૧૦. કુસીતારમ્ભવત્થુસુત્તં

૮૦. [દિ. નિ. ૩.૩૩૪, ૩૫૮] ‘‘અટ્ઠિમાનિ, ભિક્ખવે, કુસીતવત્થૂનિ. કતમાનિ અટ્ઠ? ઇધ, ભિક્ખવે, ભિક્ખુના કમ્મં કત્તબ્બં હોતિ. તસ્સ એવં હોતિ – ‘કમ્મં ખો મે કત્તબ્બં ભવિસ્સતિ. કમ્મં ખો પન મે કરોન્તસ્સ કાયો કિલમિસ્સતિ. હન્દાહં નિપજ્જામી’તિ. સો નિપજ્જતિ, ન વીરિયં આરભતિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય. ઇદં, ભિક્ખવે, પઠમં કુસીતવત્થુ.

‘‘પુન ચપરં, ભિક્ખવે, ભિક્ખુના કમ્મં કતં હોતિ. તસ્સ એવં હોતિ – ‘અહં ખો કમ્મં અકાસિં. કમ્મં ખો પન મે કરોન્તસ્સ કાયો કિલન્તો. હન્દાહં નિપજ્જામી’તિ. સો નિપજ્જતિ, ન વીરિયં આરભતિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય. ઇદં, ભિક્ખવે, દુતિયં કુસીતવત્થુ.

‘‘પુન ચપરં, ભિક્ખવે, ભિક્ખુના મગ્ગો ગન્તબ્બો હોતિ. તસ્સ એવં હોતિ – ‘મગ્ગો મે ગન્તબ્બો ભવિસ્સતિ. મગ્ગં ખો પન મે ગચ્છન્તસ્સ કાયો કિલમિસ્સતિ. હન્દાહં નિપજ્જામી’તિ. સો નિપજ્જતિ, ન વીરિયં આરભતિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય. ઇદં, ભિક્ખવે, તતિયં કુસીતવત્થુ.

‘‘પુન ચપરં, ભિક્ખવે, ભિક્ખુના મગ્ગો ગતો હોતિ. તસ્સ એવં હોતિ – ‘અહં ખો મગ્ગં અગમાસિં. મગ્ગં ખો પન મે ગચ્છન્તસ્સ કાયો કિલન્તો. હન્દાહં નિપજ્જામી’તિ. સો નિપજ્જતિ, ન વીરિયં આરભતિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય. ઇદં ભિક્ખવે, ચતુત્થં કુસીતવત્થુ.

‘‘પુન ચપરં, ભિક્ખવે, ભિક્ખુ ગામં વા નિગમં વા પિણ્ડાય ચરન્તો ન લભતિ લૂખસ્સ વા પણીતસ્સ વા ભોજનસ્સ યાવદત્થં પારિપૂરિં. તસ્સ એવં હોતિ – ‘અહં ખો ગામં વા નિગમં વા પિણ્ડાય ચરન્તો નાલત્થં લૂખસ્સ વા પણીતસ્સ વા ભોજનસ્સ યાવદત્થં પારિપૂરિં. તસ્સ મે કાયો કિલન્તો અકમ્મઞ્ઞો. હન્દાહં નિપજ્જામી’તિ. સો નિપજ્જતિ, ન વીરિયં આરભતિ…પે… ઇદં, ભિક્ખવે, પઞ્ચમં કુસીતવત્થુ.

‘‘પુન ચપરં, ભિક્ખવે, ભિક્ખુ ગામં વા નિગમં વા પિણ્ડાય ચરન્તો લભતિ લૂખસ્સ વા પણીતસ્સ વા ભોજનસ્સ યાવદત્થં પારિપૂરિં. તસ્સ એવં હોતિ – ‘અહં ખો ગામં વા નિગમં વા પિણ્ડાય ચરન્તો અલત્થં લૂખસ્સ વા પણીતસ્સ વા ભોજનસ્સ યાવદત્થં પારિપૂરિં. તસ્સ મે કાયો ગરુકો અકમ્મઞ્ઞો માસાચિતં મઞ્ઞે. હન્દાહં નિપજ્જામી’તિ. સો નિપજ્જતિ, ન વીરિયં આરભતિ…પે… ઇદં, ભિક્ખવે, છટ્ઠં કુસીતવત્થુ.

‘‘પુન ચપરં, ભિક્ખવે, ભિક્ખુનો ઉપ્પન્નો હોતિ અપ્પમત્તકો આબાધો. તસ્સ એવં હોતિ – ‘ઉપ્પન્નો ખો મે અયં અપ્પમત્તકો આબાધો અત્થિ કપ્પો નિપજ્જિતું. હન્દાહં નિપજ્જામી’તિ. સો નિપજ્જતિ, ન વીરિયં આરભતિ…પે… ઇદં, ભિક્ખવે, સત્તમં કુસીતવત્થુ.

‘‘પુન ચપરં, ભિક્ખવે, ભિક્ખુ ગિલાના વુટ્ઠિતો [અ. નિ. ૬.૧૬ સુત્તવણ્ણના ટીકા ઓલોકેતબ્બા] હોતિ અચિરવુટ્ઠિતો ગેલઞ્ઞા. તસ્સ એવં હોતિ – ‘અહં ખો ગિલાના વુટ્ઠિતો અચિરવુટ્ઠિતો ગેલઞ્ઞા. તસ્સ મે કાયો દુબ્બલો અકમ્મઞ્ઞો. હન્દાહં નિપજ્જામી’તિ. સો નિપજ્જતિ, ન વીરિયં આરભતિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય. ઇદં, ભિક્ખવે, અટ્ઠમં કુસીતવત્થુ. ઇમાનિ ખો, ભિક્ખવે, અટ્ઠ કુસીતવત્થૂનિ.

