દ્વિચત્તાલીસતિમ પરિચ્છેદ

છ રાજકો

૧. સઙ્ઘતિસ્સો તતો આસિ, અસિગ્ગાહો મહીપતિ;

સાસનસ્સ ચ રટ્ઠસ્સ, વુદ્ધિકામો નયે રતો.

૨. ઠાનન્તરં યથારહં, દત્વા સઙ્ગણ્હિસો જનં;

તદા ખુદ્દકરાજસ્સ, મોગ્ગલ્લાનો ચમૂપતિ.

૩. વસન્તો રોહણે સુત્વા, સઙ્ઘતિસ્સસ્સ રાજતં;

ખન્ધવારં સયુદ્ધત્થં, મહાગલ્લે નિવેસયિ.

૪. સઙ્ઘતિસ્સો ચ સુત્વા તં, બલકાયમપેસયિ;

યુજ્ઝિતું તેન તજ્જેસિ, મોગ્ગલ્લાનો મહબ્બલો.

૫. તતો હત્થસ્સમાદાય, ગન્ત્વા રત્તિવિહારકં;

બલં સો સન્નિપાતેન્તો, વાસં તત્થેવ કપ્પયિ.

૬. રાજા સુત્વા પુના’ગન્ત્વા, કદલ્લાદીનિવાતકે;

યુજ્ઝિત્વા તં પલાપેત્વા, પેસેત્વા બલમત્તનો.

૭. સયં પુરમુપાગઞ્છિ, સોપિ નટ્ઠં સવાહિનિં;

પુન પાકતિકં કત્વા, કરેહેરમુપાગમિ.

૮. રઞ્ઞો સેનાપતિ પુત્તં, પેસેત્વા ચોરસન્તિકં;

યેન કેનચિ લેસેન, સયં દુક્ખિવ દુમ્મનો.

૯. આતુરો વિય બાળ્હં સો, હોસિ મઞ્ચપરાયનો;

રાજા સુત્વા પવત્તિતં, ઉપસઙ્કમ્મ તઙ્ખણે.

૧૦. મા ત્વં સોચિ કુમારસ્સ, સમ્માનેત્વાનુસાસિય;

હન્દ ત્વં નગરં રક્ખ, નતે સક્કા મયા સહ.

૧૧. યુદ્ધમણ્ડલમાગન્તું, ગિલાનત્તાતિ યોજયિ;

ઉબ્બાસિતે જને સબ્બે, વિચ્છિન્ને રાજભોજને.

૧૨. મહાપાળિમ્હિ સમ્પક્કં, રઞ્ઞો ભોજનમાહરું;

રાજા દ્વિસ્વા’તિ નિબિન્નો, યાવ મન્દો ન હેસ્સતિ.

૧૩. એક્કો પીતિ વિચિન્તેત્વા, યુદ્ધાય સમાસા’ગમા;

સદ્ધિં પુત્તેન આરુય્હ, હત્થિંસન્નદ્ધવાહનો.

૧૪. થોકેનેવ બલેનાગા, પાચિનતિસ્સપબ્બતં;

એવં ઉભયતો ચૂળ-સઙ્ગામે પચ્ચુપટ્ઠિતે.

૧૫. સેનાપતિસમિત્તદ્દુ, યુદ્ધમારભિ પચ્છતો;

પુત્તો દિસ્વા નરિન્દસ્સ, ઘાતેસ્સામિ ઇમં ઇતિ.

૧૬. આહ રાજા નિવારેસિ, મા તે રુચ્ચિ બલં ઇદં;

નેવ સક્કા’ધિવાસેતું, અતિમન્દં હનિસ્સતિ.

૧૭. દુવિન્નં બલકાયાનં, રાજામજ્ઝગતો અહુ;

તતો સેના દ્વિધા’હોસિ, ચોરસેનાપતીપતિ.

૧૮. રઞ્ઞો નાગો મધુકવ્હ રુક્ખચ્છાયં સમાવિસિ;

તદા છત્તં પતિતસ્સ, સાખમાહચ્ચ ભૂમિયં.

