અટ્ઠતિંસતિમ પરિચ્છેદ

દસરાજકો

૧. મહાનામ સુતો આસિ, દમિળી કુચ્છિસમ્ભવો;

સોત્થિસેનો, તથાસઙ્ઘો-ધીતા ચા’સિ મહેસિયા.

૨. સોત્થિસેનો તદા રજ્જં, પત્વા સઙ્ઘયનાસિતો;

તસ્મિંયેવ દિને ભેરિં, ચરાપેત્વા તદા તુ સા.

૩. અત્તનો સામિકસ્સદા, છત્તગ્ગાહકજન્તુનો;

છત્તગ્ગાહકવાપિં સો, કત્વા સંવચ્છરે મતો.

૪. અથ મચ્ચો મહાપઞ્ઞો, સહાયો તસ્સ તં મતં;

અન્તોવત્થુમ્હિ ઝાપેત્વા, વીહિચોરં મહાબલં.

૫. રજ્જયોગ્ગોતિ ચિન્તેત્વા, કત્વા તં ભૂપતિં રહો;

અન્તોયેવ નિવાસેત્વા, રાજા રોગાતુરો ઇતિ.

૬. યસં રજ્જં વિચારેસિ, છણે પત્તે મહાજના;

રાજા ચે અત્થિ અમ્હેહિ, સદ્ધિં મેતૂતિ ઘોસયું.

૭. તં સુત્વા નરપાલો સો, સબ્બલઙ્કારમણ્ડિતો;

સમાનંતે મહાનાગે, નેસયોગ્ગા મમા’તિસો.

૮. દાટ્ઠાધાતુઘરઠાને, સુવા નાગં સમાદિસિ;

રઞ્ઞો આણાતિ વુત્તે સો, અગા આરુય્હ તં પુરં.

૯. કત્વા પદક્ખિણં ગન્ત્વા, પાચિનદ્વારતો બહિ;

પઠમે ચેતિયઠાને, ધાતુનાગં સમપ્પયિ.

૧૦. મહાચેતિત્તયે હત્થિ-પાકારે’કાસિ તોરણં;

મિત્તસેનો બહું પુઞ્ઞં, કત્વા વસ્સેન સો ચુતો.

૧૧. મિત્તસેનં રણે હન્ત્વા, દમિળો પણ્ડુનામકો;

આગતો પરતીરમ્હા, લઙ્કારજ્જમકારયિ.

૧૨. જના કુલીના સબ્બેપિ, રોહણં સમુપાગતા;

ઓરગઙ્ગાય ઇસ્સેરં, દમિળા એવ કપ્પયું.

૧૩. યે સુભસ્સ બલટ્ઠસ્સ, ભીતામોરિયવંસજા;

બલાયિત્વા નરાવાસં, કપ્પયિંસુ તહિં તહિં.

૧૪. તેસમઞ્ઞતમો નન્દિ-વાપિ ગામે કુટિમ્બકો;

ધાતુસેનવ્હયો આસિ, દાઠાનામો ચ તં સુતો.

૧૫. ગામે અમ્બિલયાગુમ્હિ, વસં પુત્તે દુવે લભિ;

ધાતુસેનં સિલાતિસ્સ-બોધિંચ સમ્પજાતિકે.

૧૬. માતુસો દરિયો તેસં, સદ્ધો પબ્બજ્જ વત્તતિ;

દીઘસન્દકતાવાસે, ધાતુસેનાપિ માણવો.

૧૭. સન્તિકે તસ્સ પબ્બજ્જ-રુક્ખમૂલમ્હિ એકદા;

સજ્ઝાયતિ પવિસ્સિત્થ, મેઘો નાગોતુપસ્સિય.

૧૮. પરિક્ખિપિત્વા ભોગેહિ, છાદયિત્વા ફણેન ચ;

પોત્થકઞ્ચ કુમારઞ્ચ, રક્ખિતં પસ્સિ માતુલો.