[દી. નિ. ૩.૩૩૫, ૩૫૮] ‘‘અટ્ઠિમાનિ, ભિક્ખવે, આરમ્ભવત્થૂનિ. કતમાનિ અટ્ઠ? ઇધ, ભિક્ખવે, ભિક્ખુના કમ્મં કત્તબ્બં હોતિ. તસ્સ એવં હોતિ – ‘કમ્મં ખો મે કત્તબ્બં ભવિસ્સતિ. કમ્મં ખો મયા કરોન્તેન ન સુકરં બુદ્ધાનં સાસનં મનસિ કાતું. હન્દાહં પટિકચ્ચેવ વીરિયં આરભામિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાયા’તિ. સો વીરિયં આરભતિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય. ઇદં, ભિક્ખવે, પઠમં આરમ્ભવત્થુ.

‘‘પુન ચપરં, ભિક્ખવે, ભિક્ખુના કમ્મં કતં હોતિ. તસ્સ એવં હોતિ – ‘અહં ખો કમ્મં અકાસિં. કમ્મં ખો પનાહં કરોન્તો નાસક્ખિં બુદ્ધાનં સાસનં મનસિ કાતું. હન્દાહં વીરિયં આરભામિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાયા’તિ. સો વીરિયં આરભતિ. ઇદં, ભિક્ખવે, દુતિયં આરમ્ભવત્થુ.

‘‘પુન ચપરં, ભિક્ખવે, ભિક્ખુના મગ્ગો ગન્તબ્બો હોતિ. તસ્સ એવં હોતિ – મગ્ગો ખો મે ગન્તબ્બો ભવિસ્સતિ. મગ્ગં ખો પન મે ગચ્છન્તેન ન સુકરં બુદ્ધાનં સાસનં મનસિ કાતું. હન્દાહં વીરિયં…પે… ઇદં, ભિક્ખવે, તતિયં આરમ્ભવત્થુ.

‘‘પુન ચપરં, ભિક્ખવે, ભિક્ખુના મગ્ગો ગતો હોતિ. તસ્સ એવં હોતિ – અહં ખો મગ્ગં અગમાસિં. મગ્ગં ખો પનાહં ગચ્છન્તો નાસક્ખિં બુદ્ધાનં સાસનં મનસિ કાતું. હન્દાહં વીરિયં આરભામિ…પે… ઇદં, ભિક્ખવે, ચતુત્થં આરમ્ભવત્થુ.

‘‘પુન ચપરં, ભિક્ખવે, ભિક્ખુ ગામં વા નિગમં વા પિણ્ડાય ચરન્તો ન લભતિ લૂખસ્સ વા પણીતસ્સ વા ભોજનસ્સ યાવદત્થં પારિપૂરિં. તસ્સ એવં હોતિ – અહં ખો ગામં વા નિગમં વા પિણ્ડાય ચરન્તો નાલત્થં લૂખસ્સ વા પણીતસ્સ વા ભોજનસ્સ યાવદત્થં પારિપૂરિં. તસ્સ મે કાયો લહુકો કમ્મઞ્ઞો. હન્દાહં વીરિયં આરભામિ…પે… ઇદં, ભિક્ખવે, પઞ્ચમં આરમ્ભવત્થુ.

‘‘પુન ચપરં, ભિક્ખવે, ભિક્ખુ ગામં વા નિગમં વા પિણ્ડાય ચરન્તો લભતિ લૂખસ્સ વા પણીતસ્સ વા ભોજનસ્સ યાવદત્થં પારિપૂરિં. તસ્સ એવં હોતિ – અહં ખો ગામં વા નિગમં વા પિણ્ડાય ચરન્તો અલત્થં લૂખસ્સ વા પણીતસ્સ વા ભોજનસ્સ યાવદત્થં પારિપૂરિં. તસ્સ મે કાયો બલવા કમ્મઞ્ઞો. હન્દાહં વીરિયં આરભામિ…પે… ઇદં, ભિક્ખવે, છટ્ઠં આરમ્ભવત્થુ.

‘‘પુન ચપરં, ભિક્ખવે, ભિક્ખુનો ઉપ્પન્નો હોતિ અપ્પમત્તકો આબાધો. તસ્સ એવં હોતિ – ઉપ્પન્નો ખો મે અયં અપ્પમત્તકો આબાધો. ઠાનં ખો પનેતં વિજ્જતિ યં મે આબાધો પવડ્ઢેય્ય. હન્દાહં પટિકચ્ચેવ વીરિયં આરભામિ…પે… ઇદં, ભિક્ખવે, સત્તમં આરમ્ભવત્થુ.

‘‘પુન ચપરં, ભિક્ખવે, ભિક્ખુ ગિલાના વુટ્ઠિતો હોતિ અચિરવુટ્ઠિતો ગેલઞ્ઞા. તસ્સ એવં હોતિ – ‘અહં ખો ગિલાના વુટ્ઠિતો અચિરવુટ્ઠિતો ગેલઞ્ઞા. ઠાનં ખો પનેતં વિજ્જતિ યં મે આબાધો પચ્ચુદાવત્તેય્ય. હન્દાહં પટિકચ્ચેવ વીરિયં આરભામિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાયા’તિ. સો વીરિયં આરભતિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય. ઇદં, ભિક્ખવે, અટ્ઠમં આરમ્ભવત્થુ. ઇમાનિ ખો, ભિક્ખવે, અટ્ઠ આરમ્ભવત્થૂની’’તિ. દસમં.

યમકવગ્ગો તતિયો.