૨. સંકિણ્ણવગ્ગવણ્ણના

૭૫૮. પુબ્બસ્મિં કણ્ડદ્વયે બુદ્ધાદીનિ નામાનિ સમાનત્થાનિ પકરણેન નિબદ્ધાનિ, અસ્મિમ્પિ કણ્ડે સોભનાદીનિ વિસેસનનામાનિ, સમયાદીન્યનેકત્થાનિ, ચિરસ્સમાદીનિ ચ અબ્યયાનિ પકરણેનેવ નિબદ્ધાનિ, ઇદાનિ પન પુબ્બવગ્ગેસુ વિત્થારભયા યે ન નિબદ્ધા, તંસઙ્ગહત્થં, તંસમયાનુપાલનત્થઞ્ચ સંકિણ્ણમારભતે ‘‘ઞે ય્ય’’મિચ્ચાદિના. તસ્સત્થો – ઇહાપિ સંકિણ્ણવગ્ગેપિ ક્વાપિ કત્થચિ ક્રિયાદીસુ પચ્ચયત્થવસેન આપચ્ચયાદીનં ઇત્થિલિઙ્ગાદિભાવજોતકસ્સ સભાવસ્સ વસેન લિઙ્ગં ઇત્થિલિઙ્ગાદિકં ઞેય્યન્તિ. ચકારેન ભિય્યો રૂપન્તરાદિપરિગ્ગહોપિ. ઇહાતિ ચ ઉપલક્ખણં, વગ્ગન્તરેસુપિ પચ્ચયત્થવસેન લિઙ્ગાદિનિચ્છયસમ્ભવતો.

કત્તબ્બતો ક્રિયા, કર કરણે, ણ્યો, ઇકારાગમો, અસ્સિ, વણ્ણવિપરિયયે ક્રિયા, ક્રિયમ્પિ, રિરિયપચ્ચયે કિરિયં, કિરિયાપિ. રમ્મપચ્ચયે કમ્મં.

તિકં ચિત્તોપસમે. સમુ ઉપસમે,તિ, સન્તિ. થમ્હિ સમથો.અમ્હિ સમો.

તિકં કાયોપસમે. દમુ ઉપસમે. થમ્હિ દમથો. તિમ્હિ દન્તિ. ચિત્તોપસમેપ્યેતે.

સુદ્ધકમ્મનિ વત્તં ભવતિ. વત્ત વત્તને, વત્ત સમાદાને વા વત્તં, અસીતિમહાવત્તાદિ.

આસઙ્ગવચનં આસત્તવચનં સદ્દસરૂપં પરાયણં નામ વુત્તં, તઞ્ચ તીસુ. પરં આયનં આયત્તો તાણં પરાયણં, કમ્માસત્તો ઇચ્ચત્થો, સાકલ્યવચને તુ પારાયણં, પારં પરિયન્તં અયન્તિ ગચ્છન્તિ કસ્સચિ અનેનાતિ પારાયણં, યુ, ણત્તં, યથા – નામપારાયણં, ધાતુપારાયણં.

૭૫૯. તિકં દ્વિધાભાવે. ભિદિ દ્વિધાકરણે, ણો. દર વિદારણે. ફુટ વિકસને, ફુટ ભેદને વા, યુ.

દ્વયં તપ્પને. તપ પીણને, યુ. પી તપ્પને, યુ, કિયાદિ, નસ્સ ણત્તં. અવનમ્પિ, અવ પાલને, દિત્તિયઞ્ચ અનેકત્થત્તા.

દ્વયં સાપે. કુસ અવ્હાને, ભેદને ચ, યુ. સન્જ સઙ્ગે, અભિસઙ્ગો.

તિકં યાચનાયં. ભિક્ખ યાચને, યુ. યાચ યાચને. અત્થ યાચને. અદ્દનોપ્યત્ર, અદ્દ ગતિમ્હિ, યાચને ચ.

૭૬૦. નિમિત્તરહિતં યદિચ્છા નામ, યા યા ઇચ્છા અધિપ્પાયો યદિચ્છા નામ. સેરિતાપિ.

