીપકમ્પિ ચ.

૨. કારેત્વાન પરિચ્છેદં, મહાનેત્તાદિ પાદિકં;

તેસમેવ અદા કોળુ-વાતે સો દેવતિસ્સકં.

૩. વહત્થલે ચ સો કત્વા, કદમ્બગોનનામકં;

દેવપાળિમ્હિ કત્વાન, ગીરિવ્હનગરં તથા.

૪. કત્વા અન્તરસોબ્ભમ્હિ, દેવનામં વિહારકં;

રાજમાતિકમારામં, કત્વા’દા પંસુકૂલિનં.

૫. ગોકણ્ણકવિહારે’કા, પધાનઘરમેવ ચ;

જિણ્ણગેહઞ્ચ કારેસિ, વડ્ઢમાનકબોધિયા.

૬. સઙ્ઘમિત્તવ્હયે ચેવ, અઞ્ઞત્થ ચ મહાયસો;

તત્થ તત્થ વિહારેસુ, નવકમ્મમકારયિ.

૭. છબ્બીસતિ સહસ્સાનિ, સુવણ્ણાનં સમપ્પિય;

જિણ્ણાનિ પટિસઙ્ખાસિ, રાજા ચેતિયપબ્બતે.

૮. તાલવત્થુવિહારઞ્ચ, કારેત્વા પણ્ણભત્તકં;

વિહારસ્સ મહાસેન-નરિન્દવ્હસ્સ દાપયિ.

૯. ગોણ્ડિગામિકવાપિઞ્ચ, છિન્નં બન્ધિ યથા પુરા;

દાનભણ્ડઞ્ચ સો સબ્બં, સબ્બેસં દાસિ પાણિનં.

૧૦. ઉપોસથં ઉપવસતિ, સદ્ધિં દીપજનેહિ સો;

ધમ્મઞ્ચ તેસં દેસેતિ, દાતું લોકુત્તરં સુખં.

૧૧. કમ્મં સોવગ્ગિયં તસ્સ, રજ્જે સબ્બો સમાચરિ;

યં કરોતિ મહીપાલો, તં તસ્સ કુરુતે જનો.

૧૨. તસ્મા રાજા મહાપઞ્ઞો, ધમ્મમેવ સમાચરે;

સો નિવુત્થનિવુત્થમ્હિ, ઠાને હોતિ મહાયસો.

૧૩. સમ્પત્તપરિવારો ચ, અન્તે ગચ્છતિ નિબ્બુતિં;

અત્તત્થઞ્ચ પરત્થઞ્ચ, તસ્મા પસ્સેય્ય બુદ્ધિમા.

૧૪. અત્તના યદિ એકેન, વિનિતેન મહાજના;

વિનયં યન્તિ સબ્બેપિ, કોતં નાસેય્ય પણ્ડિતો.

૧૫. પયોગો યો હિ સત્તાનં, લોહદ્વય હિતાવહો;

સો તેન અકતો નત્થિ, રત્તન્દિવમતન્દિના.

૧૬. અત્તનો સો નિવત્થાનિ, વત્થાનિ સુખુમાનિ ચ;

પંસૂકૂલિકભિક્ખૂનં, ચીવરત્થાય દાપયિ.

૧૭. અટ્ઠાનવિનિયોગોપિ, સઙ્ગહો વા વિરૂપકો;

સાવજ્જો પરિભોગો વા, તસ્સ નાહોસિ સબ્બસો.

૧૮. યે યે સત્તા યદા હારા, તેસં તં તં સદાપયિ;

યે યેન સુખી હોન્તિ, તે તે તેન સુખાપયી.

૧૯. એવં પુઞ્ઞાનિ કત્વાન, છબ્બસ્સાનિ નરાધિપો;

અગમા દેવરાજસ્સ, સન્તિકં સન્તિયાવહો.

૨૦. અથ તસ્સ નુજો રાજા, કસ્સપો હોતિ ખત્તિયો;

સમત્થો રજ્જભારસ્સ, વહિતું પુબ્બવુત્તિનો.