૧૯. સીસે આકિરિ સઙ્કારં, તસ્સ રુટ્ઠો પરોયતિ;

તસ્મિં ચિત્તં ન દૂસેસિ, તમ્પિ દિસ્વાન માતુલો.

૨૦. ઉત્તમો વત’યં સત્તો, રાજા હેસ્સતિ નિચ્છયં;

રક્ખિતબ્બો’તિ આદાય, તં વિહારમુપાગતો.

૨૧. ગોણિસાદિ વિહારે’યં, કત્તબ્બો નીતિમા ઇતિ;

સિક્ખાપેસિ કુમારં તં, પણ્ડુકો તં વિજાનિય.

૨૨. ગણ્હથેતન્તિપેસેસિ, સેવકે તસ્સારત્તિયં;

દિસ્વાન સુપિનં થેરો, નીહરિત્થ કુમારકં.

૨૩. તસ્મિં નિક્ખન્તમત્તમ્હિ, સેવકં પરિવારિય;

પરિવેણે ન પસ્સિંસુ, તતો નિક્ખમ્મ તે ઉભો.

૨૪. દક્ખિણસ્મિં દિસાભાગે, ગોણ નામં મહાનદિં;

પત્વા સમ્પુણ્ણમટ્ઠંસુ, ગન્તુકામાપિ વેગસા.

૨૫. યથા નદિયં વારેતિ, અમ્હે તં ત્વમ્પિ વારય;

વાપિંગહેત્વા એત્થે’તિ, વત્વા થેરો તદા નદિં.

૨૬. ઓતરિત્થકુમારેન, સદ્ધિં દિસ્વાન તે ઉભો;

નાગરાજા તદા એકો, પિટ્ઠિં પાદાસિ તેન સો.

૨૭. ઉત્તરિત્વા કુમારં તં, નેત્વા પચ્ચન્તમાવસં;

લદ્ધા ખીરોદનં સુત્વા, સેસં પત્તેન તસ્સ’દા.

૨૮. ચિત્તકારેન થેરમ્હિ, ભત્તં પક્ખિપ્પ ભૂમિયં;

ભુઞ્જિ થેરોપિ તં જાનિ, ભુઞ્જ તે યં મહિં ઇતિ.

૨૯. પણ્ડુરાજાપિ કત્વાન, રજ્જં વસ્સમ્હિ પઞ્ચમે;

ચુતો પુત્તો પિપારિન્દો, તતિયો તસ્સ ભાતુકો.

૩૦. કણિટ્ઠો ખુદ્દપારિન્દો, કુબ્બં રજ્જં મહામહિં;

ધાતુસેનાનુગે સબ્બે, વિહેઠેસિ મહાજને.

૩૧. સઙ્ગહેત્વા જને સાધુ-સેનો યુજ્જિત્થ રાજિના;

સો સોળસહિ વસ્સેહિ, પુઞ્ઞપાપકરોમતો.

૩૨. નિરિતરો તતો આસિ, રાજામાસદ્વયેન તં;

ધાતુસેનો વિનાસેસિ, તેન કત્વા મહાહવં.

૩૩. હતે તસ્મિં મહીપાલે, દાઠિયો દમિળો તતો;

રાજા વસ્સત્થ યે હુત્વા, ધાતુસેનહતોતતો.

૩૪. પિટ્ઠિયો દમિળો સત્ત-માસેન નિધનં ગતો;

ધાતુસેનેન યુજ્ઝિત્વા, વંસો પચ્છિજ્જિ દામિળો.

૩૫. અથા’સિ રાજાલઙ્કાયં, ધાતુસેનો ઇરાધિપો;

ભાતરા સહ દીપમ્હિ, દમિળે દીપઘાતકે.

૩૬. ઉપાયેહિ અનેકેયિ, એકવીસપ્પમાણકે;

ખન્ધવારે નિવેસેત્વા, કત્વા યુદ્ધમસેસતો.

૩૭. સોધેત્વા મેદિનિં સાધુ, કત્વા ચ સુખિતંજનં;

સાસનઞ્ચ યથાઠાને, ઠપેસિ પરનાસિતં.

