૩. સંખિત્તસુત્તં

૫૩. [ચૂળવ. ૪૦૬] એકં સમયં ભગવા વેસાલિયં વિહરતિ મહાવને કૂટાગારસાલાયં. અથ ખો મહાપજાપતી ગોતમી યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં અટ્ઠાસિ. એકમન્તં ઠિતા ખો સા મહાપજાપતી ગોતમી ભગવન્તં એતદવોચ –

‘‘સાધુ મે, ભન્તે, ભગવા સંખિત્તેન ધમ્મં દેસેતુ, યમહં ભગવતો ધમ્મં સુત્વા એકા વૂપકટ્ઠા અપ્પમત્તા આતાપિની પહિતત્તા વિહરેય્ય’’ન્તિ. ‘‘યે ખો ત્વં, ગોતમિ, ધમ્મે જાનેય્યાસિ – ‘ઇમે ધમ્મા સરાગાય સંવત્તન્તિ, નો વિરાગાય; સંયોગાય સંવત્તન્તિ, નો વિસંયોગાય; આચયાય સંવત્તન્તિ, નો અપચયાય; મહિચ્છતાય સંવત્તન્તિ, નો અપ્પિચ્છતાય; અસન્તુટ્ઠિયા સંવત્તન્તિ, નો સન્તુટ્ઠિયા; સઙ્ગણિકાય સંવત્તન્તિ, નો પવિવેકાય; કોસજ્જાય સંવત્તન્તિ, નો વીરિયારમ્ભાય; દુબ્ભરતાય સંવત્તન્તિ, નો સુભરતાયા’તિ, એકંસેન, ગોતમિ, ધારેય્યાસિ – ‘નેસો ધમ્મો, નેસો વિનયો, નેતં સત્થુસાસન’’’ન્તિ.

‘‘યે ચ ખો ત્વં, ગોતમિ, ધમ્મે જાનેય્યાસિ – ‘ઇમે ધમ્મા વિરાગાય સંવત્તન્તિ, નો સરાગાય; વિસંયોગાય સંવત્તન્તિ, નો સંયોગાય; અપચયાય સંવત્તન્તિ, નો આચયાય; અપ્પિચ્છતાય સંવત્તન્તિ, નો મહિચ્છતાય; સન્તુટ્ઠિયા સંવત્તન્તિ, નો અસન્તુટ્ઠિયા; પવિવેકાય સંવત્તન્તિ, નો સઙ્ગણિકાય; વીરિયારમ્ભાય સંવત્તન્તિ, નો કોસજ્જાય; સુભરતાય સંવત્તન્તિ, નો દુબ્ભરતાયા’તિ, એકંસેન, ગોતમિ, ધારેય્યાસિ – ‘એસો ધમ્મો, એસો વિનયો, એતં સત્થુસાસન’’’ન્તિ. તતિયં.