૨૧. પિતા વિય નિયં પુત્તં, સો સઙ્ગણ્હિ મહાજનં;

દાનેન પેય્યવજ્જેન, અત્થસ્સ ચરિયાય ચ.

૨૨. ઠાનન્તરઞ્ચ દાપેસિ, તસ્સ તસ્સ યથારહં;

સયં ભુઞ્જિત્થ ભોગેપિ, સબ્બદુક્ખવિવજ્જિતો.

૨૩. ગીહિનઞ્ચેવ ભિક્ખૂનં, બ્રહ્મણાનઞ્ચ ખત્તિયો;

વત્તાપયિ સકાવારે, માઘાતઞ્ચેવ કારયિ.

૨૪. મચ્છતિત્થે દુવે ચેવ, આવાસં હેળિગામકં;

વણિજ્જગામમારામં, કસ્સપાદીગિરિં તથા.

૨૫. તથા અમ્બતનવ્હઞ્ચ, પધાનઘર મુત્તમં; ભોગગામઞ્ચ…

[એત્થકસ્સપસ્સ રજ્જપટિબદ્ધાય કથાય ઊનતા દિસ્સતિ.]

૨૬. તેસં સબ્બકનિટ્ઠોપિ, મહિન્દો નામ ખત્તિયો;

સમ્પત્તરજ્જો નાહોસિ, રાજા રજ્જ ધુરન્ધરો.

૨૭. તસ્સપિ કિર નિલવ્હો, સહાયો ચીરસત્થુતો;

મતો પુબ્બેવ તસ્મા, સો સરન્તો તં ન ઇચ્છિતં.

૨૮. અહોરજ્જમ્પિ દીપમ્હિ, ન મઞ્ઞિત્થ સુખાવહં;

અભાવેન સહાયસ્સ, સહાયા’તીવ દુલ્લભા.

૨૯. તેનેવ વુત્તં મુનિના, ધમ્મા યેકેચિ લોકિયા;

તથા લોકુત્તરા ચેવ, ધમ્મા નિબ્બાનગામિનો.

૩૦. કલ્યાણમિત્તં આગમ્મ, સબ્બે તે હોન્તિ પાણિનં;

તસ્મા કલ્યાણમિત્તેસુ, કત્તબ્બો’તિ સદા દરો.

૩૧. આદિપાદોવ સો તસ્મા, હુત્વા રજ્જં વિચારયિ;

પાલેતુંયેવ દીપમ્હિ, જિવન્તો વિય પાણિનો.

૩૨. કસ્સપસ્સ સભાતુસ્સ, પુત્તં સો અગ્ગબોધિકં;

ઠપેત્વા ઓપરજ્જમ્હિ, દત્વા ભોગમનપ્પકં.

૩૩. દેસં દત્વાન પાચિનં, વસિતું તત્થ પેસિય;

દેસં દક્ખિણમાદાસિ, રાજ પુત્તસ્સ અત્તનો.

૩૪. મહાપાળિમ્હિ દાનઞ્ચ, દાપેસિ દસવાહણં;

સબ્બે ભોગે સમે’કાસિ, યાચનાનં સહ’ત્તના.

૩૫. અદત્વા યાચકાનં સો, નુ કિઞ્ચિ પરિભુઞ્જતિ;

ભુત્તં વા સતિયા દેતિ, દ્વિ ગુણં અત્તભુત્તતો.

૩૬. સકનામં સકારેસિ, ભિક્ખુની ન મુપસ્સયં;

પાદાનગરગલ્લઞ્ચ, આરામ મરિયાદકં.

૩૭. મહિન્દતટમારામં, સમ્પત્ત ચતુપચ્ચયં;

અઞ્ઞમ્પિ બહુધા કાસિ, પુઞ્ઞં પુઞ્ઞગુણેરતો.

