તેચત્તાલીસતિમ પરિચ્છેદ

ચતુરાજકો

૧. તતો વિજિતસઙ્ગામો, કસ્સપો પુરિતાસયો;

મહાપાળિમ્હિ સઙ્ઘસ્સ, સમિદ્ધં ભોજનં અકા.

૨. નાગસાલા નિવાસિં સો, મહાધમ્મકથિં યતિં;

મહાપૂજાય પૂજેત્વા, સદ્ધમ્મં તેન વાચયિ.

૩. વસન્તં ભાતુઆવાસે, સમુદ્દિસ્સ લિખાપયિ;

કટન્ધકારવાસિં સો, પાળિ સબ્બં સસઙ્ગહં.

૪. જિણ્ણં સઙ્ખરિકમ્મઞ્ચ, નવં કારેસિ ચેતિયે;

સઙ્ઘભોગમનેકઞ્ચ, તત્થ તત્થ પવત્તયિ.

૫. નાનામણિસમુજ્જોતં, કાસિ ચૂળમણિત્તયં;

સતં પણ્ડુપલાસાનં, વત્થદાનેન તપ્પયિ.

૬. તસ્સાસું બહવો પુત્તા, જેટ્ઠો તેસઞ્ચ માણકો;

સબ્બે તે ન વયપ્પત્તા, બાલાવિગતબુદ્ધિનો.

૭. તતો સો બ્યાધિના ફુટ્ઠો, અતેકિચ્છેન કેનચિ;

પુત્તા મે બાલકા સબ્બે, ને’તે રજ્જક્ખમા ઇતિ.

૮. વસન્તં રોહણે દેસે, ભાગિનેય્યં મહામતિં;

આહુય સબ્બં પાદાસિ, રજ્જં પુત્તેહિ અત્તનો.

૯. ગન્ધમાલાદિપૂજાહિ, પૂજયિત્વાન ચેતિયે;

ભિક્ખુસઙ્ઘં ખમાધપસિ, દત્વાન ચતુપચ્ચયં.

૧૦. એવં ધમ્મં ચરિત્વાન, મિત્તામચ્ચજનેસુ ચ;

ગતો નવહિ વસ્સેહિ, યથાકમ્મં નરાધિપો.

૧૧. કત્વા કત્તબ્બકિચ્ચં સો, માતુલસ્સ સગારવો;

સઙ્ગહન્તો જનં માણો, દમિળે નીહરાપયિ.

૧૨. એકતો દમિળા હુત્વા, નિબ્બાસેમ ઇમં ઇતિ;

તસ્મિં ઠિતે બહિદ્ધાવ, અગ્ગહેસું પુરં સયં.

૧૩. હત્ત દાઠસ્સ પેસેસિ, જમ્બુદીપગતસ્સ તે;

આગન્તુંતવ કાલોતિ, સાસનં રજ્જગાહણે.

૧૪. માણો’પિ સઙ્ઘં પેસેસિ, સાસનં પિતુરોહણં;

પિતા સુત્વાન તં આગા, ન ચીરેનેવ રોહણા.

૧૫. ઉભે તે મન્તયિત્વાન, અકંસુ સન્ધિલેસકં;

ઉમિળેહિ તતો જાતા, સબ્બે તે સમવુત્તિનો.

૧૬. તતો સો પિતરં રજ્જે, અભિસિઞ્ચિત્થ માણકો;

સો’ભિસિત્તો નિકાયાનં, સહસ્સાનં તયં અદા.

૧૭. સઙ્ઘં રટ્ઠઞ્ચ સઙ્ગય્હ, સબ્બં રાજકુલટ્ઠિતં;

ભણ્ડં પેસેસિ સત્તૂહિ, રક્ખણત્થાય રોહણં.

૧૮. હત્થદાઠોપિ સુત્વાન, દમિળાનં તુ સાસનં;

ખણેના’ગા ઇમં દીપં, ગહેત્વા દમિળ્હં બલં.

