છત્તિંસતિમ પરિચ્છેદ

તયોદસ રાજકો

૧. મહલ્લનાગચ્ચયેન, પુત્તો ભાતિકતિસ્સકો;

ચતુવીસતિવસ્સાનિ, લંકારજ્જમકારયિ.

૨. મહાવિહારે પાકારં, કારાપેસિ સમન્તતો;

ગવરતિસ્સવિહારં, સો કારયિત્વા મહીપતિ.

૩. મહાગામણિકં વાપિં, વિહારસ્સ’સ્સ’દાસિ ચ;

વિહારઞ્ચ અકારેસિ, ભાતિયતિસ્સ નામકં.

૪. કારેસુપોસથાગારં, થૂપારામે મનોરમે;

રન્ધકણ્ડકવાપિઞ્ચ, કારાપેસિ મહીપતિ.

૫. સત્તેસુ મુદુચિત્તોસો, સઙ્ઘમ્હિ તિબ્બગારવો;

ઉભતોસઙ્ઘે મહીપાલો, મહાદાનં પવત્તયિ.

૬. ભાતિકતિસ્સચ્ચયેન, તસ્સ કનિટ્ઠતિસ્સકો;

અટ્ઠવીસસમારજ્જં, લંકાદીપે અકારયિ.

૭. ભૂતારામ મહાનાગ, થેરસ્મિં સો પસીદિય;

કારેસિ રતનપાસાદં, અભયગિરિમ્હિ સાધુકં.

૮. અભયગિરિમ્હિ પાકારં, મહાપરિવેણમેવ ચ;

કારેસિ મણિસોમવ્હે, મહાપરિવેણમેવ ચ.

૯. તત્થેવ ચેતિયઘરં, અમ્બત્થલે તથેવ ચ;

કારેસિ પટિસઙ્ખારં, નાગદીપે ઘરે પન.

૧૦. મહાવિહારસીમંસો, મદ્દિત્વા તત્થ કારયિ;

કુક્કુટગિરિ પરિવેણ, પન્તિં સક્કચ્ચ ભૂપતિ.

૧૧. મહાવિહારે કારેસિ, દ્વાદસ મનુજાધિપો;

મહાચતુરસ્સપાસાદે, દસ્સનેય્યેમનોરમે.

૧૨. દક્ખિણવિહાર થૂપમ્હિ, કઞ્ચુકઞ્ચ અકારયિ;

ભત્તસાલં મહામેઘ, વનાસિમઞ્ચ મદ્દિય.

૧૩. મહાવિહારપાકારં, પસ્સતો અપનીયસો;

મગ્ગં દક્ખિણવિહાર, ગામિઞ્ચાપિ અકારયિ.

૧૪. ભૂતારામ વિહારઞ્ચ, રામગોણકમેવ ચ;

તથેવ નન્દતિસ્સસ્સ, આરામઞ્ચ અકારયિ.

૧૫. પાચિનતો અનુળાતિસ્સ, પબ્બતં ગઙ્ગરાજિયં;

નિયેલતિસ્સારામઞ્ચ, પિળ પિટ્ઠિ વિહારકં.

૧૬. રાજમહાવિહારઞ્ચ, કારેસિ મનુજાધિપો;

સોયેવ તીસુ ઠાનેસુ, કારેસુ’પોસથાલયં.

૧૭. કલ્યાણીક વિહારે ચ, મણ્ડલગિરિકે તથા;

દુબ્બલવાપિતિસ્સવ્હે, વિહારેસુ ઇમેસુ હિ.

૧૮. કનિટ્ઠતિસ્સચ્ચયેન, તસ્સ પુત્તો અકારયિ;

રજ્જં દ્વેયેવ વસ્સાનિ, ચૂળનાગોતિ વિસ્સુતો.

