ચતુચત્તાલીસતિમ પરિચ્છેદ

તિરાજકો

૧. અચ્ચયે હત્થદાઠસ્સ, અગ્ગબોધિકુમારકો;

કણિટ્ઠો રાજિનો આસિ, સિરિસઙ્ઘાદિ બોધિકો.

૨. ધમ્મરાજા અયં આસિ, સમ્મા દસ્સનસઞ્ઞુતો;

તસ્મા સો પુઞ્ઞકમ્માનિ, અપ્પમેય્યાનિ વત્તયિ.

૩. નિકાયત્તયવાસીનં, ભત્તગ્ગમવલોકયિ;

મહાપાળિઞ્ચ વડ્ઢેસિ, માઘાતઞ્ચેવ કારયિ.

૪. ઠાનન્તરઞ્ચ દાપેસિ, યથારહ મનાલયો;

સિપગોત્તાદિયોગ્ગેહિ, સંગતેહિ ચ સંગહિ.

૫. યત્થ કત્થચિ દિસ્વાપિ, ભિક્ખવો સો મહામતિ;

સક્કત્વા સોભણાપેસિ, પરિત્તં સાસનોગધં.

૬. થેરં સો ઉપસઙ્કમ્મ, નાગસાલનિવાસિનં;

દાઠાસિવં મહાપઞ્ઞં, સીલવન્તં બહુસ્સુતં.

૭. સક્કચ્ચ નં તતો સુત્વા, સમ્માસમ્બુદ્ધસાસનં;

ધમ્મે’તીવપસીદિત્વા, સબ્બસન્તિકરો ઇતિ.

૮. સુત્વા થેરિયવાદાનં, પુબ્બઞાતીનમત્તનો;

પાપાનં દુટ્ઠચિત્તાનં, અપકારે કતે બહૂ.

૯. વિહારે પરિવેણે ચ, જિણ્ણેપાકતિકે અકા;

ભોગગામે ચ દાપેસિ, તત્થ તત્થ બહૂદયે.

૧૦. વિચ્છિન્નપચ્ચયે ચાકા, તદાત્યં કુરિતે વિય;

દાસકેપિ ચ સઙ્ઘસ્સ, યથાઠાને ઠપાપયિ.

૧૧. પધાનઘર મેતસ્સ, થેરસ્સ’કાસનામકં;

પટિગ્ગહેત્વા તં સો’પિ, સઙ્ઘસ્સા’દા મહામતી.

૧૨. ભોગગામે ચ તસ્સા’દા, ભરત્તાલં કિહિમ્બિલં;

કતકઞ્ચ તુલાધારં, અન્ધકારકમેવ ચ.

૧૩. અન્ધકારં અન્તુરેળિં, બાલવં દ્વારનાયકં;

મહાનિકડ્ઢિકઞ્ચેવ, પેળહાળં તથાપરં.

૧૪. એતે અઞ્ઞે ચ સો દત્વા, ભોગગામે નરિસ્સરો;

દાસિ આરામિકે ચેવ, અત્તનો કિર ઞાતકે.

૧૫. તથા દ્વિન્નં નિકાયાનં, વિહારે મન્દપચ્ચયે;

દિસ્વાપિ ચ સુત્વા વા, ભોગગામે બહૂ અદા.

૧૬. બહુના કિન્તુવુત્તેન, નિકાયેસુ’પિ તીસુ’પિ;

અદા ગામસહસ્સં સો, બહુપ્પાદં નિરાકુલં.

૧૭. અનુસ્સરન્તો સો તિણ્ણં, રતનાનં ગુણે વરે;

એકાવલિં ગહેત્વાન, અક્ખમાલ મકા કિર.

૧૮. એવં સબ્બપ્પયોગેહિ, સો’હુ ધમ્મપરાયનો;

સબ્બે તમનુસિક્ખન્તા, હેસુ ધમ્મકરા નરા.

૧૯. દમિળો પોત્થકુટ્ઠવો, તસ્સ કમ્મકરો તદા;

માટમ્બિયવ્હં કારેસિ, પધાનઘરમબ્ભુતં.

૨૦. બૂકકલ્લે અમ્બવાપિં, તન્તવાયિકચાટિકં;

ગામં નિટ્ઠિલવેટ્ઠિઞ્ચ, તસ્સા’દા સો સદા સકં.

૨૧. કપ્પૂરપરિવેણે ચ, કુરુન્દપિલ્લકે તથા;

મહારાજઘરે ચેવ, પાસાદે સો’વ કારયિ.

૨૨. અઞ્ઞત્થા’દા તયો ગામે, વિહારેસુ મહાધનો;

પોત્થસાતવ્હયો પઞ્ઞો, વિહારે જેતનામકે.

૨૩. સેનાપતિરાજનામં, પરિવેણં સમાપયિ;

મહાકન્દો ચ દમિળો, પરિવેણં સનામકં.

૨૪. ચુલ્લપન્થં તથા એકો, સેહાલઉપરાજકં;

ઉપરાજા સકારેસિ, સઙ્ઘતિસ્સો’પિ રાજિનો.

