એકૂનચત્તાલીસતિમ પરિચ્છેદ

રાજદ્વયદીપનો

૧. તતો કસ્સપનામો સો, પાપકો નરપાલકો;

અસ્સ ગો પઞ્ચસૂદઞ્ચ, પેસયિત્વાન ભાતિકં.

૨. મારાપેતું અસક્કોન્તો, ભીતો સીહગિરિં ગતો;

દુરારોહં મનુસ્સેહિ, સોધાપેત્વા સમન્તતો.

૩. પાકારેન પરિક્ખિપ્પ, સીહાકારેન કારયિ;

તત્થ નિસ્સેણિ ગેહાનિ, તેન તં નામકો અહૂ.

૪. સંહરિત્વા ધનં તત્થ, નિદહિત્વા સુગોપિતં;

અત્તનો નિહિતાનં સો, રક્ખં દત્વા તહિં તહિં.

૫. કત્વા રાજઘરં તત્થ, દસ્સનેય્યં મનોરમં;

દુતિયાલકમન્દંવ, કુવેરોવ તહિં વસિ.

૬. મિગારો નામ કારેસિ, સેનાપતિ સનામકં;

પરિવેણં તથાગેહ-મભિસેકજિનિસ્સ ચ.

૭. તસ્સાભિસેકં યાચિત્વા, સિલાસમ્બુદ્ધતો’ધિરં;

અલદ્ધાસામિ નો રજ્જે, જાનિસ્સામીતિ સણ્ઠહિ.

૮. હુત્વા વિપ્પટિસારી સો, અત્તના કતકમ્મના;

મુચ્ચિસ્સામિ કતં નુ’તિ, પુઞ્ઞં કાસિ અનપ્પકં.

૯. મહા વત્થુનિ કારેસિ, દ્વારેસુ નગરસ્સ સો;

અમ્બુય્યાને ચ કારેસિ, દીપે યોજન યોજને.

૧૦. ઇસ્સરસમણારામં, કારેત્વા પુબ્બવત્થુતો;

અધિકં ભોગગામે ચ, અધિકં તસ્સ દાપયિ.

૧૧. બોધિ ઉપ્પલવણ્ણા ચ, તસ્સાસું ધીતરો દુવે;

વિહારસ્સ’સ્સ કારેસિ, નામં તાસઞ્ચ અત્તનો.

૧૨. દેન્તે તસ્મિં ન ઇચ્છિંસુ, સમણા થેરવાદિનો;

‘‘પિતુઘાતિસ્સ કમ્મ’’ન્તિ, લોકગારય્હ ભીરુનો.

૧૩. દાતુકામોસ તેસં’વ, સમ્બુદ્ધ પટિમાય’દા;

ભિક્ખવે અધિવાસેસું, ભોગો નો સત્થુનો ઇતિ.

૧૪. કથા નિય્યન્તિ ઉય્યાને, સમીપે પબ્બતસ્સ સો;

કારાપેસિ વિહારં સો, તેસં નામો તતો અહુ.

૧૫. અદા ધમ્મરુચિનં તં, સમ્પત્ત ચતુપચ્ચયં;

વિહારઞ્ચેવ ઉય્યાનં, દિસાભાગમ્હિ ઉત્તરે.

૧૬. ભત્તં સનીરપક્કં સો, ભુઞ્જિત્વા દિન્નમિત્થિયા;

સપ્પિયુત્તં મનુઞ્ઞેહિ, સૂપેહિ અભિસઙ્ખતં.

૧૭. મનુઞ્ઞમિદમય્યાનં, દસ્સમેવન્તિ તાદિસં;

ભત્તં પાદાસિ ભિક્ખૂનં, સબ્બેસઞ્ચ સચીવરં.

૧૮. ઉપોસથમધિટ્ઠાસિ, અપ્પમઞ્ઞઞ્ચ ભાવયિ,

સમાદિયિ ધુતઙ્ગે ચ, લિખાપેસિ ચ પોત્થકે.

૧૯. પટિમાદાન સાલાદિં, કારાપેસિ અનપ્પકં;

ભિતો સો પરલોકમ્હા, મોગ્ગલ્લાના ચ વત્તતિ.

૨૦. તતો અટ્ઠારસે વસ્સે, મોગ્ગલ્લાનો મહાભટો;

આદેસેન નિગણ્ઠાનં, દ્વાદસગ્ગસહાય વા.