૧૯. તદા તે દમિળા સબ્બે, પરિભૂતા ઇધ ઠિતા;

આયન્તમેવ તં ગન્ત્વા, પરિવારેસુ મઞ્જસે.

૨૦. માણોપિ સુત્વા તં સબ્બં, નાયં કાલોતિ યુજ્ઝિતું;

પેસેત્વા પિતુરાજાનં, સદ્ધિં સારેન રોહણં.

૨૧. પુબ્બદેસં સયં ગન્ત્વા, સઙ્ગણ્હન્તો જનં વસી;

લદ્ધા દમિળપક્ખં સો, ગહેત્વા રાજકં પુરં.

૨૨. દાઠોપતિસ્સો રાજાતિ, નામં સાવેતિ અત્તનો;

માતુલં વિય તં લોકો, તેન નામેન વોહરિ.

૨૩. પિતુચ્છપુત્તમાનેત્વા, અગ્ગબોધિ સનામકં;

ઠપેત્વા યુવરાજત્તે, દેસઞ્ચા’દાસિ દક્ખિણં.

૨૪. ઠાનન્તરઞ્ચ પાદાસિ, નિસ્સિતાનં યથારહં;

સાસનસ્સ ચ લોકસ્સ, સબ્બં કત્તબ્બમાચરિ.

૨૫. મહાપાળિમ્હિ દાપેસિ, સવત્થં દધિભત્તકં;

ખીરં પાયાસકઞ્ચેવ, ધમ્મં સુણિ ઉપોસથિ.

૨૬. કારેત્વા સબ્બપૂજાયો, દેસા પેત્વાન દેસનં;

એવમાદીહિ પુઞ્ઞેહિ, અત્તાનં’કાસિ ભદ્દકં.

૨૭. કસ્સપસ્સ વિહારસ્સ, દત્વાસેનવ્હગામકં;

મહાગલ્લઞ્ચ પાદાસિ, પધાનઘરકસ્સ સો.

૨૮. પરિવેણસ્સ મોરસ્સ, અકાસિ સકગામકં;

થૂપારામસ્સ પુણ્ણોળિં, દત્વા સક્કાસિ ચેતિયં.

૨૯. કપ્પૂરપરિવેણં સો, કારેસિ અભયુત્તરે;

વિહારં તિપુથુલ્લવ્હં, કત્વા તસ્સેવ દાપયિ.

૩૦. તસ્મિં કરોન્તે વારેસું, સીમાયન્તો’તિ ભિક્ખવો;

થેરિયા તે કિબાહેત્વા, બલં તથેવ કારયિ.

૩૧. અથ તે તે થેરિયા ભિક્ખૂ, દુમ્મઞ્ઞૂ તત્થ રાજિનિ;

અસ્સદ્ધં તં વિદિત્વાન, પત્તનિક્કુજ્જનં કરું.

૩૨. વુત્તઞ્હિ મુનિના તેન, અસ્સદ્ધો યો ઉપાસકો;

અલાભાય ચ ભિક્ખૂનં, ચેતેત’ક્કોસતિ ચ તે.

૩૩. પત્તનિકુજ્જનં તસ્સ, કત્તબ્બન્તિ તતો હિ તે;

તસ્સ તં કમ્મમકરું, લોકો મઞ્ઞિત્થ અઞ્ઞથા.

૩૪. આદાયુ કુજ્જિતં પત્તં, ચરન્તો ભિક્ખુભિક્ખકં;

નિકુજ્જેય્ય ઘરદ્વારે, તસ્સા’તિ કથિકં કરું.

૩૫. તસ્મિં સો સમયે ફુટ્ઠો, બ્યાધિના મહતામરિ;

વસ્સમ્હિ નવમે રાજા, સમ્પત્તો જીવિતક્ખયં.

૩૬. દપ્પુલોપિ તતો રાજા, ગતો રોહણકં સકં;

વાસં કપ્પેસિ તત્થેવ, કરોન્તો પુઞ્ઞસઞ્ચયં.

૩૭. ઇતો પટ્ઠાય વક્ખામ, તસ્સ વંસમનાકુલં;

વુચ્ચમાનમ્હિ એત્થેવ, તસ્મિં હોતિ અસઙ્કરો.

