૮. દેવાસુરસઙ્ગામસુત્તં

૩૯. ‘‘ભૂતપુબ્બં, ભિક્ખવે, દેવાસુરસઙ્ગામો સમુપબ્યૂળ્હો [સમુપબ્બૂળ્હો (સી. પી.)] અહોસિ. તસ્મિં ખો પન, ભિક્ખવે, સઙ્ગામે અસુરા જિનિંસુ, દેવા પરાજયિંસુ [પરાજિયિંસુ (સી. સ્યા. ક.)]. પરાજિતા ચ, ભિક્ખવે, દેવા [દેવા ભીતા (પી.)] અપયિંસુયેવ [અપયંસ્વેવ (સી.)] ઉત્તરેનાભિમુખા, અભિયિંસુ [અભિયંસુ (સી.)] અસુરા. અથ ખો, ભિક્ખવે, દેવાનં એતદહોસિ – ‘અભિયન્તેવ ખો અસુરા. યંનૂન મયં દુતિયમ્પિ અસુરેહિ સઙ્ગામેય્યામા’તિ. દુતિયમ્પિ ખો, ભિક્ખવે, દેવા અસુરેહિ સઙ્ગામેસું. દુતિયમ્પિ ખો, ભિક્ખવે, અસુરાવ જિનિંસુ, દેવા પરાજયિંસુ. પરાજિતા ચ, ભિક્ખવે, દેવા અપયિંસુયેવ ઉત્તરેનાભિમુખા, અભિયિંસુ અસુરા’’.

અથ ખો, ભિક્ખવે, દેવાનં એતદહોસિ – ‘અભિયન્તેવ ખો અસુરા. યંનૂન મયં તતિયમ્પિ અસુરેહિ સઙ્ગામેય્યામા’તિ. તતિયમ્પિ ખો, ભિક્ખવે, દેવા અસુરેહિ સઙ્ગામેસું. તતિયમ્પિ ખો, ભિક્ખવે, અસુરાવ જિનિંસુ, દેવા પરાજયિંસુ. પરાજિતા ચ, ભિક્ખવે, દેવા ભીતા દેવપુરંયેવ પવિસિંસુ. દેવપુરગતાનઞ્ચ પન [પુન (ક.)], ભિક્ખવે, દેવાનં એતદહોસિ – ‘ભીરુત્તાનગતેન ખો દાનિ મયં એતરહિ અત્તના વિહરામ અકરણીયા અસુરેહી’તિ. અસુરાનમ્પિ, ભિક્ખવે, એતદહોસિ – ‘ભીરુત્તાનગતેન ખો દાનિ દેવા એતરહિ અત્તના વિહરન્તિ અકરણીયા અમ્હેહી’તિ.

‘‘ભૂતપુબ્બં, ભિક્ખવે, દેવાસુરસઙ્ગામો સમુપબ્યૂળ્હો અહોસિ. તસ્મિં ખો પન, ભિક્ખવે, સઙ્ગામે દેવા જિનિંસુ, અસુરા પરાજયિંસુ. પરાજિતા ચ, ભિક્ખવે, અસુરા અપયિંસુયેવ દક્ખિણેનાભિમુખા, અભિયિંસુ દેવા. અથ ખો, ભિક્ખવે, અસુરાનં એતદહોસિ – ‘અભિયન્તેવ ખો દેવા. યંનૂન મયં દુતિયમ્પિ દેવેહિ સઙ્ગામેય્યામા’તિ. દુતિયમ્પિ ખો, ભિક્ખવે, અસુરા દેવેહિ સઙ્ગામેસું. દુતિયમ્પિ ખો, ભિક્ખવે, દેવા જિનિંસુ, અસુરા પરાજયિંસુ. પરાજિતા ચ, ભિક્ખવે, અસુરા અપયિંસુયેવ દક્ખિણેનાભિમુખા, અભિયિંસુ દેવા’’.

અથ ખો, ભિક્ખવે, અસુરાનં એતદહોસિ – ‘અભિયન્તેવ ખો દેવા. યંનૂન મયં તતિયમ્પિ દેવેહિ સઙ્ગામેય્યામા’તિ. તતિયમ્પિ ખો, ભિક્ખવે, અસુરા દેવેહિ સઙ્ગામેસું. તતિયમ્પિ ખો, ભિક્ખવે, દેવા જિનિંસુ, અસુરા પરાજયિંસુ. પરાજિતા ચ, ભિક્ખવે, અસુરા ભીતા અસુરપુરંયેવ પવિસિંસુ. અસુરપુરગતાનઞ્ચ પન, ભિક્ખવે, અસુરાનં એતદહોસિ – ‘ભીરુત્તાનગતેન ખો દાનિ મયં એતરહિ અત્તના વિહરામ અકરણીયા દેવેહી’તિ. દેવાનમ્પિ, ભિક્ખવે, એતદહોસિ – ‘ભીરુત્તાનગતેન ખો દાનિ અસુરા એતરહિ અત્તના વિહરન્તિ અકરણીયા અમ્હેહી’તિ.

