પઞ્ચચત્તાલીસતિમ પરિચ્છેદ

૧. રઞ્ઞો તસ્સચ્ચયે રાજા, માણવમ્મો અહોસિ સો;

કિં ગોત્તો કસ્સ પુત્તો ચ, કથં રજ્જમપાપુણિ.

૨. મહાસમ્મતવંસમ્હિ, જાતો જાતિગુણાવહો;

પુત્તો કસ્સપનામસ્સ, થૂપારામસ્સ ભેદિનો.

૩. ધીતા મલયરાજસ્સ, સઙ્ઘનામસ્સ રાજિનો;

તં લભિત્વા વસં દેસે, ઉત્તરે લીનવુત્તિકો.

૪. હત્થદાઠનરિન્દેન, તસ્મિં અત્થેવ ધારિતે;

જમ્બુદીપમુપાગમ્મ, નરસીહં મહીપતિ.

૫. ગન્ત્વા વત્વા સકં નામં, સેવિતું તમુપક્કમિ;

આરાધેસિ ચ સબ્બેહિ, પયોગેહિ નરાધીપં.

૬. વિદિત્વા તસ્સ સોહજ્જં, નેત્વા ભરિયમત્તનો;

વાસં તત્થેવ કપ્પેસિ, સેવમાનો દિવાનિસં.

૭. સોપિ આરાધિતો તેન, કણ્ડુવેટ્ઠિ નરુત્તમો;

સબ્બં નેન્તોવ તં રજ્જં, મહાભોગમદાપયિ.

૮. તેન સંવાસમન્વાય, ભરિયા સઙ્ઘનામિકા;

ચતસ્સો ધીતરો પુત્તે, ચત્તારોપિ વિજાયથ.

૯. અથેકદિવસં રાજા, હત્થિક્ખન્ધવરં ગતો;

સઞ્ચરન્તો યથાકામં, માણવમ્મેન એકતો.

૧૦. નાળિકેરં પિવિત્વાન, તત્રટ્ઠોવ પિપાસિતો;

માણવમ્મસ્સ પાદાસિ, મઞ્ઞન્તો અઞ્ઞમેવ તં.

૧૧. સો તં ગહેત્વા ચિન્તેસિ, સખં પેસ નરાધિપો;

ઉચ્છિટ્ઠં નામ કિં હોતિ, સત્તાનં પરમત્થતો.

૧૨. તસ્મા યુત્તં મયાપાતુ-મીતિ ચિન્તિય તં પિવિ;

એવં હોન્તિ મહુસ્સાહા, દેતુકામાહિ બુદ્ધિનો.

૧૩. રાજાપિ દિસ્વા તં ભીતો, તસ્સપી તાવ સેસકં;

સયં પિવિ તથાહોતિ, કમ્મં પુઞ્ઞવતં સદા.

૧૪. ઠપેસિ સકવેસેવ, તતો પટ્ઠાય અત્તનો;

ભોજને સયને ચેવ, પરિહારે ચ વાહને.

૧૫. એવં તેસુ વસન્તેસુ, યુદ્ધત્થાયમુપક્કમિ;

વલ્લભો નરસીહેન, નરસીહો વિચિન્તયિ.

૧૬. અયં ખો મમ સેવાય, રજ્જં વંસ ગતં સકં;

લભિસ્સામીતિ સેવેતિ, રત્તિં દિવ મતન્દિતો.

૧૭. સચે સોપિ મયા ગન્ત્વા, યુજ્ઝન્તો મરણં ગતો;

તક્કિતં તસ્સ મય્હઞ્ચ, સબ્બં તમફલં ભવે.

૧૮. એવં ચિન્તિયતં રાજા, નિવત્તેત્વા સકે પુરે;

સયં વલ્લભરાજેન, કાતું સઙ્ગામમારસિ.

૧૯. માણવમ્મોપિ ચિન્તેસિ, સચે’યં મયિ જીવિતિ;

રાજા મીયતિ યુદ્ધમ્હિ, કિં ફલં મમ જીવિતે.

૨૦. વિસ્સાસો દુક્કતો તેન, ભવિસ્સતિ તથાસતિ;

સઙ્ગહેસિ કિમત્થં મં, સમાનત્તેન અત્તનો.

૨૧. તસ્મા યુત્તં મયા ગન્તું, સહસઙ્ગામ મણ્ડલં;

સુખઞ્હિ સદ્ધિં તેનેત્થ, જીવિતં મરણંપિ વા.

૨૨. એવં ચિન્તિય સન્નદ્ધ-બલો હત્થિવરં ગતો;

ગન્ત્વા દસ્સેસિ અત્તાનં, સો તં સઙ્ગામ મણ્ડલે.