૧૯. ચૂળનાગકનિટ્ઠોતુ, રાજાઘાતિય ભાતિકં;

એકવસ્સં કુડ્ડનાગો, રજ્જં લંકાય કારયિ.

૨૦. મહાપેળઞ્ચ વડ્ઢેસિ, એકનાળિકછાતકે;

ભિક્ખુસતાનં પઞ્ચન્નં, અબ્ભોચ્છિન્નં મહીપતિ.

૨૧. કુડ્ડનાગસ્સ રઞ્ઞો તુ, દેવીયા ભાતુકો તદા;

સેનાપતિ સિરિનાગો, ચોરો હુત્વાન રાજિનો.

૨૨. બલવાહન સમ્પન્નો, આગમ્મ નગરન્તિકં;

રાજબલેન યુજ્ઝન્તો, કુડ્ડનાગં મહીપતિં.

૨૩. પલાપેત્વા લદ્ધજયો, અનુરાધ પુરે વરે;

લંકારજ્જમકારેસિ, વસ્સાનેકૂનવીસતિ.

૨૪. મહાથૂપવરે છત્તં, કારાપેત્વાન ભૂપતિ;

સુવણ્ણકમ્મં કારેસિ, દસ્સનેય્યં મનોરમં.

૨૫. કારેસિ લોહપાસાદં, સંખિત્તં પઞ્ચભૂમકં;

મહાબોધિ ચતુદ્વારે, સોપાનં પુનકારયિ.

૨૬. કારેત્વા છત્તપાસાદં, મહે પૂજમકારયિ;

કુલમ્બણઞ્ચ દીપસ્મિં, વિસ્સજ્જેસિ દયાપરો.

૨૭. સિરિનાગચ્ચયે તસ્સ, પુત્તો તિસ્સો અકારયિ;

રજ્જં દ્વાવીસવસ્સાનિ, ધમ્મવોહાર કોવિદો.

૨૮. ઠપેસિ સો હિ વોહારં, હિંસા મુત્તં યતોઇધ;

વોહારક તિસ્સરાજા, ઇતિ નામં તતો અહુ.

૨૯. કમ્બુગામકવાસિસ્સ, દેવત્થેરસ્સ સન્તિકે;

ધમ્મં સુત્વા પટિકમ્મં, પઞ્ચાવાસે અકારયિ.

૩૦. મહાતિસ્સસ્સ થેરસ્સ, અનુરા રામવાસિનો;

પસન્નો મુચેલપટ્ટને, દાન વટ્ટમકારયિ.

૩૧. તિસ્સરાજ મણ્ડપઞ્ચ, મહાવિહારદ્વયેપિ સો;

મહાબોધિઘરે પાચિ, લોહરૂપદ્ધયમ્પિ ચ.

૩૨. સત્તપણ્ણિકપાસાદં, કારેત્વા સુખવાસકં;

માસે માસે સહસ્સં સો, મહાવિહારસ્સ દાપયિ.

૩૩. અભયગિરિવિહારે, દક્ખિણમૂલસવ્હયે;

મરિચવટ્ટિ વિહારમ્હિ, કુલાલિતિસ્સસવ્હયે.

૩૪. મહિયઙ્ગણ વિહારમ્હિ, મહાગામકસવ્હયે;

મહાનાગતિસ્સવ્હમ્હિ, તથા કલ્યાણીકવ્હયે.

૩૫. ઇતિ અટ્ઠસુ થૂપેસુ, છત્તકમ્મમકારયિ;

મૂકનાગસેનાપતિ, વિહારે દક્ખિણે તથા.

૩૬. મરિચ વટ્ટિ વિહારમ્હિ, પુત્તભાગવ્હયે તથા;

ઇસ્સરસમણવ્હમ્હિ, તિસ્સવ્હે નાગદીપકે.

૩૭. ઇતિ છસુ વિહારેસુ, પાકારઞ્ચ અકારયિ;

કારેસુ’ પોસથાગારં, અનુરારામસવ્હયે.