તિકં આપુચ્છને, આપુચ્છનઞ્ચ ગમનાગમનાદિસમયે સુહજ્જ બન્ધવાદીનમાલિઙ્ગન ચુમ્બનસ્વાગતપિયવચનારોગ્યપુચ્છનગમનાનુઞ્ઞાદિના આનન્દનં. પુચ્છ પુચ્છને, આપુચ્છનં. નન્દ સમિદ્ધિયં, આનન્દનં. સભાજ પીતિદસ્સનેસુ, સભાજ પીતિવચનેસુ વા, ચુરાદિ, યુ, સભાજનં.

દ્વયં નયે. ઞાયન્તિ યેનાતિ ઞાયો, આકારન્તાનમાયો. ન્યાયોપિ, નિસ્સેસતો અયતિ યેન ન્યાયો. ની નયે, અયાદેસો, નયો.

દ્વયં વુદ્ધિમ્હિ. ફા વુદ્ધિમ્હિ, ફાય વુદ્ધિયં વા, યલોપો,તિ, ફાતિ, નારિયં. વદ્ધ વદ્ધને,તિ, દલોપો, ધઢભહેહિ ધઢા ચ, અસ્સુ, વુદ્ધિ, વુડ્ઢિપિ.

૭૬૧. કિલમ હાસક્ખયે, થો, કિલમથો. યુમ્હિ કિલમનં. સૂ પાણિપસવે, પસવનં પસવો, તિમ્હિ પસૂતિ.

કસ ગતિયં હિંસાયઞ્ચ, નિગ્ગહીતાગમો, ઉક્કંસો, કસ વિલેખને વા. અતિસયો વુત્તો. ભુસાદયો પમાણાતિસયવસેન વુત્તા, ઉક્કંસો ગુણાતિસયવસેન વુત્તો, અતિસયો પન ઉભયવસેનાતિ ઉભયત્ર નિદ્દિટ્ઠાનં ભેદો. તિકં જયને. જયનં જયો, યુ, જયનં. તિમ્હિ જિતિ, નારી.

૭૬૨. બન્ધનન્તાનિ દ્વે દ્વે નામાનિ. વસ કન્તિયં. કમુ કન્તિયં,તિ. વિધ વેધને, બ્યથને ચ અનેકત્થત્તા, અ, ઇકારસ્સ યાદેસો, બ્યધો, વેધો. ગહ ઉપાદાને નિબન્ધને ચ, ગહો, ગાહો ચ. વર આવરણે, વરો. વુ સંવરણે,તિ, વુતિ. પચ પાકે, ઇત્થિયમતિયવો વા, અ. પચનં પાકો, ણો.

દ્વયં આહ્વાને. હુ દાનાદનહબ્યપ્પદાનેસુ, ણો, હવો. તિમ્હિ હુતિ. દ્વયં અનુભવને. વિદ ઞાણે, ણો, વેદો. વિદ વેદનાખ્યાનનિવાસેસુ, ચુરાદિ, યુ, વેદનં, વાકારો વેદનાસદ્દસ્સ નપુંસકત્તાપેક્ખો.

૭૬૩. દ્વયં ધનાદિજાનિયં. જર વયોહાનિમ્હિ, યુ, જીરણં, અસ્સી. હા ચાગે, યુ, નદાદિ, રસ્સો, હસ્સ જો, જાનિ. તા પાલને, યુ, ણત્તં. દ્વયં પમાણે. મા માને,તિ, પમિતિ. અમ્હિ પમા.

દ્વયં સંયોગે. સિલિસ આલિઙ્ગને. સંપુબ્બો ધા ધારણે, ઇ, સન્ધનં સન્ધિ. દ્વયં ખયે. ખિ ખયે, ણો, ઇસ્સે, એ અય, ખયો. ચિ ચયે, અપપુબ્બો ખયે. દ્વયં સદ્દે. રુ સદ્દે, ણો, વુદ્ધ્યાદેસો. રણ સદ્દે. અ, રણો.

