એકચત્તાલીસતિમ પરિચ્છેદ

દ્વિરાજકો

૧. મહાનાગનરિન્દસ્સ, ભાગિનેય્યો સુભાગિયો;

સો અગ્ગબોધિરાજાસિ, અગ્ગબોધિગતાસયો.

૨. તેજેન બાહું સોમ્મેન, ચન્દં સમ્પુણ્ણમણ્ડલં;

સુમેરુમચલન્તેન, ગમ્ભિરેન મહોદધિં.

૩. વસુન્ધરા પકમ્પેન, મારુતં સમ્પવુત્તિયા;

બુદ્ધિયામરમન્તારં, સુદ્ધિયા સરદમ્બરં.

૪. કામભોગેન દેવિન્દ, મત્થેન ચ નરિસ્સરં;

ધમ્મેન સુદ્ધવાસેટ્ઠં, વિક્કમેન મિગાધિપં.

૫. રાજધમ્મેહિ રજ્જેહિ, ચક્કવત્તિનરિસ્સરં;

વેસ્સન્તરઞ્ચ દાનેન, અનુગન્ત્વા જને સુતો.

૬. માતુલં ઉપરાજવ્હે, ભાતરં યુવરાજકે;

ભાગિનેય્યઞ્ચ મલય-રાજઠાને ઠપેસિ સો.

૭. ઠાનન્તરે યથાયોગં-સેટ્ઠામચ્ચે ઠપેસિ ચ;

જનં સઙ્ગહવત્થૂહી, રાજધમ્મેહિ ચગ્ગહિ.

૮. દેસં સયોગ્ગં પાદાસિ, યુવરાજસ્સ દક્ખિણં;

વસં તત્થ સિરીવડ્ઢ-માનવાપિં સગાહયિ.

૯. કત્વા ગિરિવિહારઞ્ચ, સઙ્ઘિકં તસ્સ દાપયિ;

ખેત્તાનં દ્વિસતં સઙ્ઘ-ભોગત્થાય મહામતિ.

૧૦. અદા મલયરાજસ્સ, દાઠાનામં સધીતરં;

પરિવેણં સીરિસઙ્ઘ-બોધિનામઞ્ચ કારયિ.

૧૧. મહાસિવસ્સ કારેસિ, પરિવેણં સનામકં;

પરિવારો’પિ તસ્સાસિ, એવં પુઞ્ઞપરાયનો.

૧૨. કત્વા સાધુપચારેન, પોરાણં સઙ્ગહં વિધિં;

અન્તરાયં વિસોધેતું, જિણ્ણઞ્ચ પટિસઙ્ખરિ.

૧૩. કવયો તસ્સ રજ્જમ્હિ, સીહળાય નિરુત્તિયા;

કાવેય્યે બહુકે’કાસું, વિચિત્રનયાસાલિનો.

૧૪. વિહારે દક્ખિણે કાસિ, પાસાદં સુમનોહરં;

અકા નવહિ વસ્સેહિ, દિપે કણ્ટકસોધનં.

૧૫. કુરુન્દનામં કારેત્વા, વિહારં સબ્બસઙ્ઘિકં;

વાપિં તન્નામકં નાળિ-કેરારામં તિયોજનં.

૧૬. મહાસિવવ્હયે ચેવ, સસ્સં કારયિતું અદા;

લાભસક્કારસમ્માન-મારામિકસતં તદા.

૧૭. વિહારં તં સમીપમ્હિ, કત્વા અમ્બિલપસ્સવં;

ગામં તન્નામકં ચાદા, થેરિયાનં તપસ્સીનં.

૧૮. ઉત્તરવલ્લિવિહારસ્સ, રતનં દીઘવણ્ણિતં;

દત્વા ગામં પતિટ્ઠેસિ, સત્થુબિમ્બં સિલામયં.

૧૯. કેળિવાતે ચ કારેસિ, સુમનં નામ પબ્બતં;

મહાતેલવટંબોધિ-ઘરે પાસાણવેદિકં.

૨૦. કારેત્વા લોહપાસાદં, પાસાદમહને અદા;

છત્તિંસાનં સહસ્સાનં, ભિક્ખૂનં સો તિચીવરં.

૨૧. ગામં દત્વા નિયોજેસિ, આરક્ખં ધીતુ નામકં;

હત્થિકુચ્છિવિહારેપિ, પાસાદં કાસિ બુદ્ધિમા.

૨૨. દાઠા સિવસ્સ ઠત્વાન, ઓવાદે સાધુ ભિક્ખુનો;

સમાચરન્તો ધમ્મેન, સક્કચ્ચં તમુપટ્ઠહિ.

૨૩. મૂગસેનાપતિં ચાકા, વિહારં સો વિસાલકં;

ગામં લજ્જિકમેતસ્સ, દાસ ભોગાય’દાસિ ચ.

૨૪. મહાનાગસ્સ પુઞ્ઞત્થં, રઞ્ઞો તંનામકં અકા;

મહાથેરસ્સ તઞ્ચા’દા, રાજા તેપિટકસ્સ સો.