૩૮. દમિળે યે’નુવત્તિંસુ, કુલીના કુલગામવા;

તે મં વા સાસનં વા નો, રક્ખિંસૂ’તિ પકુપ્પિય.

૩૯. તેસં ગામે ગહેત્વાન, ગામે સ્વાકાસિરક્ખકે;

રોહણા’ગમ્મ તે સબ્બે, કુલીના તમુપટ્ઠહું.

૪૦. તેસં સક્કારસમ્માનં, યથાયોગમકાસિ સો;

અમચ્ચે અત્તનો દુક્ખ-સહાયેચા’ભિ તોસયિ.

૪૧. બન્ધાપેત્વા મહાગઙ્ગં, કેદારે’કા થિરોદકે;

મહાપાળમ્હિ ભિક્ખૂનં, સાલિભત્તઞ્ચ દાપયિ.

૪૨. પઙ્ગુરોગા તુરટ્ટાનં, સાલાયોકાસિ બુદ્ધિમા;

કાળવાપિંચ ગણ્હિત્વા, બન્ધિ ગોણં મહાનદિં.

૪૩. મહાવિહારં કત્વાન, પન્તિયુત્તમનાકુલં;

તથા બોધિઘરઞ્ચેવ, દસ્સનેય્ય મકારયિ.

૪૪. ભિક્ખવો પરિતોસેત્વા, પચ્ચયેહિ ચતૂહિપિ;

ધમ્માસોકો’વ સોકાસિ, સઙ્ગહં પિટકત્તયે.

૪૫. અટ્ઠારસવિહારે ચ, થેરિયાન મકારયિ;

સમ્પન્નભોગે દીપમ્હિ, અટ્ઠારસ ચ વાપિયો.

૪૬. કાળવાપી વિહારો ચ, કોટિપસ્સાવનામકો;

દક્ખિણ ગિરિનામો ચ, વિહારો વડ્ઢમાનકો.

૪૭. પણ્ણવલ્લકભૂતો ચ, ભલ્લાતકસનામકો;

પાસાણસિન્ને દેસમ્હિ, ધાતુસેનો ચ પબ્બતો.

૪૮. મં ગનો થૂપવિટ્ઠિ ચ, ધાતુસેનોપિ ઉત્તરે;

પાચિન કમ્બવિટ્ઠિ ચ, તથા અન્તરમે ગિરિ.

૪૯. અન્તાળિ ધાતુસેનો ચ, કસ્સપિટ્ઠિક પુબ્બકો;

રોહણેદાયગામો ચ, સાલવાણો વિભીસનો.

૫૦. વિહારો ભલ્લિવાણો ચ, અટ્ઠારસનરુત્તમો;

પાદૂલકં હમ્બલટ્ઠિ, મહાદત્થાદિવાપિ યો.

૫૧. ખુદ્દકે ચ વિહારેસો, અટ્ઠારસનરુત્તમો;

વાપીયો ચ તથાકત્વા, તેસમેવ તુ દાપયિ.

૫૨. પઞ્ચવીસતિ હત્થઞ્ચ, મયૂરપરિવેણકં;

હરિત્વા’કાસિપાસાદ-મેકવીસતિ હત્થકં.

૫૩. કુમારસેનસ્સ’પેત્વા, પુબ્બભોગં વિસોધયિ;

કાળવાપિમ્મિભાગદ્ધં, ખેત્તાનઞ્ચ સતદ્વયં.

૫૪. લોહ પાસદકે જિણ્ણે, નવકમ્મમકારયિ;

મહાથૂપેસુ છત્તાનિ, તીસુ જિણ્ણાનિ કારયિ.

૫૫. દેવાનંપિયતિસ્સેન, કતં બોધિમહં વિય;

સિન્હાનપૂજં બોધિસ્સ, વરબોધિસ્સ કારયિ.

૫૬. ધાવના લોભનાવાયો, તત્થ પૂજેસિ સોળસ;

અલઙ્કારં મુનિન્દસ્સ, અભિસેકઞ્ચ કારયિ.