૧૯. ચોરસ્સ સેના તં દિત્વા, હરિત્વા સામિનો અદા;

સો તં ઉસ્સાપયિછત્તં, ઠત્વાપબ્બતમુદ્ધનિ.

૨૦. તદા રાજબલં રાજા, નુનમેસોતિ ચિન્તિય;

ગન્ત્વા તં પરિવારેસિ, રાજા આસિ તદેકકો.

૨૧. હત્થિક્ખન્ધા તદોરુય્હ-પુત્તં’મચ્ચઞ્ચ સોહદં;

ઉપાવિસિ સમીપમ્હિ, મેરુમજ્જરકાનનં.

૨૨. મોગ્ગલ્લાનો તતો લદ્ધ-જયો વાહનમાદિય;

સેનાપતિંચ મિત્તદ્દું, તસ્સ પુત્તઞ્ચ પાપિનં.

૨૩. ઉપાગમ્મ પુરં રાજા, આસી લઙ્કા તલાધિપો;

તતો ચિન્તેસિ જીવન્તે, સત્તુમ્હિ ન સુખં ઇતિ.

૨૪. સો સુત્વા પુબ્બરાજસ્સ, પુત્તો એત્થાતિ કુજ્ઝિય;

આણાપેસિ ચ તસ્સા’સુ, હત્થપાદાનિ છિન્દિતું.

૨૫. ઉપક્કમિ તદા રઞ્ઞા, આણત્તો પુરિસો ખણે;

છિન્દિતું હત્થપાદં સો, કુમારો રોદિ દુમ્મનો.

૨૬. પૂવખાદકહત્થં મે, છિન્દેય્યં ચે તદા અહં;

ખાદિસં તેન પૂવેતિ, હં સુત્વા રાજકમ્મિકો.

૨૭. રોદિત્વા પરિદેવિત્વા, રાજાણાય દુખદ્દિતો;

વામં હત્થઞ્ચ પાદઞ્ચ, તસ્સ છિન્દિ નરાધમો.

૨૮. જેટ્ઠતિસ્સો પલાયિત્વા, રઞ્ઞો પુત્તો’પરો અગા;

અઞ્ઞતો મલયં દેસં, મેરુકન્દરનામકં.

૨૯. રાજા’થ સસુતા’મચ્ચો, ગન્ત્વા વેળુવનં રહો;

ચોદિતો તત્થ ભિક્ખૂહિ, કાસાવાનિ સમાદિયિ.

૩૦. ભિક્ખુવેસં ગહેત્વાન, રોહણં ગન્તુમાનસો;

મણિહીરં સમાગઞ્છિ, તત્રઠા રાજસેવકા.

૩૧. સઞ્જાનિત્વા તયોપેતે, તેસં પાદેવરુજ્ઝિય;

સાસનં તસ્સ પેસેસું, રાજા સુત્વા વિસેસતો.

૩૨. તુટ્ઠો આણાપયિ ગન્ત્વા, સીઘમાદાય તેજને;

તતો સીહગિરિંનેત્વા, તિસ્સઙ્કં નિરુપદ્દવં.

૩૩. સીસં ગણ્હથ તત્થેવ, રઞ્ઞો ચ તનયસ્સ ચ;

અમચ્ચં પન જીવન્ત-માનેય્યાથ મમ’ન્તિકં.

૩૪. મનુસ્સા એવમાણત્તા, તે ગહેત્વા તયોજને;

નેત્વા સીહગિરિંકાતું, યથાવુત્તમુપક્કમું.

૩૫. તતો રાજસુતો આહ, પુરિસે કમ્મકારકે;

સીસં મે પઠમં છેત્વા, દેથ મય્હં સુખં ઇતિ.

૩૬. રાજપોસા તથા’કાસું, પચ્છાછિન્દિંસુ રાજિનો;

સીસં પસ્સથ બાલાનં, કમ્મં કમ્મવિદૂજના.

૩૭. એવં અનિચ્ચા ભોગાહિ, અધુવા અસયંવસી;

તત્થ લગ્ગા કથં નિચ્ચં, સુખં ભો ન ગવેસથ.