૨૫. અત્તનો સદિસાનઞ્ચ, યોગીનં વિગતાલયો;

ભિક્ખૂનં ચતુસટ્ઠીનં, વિહારં તં તદા અદા.

૨૬. કત્વા તસ્સેવ મહા-પરિવેણનિવાસિનો;

ભિન્નોરુદીપં દત્વાન, વટ્ટકાકારપિટ્ઠિતો.

૨૭. દક્ખિણગીરિદળ્હવ્હે, મહાનાગે ચ પબ્બતે;

કાળવાપાદિકે ચા’કા, વિહારે પોસથાલયે.

૨૮. વિહારે અભયે’કાસિ, મહાપોક્ખરણિં તથા;

ચેતિયપબ્બતે ચાકા, નાગસોણ્ડિં થિરોદિકં.

૨૯. મહિન્દતટવાવિઞ્ચ, કારાપેત્વાન સાધુકં;

એતિસ્સા મરિયાદાય, થેરં નેતું નિયોજયિ.

૩૦. મહામહિન્દ થેરમ્હિ, તંઠાનસમુપાગતો;

તરચ્છા એવ નેતુન્તિ, કતિકઞ્ચેવ કારયિ.

૩૧. છત્તં સોણ્ણઞ્ચ કારેસિ, નિકાયેસુપિ તીસુ સો;

સત્તાટ્ઠનવ વારેસુ, મહગ્ઘરતનેહિ ચ.

૩૨. મહાતૂપે ચતુબ્બીસ-ભારં છત્તં સુવણ્ણયં;

તત્થ તત્થ ચ પૂજેસિ, મહગ્ઘં રતનુત્તમં.

૩૩. દાઠાધાતુઘરં કત્વા, વિચિત્રરતનુજ્જલં;

કાસિ હેમકરણ્ડઞ્ચ, લોહનાવઞ્ચ પાળિયં.

૩૪. મણિમેખલનામઞ્ચ, બન્ધાપેસિ સબન્ધનં;

મહામાતિઞ્ચ ગણ્હેસિ, મણિહીરકવાપિયં.

૩૫. તદા એકો મહાથેરો, જોતિપાલકનામકો;

પરાજેસિ વિવાદેન, દીપે વેતુલ્લવાદિનો.

૩૬. દાઠાપભુતિનામો’થ, આદિપાદો’તિલજ્જિતો;

હત્થમુક્ખિપ્પિ તં હન્તું, ગણ્ડો સઞ્જાયિ તંખણે.

૩૭. રાજા તસ્મિં પસીદિત્વા, વિહારેયેવ વાસયિ;

માનેન તં અનાગમ્મ, દાઠાપભૂમતો કિર.

૩૮. દત્વા મહાદિપાદત્તં, ભાગિનેય્યગ્ગબોધિનો;

રક્ખિતું તં નિયોજેસિ, થેરં સોપિ તમાચરિ.

૩૯. નીલગેહપરિચ્છેદં, કત્વા તસ્સેવ સો અદા;

કત્વેવં બહુધા પુઞ્ઞં, ચતુત્તિંસે સમે મતો.

૪૦. અગ્ગબોધિ તતો આસિ, રાજા પુબ્બસ્સ રાજિનો;

મહલ્લકત્તાનં ખુદ્દ-નામેન પરિદીપયું.

૪૧. સો દીપં પરિપાલેસિ, પુબ્બચારિત્તકોવિદો;

અકાસિ ચ મહેસિં સો, માતુલધીતુમત્તનો.

૪૨. સઙ્ઘભદ્દં અસિગ્ગાહં, કાસિ બન્ધું મહેસિયા;

યથારહમદા ચેવ, ઠાનન્તરમનાલયો.

૪૩. કત્વા વેળુવનં રાજા, સાગલીનં નિયોજયી;

જમ્બુરન્તરગલ્લઞ્ચ, કાસિ માતિકપિટ્ઠિકં.

૪૪. રઞ્ઞો તસ્સે’વ રજ્જમ્હિ, કાલિઙ્ગેસુ મહીપતિ;

સત્તાનં મરણં યુદ્ધે, દિસ્વા સંવિગ્ગમાનસો.

૪૫. ઇમં દીપમુપાગમ્મ, પબ્બજ્જા કતનિચ્છયો;

જોતિપાલમ્હિ પબ્બજિ, રાજા સક્કાસિ તં ચિરં.

૪૬. પધાનઠાનં તસ્સ’કા, વિહારે મત્તપબ્બતે;

તસ્સામચ્ચો મહેસી ચ, તથેવા’ગમ્મ પબ્બજું.

૪૭. રઞ્ઞો મહેસી સુત્વાન, તસ્સ પબ્બજ્જમુત્તમં;

સક્કચ્ચં તમુપટ્ઠાસિ, રતનવ્હઞ્ચ કારયિ.