૭૬૪. ગદ બ્યત્તિયં વાચાયં, ણો, અ ચ, નિગાદો, નિગદો ચ. દ્વયં મદે. મદ ઉમ્માદે, માદો, મદો ચ. સિ બન્ધને,તિ, સિતિ.

તિકં આકારે. આકરણં આકારો, અનેકત્થત્તા મુખવઙ્કાદ્યઙ્ગવિકારો વા, ઇઙ્ગતિ જાનાતીતિ વા યેન આકારો. ઇઙ્ગ ગમનત્થો, તો, અ ચ, ઇઙ્ગિતં, ઇઙ્ગો ચ. અત્થસ્સ ધનસ્સ અપગમો વિનાસો બ્યયો નામ. બ્યય ચિત્તસમુસ્સગ્ગે.

૭૬૫. દ્વયં અન્તરાયે. ચુતિપટિસન્ધીનમન્તરે અયતીતિ અન્તરાયો. પટિપક્ખવસેન ઊહતિ પવત્તતીતિ પચ્ચૂહો, અથ વા કારિયસિદ્ધિ અન્તરં બ્યવધાનં અયતિ ગમયતીતિ અન્તરાયો. પચ્ચૂહન્તિ વિનિહન્તીતિ પચ્ચૂહો.

વિકરણં અઞ્ઞથા ભવનન્તિ વિકારો, વિકતિ ચ, કર કરણે, ણો,તિ ચ.

દ્વયં સભાવવિગમે. સિલિસ આલિઙ્ગને, પવિપુબ્બો તંસભાવવિગમે, વિગતો ધુરો સદિસભાવો યસ્માતિ વિધુરો, ‘‘વિધુરં પવિસિલેસે, ક્લિવઞ્ચ વિકલે તિસૂ’’તિ [ચિન્તામણિટીકા ૨૨.૨૦] રભસો. વિધ વિધાને વા, ઉરો. દ્વયં આસને. વિસ પવેસને, ઉપવેસનં. આસ ઉપવેસને, આસનં.

૭૬૬. તિપાદં અધિપ્પાયે. ચિત્તમધ્યાગન્ત્વા સયતીતિ અજ્ઝાસયો. અનમિપુબ્બે આસયો. અધિપયતિ ચિત્તેતિ અધિપ્પાયો, ણો, પય ગમને. ચિત્તે અભિસન્ધાયતીતિ અભિસન્ધિ, દ્વીસુ. ભવતિ ચિત્તેતિ ભાવો, ણો. અધિમુચ્ચનં ચિત્તે અધિટ્ઠાનં અધિમુત્તિ, નારી. છન્દો તણ્હાયમ્પિ વુત્તો.

દ્વયં આદીનવે. દોસો પટિઘે વુત્તો. આ ભુસો દીનં વાયતિ ગમયતીતિ આદીનવો, દીન દુગ્ગતભાવે, વો, વી ગમને ચ.

૭૬૭. દ્વયં આનિસંસે. સંસ હિંસાથુતીસુ, આનિસંસો અમુખ્યફલે, મુખ્યફલે ચ, તથા ગુણો. ગુણ પકાસને, પકાસેતિ કારણન્તિ ગુણો, ગણ સઙ્ખ્યાને વા, અસ્સુ, ગુણો. દ્વયં મજ્ઝે. મજ સુદ્ધિયં, ઝો. વિપુબ્બે વેમજ્ઝં.

દ્વયં તરુણસૂરિયટ્ઠાને. અહસ્સ મજ્ઝો મજ્ઝહો, સો એવ મજ્ઝન્હિકો, હસ્સ ન્હો [મોગ્ગલ્લાન ૩.૧૧૦ સુત્તં પસ્સિતબ્બં]. અહસ્સ મજ્ઝો મજ્ઝન્હો, મજ્ઝન્તોપિ. દ્વયં નાનત્તાયં. વિગતા મત્તા સદિસપ્પમાણં એતેન હેતુભૂતેન વેમત્તં. નાનમેવ નાનતા, નાનસદ્દો પુન્નપુંસકે, અબ્યયે તુ નાના.

