૫. પઞ્ઞાસુત્તં

૨૫. ‘‘યતો ખો, ભિક્ખવે, ભિક્ખુનો પઞ્ઞાય ચિત્તં સુપરિચિતં હોતિ, તસ્સેતં, ભિક્ખવે, ભિક્ખુનો કલ્લં વચનાય – ‘ખીણા જાતિ, વુસિતં બ્રહ્મચરિયં, કતં કરણીયં, નાપરં ઇત્થત્તાયાતિ પજાનામી’’’તિ.

‘‘કથઞ્ચ, ભિક્ખવે, ભિક્ખુનો પઞ્ઞાય ચિત્તં સુપરિચિતં હોતિ? ‘વીતરાગં મે ચિત્ત’ન્તિ પઞ્ઞાય ચિત્તં સુપરિચિતં હોતિ; ‘વીતદોસં મે ચિત્ત’ન્તિ પઞ્ઞાય ચિત્તં સુપરિચિતં હોતિ; ‘વીતમોહં મે ચિત્ત’ન્તિ પઞ્ઞાય ચિત્તં સુપરિચિતં હોતિ; ‘અસરાગધમ્મં મે ચિત્ત’ન્તિ પઞ્ઞાય ચિત્તં સુપરિચિતં હોતિ; ‘અસદોસધમ્મં મે ચિત્ત’ન્તિ પઞ્ઞાય ચિત્તં સુપરિચિતં હોતિ; ‘અસમોહધમ્મં મે ચિત્ત’ન્તિ પઞ્ઞાય ચિત્તં સુપરિચિતં હોતિ; ‘અનાવત્તિધમ્મં મે ચિત્તં કામભવાયા’તિ પઞ્ઞાય ચિત્તં સુપરિચિતં હોતિ; ‘અનાવત્તિધમ્મં મે ચિત્તં રૂપભવાયા’તિ પઞ્ઞાય ચિત્તં સુપરિચિતં હોતિ; ‘અનાવત્તિધમ્મં મે ચિત્તં અરૂપભવાયા’તિ પઞ્ઞાય ચિત્તં સુપરિચિતં હોતિ. યતો ખો, ભિક્ખવે, ભિક્ખુનો પઞ્ઞાય ચિત્તં સુપરિચિતં હોતિ, તસ્સેતં, ભિક્ખવે, ભિક્ખુનો કલ્લં વચનાય – ‘ખીણા જાતિ, વુસિતં બ્રહ્મચરિયં, કતં કરણીયં, નાપરં ઇત્થત્તાયાતિ પજાનામી’’’તિ. પઞ્ચમં.