૩૮. રઞ્ઞો સાસનમાહંસુ, અમચ્ચસ્સ હિતેસિનો;

તં સુત્વાન હસિત્વાન, ઇદં વચનમબ્રવિ.

૩૯. છિન્નસીસો મયા દિટ્ઠો, મયિ જીવતિ સામિકો;

ઠપેત્વા હમ્પિ સેવામિ, અહો અઞ્ઞઞ્હિ સામિકં.

૪૦. ઇધ તં મારયિત્વાન, છાયં તસ્સ હરિસ્સથ;

અહો અઞ્ઞાણકા તુમ્હે, મઞ્ઞે ઉમ્મત્તકા ઇતિ.

૪૧. ઇતિ વત્વાન સો પાદે, ગહેત્વા સામિનો સયિ;

તસ્સ તે હરણોપાયં, અપસ્સન્તા યથા તથા.

૪૨. તસ્સાપિ સીસં છેત્વાન, મચ્ચા આદાય તીણિ’પિ;

રઞ્ઞો દસ્સેતુમાહચ્ચ, રાજા તુસિત્થ નિબ્ભયો.

૪૩. દુટ્ઠસેના પતિસ્સા’દા, તતો મલયરાજતં;

અસિગ્ગાહકઠાનમ્હિ, તસ્સ પુત્તં ઠપેસિ ચ.

૪૪. થૂપત્તયમ્પિ છાદેસિ, વત્થેહિ અહતેહિ સો;

તથા લઙ્કાતલે સબ્બે, થૂપેકાસિ મહુસ્સવં.

૪૫. કેસધાતુઞ્ચ નાથસ્સ, દાઠાધાતું તથેવ ચ;

મહાબોધિં સસક્કચ્ચં, મહાપૂજાય સક્કરિ.

૪૬. સબ્બં વેસાખપૂજાદિં, ચારિત્તંનુગતં અકા;

ધમ્મકમ્મેન સોધેસિ, સબ્બં સુગતસાસનં.

૪૭. પિટકાનઞ્ચ સજ્ઝાયં, મહાપૂજાય કારયિ;

લાભં દત્વા તિરેકેન, પૂજયિત્થ બહુસ્સુતે.

૪૮. ભિક્ખૂનં દીપવાસીનં, સબ્બેસં ચીવરં અગા;

આવાસેસુ ચ સબ્બેસુ, કથિનં અત્થરાપયિ.

૪૯. પટિમાયો ચ કારેસિ, જિણ્ણઞ્ચ પટિસઙ્ખરિ;

લોણક્ખેત્તઞ્ચ પાદાસિ, સઙ્ઘસ્સ તિસતાધિકં.

૫૦. કારપિટ્ઠિમ્હિ કારેસિ, મોગ્ગલ્લાન વિહારકં;

વિહારા પિટ્ઠિગામઞ્ચ, સગામં વટગામકં.

૫૧. તથા ચેતિયગેહઞ્ચ’-કાસિ રક્ખવિહારકે;

વિહારં નં બહુન્નં સો, ભોગગામે બહૂ અદા.

૫૨. એવં પુઞ્ઞાની સો’કાસિ, અપ્પમેય્યાનિ ભૂમિપો;

સમ્પત્તીનમનિચત્તં, સરન્તો પુબ્બરાજિનો.

૫૩. તદા કેનચિ દોસેન, કુદ્ધોમલયરાજિનો;

સરિત્વા પુબ્બરાજસ્સ, કતં તેન વિરૂપકં.

૫૪. ઉપાયેન ગહેત્વાન, હત્થપાદઞ્ચ છેદયિ;

તં સુત્વા સો અસિગ્ગાહો, સપુત્તો રોહણંગતો.

૫૫. વસન્તો તત્થ સો કત્વા, હત્થે જનપદં લહું;

જેટ્ઠસિસ્સમુપગઞ્છિ, નિલીનં મલયે ઠિતં.