૭૬૮. દ્વયં નિદ્દાપટિક્ખેપે. જાગર નિદ્દક્ખયે, જાગરમેવ જાગરિયો. દ્વયં જલાદીનમવિચ્છન્નાયં સન્તતિયં. વહતિસ્મા ણો, પવાહો. વતુ આવત્તને,તિ, પવત્તિ.

તિકં વિત્થારે. અસુ ખેપને, ણો, બ્યાસો. પપુબ્બો પઞ્ચ વિત્થારે. થર સન્થરણે, પાદિપુબ્બો ચ વિત્થારે. તિકં સંયમે. યમુ ઉપરમે, ણો, યામો. ઇતરેસુ અ.

૭૬૯. દ્વયં ગત્તાનં મદ્દને. ‘‘સમ્બાહનો’ઙ્ગમદ્દકો’’તિ વોપાલિતો, સંપુબ્બો વાહ પયતને, મદ્દને વા, યુ. મદ્દ મદ્દને. દ્વયં નાનારમ્મણાદીસુ વિસપ્પને. સર ગમને, ણ. સપ્પ ગમને, યુ, વિસપ્પનં.

દ્વયં પરિચયે. થુ અભિત્થવે. ચિ ચયે. તિકં સઙ્ગમે. મિલ સિલેસને, ણો, સકત્થે કો, મેલકો. સન્જ સઙ્ગે, ણો. સંપુબ્બા ગમિતો અ.

૭૭૦. સન્નિકટ્ઠમ્હિ સમીપે સન્નિધિસદ્દો, સન્નિધાનં સન્નિધિ, પુમે, ઠપનેપ્યયં. નસ અદસ્સને, ણો. દિસ પેક્ખને, યુ, દિસ્સાદેસો, ઇસ્સત્તં.

તિકં ધઞ્ઞાદીનં લવને. લૂ છેદને, અ. ણમ્હિ અભિલાવો. યુમ્હિ લવનં. દ્વયં ખણપ્પત્તિયં. પપુબ્બો થુ અભિત્થવે. સર ગમને, અવસરો. સમાતિ દ્વે તુલ્યત્થા.

૭૭૧. ચતુક્કં પરિયોસાને. સા તનુકરણે, યુ, ઓસાનં. પરિપુબ્બો પરિયોસાનં. ઉક્કંસાતિસયા પકટ્ઠેપ્યુત્તા.

દ્વયં સણ્ઠાને. વિસ પવેસને, સન્નિવેસો. ઠા ગતિનિવત્તિયં, યુ, સણ્ઠાનં. દ્વયં અબ્ભન્તરવાચકં પાટિપદિકં. અથ વા અભિ બન્ધને, અરો, ધાત્વત્થાનુવત્તકો અભિ, અબ્ભન્તરં. અબ્ભાભાવે અન્તરં.

૭૭૨. તિકં પાટિહારિયે. હિ ગતિમ્હિ, પટિતો હિસ્સ હેરણ હીરણ, પાટિહેરં, પાટિહીરં. યદાદિના હારિયઞ્ચ, પાટિહારિયં, અથ વા પટિપક્ખે હરતીતિ પાટિહીરં, ણો, અસ્સી. એકારાદેસે પાટિહેરં. ણ્યમ્હિ પાટિહારિયં, વિહતુપક્કિલેસેન પચ્ચાહરિતબ્બં પવત્તેતબ્બન્તિ પાટિહીરન્તિઆદિપિ કાતબ્બં.

દ્વયં કત્તબ્બમત્તે. કરમ્હા રિચ્ચ, કિચ્ચં, અવસ્સં કાતબ્બેપિ. અનીયપચ્ચયે કરણીયં.