૪૮. અદા રાજા અમચ્ચસ્સ, પાચીનકણ્ડરાજિયં;

વેત્તવાસવિહારઞ્ચ, સો’દા સઙ્ઘસ્સ તં યતિ.

૪૯. રાજત્થેરેમતે રાજા, સોચિત્વા પરિદેવિય;

પધાનઠાનં કારેસિ, ચૂળગલ્લવિહારકે.

૫૦. પલંનગરગઞ્ચેવ, તસ્સ ઠાનઞ્હિ કારયિ;

એવં તદત્થં પુઞ્ઞાનિ, બહૂનિ’પિ મહીપતિ.

૫૧. જોતિપાલિત થેરમ્હિ, તૂપારામમ્હિ ચેતિયં;

વન્દમાને પભિજ્જિત્વા, ભાગો તં પુરતો પતિ.

૫૨. પક્કોસિત્વાન રાજાનં, થેરો દસ્સેસિ દુક્ખિતો;

રાજા દિસ્વાવ સંવિગ્ગો, કમ્મં પટ્ઠપિ તંખણે.

૫૩. દક્ખિણક્ખકધાતું સો, લોહપાસાદકુચ્છિયં;

સારક્ખં ઠપયિત્વાન, રત્તિન્દિવમપૂજયિ.

૫૪. નવકમ્મે ચિરાયન્તે, થૂપારામમ્હિ દેવતા;

સુપિનં તસ્સ દસ્સેસું, રત્તિમારામિકા વિય.

૫૫. સચે રાજા પપઞ્ચેતિ, કાતું ધાતુઘરં મયં;

ધાતું ગહેત્વા ગચ્છામ, યત્થતત્થા’તિ તંખણે.

૫૬. રાજા પબુદ્ધો સંવિગ્ગો, ન ચિરેનેવ કારયિ;

કમ્મં ધાતુઘરેસબ્બં, ચિત્તકમ્માદિસઞ્ઞુત્તં.

૫૭. ચતસ્સો પટિમાયો ચ, પલ્લઙ્કે ચ સિલામયે;

હેમચ્છત્તં સિલાદન્ત-કમ્મં ગેહમ્હિ સબ્બસો.

૫૮. મહામચ્ચાદયો’કંસુ, કરણ્ડાનં સતં નવ;

દેવાનંપિયતિસ્સસ્સ, કમ્મઞ્ચ નિખિલં નવં.

૫૯. સબ્બુસ્સાહેન કારેત્વા, મહાપૂજં યથારહં;

આનેત્વા લોહપાસાદા, ધાતું સબ્બાદરેન સો.

૬૦. જોતિપાલં મહાથેરં, સસઙ્ઘં પરિવારિય;

પરિહારેન વડ્ઢેસિ, ધાતું ધાતુકરણ્ડકે.

૬૧. ધાતુગેહસ્સ પાદાસિ, લઙ્કાદીપં સહત્તના;

લાભગ્ગામ-મદા તસ્સા, રક્ખકાનં મહેસિયા.

૬૨. નાગદીપમ્હિ ગેહઞ્ચ, રાજાયતનધાતુયા;

ઉણ્ણલોમઘરઞ્ચેવ, છત્તમામલચેતિયે.

૬૩. તત્થ ગામં વિહારસ્સ, યાગુદાનાય’દાસિ ચ;

વિહારસ્સ’ભયસ્સા’દા, ગામમઙ્ગણસાલકં.

૬૪. નામં કત્વાન સો’કાસિ, અત્તનો ચ મહેસિયા;

દાઠગ્ગબોધિમાવાસં, વિહારે અતયુત્તરે.

૬૫. દેવી કપાલનાગં સા, વિહારં સાધુકારિય;

તસ્સે’વાદા વિહારસ્સ, સમ્પન્નચતુપચ્ચયં.

૬૬. ગેહં જેતવને કાસિ, રાજા રાજતચુમ્બટં;

ઉદપાનં મણાપેસિ, સોવ બોધિઘરન્તિકે.

૬૭. ગઙ્ગાતટં વલાહસ્સં, વાપિં ગિરિતટઞ્ચકા;

મહાપાળિંપિ વડ્ઢેસિ, ભતનાવઞ્ચ કારયિ.

૬૮. ભિક્ખૂનીનં મહેસી ચ, ભત્તવંસં સમાદિસિ;

એવં પુઞ્ઞાનિ કત્વા સો, દિવં’ગા દસમે સમે.

૬૯. એવં પુઞ્ઞરતા નરાધિપતયો સમ્પન્નભોગા ગમું;

મચ્ચુસ્સેવ વસં તતોહિ મતિમા સમ્મા ભવસ્સીદિસં;

પસ્સન્તો નિયમં વિહાય વિધિના સબ્બં ભવે સઙ્ગતિં;

નિબ્બાનાભિમુખો ચરેય્ય ધિતિમા પબ્બજ્જમજ્ઝૂપગો.

સુજનપ્પસાદસંવેગત્થાય કતે મહાવંસે

દ્વિરાજકો નામ

એકચત્તાલીસતિમો પરિચ્છેદો.