૩૮. અરિયવંસકથાઠાને, લંકાદીપેખિલેપિ ચ;

દાન વટ્ટં ઠપાપેસિ, સદ્ધમ્મે ગારવેન સો.

૩૯. તિણી સતસહસ્સાનિ, દત્વાન મનુજાધિપો;

ઇણતો સયિકે ભિક્ખૂ, મોચેસિ સાસનપ્પિયો.

૪૦. મહા વેસાખ પૂજં સો, કારેત્વા દીપવાસિનં;

સબ્બે સંયેવ ભિક્ખૂનં, તિચીવરમદાપયિ.

૪૧. વેતુલ્લવાદં મદ્દિત્વા, કારેત્વા પાપનિગ્ગહં;

કપિલેન અમચ્ચેન, સાસનં જોતયીચ સો.

૪૨. વિસ્સુતો’ભયનાગો’તિ, કનિટ્ઠો તસ્સરાજિનો;

દેવિયા તસ્સ સંસટ્ઠો, ઞાતો ભીતો સભાતરા.

૪૩. પલાયિત્વા હલ્લતિત્થં, ગન્ત્વાન સહસેવકો;

કુદ્ધો વિય માતુલસ્સ, હત્થપાદઞ્ચ છેદયિ.

૪૪. રાજિનો રટ્ઠતેદત્થં, ઠપેત્વાન ઇધેવ તં;

સુનખોપમં દસ્સયિત્વા, ગહેત્વા’તિ સિનિદ્ધકે.

૪૫. તત્થેવ નાવં આરુય્હ, પરતીરમગાસયં;

સુભવો માતુલો તુ, ઉપગમ્મ મહીપતિ.

૪૬. સુહદો વિય હુત્વાન, તસ્મિં રટ્ઠમભિન્દિસો;

અભયો તં જાનનત્થં, દૂતં ઇધ વિસજ્જયિ.

૪૭. તં દિસ્વા પૂગરુક્ખં સો, સમન્તા કુન્તનાળિયા;

પરિબ્ભમન્તો મદ્દિત્વા, કત્વા દુબ્બલમૂલકં.

૪૮. બાહુનાયેવ પાતેત્વા, તજ્જેત્વા તં પલાપયિ;

દૂતો ગન્ત્વા અભયસ્સ, તં પવત્તિં પવેદયિ.

૪૯. ઞત્વા’ભયો તં દમિળે, આદાય બસુકે તતો;

નગરન્તિકમાગઞ્છિ, ભાતરા સહ યુજ્ઝિતું.

૫૦. તં ઞત્વાન પલાયિત્વા, અસ્સમારુય્હદેવિયા;

મલયં આગમા રાજા, તંકનિટ્ઠો’નુ બન્ધિય.

૫૧. રાજાનં મલયે હન્ત્વા, દેવીમાદાય આગતો;

કારેસિ નગરે રજ્જં, અટ્ઠવસ્સાનિ ભૂપતિ.

૫૨. પાસાણવેદિં કારેસિ, મહાબોધિસમન્તતો;

લોહપાસાદઙ્ગણમ્હિ, રાજા મણ્ડપમેવ ચ.

૫૩. દ્વિહિ સતસહસ્સેહિ, નેકવત્થાનિ ભાગિય;

દીપમ્હિ ભિક્ખુસઙ્ઘસ્સ, વત્થદાનમદાસિ સો.

૫૪. અભયસ્સ’ચ્ચયે ભાતુ, તસ્સસ્સ તસ્સ અત્રજો;

દ્વેવસ્સાનિ સિરિનાગો, લંકારજ્જ મકારયિ.

૫૫. પટિસઙ્ખરિય પાકારં, મહાબોધિસમન્તતો;

મહાબોધિઘરસ્સેવ, સોયેવ વાલિકાતલે.