૩૮. તિણી વસ્સાનિ કારેત્વા, રજ્જમેવ મહામતિ;

ગવેસન્તો સહાયં’વ, દેવલોકમુપાગમિ.

૩૯. વસન્તો દક્ખિણે દેસે, અગ્ગબોધિ કુમારકો;

કેનાપિ કરણીયેન, નગરં આગતો અહુ.

૪૦. તસ્મિં તત્થ વસન્તમ્હિ, આદિપાદો મહિન્દકો;

મતો આસિ તતો તસ્સ, રજ્જં હત્થગતં અહુ.

૪૧. સો તં હત્થગતં કત્વા, સણ્ઠપેત્વાન સાસનં;

પાચિન દેસપતિનો, અગ્ગબોધિસ્સ પેસયિ.

૪૨. સ આગન્ત્વા અહુ રાજા, સિલામેઘોતિ સઞ્ઞિતો;

ઓપરજ્જે કુમારઞ્ચ, અભિસિઞ્ચિત્થ ભૂપતિ.

૪૩. સો રાજા નં નિયોજેત્વા, ચિન્તા ભારં વિમુઞ્ચિય;

ભોગે ભુઞ્જથ તુમ્હેતિ, સયં રજ્જં વિચારયિ.

૪૪. યથાયોગં જનસ્સેસ-કાસિ નિગ્ગહસંગહે;

દેસે ઉબ્બિનયં સબ્બં, મગ્ગં પાપેસિ ચક્ખુમા.

૪૫. એવં તેસુ વસન્તેસુ, ઓતારં પાપકમ્મિનો;

ન લભન્તા વિચિન્તેસું, ભિન્દિતબ્બા ઇમે ઇતિ.

૪૬. રાજાનમુપસઙ્કમ્મ, અવોચું પિસુનં રહો;

તુવં રાજાસિ નામેન, રાજા અઞ્ઞો સભાવહો.

૪૭. ઉપરાજા અયં રજ્જં, ગણ્હિસ્સતિ મહાજનં;

સઙ્ગય્હ ન ચિરેનેવ, હોતિ રાજા ન સંસયો.

૪૮. તં સુત્વાન મહીપાલો, પરિભિજ્જિ કુમારકે;

કુમારોપિ વિધિત્વા તં, ચોરો હુત્વાન રાજિન્દો.

૪૯. પલાયિત્વા સકં દેસં, સઙ્ગણ્હિત્વા તહિં જને;

મહન્તં બલમાદાય, કાતું સઙ્ગામ મારભિ.

૫૦. કદલ્યાદિનિવાતમ્હિ, સઙ્ગામો ભિંસનો અહુ;

ગતો તત્થ પરાજિત્વા, કુમારો મલયં વસો.

૫૧. તતો રાજા કતઞ્ઞૂ સો, ઉપકારં સભાતુનો;

ચિન્તેત્વા રજ્જદાનાદિં, પરિદેવિત્થ પાકટં.

૫૨. કુમારોપિ ચ તં સુત્વા, અહોસિ મુદુચિત્તકો;

એવં તે અઞ્ઞમઞ્ઞસ્સ, સિનિદ્ધન્તં પકાસયું.

૫૩. રાજા ગન્ત્વા સયંયેવ, મલયં એકકો વંસો;

કુમારં તં સમાદાય, આગમિત્થ સકં પુરં.

૫૪. હોતિ નિસ્સંસયં [એવંપિ ચિત્તો] અતીવ સો;

વિવાહં તેન કારેસિ, ધીતરં સઙ્ઘનામિકં.

૫૫. તાય સદ્ધિં વસન્તો સો, વિસ્સત્થો તેન રાજિના;

પહારં તાય પાદાસિ, દુટ્ઠો દોસમ્હિ કિસ્મિંચિ.

૫૬. પિતરં સા ઉપાગમ્મ, કરુણં રોદિતમ્પતિ;

અકારણે મં મારેતિ, દિન્નો વો સામિકો ઇતિ.

