૨. સંકિણ્ણવગ્ગ

૭૫૮. ઞેય્યં લિઙ્ગ મિહ ક્વાપિ, પચ્ચયત્થવસેન ચ;

ક્રિયા તુ કિરિયં કમ્મં,

સન્તિ તુ સમથો સમો;

દમો ચ દમથો દન્તિ, વત્તં તુ સુદ્ધકમ્મનિ;

અથો આસઙ્ગવચનં, તીસુ વુત્તં પરાયણં.

૭૫૯. ભેદો વિદારો ફુટનં, તપ્પનં તુ ચ પીણનં;

અક્કોસન મભિસઙ્ગો,

ભિક્ખા તુ યાચના’ત્થના.

૭૬૦. નિન્નિમિત્તં યદિચ્છા થા’, પુચ્છના નન્દનાનિ ચ;

સભાજન મથો ઞાયો,

નયો ફાતિ તુ વુદ્ધિયં.

૭૬૧. કિલમથો કિલમનં, પસવો તુ પસૂતિયં;

ઉક્કંસો ત્વતિસયો થ,

જયો ચ જયનં જિતિ.

૭૬૨. વસો કન્તિ, બ્યધો વેધો,

ગહો ગાહો વરો વુતિ;

પચા પાકો હવો હુતિ [હૂભિ (સી. અમરકોસ)],

વેદો વેદન મિત્થિ વા.

૭૬૩. જીરણં જાનિ તાણં તુ, રક્ખણં પમિતિપ્પમા;

સિલેસો સન્ધિ ચ ખયો,

ત્વપચયો રવો રણો.

૭૬૪. નિગાદો નિગદો માદો, મદો પસિતિ બન્ધનં;

આકરો ત્વિઙ્ગિતં ઇઙ્ગો,

અથ’ત્થાપગમો બ્યયો.

૭૬૫. અન્તરાયો ચ પચ્ચૂહો,

વિકારો તુ વિકત્ય’પિ;

પવિસિલેસો વિધુરં, ઉપવેસનમાસનં.

૭૬૬. અજ્ઝાસયો અધિપ્પાયો, આસયો ચાભિસન્ધિ ચ;

ભાવો ધિમુત્તિ છન્દો થ,

દોસો આદીનવો ભવે.

૭૬૭. આનિસંસો ગુણો ચાથ,

મજ્ઝં વેમજ્ઝ મુચ્ચતે;

મજ્ઝન્હિકો [મજ્ઝન્તિકો (ટી. સી. પી.)] તુ મજ્ઝન્હો, વેમત્તં તુ ચ નાનતા.

૭૬૮. વા જાગરો જાગરિયં [જાગરિયો (ટી.)], પવાહો તુ પવત્તિ ચ;

બ્યાસો પપઞ્ચો વિત્થારો,

યામો તુ સંયમો યમો.

૭૬૯. સમ્બાહનં મદ્દનઞ્ચ, પસરો તુ વિસપ્પનં;

સન્થવો તુ પરિચયો,

મેલકો સઙ્ગ સઙ્ગમા.

૭૭૦. સન્નિધિ સન્નિકટ્ઠમ્હિ, વિનાસો તુ અદસ્સનં;

લવો ભિલાવો લવનં,

પત્થાવો’વસરો સમા.

૭૭૧. ઓસાનં પરિયોસાનં, ઉક્કંસો’તિસયો ભવે [અવસાનં સમાપનં (?)];

સન્નિવેસો ચ સણ્ઠાનં, અથા’બ્ભન્તર મન્તરં.

૭૭૨. પાટિહીરં પાટિહેરં, પાટિહારિય મુચ્ચતે;

કિચ્ચં તુ કરણીયઞ્ચ, સઙ્ખારો વાસના ભવે.

૭૭૩. પવનં પવ નિપ્પાવા, તસરો સુત્તવેઠનં;

સઙ્કમો દુગ્ગસઞ્ચારો, પક્કમો તુ ઉપક્કમો.

૭૭૪. પાઠો નિપાઠો નિપઠો, વિચયો મગ્ગના પુમે;

આલિઙ્ગનં પરિસ્સઙ્ગો, સિલેસો ઉપગૂહનં.

૭૭૫. આલોકનઞ્ચ નિજ્ઝાનં, ઇક્ખણં દસ્સનં પ્યથ;

પચ્ચાદેસો નિરસનં, પચ્ચક્ખાનં નિરાકતિ.

૭૭૬. વિપલ્લાસો’ઞ્ઞથાભાવો, બ્યત્તયો વિપરીયયો;

વિપરિયાસો’તિક્કમો, ત્વ’તિપાતો ઉપચ્ચયો.

ઇતિ સંકિણ્ણવગ્ગો.