૨૫. અઞ્ઞેસુ બહવો આસું, વિહારે એવમાદિકે;

ભસ્સ રઞ્ઞો’ નુવત્તન્તા, એવં ધમ્મીહિ પાણિનો.

૨૬. પાપં વાપિ હિ પુઞ્ઞં વા,

પધાનોયં કરોતિ યો;

લો કો તં તં કરોતેવ,

તં વિજનેય્ય પણ્ડિતો.

૨૭. જેટ્ઠનામા મહાપુઞ્ઞા, મહેસી તસ્સ રાજિનો;

જેટ્ઠારામઞ્ચ કારેસિ, ભિક્ખૂનીનમુપસ્સયં.

૨૮. તસ્સા’દાસિ ચ દ્વે ગામે, પક્કપાસાણભૂમિયં;

તમ્બુદ્ધં ભેલગામઞ્ચ, આરામિકસતં તથા.

૨૯. અકા મલયરાજાપિ, ધાતુગેહં મહારહં;

મણ્ડલગિરિવિહારમ્હિ, ચેતિયસ્સ મહાધનો.

૩૦. લોહપાસાદકે સો’વ, છાદેસિ મજ્ઝકૂટકં;

બોધિતિસ્સવિહારઞ્ચ, બોધિતસ્સો મહાયસો.

૩૧. દીપે મણ્ડલિકા સબ્બે, તત્થ તત્થ યથાબલં;

વિહારે પરિવેણે ચ, કારયિંસુ અનપ્પકે.

૩૨. તસ્સ કાલો નરિન્દસ્સ, પુઞ્ઞકમ્મમયો ઇધ;

અતિવિત્થારભીતેન, સબ્બસો ન વિચારિતં.

૩૩. પુબ્બકોપિ કથામગ્ગો, આકુલો વિય ભાતિમે;

યથાપધાનં કથિતં, હેતૂનં ઉપલક્ખણં.

૩૪. અથાપરેન કાલેન, પુલત્થિનગરં ગતો;

વાસં તત્થેવ કપ્પેસિ, કરોન્તો પુઞ્ઞસઞ્ચયં.

૩૫. અતેકિચ્છિયરોગેન, સમ્ફુટ્ઠો કાલમત્તનો;

મરણસ્સ વિદિત્વાન, તમાહુયમહાજનં.

૩૬. ઓવદિત્વાન ધમ્મેન, મરણં સો ઉપાગમિ;

મહાજનો મતે તસ્મિં, બાળ્હસોકો પરોદિય.

૩૭. કત્વા આળહણે તસ્સ, કિચ્ચં સબ્બમસેસતો;

તસ્સાળાહણભસ્મમ્પિ, કત્વા ભેસજ્જમત્તનો.

૩૮. રાજા ભણ્ડઞ્ચ તં સબ્બં, સબ્બઞ્ચ બલવાહનં;

સમ્મા આદાય ગોપેત્વા, નગરં સમુપાગમિ.

૩૯. એવં સોળસમે વસ્સે, રાજા આસિ દિવઙ્ગતો;

પોત્થકુટ્ઠોપિ દમિળો, રજ્જં તસ્સ વિચારયિ.

૪૦. ઉપરાજં ગહેત્વાન, દાઠાસિવં ખિપાપયિ;

ચારકો વિહિતું સમ્મા, રક્ખાવરણ માદિસિ.

૪૧. વિના રઞ્ઞા ન સક્કાતિ, મેદિનિં પરિભુઞ્જિતું;

આનેત્વા દત્તનામકં, ધનપિટ્ઠપ્પધાનકં.

૪૨. ઉપ્પન્નં રાજવંસમ્હિ, રજ્જે તં અભિસિઞ્ચિય;

તસ્સ નામં ઠપેત્વાન, સયં સબ્બં વિચારયિ.

૪૩. દન્તો સો ધનપિટ્ઠિમ્હિ, વિહારં સકનામકં;

કારયિત્વાન પુઞ્ઞાનિ, અઞ્ઞાનિપિ સમાચિનિ.

૪૪. સમકન્તુ સો ઠત્વા’વ, વસ્સદ્વય મહુમતો;

પોત્થકુટ્ઠો મતેતસ્મિં, પુન અઞ્ઞમ્પિ માણવં.

૪૫. હત્થદાઠં સમાહૂય, ઉણ્હા નગરસમ્ભવં;

તમ્પિ રજ્જે ભિસિઞ્ચિત્વા, યથા પુબ્બં સયંવસી.

૪૬. કાળદીઘાવિકં કત્વા, પધાનઘરકં તથા;

પુઞ્ઞમઞ્ઞં છમાસેહિ, સો’પિ મચ્ચુવસં ગતો.

૪૭. એવં વિદિત્વા બહુપદ્દવાનિ;

ધનાનિ ધઞ્ઞાનિ ચ વાહનાનિ;

વિહાય રજ્જેસુ રતિંસપ્પઞ્ઞા;

મનુઞ્ઞપુઞ્ઞાભિરતા ભવેય્યું.

સુજનપ્પસાદસંવેગત્થાય કતે મહાવંસે

તિરાજકો નામ

ચતુચત્તાલીસતિમો પરિચ્છેદો.