૮. બલસુત્તં

૭૨. ‘‘છહિ, ભિક્ખવે, ધમ્મેહિ સમન્નાગતો ભિક્ખુ અભબ્બો સમાધિસ્મિં [સમાધિમ્હિ (ક.)] બલતં પાપુણિતું. કતમેહિ છહિ? ઇધ, ભિક્ખવે, ભિક્ખુ ન સમાધિસ્સ સમાપત્તિકુસલો હોતિ, ન સમાધિસ્સ ઠિતિકુસલો હોતિ, ન સમાધિસ્સ [ન સમાધિમ્હા (ક.) ઉપરિસત્તકનિપાતે દેવતાવગ્ગે પન સબ્બત્થપિ ‘‘સમાધિસ્સ’’ઇત્વેવ દિસ્સતિ] વુટ્ઠાનકુસલો હોતિ, અસક્કચ્ચકારી ચ હોતિ, અસાતચ્ચકારી ચ, અસપ્પાયકારી ચ. ઇમેહિ ખો, ભિક્ખવે, છહિ ધમ્મેહિ સમન્નાગતો ભિક્ખુ અભબ્બો સમાધિસ્મિં બલતં પાપુણિતું.

‘‘છહિ, ભિક્ખવે, ધમ્મેહિ સમન્નાગતો ભિક્ખુ ભબ્બો સમાધિસ્મિં બલતં પાપુણિતું. કતમેહિ છહિ? ઇધ, ભિક્ખવે, ભિક્ખુ સમાધિસ્સ સમાપત્તિકુસલો હોતિ, સમાધિસ્સ ઠિતિકુસલો હોતિ, સમાધિસ્સ વુટ્ઠાનકુસલો હોતિ, સક્કચ્ચકારી ચ હોતિ, સાતચ્ચકારી ચ, સપ્પાયકારી ચ. ઇમેહિ ખો, ભિક્ખવે, છહિ ધમ્મેહિ સમન્નાગતો ભિક્ખુ ભબ્બો સમાધિસ્મિં બલતં પાપુણિતુ’’ન્તિ. અટ્ઠમં.