સત્તતિંસતિમ પરિચ્છેદ

પઞ્ચરાજકો

૧. જેટ્ઠતિસ્સચ્ચયે તસ્સ, મહાસેનો કનિટ્ઠકો;

સત્તવીસતિવસ્સાનિ, રાજા રજ્જમકારયિ.

૨. તસ્સ રજ્જાભિસેકં તં,

કારેતું પરતીરતો;

સો સઙ્ઘમિત્તત્થેરો તુ,

કાલં ઞત્વા ઇધાગતો.

૩. તસ્સાભિસેકં કારેત્વા, અઞ્ઞં કિચ્ચઞ્ચનેકધા;

મહાવિહાર વિદ્ધંસં, કાતુકામો અસઞ્ઞતો.

૪. અવિનયવાદિનો એતે, મહાવિહારવાસિનો;

વિનયવાદી મયં રાજ, ઇતિ ગાહિય ભૂપભિં.

૫. મહાવિહારવાસિસ્સ, આહારં દેતિ ભિક્ખુનો;

યો સો સતં દણ્ડિયો’તિ, રઞ્ઞા દણ્ડં ઠપાપયિ.

૬. ઉપદ્દુતા તેહિ ભિક્ખૂ, મહાવિહારવાસિનો;

મહાવિહારં છડ્ડેત્વા, મલયં રોહણં અગું.

૭. તેન મહાવિહારો’યં, નવવસ્સાનિ છડ્ડિતો;

મહાવિહારવાસીહિ, ભિક્ખૂહિ આસિ સુઞ્ઞકો.

૮. ‘‘હોતિ અસ્સામિકં વત્થુ, પુતુવિસામિનો’’ઇતિ;

રાજાનં સઞ્ઞાપેત્વા સો, થેરો દુમ્મતિ દુમ્મતિં.

૯. મહાવિહારં નાસેતું, લદ્ધાનુમતિ રાજતો;

તથા કાતું મનુસ્સે સો, યોજેસિ દુટ્ઠમાનસો.

૧૦. સઙ્ઘમિત્તસ્સ થેરસ્સ, સેવકો રાજવલ્લભો;

સોણામચ્ચો દારણો ચ, ભિક્ખવો ચ અલજ્જિનો.

૧૧. ભિન્દિત્વા લોહપાસાદં, સત્તભૂમક મુત્તમં;

ઘરે નાનપ્પકારે ચ, ઇતો’ભયગિરિં નયું.

૧૨. મહાવિહારા નીતેહિ, પાસાદેહિ બહૂહિ ચ;

અભયગિરિવિહારોયં, બહુપાસાદકો અહુ.

૧૩. સઙ્ઘમિત્તં પાપમિત્તં, થેરં સોણઞ્ચ સેવકં;

આગમ્મ સુબહું પાપં, અકાસિ સો મહીપતિ.

૧૪. મહાસિલાપટિમં સો, પાચિનતિસ્સપબ્બતા;

આનેત્વા’ભયગિરિમ્હિ, પતિટ્ઠાપેસિ ભૂપતિ.

૧૫. પટિમાઘરં બોધિઘરં, ધાતુસાલં મનોરમં;

ચતુસાલઞ્ચ કારેસી, સઙ્ખરી કુક્કુટવ્હયં.

૧૬. સઙ્ઘમિત્તેન થેરેન, તેન દારુણકમ્મુના;

વિહારો સો’ભયગિરિ, દસ્સનેય્યો અહુ તદા.

૧૭. મેઘવણ્ણાભયો નામ, રઞ્ઞો સબ્બત્થ સાખકો;

સખા અમચ્ચો કુજ્ઝિત્વા, મહાવિહારનાસને.

૧૮. ચોરો હુત્વાન મલયં, ગન્ત્વા લદ્ધમહબ્બલો;

ખન્ધાવારં નિવેસેસિ, દુરતિસ્સકવાપિયં.