દ્વયં પુપ્ફાદિના ઉદકાદીનં પરિભાવને. સુન્દરં કરીયતે યેનાતિ સઙ્ખારો, ણો, ખરાદેસો. વસ નિવાસે, યુ, વાસના, કિલેસાદીનં સત્તિવિસેસેપિ. સા હિ કુસલાપિ અત્થિ અકુસલાપિ અબ્યાકતાપિ, તથા પહાતબ્બાપિ અત્થિ અપ્પહાતબ્બાપિ. તત્થ યા કુસલાબ્યાકતા, ન સા પહાતબ્બા. યા પન અકુસલા, સા સુખુમતરતાય ભગવતોયેવ અરિયમગ્ગેન પહાતબ્બા, નાઞ્ઞેસં. એવં સન્તે અરિયાનમ્પિ અપાયૂપપત્તિ સિયાતિ? ન સિયા, સબ્બેસમેવ અરિયાનં અપાયૂપપત્તિહેતુકાય વાસનાય પહીનત્તા. દુવિધા હિ અકુસલા વાસના કાયવચીપયોગહેતુભૂતા ચ અપાયૂપપત્તિહેતુભૂતા ચ. તત્થ પુરિમા ભગવતોયેવ અરિયમગ્ગેન પહાતબ્બા, ઇતરા સબ્બેસમ્પિ અરિયમગ્ગેનાતિ, તસ્મા યં વુત્તં ‘‘બુદ્ધાવ સવાસને કિલેસે પજહિતું સક્કોન્તિ, નાઞ્ઞે’’તિ, તં કાયવચીપયોગહેતુભૂતં વાસનં સન્ધાય વુત્તં, નેતરન્તિ નિટ્ઠમેત્થાવગન્તબ્બં.

૭૭૩. તિકં ધઞ્ઞાદીનં પૂતકરણે. પૂ પવને, યુ. અપચ્ચયે પવો. ણમ્હિ નિપ્પાવો. દ્વયં તસરે. તસ ઉબ્બેગે, અરો. સુત્તેન વેઠનં સુત્તવેઠનં.

દ્વયં દુગ્ગસઞ્ચારે. સઙ્કમ્યતે યેનાતિ સઙ્કમો. સઞ્ચરન્તિ અનેનાતિ સઞ્ચારો, દુગ્ગસ્સ સઞ્ચારો દુગ્ગસઞ્ચારો. દ્વયં પઠમારમ્ભે. પઠમં કમો પક્કમો, ઉપક્કમો ચ.

૭૭૪. તિકં પાઠે. પઠ વિયત્તિયં વાચાયં, ણો, પાઠો. નિપુબ્બે નિપાઠો, અમ્હિ નિપઠો. દ્વયં અપહરિતાદિનો વત્થુનો અન્વેસને. ચિ ચયે, ચયનમત્ર અન્વેસનં. મગ્ગ અન્વેસને, ચુરાદિ, યુ, એતે દ્વે અપુમે, સંવિક્ખનંપ્યત્ર.

ચતુક્કં આલિઙ્ગને. લિઙ્ગ ગત્યત્થો. સન્જ સઙ્ગે. સિલિસ આલિઙ્ગને. ગુહ સંવરણે, યુ, પરિરમ્ભોપ્યત્ર. રમ્ભ સદ્દે.

૭૭૫. ચતુક્કં આલોકને. લોક દસ્સને. ઝે ચિન્તાયં. ઇક્ખ દસ્સનઙ્કેસુ. દિસ પેક્ખને, સબ્બત્ર ભાવે યુ.

ચતુક્કં નિરાકરણે. દિસ પેક્ખને. અસુ ખેપને, નિરસનં. પતિ આપુબ્બો ખાકથને. કર કરણે, ઇત્થિયમતિયવો વા,તિ.

૭૭૬. પઞ્ચકં વિપરિયયે. વિપરિપુબ્બો અસુ ખેપને, ણો, વિપલ્લાસો. અઞ્ઞેન પકારેન ભવનં અઞ્ઞથાભાવો. વિપરિપુબ્બો અય ગમને, વિપરિયયો. અસુ ખેપને, વિપરિયાસો.

તિકં અતિક્કમે. અતિક્કમનં અતિક્કમો. અતિક્કમ્મ પતનં અતિપાતો. અય ગમને, ઉપચ્ચયો.

સંકિણ્ણવગ્ગવણ્ણના નિટ્ઠિતા.