૨૩. નરસીહોવ તં દિસ્વા, હટ્ઠતુટ્ઠો સમુગ્ગિરિ;

સહો સન્થવમેતસ્મિં, કત્તબ્બં મે કતં ઇતિ.

૨૪. તતો માનસ્સ સેના ચ, સેના ચેવસ્સરાજિનો;

સેનં વલ્લભરાજસ્સ, વિદ્ધંસેસિ સમાગતા.

૨૫. માણવમ્મોપિ દસ્સેસિ, તહિં સુરત્તમત્તનો;

પરક્કમન્તો દેવાનં, રણે નારાયણો વિય.

૨૬. નરસીતોપિ સન્તુટ્ઠો, માણવમ્મસ્સ વિક્કમે;

આલિઙ્ગત્વા સિનેહેન, ત્વં ખો મે જયદો ઇતિ.

૨૭. અત્તનો પુરમાગમ્મ, કત્વા વિજયમઙ્ગલં;

માણવમ્મસ્સ સેનાય, કત્તબ્બં સબ્બમાચરિ.

૨૮. અથેવં ચિન્તયિ રાજા, કત્તબ્બં મે સહાયકો;

અત્તના’કાસિ સબ્બઞ્ચ, અનણો સો મમજ્જતો.

૨૯. ઇણં મમાપિ સોધેમિ, કત્વા કત્તબ્બમત્તના;

કત્તઞ્ઞૂ કતવેદીહિ, પુરિસા’તીવદુલ્લભા.

૩૦. અમચ્ચે સન્નિપાતેત્વા, ઇદં વચનમબ્રવિ;

સહાયસ્સ મમેતસ્સ, કમ્મે તુમ્હેપિ સક્ખિનો.

૩૧. મયાપિ તસ્સ કત્તબ્બં, કમ્મં સાધુ સુખાવહં;

ઉપકારો હિ સાધૂનં, ધમ્મો પુબ્બોપકારિનો.

૩૨. એવં વુત્તે અમચ્ચા તે, પચ્ચાહંસુ મહીપતિ;

યં યમિચ્છતિ દેવોહિ, તં તં રુચ્ચતિ નો ઇતિ.

૩૩. અથ સો માણવમ્મસ્સ, સેનં દત્વા સવાહનં;

સબ્બોપકરણઞ્ચેવ, સબ્બકમ્મકરેપિ ચ.

૩૪. ગચ્છાતિ વત્વા તં યન્તં, સહસેનાયપેક્ખિય;

પરિદેવિત્થ ભૂમિન્દો, વિપ્પવુત્થં’વ પુત્તકં.

૩૫. માણવમ્મોપિ આરુય્હ, નાવાયો જલધીતટે;

ન ચિરેનેવ આગમ્મ, સમત્તિક્કમ્મ વેગસા.

૩૬. સહ સેનાય મદ્દન્થો, લઙ્કાદીપમુપવિસી;

તં સુત્વાન પલાયિત્થ, રાજા દાઠોપતિસ્સકો.

૩૭. માણવમ્મો પુરં ગન્ત્વા, અહુત્વાવ નરાધિપો;

પલાતમનુબન્ધિત્થ, પદાનુપદમુગતો.

૩૮. તદા સા દમિળિ સેના, અસ્સોસિ કિર સામિકો;

મહારોગા’ભિભૂતોતિ, સુત્વા તં સા અપક્કમિ.

૩૯. સુત્વા દાઠોપતિસ્સો તં, સમાદાય મહાબલં;

માણવમ્મં ઉપાગમ્મ, કાતુમારભિ સંયુધં.

૪૦. માણવમ્મો ચ ચિન્તેસિ, સબ્બા સેના ગતા મમ;

મતે મયિ સમિજ્ઝેય્ય, વેરિનો મે મનોરથં.

૪૧. જમ્બુદીપંવ તસ્મા’હં, ગન્ત્વા’દાસ બલં તતો;

પુન રજ્જં ગહેસ્સંતિ, તસ્મા એવમકાસિ સો.

૪૨. ગન્ત્વા પુન’પિ દિસ્વાન, સહાયં નરસીહકં;

આરાધહન્તો નિપુણં, સક્કચ્ચં તમુપટ્ઠહિ.

૪૩. યાવ રાજચતુક્કંસો, માણામ્મો તહિં વસિ;

નરસીહો’થ ચિન્તેસિ, માનત્થદ્ધો યસોધનો.

૪૪. રજ્જત્થં મે સહા યો મં, સેવન્તોયેવ અદ્ધગો;

વુદ્ધો હેસ્સતિ તં પસ્સં, કથં રજ્જં કરોમહં.

૪૫. ઇમસ્મિં પન વારસ્મિં, પેસયિત્વા બલં મમ;

રજ્જં તં ન ગહેસ્સામિ, કો અત્થો જીવિતેન મે.