૧૯. તત્રા’ગતં તં સુત્વા, સહાયં સો મહીપતિ;

યુદ્ધાહ પચ્ચુગ્ગન્ત્વાન, ખન્ધાવારં નિવેસયિ.

૨૦. સાધું પાનઞ્ચ મંસઞ્ચ, લભિત્વા મલયાગતં;

‘‘ન સેવિસ્સં સહાયેન, વિના રઞ્ઞા’’તિ ચિન્તિય.

૨૧. આદાય તં સયંયેવ, રત્તિં નિક્ખમ્મ એકકો;

રઞ્ઞો સન્તિકમાગમ્મ, તમત્થં પટિવેદયિ.

૨૨. તેના’ભતં તેન સહ, વિસ્સત્થો પરિભુઞ્જિય;

‘‘કસ્મા ચોરો અહુ મે ત્વં, ‘‘ઇતિ રાજા અપુચ્છિતં.

૨૩. ‘‘તયા મહાવિહારસ્સ, નાસિતત્તા’’તિ અબ્રુવિ;

‘‘વિહારં વાસયિસ્સામિ, ખેમમેતં મમચ્ચયં.

૨૪. ઇચ્છેવ મબ્રવી રાજા, રાજાનં સો ખમાપયિ;

તેન સઞ્ઞાપિતો રાજા, નગરંયેવ આગમિ.

૨૫. રાજાનં સઞ્ઞપેત્વા સો, મેઘવણ્ણાભયો પન;

રઞ્ઞા સહ ન આગઞ્છિ, દબ્બસમ્ભારકારણા.

૨૬. વલભા ભરિયા રઞ્ઞો, એકં લેખકધીતિકા;

મહાવિહારનાસમ્હિ, દુક્ખિતં તં વિનાસકં.

૨૭. થેરં મારાપયિ કુદ્ધા, સંગહેત્વાન વડ્ઢકિં;

થૂપારામં વિનાસેતું, આગતં દુટ્ઠમાનસં.

૨૮. મારાપેત્વા સઙ્ઘમિત્ત-ત્થેરં દારુણકારકં;

સોણામચ્ચદારણઞ્ચ, ઘાતયિંસુ અસઞ્ઞકા.

૨૯. આનેત્વા દબ્બસમ્ભારં, મેઘવણ્ણાભયો તુ સો;

મહાવિહારેનેકાનિ, પરિવેણાનિ કારયિ.

૩૦. અભયેનભયો તસ્મિં, વૂપસન્તે તુ ભિક્ખવો;

મહાવિહારં વાસેસું, આગન્ત્વાન તતો તતો.

૩૧. રાજા મહાબોધિઘરે, પચ્છિમાય દિસાય તુ;

કારેત્વા લોહરૂપાનિ, ઠપાપેસિ દુવે તુ સો.

૩૨. દક્ખિણારામવાસિમ્હિ, કુહકે જિમ્હમાનસે;

પસીદિત્વા પાપમિત્તે, તિસ્સત્થેરે અસઞ્ઞતે.

૩૩. મહાવિહારસીમન્તે, ઉય્યાને જોતિનામકે;

જેતવનવિહારં સો, વારયન્તોપિ કારયિ.

૩૪. તતો સીમં સમુગ્ઘાતું, ભિક્ખુસઙ્ઘમયાચિસો;

અદાતુકામા તં ભિક્ખૂ, વિહારમ્હા અપક્કમું.

૩૫. ઇધ સીમાસમુગ્ઘાતં, પરેહિ કરિયમાનકં;

કોપેતું ભિક્ખવો કેચિ, નિલીયિંસુ તહિં તહિં.

૩૬. મહાવિહારો નવમાસે, એવં ભિક્ખૂહિ વજ્જિતો;

‘‘સમુગ્ઘાતં કરિમ્હા’’તિ-પરે ભિક્ખૂ અમઞ્ઞિસું.

૩૭. તતો સીમાસમુગ્ઘાતે, બ્યાપારે પરિનિટ્ઠિતે;

મહાવિહારં વાસેસું, ઇધાગન્ત્વાન ભિક્ખવો.