૫૬. મૂચેલરુક્ખપરતો, હંસવટ્ટં મનોરમં;

મહન્તં મણ્ડપઞ્ચેવ, કારાપેસિ મહીપતિ.

૫૭. વિજયકુમારકો નામ, સિરિનાગસ્સ અત્રજો;

પિતુનો અચ્ચયે રજ્જં, એકવસ્સમકારયિ.

૫૮. લમ્બકણ્ણા તયો આસું, સહાતા મહિયઙ્ગણે;

સઙ્ઘતિસ્સો સઙ્ઘબોધિ, તતિયો ગોટ્ઠકાભયો.

૫૯. તે તિસ્સવાપિમરિયાદ-ગતો અન્ધો વિચક્ખણો;

રાજુપટ્ઠાનમાયન્તે, પદસદ્દેન અબ્રવિ.

૬૦. ‘‘પથવીસામિનો એતે, તયો વહતિભૂ’ઇતિ;

તં સુત્વા અભયો પચ્છા, યન્તો પુચ્છિ પુનાહસો.

૬૧. તસ્સ વંસો ઠસ્સતીતિ,

પુન પુચ્છિતમેવ સો;

‘‘પચ્છિમસ્સા’’તિ સો આહ,

તં સુત્વા દ્વીહિસોઅગા.

૬૨. તે પુરં પવિસિત્વાન, તયો રઞ્ઞો’તિ વલ્લભો;

રાજકિચ્ચાનિ સાધેન્તા, વસન્તા રાજસન્તિકે.

૬૩. હન્ત્વા વિજયરાજાનં, રાજગેહમ્હિ એકતો;

સેનાપતિંસઙ્ઘતિસ્સં, દુવેરજ્જે’ભિસેચયું.

૬૪. એવં સો અભિસિત્તોવ, અનુરાધપુરુત્તમે;

રજ્જં ચત્તારિ વસ્સાનિ, સઙ્ઘતિસ્સો અકારયિ.

૬૫. મહાથૂપમ્હિ છત્તઞ્ચ, હેમકમ્મઞ્ચ કારયિ;

વિસું સતસહસ્સગ્ઘે, ચતુરો ચ મહામણિ.

૬૬. મજ્ઝે ચતુન્નં સૂરિયાનં, ઠપાપેસિ મહીપતિ;

થૂપસ્સ મુદ્ધનિ તથા-નગ્ઘવજિરચુમ્બટં.

૬૭. સો છત્તમહપૂજાય, સઙ્ઘસ્સ મનુજાધિપો;

ચત્તાલીસસહસ્સસ્સ, છ ચીવરમદાપયિ.

૬૮. તં મહાદેવથેરેન, દામગલ્લક વાસિનો;

દેસિતં ખન્ધકે સુત્તં, યાગાનિસંસ દીપનં.

૬૯. સુત્વા પસન્નો સઙ્ઘસ્સ, યાગુદાનમદાપયિ;

નગરસ્સ ચતુદ્વારે, સક્કચ્ચઞ્ચેવ સાધુ ચ.

૭૦. સો અન્તરન્તરે રાજા, જમ્બુપક્કાનિ ખાદિતું;

સહોરોધો સહામચ્ચો, અગાપાચિન દીપકં.

૭૧. ઉપદ્દુતં’સ્સ ગમને, મનુસ્સા પાચિ વાસિનો;

વિસં ફલેસુ યો જેસું, રાજભોજ્જાય જમ્બુયા.

૭૨. ખાદિત્વા જમ્બુપક્કાનિ, તાનિ તત્થેવ સો મતો;

સેનાપતિ સઙ્ઘધબાધીં-ભયો રજ્જે’ભિસેચયિ.

૭૩. રાજાસિરિ સઙ્ઘ બોધિ, વિસ્સુતો પઞ્ચસીલવા;

અનુરાધપુરે રજ્જં, દુવે વસ્સાનિ કારયિ.