૨૧. જમ્બુદીપા ઇધાગમ્મ, દેસે અમ્બટ્ઠકોલકે;

કુળારી નામે બન્ધિત્થ, વિહારે બલસઞ્ચયં.

૨૨. રાજા સુત્વા ગહેત્વા તં, ભઞ્જિસ્સામિતિ નિક્ખમિ;

નેમિત્તેહિ ન સક્કાતિ, વદન્તેપિ મહાબલો.

૨૩. મોગ્ગલ્લાનોપિ સન્નદ્ધ બલો સૂરસહાય વા;

ગચ્છન્તો સુરસઙ્ગામં, દેવો વિય સુજમ્પતિ.

૨૪. અઞ્ઞમઞ્ઞં ઉપાગમ્મ, ભિન્નવેલાવ સાગરા;

આરભિંસુ મહાયુદ્ધં, બલકાયા ઉભોપિ તે.

૨૫. કસ્સપો પુરતો દિસ્વા, મહન્તં કદ્દમાસયં;

ગન્તુમઞ્ઞેન મગ્ગેન, પરિવત્તેસિ દન્તિનં.

૨૬. દિસ્વા તં સામિકોનો’યં, પલાયતિ ભણે ઇતિ;

બલકાયો પભિજ્જિત્થ, ‘‘દિટ્ઠં પિઠ’’ન્તિ ઘોસયું.

૨૭. મોગ્ગલાન બલારાજા, છેત્વા નિકરણેન સો;

સીસં ઉક્ખિપિયા’કાસં, છુરિકં કોસિયં ખિપિ.

૨૮. કત્વા’ળાહન કિચ્ચં સો, તસ્સ કમ્મે પસીદિય;

સબ્બંસો ધનમાદાય, આગઞ્છિ નગરં વરં.

૨૯. ભિક્ખૂ સુત્વા પવત્તિં તં, સુનિવત્થા સુપારુતા;

સમ્મજ્જિત્વા વિહારઞ્ચ, અટ્ઠંસુ પટિપાટિયા.

૩૦. મહામેઘવનં પત્વા, દેવરાજાવ નન્દનં;

મહાસેન નિવત્તેત્વા, હત્થિપાકારતો બહિ.

૩૧. ઉપસઙ્કમ્મ વન્દિત્વા, સઙ્ઘે તસ્મિં પસીદિય;

છત્તત્તેન સઙ્ઘં પૂજેસિ, સઙ્ઘો તસ્સેવ તં અદા.

૩૨. તં ઠાનં છત્તવડ્ઢીતિ, વોહરિંસુ તહિં કતં;

પરિવેણમ્પિ તં નામં, અહોસિ પુરમાગતો.

૩૩. વિહારે દ્વેપિ ગન્ત્વાન, સઙ્ઘં તત્થા’ભિવન્દિય;

પાપુણિત્વા મહારજ્જં, લોકં ધમ્મેન પાલયિ.

૩૪. કુદ્ધો નીહરિ દાઠંસો, ઘાતકં પિતુનો મમ;

અનુવત્તિત્વા મચ્ચાતિ, તેન રક્ખસ નામ વા.

૩૫. અતિરેકસહસ્સં સો, અમચ્ચાનં વિનાસયિ;

કણ્ણનાસાદિ છેદેસિ, પબ્બાજેસિ તથા બહૂ.

૩૬. તતો સુત્વાન સદ્ધમ્મ-મુપસન્નો સુમાનસો;

મહાદાનં પવત્તેસિ, મેઘો વિય મહીતલે.

૩૭. ફુસ્સપુણ્ણમીયં દાન-મનુવસ્સં પવત્તયિ;

તતો પટ્ઠાય તં દાનં, દીપે અજ્જાપિ વત્તતિ.

૩૮. સોપિ સારથિકો લાજ-દાયકો પિતુરાજિનો;

આનેત્વા પિતુસન્દે સં, મોગ્ગલ્લાનસ્સ દસ્સયિ.

૩૯. તં દિસ્વા પરિદેવિત્વા, પિતુનો પેમ મત્તની;

વણ્ણેત્વા તસ્સ પાદાસિ, દ્વારનાયકતં વિભૂ.

૪૦. સેનાપતિ મિગારોહિ, નિવેદેત્વા યથા વિધિં;

અભિસેક જિનસ્સા’કા, અભિસેકં યથારુચિં.

૪૧. સીહા’ચલે દળ્હનામં, દાઠા કોણ્ડઞ્ઞકમ્પિ ચ;

વિહારં ધમ્મરુચિનં, સાગલિનઞ્ચ દાપયિ.