૩૮. તસ્સ વિહારગાહિસ્સ, તિસ્સત્થેરસ્સ ચોદના;

અન્તિમવત્થુના આસિ, ભૂતત્થં સઙ્ઘમજ્ઝગા.

૩૯. વિનિચ્છિય મહામચ્ચો, તથા ધમ્મિકસમ્મતો;

ઉપ્પબ્બાજેસિ ધમ્મેન, તં અનિચ્છાય રાજિનો.

૪૦. સોયેવ રાજા કારેસિ, વિહારં મણિહીરકં;

તયો વિહારે કારેસિ, દેવાલયં વિનાસિય.

૪૧. ગોકણ્ણં એરકાપિલ્લં, કલન્દબ્રાહ્મણગામકે;

મિગગામવિહારઞ્ચ, ગઙ્ગસેનકપબ્બતં.

૪૨. પચ્છિમાય દિસાયાથ, ધાતુસેનઞ્ચ પબ્બતં;

રાજા મહાવિહારઞ્ચ, કોકવાતમ્હિ કારયિ.

૪૩. રૂપારમ્મવિહારઞ્ચ, ચૂળવિટ્ટઞ્ચ કારયિ;

ઉત્તરાભયસવ્હે ચ, દુવે ભિક્ખૂનુપસ્સયે.

૪૪. કાલવેળકયક્ખસ્સ, ઠાને થૂપઞ્ચ કારયિ;

દીપમ્હિ જિણ્ણકાવાસે, બહૂ ચ પટિસઙ્ખરિ.

૪૫. સઙ્ઘત્થેરસહસ્સસ્સ, સહસ્સગ્ઘમદાસિ સો;

થેરદાનઞ્ચ સબ્બેસં, અનુવસ્સઞ્ચ ચીવરં.

૪૬. અન્નપાનાદિદાનસ્સ, પરિચ્છેદો ન વિજ્જતિ;

સુભિક્ખત્થાય કારેસિ, સો’વ સોળસ વાપિયો.

૪૭. મણિહીરમહાવાપિં, જલ્લુરં ખાણુનામકં;

મહામણિં કોકવાતં, મોરકપરકવાપિકં.

૪૮. કુબ્બાહકં વાહકઞ્ચ, રત્તમાલકણ્ડકમ્પિ ચ;

તિસ્સવડ્ઢમાનકઞ્ચ, વેળઙ્ગવિટ્ઠિકમ્પિ ચ.

૪૯. મહાગલ્લચીરવાપિં, મહાદારગલ્લકમ્પિ ચ;

કાળપાસાણવાપિઞ્ચ, ઇમા સોળસ વાપિયો.

૫૦. ગઙ્ગાય પબ્બવવ્હંસો, મહામાતિઞ્ચ કારયિ;

એવં પુઞ્ઞમપુઞ્ઞઞ્ચ, સુબહું સો ઉપાચિનીતિ.

૫૧. અસાધુસઙ્ગમેનેવં, યાવજીવં સુભાસુભં;

કત્વા ગતો યથાકમ્મં, સો મહાસેનભૂપતિ.

૫૨. તસ્મા અસાધુસંસગ્ગં, આરકા પરિવજ્જિય;

અહિં વા’સિ વિસં ખિપ્પં, કરેય્ય’ત્થહિતં બુધો.

૫૩. અહુ રાજા સિરિમેઘ-વણ્ણો તસ્સ સુતો તતો;

વન્ધાતા વિય લોકસ્સ, સબ્બસમ્પત્તિદાયકો.

૫૪. મહાસેનેન પાપાનં, વસગેન વિનાસિતે;

મહાવિહારે સબ્બેપિ, સન્નિપાતિય ભિક્ખવો.

૫૫. ઉપસઙ્કમ્મ વન્દિત્વા, નિસિન્નો પુચ્છિ સાદરો;

‘‘પિતરા સઙ્ઘમિત્તસ્સ, સહાયેન વિનાસિતં.