૩૮. જાતો ઓક્કાકવંસમ્હિ, મહાતિસ્સોતિ વિસ્સુતો;

આસિ એકો મહાપુઞ્ઞો, સમાકિણ્ણગુણાકરો.

૩૯. તસ્સે’કા ભરિયા આસિ, સઙ્ઘપિવાતિ વીસ્સુતા;

ધઞ્ઞપુઞ્ઞગુણૂપેતા, ધીતા રોહણસામિનો.

૪૦. તસ્સાપુત્તા તયો આસું, પઠમો અગ્ગબેધિકો;

દુતિયો દપ્પુલો નામ, તતિયો મણિઅક્ખિકો.

૪૧. એકાવ ધીતા તસ્સાસિ, રાજનમગમા ચ સા;

જેટ્ઠો રોહણનામસ્સ, દેસસ્સા’સિ સયં વસી.

૪૨. મહાપાળિં સ કારેસિ, મહાગામે મહાધનો;

દાઠગ્ગબોધિનામઞ્ચ, પરિવેણં તહિ વંસો.

૪૩. કાણગામમ્હિ કાણાનં, ગિલાનાનઞ્ચ સાલકે;

વિહારે પટિમાવ્હે ચ, મહન્તં પટિમાઘરં.

૪૪. પતિટ્ઠપેસિ કત્વાન, બુદ્ધતત્થ સિલામયં;

મહન્તનામં સપ્પઞ્ઞો, ઇદ્ધીહિ વિય નિમ્મિતં.

૪૫. સાલવાણઞ્ચ કારેસિ, વિહારં અત્તનામકં,

પરિવેણવિહારઞ્ચ, તથા કાજરગામકં.

૪૬. નવકમ્માનિ કારેત્વા, ધમ્મસાલવિહારકે;

સયં વચ્ચકુટી એસ, તત્થ સોધેસિ બુદ્ધિમા.

૪૭. ઉચ્ચિટ્ઠં ભિક્ખુસઙ્ઘસ્સ, ભોજનં પરિભુઞ્જિય;

મણ્ડગામઞ્ચ સઙ્ઘસ્સ, ગામં’દાસિ મસાદવા.

૪૮. પુઞ્ઞાને’તાનિચઞ્ઞાનિ, કત્વા તસ્મિં દિવઙ્ગતે;

આસી તસ્સા’નુજો તત્થ, સામિ દપ્પુલનામકો.

૪૯. ઇસ્સેરં તત્થ વત્તેસિ, સમ્પમદ્દિય સત્ત વો;

મહાદાનં પવત્તેસિ, નિસ્સઙ્કં રોહણં અગા.

૫૦. તસ્સ તુટ્ઠો જનો આહ, મહાસામીતિ એસનો;

તતો પટ્ઠાય તં લોકો-મહાસામીતિ વોહરિ.

૫૧. સુત્વાન તં સિલાદાઠો, નરિન્દો સકધીતરં;

તસ્સ પાદાસિ સન્તુટ્ઠો, ગુણેહિ બહુકેહિ ચ.

૫૨. યુજરાજત્તમસ્સાદા, રજ્જયોગ્ગોતિ માનિતું;

માણવમ્માદયો તસ્સ, પુત્તા આસું મહાસયા.

૫૩. પાસાણદિપવાસિસ્સ, મહાથેરસ્સ સન્તિકે;

ધમ્મં સુત્વા પસીદિત્વા, તસ્મિં તં બહુમાનિતું.

૫૪. વિહારં રોહણે કત્વા, તસ્સ પાદાસિ સોપિ તં;

ચાતુદ્દિસિયસઙ્ઘસ્સ, પરિભોગાય વિસ્સજ્જિ.

૫૫. અમ્બમાલા વિહારાદિ, વિહારે કારયિ બહૂ;

ખદિરાલિવિહારઞ્ચ, કત્વા દેવ મપૂજયિ.