૪૨. પબ્બતન્તુ વિહારંસો, કત્વા થેરસ્સ દાપયિ;

મહાનામસનામસ્સ, દીઘસણ્ડ વિહારકે.

૪૩. રાજિનિનામકઞ્ચેવ, કત્વા ભિક્ખુનુપસ્સયં;

અદા સાગલિકાનં સો, ભિક્ખુનીનં મહામતિ.

૪૪. લમ્બકણ્ણકગોત્તોપિ, દાઠા પભુતિ નામકો;

કસ્સપસ્સ ઉપઠાને, કોચિ નિબ્બિન્ન માનસો.

૪૫. ગન્તા મે રેલિયં વગ્ગં,

વાસં તત્થેવ કપ્પયિ;

અહોસિ પુત્તો તસ્સેકો,

સિલાકા લોતિ પિસ્સુતો.

૪૬. સોપિ કસ્સપતો ભીતો, ઞાતકેન સહ’ત્તનો;

મોગ્ગલ્લાનેન ગન્ત્વાન, જમ્બુદીપતલં ઇતો.

૪૭. બોધિપણ્ડવિહારમ્પિ, પબ્બજ્જં સમુપાગતો;

કરોન્તો સઙ્ઘકિચ્ચાનિ, સાદરો સો સુપેસલો.

૪૮. અમ્મં સઙ્ઘસ્સ પાદાસિ, સઙ્ઘો તસ્મિં પસીદિય;

આહ’મ્બ સામણેરો’તિ, તેન તં નામકો અહુ.

૪૯. સો કેસધાતુવંસમ્હિ, વુત્તેન વિધિના તતો;

કેસધાતું લભિત્વાન, તસ્સ રજ્જે ઇધા’નયિ.

૫૦. તસ્સ કત્વાન સક્કારં, ગહેત્વા કેસ ધાતુયો;

મહગ્ઘે નિદહિત્વાન, કરણ્ડે ફલિકુમ્ભવ્હે.

૫૧. દીપઙ્કરસ્સ નાથસ્સ, પટિમાય ઘરે વરે;

વડ્ઢેત્વા પરિહારેન, મહાપૂજં પવત્તયિ.

૫૨. માતુલં ભરિયઞ્ચ’સ્સ, કત્વા સોવણ્ણયં તહિં;

ઠપેસિ પટિમાયો ચ, અસ્સ બિમ્બઞ્ચ ચારુકં.

૫૩. કેસધાતુકરણ્ડઞ્ચ, છત્તં રતનમણ્ડપં;

સાવકગ્ગયુંગં વાળ-બીજનિઞ્ચ સકારયિ.

૫૪. પરિહારઞ્ચ તસ્સ’દા, રાજા અધિકમત્તનો;

સિલાકાળ મસિગ્ગાહં, કત્વા રક્ખાય યોજયિ.

૫૫. અસિગ્ગાહસિલાકાળો, ઇતિ તેના’સિ વિસ્સુતો;

ભગિનિઞ્ચ’સ્સ પાદાસિ, સદ્ધિં ભોગેન ભૂમિપો.

૫૬. વુત્તો’યમતિ સઙ્ખેપો, વિત્થારો પન સબ્બસો;

કેસધાતુકવંસમ્હા, ગહેતબ્બો વિભાવિના.

૫૭. બન્ધિત્વા સાગરા રક્ખં, દીપઞ્ચ કાસિનિબ્ભયં;

ધમ્મકમ્મન સોધેસિ, સધમ્મં જિનસાસનં.

૫૮. સેનાપતિસ નામં’કા, પધાનઘર મુત્તરો;

કત્વા’ટ્ઠારસમે વસ્સે, સો પુઞ્ઞાનિ ખયં ગતો.

૫૯. કસ્સપતો જિતો અતિબલિ પુઞ્ઞક્ખયે સઙ્ખતે;

જેતું નો વિસહિત્થ મચ્ચુમુપગં સો યેવદાસોવિય;

તસ્મા મચ્ચુબલં નિહચ્ચ સુખિનો હેસ્સન્તિ મેધાવિનો;

નિબ્બાનં પરમચ્ચુતં સિવપદં પત્તબ્બમત્તઞ્ઞુના.

સુજનપ્પસાદ સંવેગત્થાય કતે મહાવંસે

રાજદ્વયદીપનો નામ

એકૂનચત્તાલીસતિમો પરિચ્છેદો.