૪. ગયાસીસસુત્તં

૬૪. એકં સમયં ભગવા ગયાયં વિહરતિ ગયાસીસે. તત્ર ખો ભગવા ભિક્ખૂ આમન્તેસિ…પે… ‘‘પુબ્બાહં, ભિક્ખવે, સમ્બોધા અનભિસમ્બુદ્ધો બોધિસત્તોવ સમાનો ઓભાસઞ્ઞેવ ખો સઞ્જાનામિ, નો ચ રૂપાનિ પસ્સામિ’’.

‘‘તસ્સ મય્હં, ભિક્ખવે, એતદહોસિ – ‘સચે ખો અહં ઓભાસઞ્ચેવ સઞ્જાનેય્યં રૂપાનિ ચ પસ્સેય્યં; એવં મે ઇદં ઞાણદસ્સનં પરિસુદ્ધતરં અસ્સા’’’તિ.

‘‘સો ખો અહં, ભિક્ખવે, અપરેન સમયેન અપ્પમત્તો આતાપી પહિતત્તો વિહરન્તો ઓભાસઞ્ચેવ સઞ્જાનામિ, રૂપાનિ ચ પસ્સામિ; નો ચ ખો તાહિ દેવતાહિ સદ્ધિં સન્તિટ્ઠામિ સલ્લપામિ સાકચ્છં સમાપજ્જામિ.

‘‘તસ્સ મય્હં, ભિક્ખવે, એતદહોસિ – ‘સચે ખો અહં ઓભાસઞ્ચેવ સઞ્જાનેય્યં, રૂપાનિ ચ પસ્સેય્યં, તાહિ ચ દેવતાહિ સદ્ધિં સન્તિટ્ઠેય્યં સલ્લપેય્યં સાકચ્છં સમાપજ્જેય્યં; એવં મે ઇદં ઞાણદસ્સનં પરિસુદ્ધતરં અસ્સા’’’તિ.

‘‘સો ખો અહં, ભિક્ખવે, અપરેન સમયેન અપ્પમત્તો આતાપી પહિતત્તો વિહરન્તો ઓભાસઞ્ચેવ સઞ્જાનામિ, રૂપાનિ ચ પસ્સામિ, તાહિ ચ દેવતાહિ સદ્ધિં સન્તિટ્ઠામિ સલ્લપામિ સાકચ્છં સમાપજ્જામિ; નો ચ ખો તા દેવતા જાનામિ – ઇમા દેવતા અમુકમ્હા વા અમુકમ્હા વા દેવનિકાયાતિ.

‘‘તસ્સ મય્હં, ભિક્ખવે, એતદહોસિ – ‘સચે ખો અહં ઓભાસઞ્ચેવ સઞ્જાનેય્યં, રૂપાનિ ચ પસ્સેય્યં, તાહિ ચ દેવતાહિ સદ્ધિં સન્તિટ્ઠેય્યં સલ્લપેય્યં સાકચ્છં સમાપજ્જેય્યં, તા ચ દેવતા જાનેય્યં – ઇમા દેવતા અમુકમ્હા વા અમુકમ્હા વા દેવનિકાયા’તિ; એવં મે ઇદં ઞાણદસ્સનં પરિસુદ્ધતરં અસ્સા’’’તિ.

‘‘સો ખો અહં, ભિક્ખવે, અપરેન સમયેન અપ્પમત્તો આતાપી પહિતત્તો વિહરન્તો ઓભાસઞ્ચેવ સઞ્જાનામિ, રૂપાનિ ચ પસ્સામિ, તાહિ ચ દેવતાહિ સદ્ધિં સન્તિટ્ઠામિ સલ્લપામિ સાકચ્છં સમાપજ્જામિ, તા ચ દેવતા જાનામિ – ‘ઇમા દેવતા અમુકમ્હા વા અમુકમ્હા વા દેવનિકાયા’તિ; નો ચ ખો તા દેવતા જાનામિ – ‘ઇમા દેવતા ઇમસ્સ કમ્મસ્સ વિપાકેન ઇતો ચુતા તત્થ ઉપપન્ના’તિ…પે… તા ચ દેવતા જાનામિ – ‘ઇમા દેવતા ઇમસ્સ કમ્મસ્સ વિપાકેન ઇતો ચુતા તત્થ ઉપપન્ના’તિ; નો ચ ખો તા દેવતા જાનામિ – ‘ઇમા દેવતા ઇમસ્સ કમ્મસ્સ વિપાકેન એવમાહારા એવંસુખદુક્ખપ્પટિસંવેદિનિયો’તિ …પે… તા ચ દેવતા જાનામિ – ‘ઇમા દેવતા ઇમસ્સ કમ્મસ્સ વિપાકેન એવમાહારા એવંસુખદુક્ખપ્પટિસંવેદિનિયો’તિ; નો ચ ખો તા દેવતા જાનામિ – ‘ઇમા દેવતા એવંદીઘાયુકા એવંચિરટ્ઠિતિકા’તિ…પે… તા ચ દેવતા જાનામિ – ‘ઇમા દેવતા એવંદીઘાયુકા એવંચિરટ્ઠિતિકા’તિ; નો ચ ખો તા દેવતા જાનામિ યદિ વા મે ઇમાહિ દેવતાહિ સદ્ધિં સન્નિવુત્થપુબ્બં યદિ વા ન સન્નિવુત્થપુબ્બન્તિ.