૫૬. કિં કિમેવા’’તિ આહંસુ, ભિક્ખવો તં નરિસ્સરં;

‘‘સીમાયુગ્ઘાટનં કાતું, વાયમિત્વાપિ તે પિતા.

૫૭. નાસક્ખિ અન્તોસીમાયં, ભિક્ખૂનં વિજ્જમાનતો;

ભૂમિગબ્ભનિલીનાહિ, સત્તાસું એત્થ ભિક્ખવો.

૫૮. અમચ્ચો સોણામચ્ચો ચ, સઙ્ઘમિત્તો ચ પાપિયો;

રાજાનં સઞ્ઞાપેત્વાન, અપુઞ્ઞં તેન કારયું.

૫૯. ભિન્દિત્વા લોહપાસાદં, સત્તભૂમકમુત્તમં;

ઘરે નાનપ્પકારે ચ, ઇતો’ભયગિરિં નયું.

૬૦. માસકે ચતુબુદ્ધેહિ, નિવુત્થે ચેતિયઙ્ગણે;

વપાપેસુઞ્ચ દુપ્પઞ્ઞા, પસ્સ બાલસમાગમં’’.

૬૧. તં સુત્વા પિતુકમ્મં સો, નિબ્બિન્નો બાલસઙ્ગમે;

પિતરા નાસિતં તત્થ, સબ્બં પાકતિકં અકા.

૬૨. લોહપાસાદમગદો’વ, કાસિ પાસાદમુત્તમં;

રઞ્ઞો મહાપનાદસ્સ, દસ્સેન્તો વિય ભૂતલે.

૬૩. પરિવેણાનિ સબ્બાનિ, નાસિતાનિ નિવેસયિ;

ભોગે આરામિકાનઞ્ચ, યથાઠાને ઠપેસિ સો.

૬૪. પિતરા પચ્ચયાનઞ્ચ, પચ્છિન્નત્તા વિબુદ્ધિના;

છિદ્દાવાસં ઘનાવાસં, વિહારં’કાસિ બુદ્ધિમા.

૬૫. કારિતે પિતરા જોતિ વનેચે’સો વિહારકે;

કમ્મં વિપ્પકતં સબ્બં, નિટ્ઠાપેસિ નરિસ્સરો.

૬૬. થેરસ્સા’થ મહિન્દસ્સ, સમણિન્દસ્સ સુનુનો;

સુત્વાન મનુજિન્દો સો, પવત્તિં સબ્બમાદિતો.

૬૭. પસીદિત્વા ગુણે તસ્સ, રાજા દિપ્પપસાદકે;

‘‘ઇસ્સરો વત દીપસ્સ, થેરો’’ ઇતિ વિચિન્તિય.

૬૮. પટિબિમ્બં સુવણ્ણસ્સ, કત્વા તમ્માણ નિસ્સિતં;

પુબ્બકત્તિકમાસસ્સ, પબ્બપક્ખે તુ સત્તમે.

૬૯. દિને નેત્વા ચેતિયમ્બ-થલે થેરમ્બસઞ્ઞિતે;

તત્રટ્ઠમે નિવાસેત્વા, તતો તુ નવમે પન.

૭૦. મહાસેનં ગહેત્વા સો, દેવસેના સમૂપમં;

ઓરોધે નગરે ચેવ, ગેહરક્ખણકે વિના.

૭૧. લંકાદીપે ચ સકલે, સબ્બે આદાય ભિક્ખવો;

વિસ્સજ્જેત્વા મનુસ્સે ચ, નગરે ચારકટ્ઠિતે.

૭૨. પટ્ઠપેત્વા મહાદાનં, અયઞ્ચાખિલપાણિનં;

પૂજં સબ્બોપહારેહિ, કરોન્તો ચ અનૂપમં.

૭૩. પચ્ચુગ્ગમનમેતસ્સ, દીપસત્થુસ્સ સત્થુનો;

વરપુત્તસ્સ સો કત્વા, દેવરાજા’વ સત્થુનો.