૧. મેત્તાસુત્તં

૧. એવં મે સુતં – એકં સમયં ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તત્ર ખો ભગવા ભિક્ખૂ આમન્તેસિ – ‘‘ભિક્ખવો’’તિ. ‘‘ભદન્તે’’તિ તે ભિક્ખૂ ભગવતો પચ્ચસ્સોસું. ભગવા એતદવોચ –

[અ. નિ. ૧૧.૧૫] ‘‘મેત્તાય, ભિક્ખવે, ચેતોવિમુત્તિયા આસેવિતાય ભાવિતાય બહુલીકતાય યાનીકતાય વત્થુકતાય અનુટ્ઠિતાય પરિચિતાય સુસમારદ્ધાય અટ્ઠાનિસંસા પાટિકઙ્ખા. કતમે અટ્ઠ? સુખં સુપતિ, સુખં પટિબુજ્ઝતિ, ન પાપકં સુપિનં પસ્સતિ, મનુસ્સાનં પિયો હોતિ, અમનુસ્સાનં પિયો હોતિ, દેવતા રક્ખન્તિ, નાસ્સ અગ્ગિ વા વિસં વા સત્થં વા કમતિ, ઉત્તરિં અપ્પટિવિજ્ઝન્તો બ્રહ્મલોકૂપગો હોતિ. મેત્તાય, ભિક્ખવે, ચેતોવિમુત્તિયા આસેવિતાય ભાવિતાય બહુલીકતાય યાનીકતાય વત્થુકતાય અનુટ્ઠિતાય પરિચિતાય સુસમારદ્ધાય ઇમે અટ્ઠાનિસંસા પાટિકઙ્ખા’’તિ.

‘‘યો ચ મેત્તં ભાવયતિ, અપ્પમાણં પટિસ્સતો [પતિસ્સતો (સી.)];

તનૂ સંયોજના હોન્તિ, પસ્સતો ઉપધિક્ખયં.

‘‘એકમ્પિ ચે પાણમદુટ્ઠચિત્તો,

મેત્તાયતિ કુસલી તેન હોતિ;

સબ્બે ચ પાણે મનસાનુકમ્પી,

પહૂતમરિયો પકરોતિ પુઞ્ઞં.

‘‘યે સત્તસણ્ડં પથવિં વિજેત્વા,

રાજિસયો યજમાના અનુપરિયગા;

અસ્સમેધં પુરિસમેધં,

સમ્માપાસં વાજપેય્યં નિરગ્ગળં.

‘‘મેત્તસ્સ ચિત્તસ્સ સુભાવિતસ્સ,

કલમ્પિ તે નાનુભવન્તિ સોળસિં;

ચન્દપ્પભા તારગણાવ સબ્બે,

યથા ન અગ્ઘન્તિ કલમ્પિ સોળસિં [અયં પાદો બહૂસુ ન દિસ્સતિ].

‘‘યો ન હન્તિ ન ઘાતેતિ, ન જિનાતિ ન જાપયે;

મેત્તંસો સબ્બભૂતાનં, વેરં તસ્સ ન કેનચી’’તિ. પઠમં;