૪૬. એવં ચિન્તિય સો સેનં, સન્નિપાતિય અત્તનો;

સન્નાહેત્વા યથા યોગં, દાપેત્વાન યથારુચિં.

૪૭. સયમેવ તમાદાય, સમુદ્દતટમાગતો;

નાવાયો ચિત્તરૂપાયો, કારયિત્વા થિરા બહૂ.

૪૮. અમચ્ચે આહ ‘‘એતેન, સદ્ધિં ગચ્છથ ભો’’ઇતિ;

નાવં આરોહિતું સબ્બે, ન ઇચ્છિંસુ તદા જના.

૪૯. તદા સીહો વિચિન્તેત્વા, સયં હુત્વા તિરોહિતો;

અત્તનો પરિહારં સો, રાજલક્ખણસમ્મતં.

૫૦. સબ્બં તસ્સેવ દત્વાન, અલઙ્કારમ્પિ અત્તનો;

આરોપેત્વાન તં નાવં, ગચ્છ ઠત્વાન સાગરે.

૫૧. ઇમં ભેરિંચ વાદેહિ, કોટ્ઠનામન્તિ યોજયી;

સો’પિ સબ્બં તથાકાસિ, રાજાનો અગમા ઇતિ.

૫૨. આરુહિંસુ જના નાવં, એકં કત્વા નરાધિપં;

સો તં સેનઙ્ગમાદાય, માણો ગન્તું સમારભિ.

૫૩. કેવલો’પિ સમુદ્દો સો, અહોભિ નગરૂપમો;

અથ સો પટ્ટનં પત્વા, ઓતરિત્વા સવાહનો.

૫૪. વિસ્સામેત્વા બલં તત્થ, વસં કતિપયે દિને;

ઉત્તરં દેસમાદાય, કત્વા હત્થગતં જનં.

૫૫. અક્ખોબ્ભિય મહાસેનો, નગરં ગન્તુમારભિ;

પોત્થકુટ્ઠોપિ તં સુત્વા, પચ્ચુગ્ગઞ્છિ મહાબલો.

૫૬. સંગચ્છિંસુ ઉભો સેના, ભિન્નવેલા’વ સાગરા;

માણવમ્મો તતો હત્થિ-મારુય્હ ગહિતાયુધો.

૫૭. પોત્થકુટ્ઠઞ્ચ રાજાનં, દ્વેધા કત્વા પલાપયિ;

હત્થદાઠં પલાયન્તં, દિસ્વા જનપદા નરા.

૫૮. સીસમસ્સ ગહેત્વાન, માણવમ્મસ્સ દસ્સયું;

પોત્થકુટ્ઠોપલાયિત્વા, મેરુકન્દરમાગમિ.

૫૯. તતો તં સામિકો દિસ્વા, સહાયો મે અયંચિરં;

તસ્મા ન સક્કા ચડ્ડેતું, આપદે સરણાગતં.

૬૦. સામિનો ચ સહાયસ્સ, નિદ્દોસોહં કથં ભવે;

ઇતિ ચિન્તિય પૂવં સો, સવિસં ખાદિયા’મરિ.

૬૧. કુટ્ઠકોપિ ચ તેનેવ, ખાદિત્વા પૂવકં મતો;

માણવમ્મસ્સ તસ્સેવં, દીપો આસિ અકણ્ટકો.

૬૨. માણવમ્મો તતો દીપે, છત્તં ઉસ્સાપયિ તદા;

વારેન્તો વિય તેનેવ, દુક્ખં દીપે જનસ્સ સો.

૬૩. પુઞ્ઞકમ્માનિ સો’કાસિ, અનગ્ઘાનિ બહૂનિ ચ;

સમત્થો કોહિ તં સબ્બં, વત્તું પટિપદં નરો.

૬૪. કપ્પગામવ્હયઞ્ચેવ, તથા સેપણ્ણિનામકં;

પધાનરક્ખે ચ સિરિં, સિરીસઙ્ઘાદિ બોધિકે.

૬૫. પાસાદં સોવ કારેસિ, પસાદાવહમુત્તમો;

છાદેસિ લોહપાસાદં, થૂપારામઘરં તથા.

૬૬. થૂપારામે ચ પાસાદં કત્વા’દા પંસુકૂલિનં;

જિણ્ણકં પટિસઙ્ખાસિ છત્તં ચેતિયમુદ્ધનિ;

બહવો જિણ્ણકાવાસે તત્થેવ પટિસઙ્ખરિ.

[એત્થ માણવમ્મસ્સ રજ્જકથાય ઊનતા દિસ્સતિ. ઇતો પટ્ઠાય અગ્ગબોધિસ્સ રજ્જપટિબદ્ધા કથા વિર ખાયતિ.]