૯. નન્દસુત્તં

૯. ‘‘‘કુલપુત્તો’તિ, ભિક્ખવે, નન્દં સમ્મા વદમાનો વદેય્ય. ‘બલવા’તિ, ભિક્ખવે, નન્દં સમ્મા વદમાનો વદેય્ય. ‘પાસાદિકો’તિ, ભિક્ખવે, નન્દં સમ્મા વદમાનો વદેય્ય. ‘તિબ્બરાગો’તિ, ભિક્ખવે, નન્દં સમ્મા વદમાનો વદેય્ય. કિમઞ્ઞત્ર, ભિક્ખવે, નન્દો ઇન્દ્રિયેસુ ગુત્તદ્વારો, ભોજને મત્તઞ્ઞૂ, જાગરિયં અનુયુત્તો, સતિસમ્પજઞ્ઞેન સમન્નાગતો, યેહિ [યેન (ક.)] નન્દો સક્કોતિ પરિપુણ્ણં પરિસુદ્ધં બ્રહ્મચરિયં ચરિતું! તત્રિદં, ભિક્ખવે, નન્દસ્સ ઇન્દ્રિયેસુ ગુત્તદ્વારતાય હોતિ. સચે, ભિક્ખવે, નન્દસ્સ પુરત્થિમા દિસા આલોકેતબ્બા હોતિ, સબ્બં ચેતસા સમન્નાહરિત્વા નન્દો પુરત્થિમં દિસં આલોકેતિ – ‘એવં મે પુરત્થિમં દિસં આલોકયતો નાભિજ્ઝાદોમનસ્સા પાપકા અકુસલા ધમ્મા અન્વાસ્સવિસ્સન્તી’તિ. ઇતિહ તત્થ સમ્પજાનો હોતિ.

‘‘સચે, ભિક્ખવે, નન્દસ્સ પચ્છિમા દિસા આલોકેતબ્બા હોતિ…પે… ઉત્તરા દિસા આલોકેતબ્બા હોતિ… દક્ખિણા દિસા આલોકેતબ્બા હોતિ… ઉદ્ધં ઉલ્લોકેતબ્બા હોતિ… અધો ઓલોકેતબ્બા હોતિ… અનુદિસા અનુવિલોકેતબ્બા હોતિ, સબ્બં ચેતસા સમન્નાહરિત્વા નન્દો અનુદિસં અનુવિલોકેતિ – ‘એવં મે અનુદિસં અનુવિલોકયતો નાભિજ્ઝાદોમનસ્સા પાપકા અકુસલા ધમ્મા અન્વાસ્સવિસ્સન્તી’તિ. ઇતિહ તત્થ સમ્પજાનો હોતિ. ઇદં ખો, ભિક્ખવે, નન્દસ્સ ઇન્દ્રિયેસુ ગુત્તદ્વારતાય હોતિ.

‘‘તત્રિદં, ભિક્ખવે, નન્દસ્સ ભોજને મત્તઞ્ઞુતાય હોતિ. ઇધ, ભિક્ખવે, નન્દો પટિસઙ્ખા યોનિસો આહારં આહારેતિ – ‘નેવ દવાય ન મદાય ન મણ્ડનાય ન વિભૂસનાય, યાવદેવ ઇમસ્સ કાયસ્સ ઠિતિયા યાપનાય વિહિંસૂપરતિયા બ્રહ્મચરિયાનુગ્ગહાય ઇતિ પુરાણઞ્ચ વેદનં પટિહઙ્ખામિ, નવઞ્ચ વેદનં ન ઉપ્પાદેસ્સામિ, યાત્રા ચ મે ભવિસ્સતિ અનવજ્જતા ચ ફાસુવિહારો ચા’તિ. ઇદં ખો, ભિક્ખવે, નન્દસ્સ ભોજને મત્તઞ્ઞુતાય હોતિ.

‘‘તત્રિદં, ભિક્ખવે, નન્દસ્સ જાગરિયાનુયોગસ્મિં હોતિ. ઇધ, ભિક્ખવે, નન્દો દિવસં ચઙ્કમેન નિસજ્જાય આવરણીયેહિ ધમ્મેહિ ચિત્તં પરિસોધેતિ; રત્તિયા પઠમં યામં ચઙ્કમેન નિસજ્જાય આવરણીયેહિ ધમ્મેહિ ચિત્તં પરિસોધેતિ; રત્તિયા મજ્ઝિમં યામં દક્ખિણેન પસ્સેન સીહસેય્યં કપ્પેતિ પાદે પાદં અચ્ચાધાય સતો સમ્પજાનો ઉટ્ઠાનસઞ્ઞં મનસિ કરિત્વા; રત્તિયા પચ્છિમં યામં પચ્ચુટ્ઠાય ચઙ્કમેન નિસજ્જાય આવરણીયેહિ ધમ્મેહિ ચિત્તં પરિસોધેતિ. ઇદં ખો, ભિક્ખવે, નન્દસ્સ જાગરિયાનુયોગસ્મિં હોતિ.

‘‘તત્રિદં, ભિક્ખવે, નન્દસ્સ સતિસમ્પજઞ્ઞસ્મિં હોતિ. ઇધ, ભિક્ખવે, નન્દસ્સ વિદિતા વેદના ઉપ્પજ્જન્તિ, વિદિતા ઉપટ્ઠહન્તિ, વિદિતા અબ્ભત્થં ગચ્છન્તિ; વિદિતા સઞ્ઞા…પે… વિદિતા વિતક્કા…પે… અબ્ભત્થં ગચ્છન્તિ. ઇદં ખો, ભિક્ખવે, નન્દસ્સ સતિસમ્પજઞ્ઞસ્મિં હોતિ.

‘‘કિમઞ્ઞત્ર, ભિક્ખવે, નન્દો ઇન્દ્રિયેસુ ગુત્તદ્વારો, ભોજને મત્તઞ્ઞૂ, જાગરિયં અનુયુત્તો, સતિસમ્પજઞ્ઞેન સમન્નાગતો, યેહિ નન્દો સક્કોતિ પરિપુણ્ણં પરિસુદ્ધં બ્રહ્મચરિયં ચરિતુ’’ન્તિ! નવમં.