૫૬. સદ્ધિં તેનસઘાતેન્તો, રટ્ઠં જનપદં ખણે;

દોળપબ્બતમાગમ્મ, ખન્ધાવારં નિવેસયિ.

૫૭. રાજા સુત્વાન તં સબ્બં, સન્નદ્ધબલવાહનો;

ખન્ધાવારં નિવેસેસિ, ગન્ત્વા તસ્સેવ સન્તિકં.

૫૮. તદા પજ્જરરોગેન, મનુસ્સારાજિનો બહૂ;

ઉપદ્દુતા મતા આસું, તં સુત્વા સો અસિગ્ગહો.

૫૯. યુદ્ધમારભિવેગેન, રઞ્ઞો સેનાતિદુબ્બલા;

પભિજ્જિત્વા પલાયિત્થ, રાજાપચ્છા પલાયિ સો.

૬૦. દિસ્વા એકાકિનં યન્તં, સીહપબ્બતસન્તિકે;

અસિગ્ગાહો મહારાજં, મારયિત્થ સપરિસં.

૬૧. ઓહીનં પચ્છતો જેટ્ઠ-તિસ્સમ્પિ પન મારિતું;

સાસનં તસ્સ પેસેસિ, એહિ રાજા ભવાહીતિ.

૬૨. સો તઞ્ઞત્વા પલાયિત્વા, નિવત્તો મલયં અગા;

કથઞ્હિ લદ્ધં કિચ્છેન, રજ્જંસો દેતિ મે ઇતિ.

૬૩. એવં ખો દલ્લનામં સો, મોગ્ગલ્લાનં નરિસ્સરં;

મારેત્વા છહિ વસ્સેહિ, સમ્પત્તબલવાહનો.

૬૪. અથા’ગન્ત્વા અસિગ્ગાહો, અનુરાધપુરં વરં;

રાજા હુત્વા પવત્તેસિ, આણાચક્કં મહીતલે.

૬૫. સ સિલામેઘવણ્ણવ્હો, સઙ્ઘં બોધિઞ્ચ વન્દિય;

થૂપત્તયઞ્ચ સક્કાસિ, મહાપાળિઞ્ચ વડ્ઢયિ.

૬૬. પાયાસં’દાસિ સઙ્ઘસ્સ, સપ્પિફાણિતસઙ્ખતં;

છાતકે અતિકિચ્છમ્હિ, પરિસ્સાવનમેવ ચ.

૬૭. સબ્બદાનેન સઙ્ગણ્હી, કપણદ્ધિવણિબ્બકે;

પૂવમૂલધનંચા’દા, કુમારાનં મહાદયો.

૬૮. વિહારે અભયે બુદ્ધં, પૂજયિત્થ સીલામયં;

જિણ્ણઞ્ચ ગેહં તસ્સા’કા, નાનારતનચિત્તિકં.

૬૯. કોલવાપિઞ્ચ દત્વાન, આરક્ખત્થં જિનસ્સ સો;

પૂજં સબ્બોપહારેહિ, સબ્બકાલં પવત્તયિ.

૭૦. એવં તસ્મિં મહીપાલે, વસન્તે પુઞ્ઞભાજને;

નાયકો સિરિનાગવ્હો, જેટ્ઠતિસ્સસ્સ માતુલો.

૭૧. ગન્ત્વાન પરતીરં સો, આદાય દમિળે બહૂ;

આગન્ત્વા ઉત્તરં દેસં, ગણ્હિતું તમુપક્કમિ.

૭૨. રાજાપિ સુત્વા તં ગન્ત્વા, યુજ્ઝિત્વા રાજમિત્તકે;

ગામે હન્ત્વાન તં તેન, દમિળે સદ્ધિમાગતે.

૭૩. હતસેસે ગહેત્વાન, કત્વા પરિભવં બહું;

અદાસિ દાસે કત્વાન, વિહારેસુ તહિં તહિં.

૭૪. એવંસમ્પત્તવિજયે, પુરમાગમ્મભૂમિપે;

સબ્બં રટ્ઠં વિસોધેત્વા, વસન્તે અકુતો ભયે.