૫૭. મહાબોધિ પતિટ્ઠાના, ઓરં લઙ્કાય ભૂમિપા;

યાવ દ્વાદસમં વસ્સં, બોધિપૂજમકારયું.

૫૮. મહામહિન્દત્થેરસ્સ, કારેત્વા પટિબિમ્બકં;

થેરસ્સા’લાહનં નેત્વા, કાતું પૂજં મહારહં.

૫૯. દત્વા સહસ્સં દીપેતું, દીપવંસં સમાદિસિ;

ઠિતાનં તત્થ ભિક્ખૂનં, દાતુઞ્ચાણાપયિગુળં.

૬૦. ભિક્ખુસ્સ અત્તનો સીસે, સઙ્કારોકિરણં સરં;

લાભં નાદાસિ વુત્થસ્સ, પરિવેણસ્સ અત્તનો.

૬૧. ફાતિકમ્મં બહું’કાસિ, વિહારે અભયુત્તરે;

સિલાસત્થુસ્સ કારેસિ, મન્દિરઞ્ચ સમણ્ડપં.

૬૨. બુદ્ધ દાસકતેનેત્તે, નટ્ઠે’નગ્ઘમણિ દ્વયં;

અકાસિ નેત્તં સત્થુસ્સ, રંસિ ચૂળામણિંતથા.

૬૩. મણિહિ ઘનનીલેહિ, કેસા વત્તં સુમુત્તમં;

હેમપટ્ટં તથેવુણ્ણ-લોમં સોવણ્ણ ચીવરં.

૬૪. પાદજાલં સુવણ્ણસ્સ, પદુમં દીપમુત્તમં;

નાનારાગમ્બરં તત્થ, પૂજયિત્થ અસંખિયં.

૬૫. અકાસિ પટિમા ગેહે, બહુમઙ્ગલચેતિયે;

બોધિસત્તે તથા’કાસિ, કાળસેલસ્સ સત્થુનો.

૬૬. ઉપસુમ્ભવ્હયસ્સાપિ, લોકનાથસ્સ કારયિ;

રંસીચૂળામણિઞ્ચેવ, અભિસેકવ્હયસ્સ ચ.

૬૭. બુદ્ધબિમ્બસ્સ કારેસિ, પુબ્બે વુત્તં પિળન્ધનં;

વામપસ્સમ્હિ બોધિસ્સ, બોધિસત્તઘરં તથા.

૬૮. મેત્તેય્યસ્સ ચ કારેસિ, સબ્બં રાજપિળન્ધનં;

સમન્તા યોજને તસ્સ, તદા રક્ખઞ્ચ યોજયિ.

૬૯. કારાપેસિ વિહારેસુ, ધાતુરાજવ્હપન્તિયો;

તથા સતસહસ્સેન, મહાબોધિઘરં વરં.

૭૦. થૂપારમમ્હિ થૂપસ્સ, પૂજં જિણ્ણવિસોધનં;

દાઠા ધાતુઘરેચાપિ, જિણ્ણસ્સ પટિસઙ્ખરં.

૭૧. દાઠાધાતુકરુણ્ડઞ્ચ, રંસિઞ્ચ ઘનકોટ્ટિમં;

મહગ્ઘમનિસંકિણ્ણં, સુવણ્ણ પદુમાનિ ચ.

૭૨. દાઠાધાતુમ્હિ પૂજેસિ, પૂજાચાકા અસઙ્ખિયા;

ચીવરાદીનિ દાપેસિ, ભિક્ખૂનં દીપવાસિનં.

૭૩. કારાપેત્વા વિહારેસુ, નવકમ્મં તહિં તહિં;

પાકારે ચ ઘરેત્વા’કા, સુધાકમ્મં મનોહરં.

૭૪. મહાચેતિત્તયે કત્વા, સુધાકમ્મં મહારહં;

સુવણ્ણછત્તં કારેસિ, તથા વજિરચુમ્બટં.