૫૭. સોપિ તં સુતમત્તેવ, દુક્કતં વત મે ઇતિ;

પબ્બાજેસિ લહું ગન્ત્વા, ભિક્ખૂની ન મુપસ્સયં.

૫૮. અગ્ગબોધિસનામોથ, તસ્સા માતુલ પુત્તકો;

સુચિરેનેવ કાલેન, તસ્સં સા રત્તમાનસો.

૫૯. કાલો’યન્તિ વિદિત્વાન, તમાદાય પલાયિતું;

અઞ્ઞતો તં ગહેત્વાન, ગતો એકોવ રોહણં.

૬૦. અગ્ગબોધિં નરિન્દો સો, અગ્ગબોધિ નમાદિય;

અગ્ગબોધિં નિહન્તું તં, રોહણં તમુપાવીસિ.

૬૧. અગ્ગબોધિ નિસેધેત્વા, અગ્ગબોધિં સભાતરં;

અપરે પબ્બતે હન્તુ-મગ્ગબોધિં સયં ગતો.

૬૨. કસિણં રોહણં હત્થ-ગતં કત્વા મહા બલો;

યુજ્ઝિત્વા તેન તં ગણ્હિ, ભરિયં સઙ્ઘમત્તનો.

૬૩. તતો પટ્ઠાય સુખિતા, સમગ્ગા તે તયો જના;

વિસ્સટ્ઠા અઞ્ઞમઞ્ઞેસુ, વિહરિંસુ યથારુચિં.

૬૪. વાપારનિં અકારામં, તથા માણગ્ગબોધિકં;

સભત્તુદ્દેસભોગઞ્ચ, વિહારે અતિયુત્તરે.

૬૫. હત્થિ કુચ્છિવિહારે ચ, વિહારે પુન પિટ્ઠિકે;

મહાદીપરિવેણે ચ, પાસાદે વાહદીપકે.

૬૬. થૂપારામમ્હિ ગેહસ્સ, દ્વારે ચ પરિજિણ્ણકે;

કાસિ પાકતિકં તત્થ, થમ્ભે ચ પરિવત્તયિ.

૬૭. એવં કત્વાન પુઞ્ઞાનિ, પુઞ્ઞાનિ ચ યથાબલં;

ચત્તાલીસતિમે વસ્સે, યથાકમ્મ મુપાગમિ.

૬૮. અથોપરાજા રાજા’સિ, અગ્ગબોધિ સિરીધરો;

તનયો સો મહિન્દસ્સ, આદિપાદસ્સ ધીમતો.

૬૯. સાસનમ્પિ ચ લોકઞ્ચ, સઙ્ગણિત્થ યથારહં;

ઓપરજ્જે’ભિસિઞ્ચત્થ, મહિન્દં પુત્તમત્તનો.

૭૦. મહાબોધિસ્સ કારેસિ, ઘરં જિણ્ણં નવં થિરં;

આરામે દ્વે ચ કારેસિ, કળન્દં મલ્લવાતકં.

૭૧. ધમ્મકમ્મેહિ સક્કચ્ચં, સોધેસિ જિનસાસનં;

વિનિચ્છનન્તો ધમ્મેન, છિન્દિ કૂટટ્ટકારકે.

૭૨. ભેસજ્જઞ્ચ ગિલાનાનં, મઙ્ગલં ચાવમઙ્ગલં;

લઙ્કાદીપમ્હિ સકલે, સયમેવ વિચારયી.

૭૩. સલાકભત્તં દાપેસિ, નિકાયત્તય વાસિનં;

ભોજનં પંસુકૂલીનં, અત્તયોગ્ગં મહારહં.

૭૪. એવમાદીનિ કત્વાન, પુઞ્ઞાનિ સસયં વસી;

ચુતો’સિ છહિ વસ્સેહિ, પુલત્થિનગરે વસં.

૭૫. તતો પુબ્બેવ તસ્સાસિ, પુત્તો સો યુવરાજકો;