‘‘તસ્સ મય્હં, ભિક્ખવે, એતદહોસિ – ‘સચે ખો અહં ઓભાસઞ્ચેવ સઞ્જાનેય્યં, રૂપાનિ ચ પસ્સેય્યં, તાહિ ચ દેવતાહિ સદ્ધિં સન્તિટ્ઠેય્યં સલ્લપેય્યં સાકચ્છં સમાપજ્જેય્યં, તા ચ દેવતા જાનેય્યં – ‘ઇમા દેવતા અમુકમ્હા વા અમુકમ્હા વા દેવનિકાયા’તિ, તા ચ દેવતા જાનેય્યં – ‘ઇમા દેવતા ઇમસ્સ કમ્મસ્સ વિપાકેન ઇતો ચુતા તત્થ ઉપપન્ના’તિ, તા ચ દેવતા જાનેય્યં – ‘ઇમા દેવતા એવમાહારા એવંસુખદુક્ખપ્પટિસંવેદિનિયો’તિ, તા ચ દેવતા જાનેય્યં – ‘ઇમા દેવતા એવંદીઘાયુકા એવંચિરટ્ઠિતિકા’તિ, તા ચ દેવતા જાનેય્યં યદિ વા મે ઇમાહિ દેવતાહિ સદ્ધિં સન્નિવુત્થપુબ્બં યદિ વા ન સન્નિવુત્થપુબ્બન્તિ; એવં મે ઇદં ઞાણદસ્સનં પરિસુદ્ધતરં અસ્સા’’’તિ.

‘‘સો ખો અહં, ભિક્ખવે, અપરેન સમયેન અપ્પમત્તો આતાપી પહિતત્તો વિહરન્તો ઓભાસઞ્ચેવ સઞ્જાનામિ, રૂપાનિ ચ પસ્સામિ, તાહિ ચ દેવતાહિ સદ્ધિં સન્તિટ્ઠામિ સલ્લપામિ સાકચ્છં સમાપજ્જામિ, તા ચ દેવતા જાનામિ – ‘ઇમા દેવતા અમુકમ્હા વા અમુકમ્હા વા દેવનિકાયા’તિ, તા ચ દેવતા જાનામિ – ‘ઇમા દેવતા ઇમસ્સ કમ્મસ્સ વિપાકેન ઇતો ચુતા તત્થ ઉપપન્ના’તિ, તા ચ દેવતા જાનામિ – ‘ઇમા દેવતા એવમાહારા એવંસુખદુક્ખપ્પટિસંવેદિનિયો’તિ, તા ચ દેવતા જાનામિ – ‘ઇમા દેવતા એવંદીઘાયુકા એવંચિરટ્ઠિતિકા’તિ, તા ચ દેવતા જાનામિ યદિ વા મે દેવતાહિ સદ્ધિં સન્નિવુત્થપુબ્બં યદિ વા ન સન્નિવુત્થપુબ્બન્તિ.

‘‘યાવકીવઞ્ચ મે, ભિક્ખવે, એવં અટ્ઠપરિવટ્ટં અધિદેવઞાણદસ્સનં ન સુવિસુદ્ધં અહોસિ, નેવ તાવાહં, ભિક્ખવે, ‘સદેવકે લોકે સમારકે સબ્રહ્મકે સસ્સમણબ્રાહ્મણિયા પજાય સદેવમનુસ્સાય અનુત્તરં સમ્માસમ્બોધિં અભિસમ્બુદ્ધો’તિ [અભિસમ્બુદ્ધો (સી. સ્યા. પી.)] પચ્ચઞ્ઞાસિં. યતો ચ ખો મે, ભિક્ખવે, એવં અટ્ઠપરિવટ્ટં અધિદેવઞાણદસ્સનં સુવિસુદ્ધં અહોસિ, અથાહં, ભિક્ખવે, ‘સદેવકે લોકે સમારકે સબ્રહ્મકે સસ્સમણબ્રાહ્મણિયા પજાય સદેવમનુસ્સાય અનુત્તરં સમ્માસમ્બોધિં અભિસમ્બુદ્ધો’તિ પચ્ચઞ્ઞાસિં; ઞાણઞ્ચ પન મે દસ્સનં ઉદપાદિ; અકુપ્પા મે ચેતોવિમુત્તિ [વિમુત્તિ (ક. સી. ક.)]; અયમન્તિમા જાતિ નત્થિ દાનિ પુનબ્ભવો’’તિ. ચતુત્થં.