૫૬. પાસાદમનુરારામં, મુત્તોલમ્બં સુજિણ્ણકં;

સીરિવડ્ઢઞ્ચ પાસાદં, તથા તક્કમ્બિલં પરં.

૫૭. સોધેત્વા ભિક્ખવો તત્થ, દ્વત્તિંસ પરિવાસયિ;

સબ્બપચ્ચયદાનેન, સન્તપ્પેત્વા મહીમતિ.

૫૮. અદા કેવટ્ટગમ્ભીરં, ગામં નાગવિહારકે;

તથા રાજવિહારસ્સ, ગોન્નગામં સમાદિયિ.

૫૯. અદા તીસવિહારસ્સ, તથાકન્તિકપબ્બકં;

ચિત્તલપબ્બતસ્સા’દા, ગામં સો ગોન્નવિટ્ઠિકં.

૬૦. દત્વા રિયાકરસ્સેસ, ગામં સોમાલવત્થુકં;

અકાસિ પટિમાગેહં, તથેવ સુમનોહરં.

૬૧. તત્રટ્ઠસ્સ જિનસ્સા’કા, ઉણ્ણલોમં મહગ્ઘિયં;

હેમપટ્ટઞ્ચ કારેસિ, સબ્બં પૂજાવિધિં સ’કા.

૬૨. ચેતિયે પરિજિણ્ણે સો, સુધાકમ્મેન રઞ્જયિ;

તિપઞ્ચહત્થં કારેસિ, મેત્તેય્યં સુગતં પરં.

૬૩. એવમાદિનિ પુઞ્ઞાનિ, અપ્પમેય્યાનિ સો વિભૂ;

અકાસિ ચ સયં સાધુ, પરિવારેહી કારયિ.

૬૪. પરિવારા ચ તસ્સાસું, બહૂપુઞ્ઞકરા નરા;

વિહારા નેકકા આસું, કતા તેહિ સપ્પચ્ચયા.

૬૫. કદાચિ મગ્ગં ગચ્છં સો, અરઞ્ઞમ્હિ અગામકે;

સેનં સંવિદહિત્વાન, વાસં કપ્પેસિ રત્તિયં.

૬૬. સુનહાતવિલ્લિત્તો સો, સુભુત્તોસયને સુખે;

નિપન્નેસુ ઘરે રમ્મે, નિદ્દાયિતુમુપક્કમિ.

૬૭. અલભન્તો તદા નિદ્દં, કિન્નુ ખો ઇતિ કારણં;

પવત્તિં ઉપધારેન્તો, દિવસે સબ્બમત્તનો.

૬૮. અદિસ્વા કારણં અન્તો, અવસ્સં બહિ હેસ્સતિ;

ઇતિ ચિન્તિય યોજેસિ, મનુસ્સેતં ગવેસિતું.

૬૯. એવમાહ ચ નિસ્સઙ્કં, અય્યકા મમ રત્તિયં;

તેમેન્તા રુક્ખમૂલસ્મિં, ઠિતા આનેથ તે ઇતિ.

૭૦. તેપિ ગન્ત્વા ગવેસન્તા, દીપહત્થા મહાજના;

મહાગામા’ગતે ભિક્ખૂ, રુક્ખમૂલગતે તદા.

૭૧. તે ગન્ત્વા સાસનં રઞ્ઞો, આરોચેસું પધાવિસો;

દિસ્વા ચ ભિક્ખુ સન્તુટ્ઠો, નેત્વા વાસઘરં સકં.

૭૨. નિચ્ચદાનાય ભિક્ખૂનં, ઠપિતે રત્તચીવરે;

તેસં દત્વાન તિન્તાનિ, ચીવરાનિ સમાદિય.

૭૩. સુક્ખાપિય ચ કત્વાન, પાદધોવનકાદિકં;

નિસીદાપિય તે સબ્બે, સયને સાધુ સન્થતે.

૭૪. ભેસજ્જં પટિયાદેત્વા, સયમેવો’પનામિય;

પચ્ચૂસેપિ ચ કત્વાન, કત્તબ્બં ભોજનાદિકં.