‘‘એવમેવં ખો, ભિક્ખવે, યસ્મિં સમયે ભિક્ખુ વિવિચ્ચેવ કામેહિ વિવિચ્ચ અકુસલેહિ ધમ્મેહિ સવિતક્કં સવિચારં વિવેકજં પીતિસુખં પઠમં ઝાનં ઉપસમ્પજ્જ વિહરતિ, તસ્મિં, ભિક્ખવે, સમયે ભિક્ખુસ્સ એવં હોતિ – ‘ભીરુત્તાનગતેન ખો દાનાહં એતરહિ અત્તના વિહરામિ અકરણીયો મારસ્સા’તિ. મારસ્સાપિ, ભિક્ખવે, પાપિમતો એવં હોતિ – ‘ભીરુત્તાનગતેન ખો દાનિ ભિક્ખુ એતરહિ અત્તના વિહરતિ અકરણીયો મય્હ’’’ન્તિ.

‘‘યસ્મિં, ભિક્ખવે, સમયે ભિક્ખુ વિતક્કવિચારાનં વૂપસમા…પે… દુતિયં ઝાનં… તતિયં ઝાનં… ચતુત્થં ઝાનં ઉપસમ્પજ્જ વિહરતિ, તસ્મિં, ભિક્ખવે, સમયે ભિક્ખુસ્સ એવં હોતિ – ‘ભીરુત્તાનગતેન ખો દાનાહં એતરહિ અત્તના વિહરામિ અકરણીયો મારસ્સા’તિ. મારસ્સાપિ, ભિક્ખવે, પાપિમતો એવં હોતિ – ‘ભીરુત્તાનગતેન ખો દાનિ ભિક્ખુ એતરહિ અત્તના વિહરતિ, અકરણીયો મય્હ’’’ન્તિ.

‘‘યસ્મિં, ભિક્ખવે, સમયે ભિક્ખુ સબ્બસો રૂપસઞ્ઞાનં સમતિક્કમા પટિઘસઞ્ઞાનં અત્થઙ્ગમા નાનત્તસઞ્ઞાનં અમનસિકારા ‘અનન્તો આકાસો’તિ આકાસાનઞ્ચાયતનં ઉપસમ્પજ્જ વિહરતિ. અયં વુચ્ચતિ, ભિક્ખવે, ‘ભિક્ખુ અન્તમકાસિ મારં, અપદં વધિત્વા મારચક્ખું અદસ્સનં ગતો પાપિમતો તિણ્ણો લોકે વિસત્તિક’’’ન્તિ.

‘‘યસ્મિં, ભિક્ખવે, સમયે ભિક્ખુ સબ્બસો આકાસાનઞ્ચાયતનં સમતિક્કમ્મ ‘અનન્તં વિઞ્ઞાણ’ન્તિ વિઞ્ઞાણઞ્ચાયતનં ઉપસમ્પજ્જ વિહરતિ… સબ્બસો વિઞ્ઞાણઞ્ચાયતનં સમતિક્કમ્મ ‘નત્થિ કિઞ્ચી’તિ આકિઞ્ચઞ્ઞાયતનં ઉપસમ્પજ્જ વિહરતિ… સબ્બસો આકિઞ્ચઞ્ઞાયતનં સમતિક્કમ્મ નેવસઞ્ઞાનાસઞ્ઞાયતનં ઉપસમ્પજ્જ વિહરતિ… સબ્બસો નેવસઞ્ઞાનાસઞ્ઞાયતનં સમતિક્કમ્મ સઞ્ઞાવેદયિતનિરોધં ઉપસમ્પજ્જ વિહરતિ, પઞ્ઞાય ચસ્સ દિસ્વા આસવા પરિક્ખીણા હોન્તિ. અયં વુચ્ચતિ, ભિક્ખવે, ‘ભિક્ખુ અન્તમકાસિ મારં, અપદં વધિત્વા મારચક્ખું અદસ્સનં ગતો પાપિમતો તિણ્ણો લોકે વિસત્તિક’’’ન્તિ. અટ્ઠમં.