૭. દેવતાવગ્ગો

૧. અનાગામિફલસુત્તં

૬૫. ‘‘છ, ભિક્ખવે, ધમ્મે અપ્પહાય અભબ્બો અનાગામિફલં સચ્છિકાતું. કતમે છ? અસ્સદ્ધિયં, અહિરિકં, અનોત્તપ્પં, કોસજ્જં, મુટ્ઠસ્સચ્ચં, દુપ્પઞ્ઞતં – ઇમે ખો, ભિક્ખવે, છ ધમ્મે અપ્પહાય અભબ્બો અનાગામિફલં સચ્છિકાતું.

‘‘છ, ભિક્ખવે, ધમ્મે પહાય ભબ્બો અનાગામિફલં સચ્છિકાતું. કતમે છ? અસ્સદ્ધિયં, અહિરિકં, અનોત્તપ્પં, કોસજ્જં, મુટ્ઠસ્સચ્ચં, દુપ્પઞ્ઞતં – ઇમે ખો, ભિક્ખવે, છ ધમ્મે પહાય ભબ્બો અનાગામિફલં સચ્છિકાતુ’’ન્તિ. પઠમં.

૨. અરહત્તસુત્તં

૬૬. ‘‘છ, ભિક્ખવે, ધમ્મે અપ્પહાય અભબ્બો અરહત્તં સચ્છિકાતું. કતમે છ? થિનં [થીનં (સી. સ્યા. કં. પી.)], મિદ્ધં, ઉદ્ધચ્ચં, કુક્કુચ્ચં, અસ્સદ્ધિયં, પમાદં – ઇમે ખો, ભિક્ખવે, છ ધમ્મે અપ્પહાય અભબ્બો અરહત્તં સચ્છિકાતું.

‘‘છ, ભિક્ખવે, ધમ્મે પહાય ભબ્બો અરહત્તં સચ્છિકાતું. કતમે છ? થિનં, મિદ્ધં, ઉદ્ધચ્ચં, કુક્કુચ્ચં, અસ્સદ્ધિયં, પમાદં – ઇમે ખો, ભિક્ખવે, છ ધમ્મે પહાય ભબ્બો અરહત્તં સચ્છિકાતુ’’ન્તિ. દુતિયં.

૩. મિત્તસુત્તં

૬૭. ‘‘‘સો વત, ભિક્ખવે, ભિક્ખુ પાપમિત્તો પાપસહાયો પાપસમ્પવઙ્કો, પાપમિત્તે [પાપકે મિત્તે (ક.)] સેવમાનો ભજમાનો પયિરુપાસમાનો, તેસઞ્ચ દિટ્ઠાનુગતિં આપજ્જમાનો આભિસમાચારિકં ધમ્મં પરિપૂરેસ્સતી’તિ નેતં ઠાનં વિજ્જતિ. ‘આભિસમાચારિકં ધમ્મં અપરિપૂરેત્વા સેખં ધમ્મં પરિપૂરેસ્સતી’તિ નેતં ઠાનં વિજ્જતિ. ‘સેખં ધમ્મં અપરિપૂરેત્વા સીલાનિ પરિપૂરેસ્સતી’તિ નેતં ઠાનં વિજ્જતિ. ‘સીલાનિ અપરિપૂરેત્વા કામરાગં વા રૂપરાગં વા અરૂપરાગં વા પજહિસ્સતી’તિ નેતં ઠાનં વિજ્જતિ.

‘‘‘સો વત, ભિક્ખવે, ભિક્ખુ કલ્યાણમિત્તો કલ્યાણસહાયો કલ્યાણસમ્પવઙ્કો, કલ્યાણમિત્તે સેવમાનો ભજમાનો પયિરુપાસમાનો, તેસઞ્ચ દિટ્ઠાનુગતિં આપજ્જમાનો આભિસમાચારિકં ધમ્મં પરિપૂરેસ્સતી’તિ ઠાનમેતં વિજ્જતિ. ‘આભિસમાચારિકં ધમ્મં પરિપૂરેત્વા સેખં ધમ્મં પરિપૂરેસ્સતી’તિ ઠાનમેતં વિજ્જતિ. ‘સેખં ધમ્મં પરિપૂરેત્વા સીલાનિ પરિપૂરેસ્સતી’તિ ઠાનમેતં વિજ્જતિ. ‘સીલાનિ પરિપૂરેત્વા કામરાગં વા રૂપરાગં વા અરૂપરાગં વા પજહિસ્સતી’તિ ઠાનમેતં વિજ્જતી’’તિ. તતિયં.

૪. સઙ્ગણિકારામસુત્તં

૬૮. ‘‘‘સો વત, ભિક્ખવે, ભિક્ખુ સઙ્ગણિકારામો સઙ્ગણિકરતો સઙ્ગણિકારામતં અનુયુત્તો, ગણારામો ગણરતો ગણારામતં અનુયુત્તો, એકો પવિવેકે અભિરમિસ્સતી’તિ નેતં ઠાનં વિજ્જતિ. ‘એકો પવિવેકે અનભિરમન્તો ચિત્તસ્સ નિમિત્તં ગહેસ્સતી’તિ નેતં ઠાનં વિજ્જતિ. ‘ચિત્તસ્સ નિમિત્તં અગણ્હન્તો સમ્માદિટ્ઠિં પરિપૂરેસ્સતી’તિ નેતં ઠાનં વિજ્જતિ. ‘સમ્માદિટ્ઠિં અપરિપૂરેત્વા સમ્માસમાધિં પરિપૂરેસ્સતી’તિ નેતં ઠાનં વિજ્જતિ. ‘સમ્માસમાધિં અપરિપૂરેત્વા સંયોજનાનિ પજહિસ્સતી’તિ નેતં ઠાનં વિજ્જતિ. ‘સંયોજનાનિ અપ્પહાય નિબ્બાનં સચ્છિકરિસ્સતી’તિ નેતં ઠાનં વિજ્જતિ.

‘‘‘સો વત, ભિક્ખવે, ભિક્ખુ ન સઙ્ગણિકારામો ન સઙ્ગણિકરતો ન સઙ્ગણિકારામતં અનુયુત્તો, ન ગણારામો ન ગણરતો ન ગણારામતં અનુયુત્તો, એકો પવિવેકે અભિરમિસ્સતી’તિ ઠાનમેતં વિજ્જતિ. ‘એકો પવિવેકે અભિરમન્તો ચિત્તસ્સ નિમિત્તં ગહેસ્સતી’તિ ઠાનમેતં વિજ્જતિ. ‘ચિત્તસ્સ નિમિત્તં ગણ્હન્તો સમ્માદિટ્ઠિં પરિપૂરેસ્સતી’તિ ઠાનમેતં વિજ્જતિ. ‘સમ્માદિટ્ઠિં પરિપૂરેત્વા સમ્માસમાધિં પરિપૂરેસ્સતી’તિ ઠાનમેતં વિજ્જતિ. ‘સમ્માસમાધિં પરિપૂરેત્વા સંયોજનાનિ પજહિસ્સતી’તિ ઠાનમેતં વિજ્જતિ. ‘સંયોજનાનિ પહાય નિબ્બાનં સચ્છિકરિસ્સતી’તિ ઠાનમેતં વિજ્જતી’’તિ. ચતુત્થં.

૫. દેવતાસુત્તં

૬૯. અથ ખો અઞ્ઞતરા દેવતા અભિક્કન્તાય રત્તિયા અભિક્કન્તવણ્ણા કેવલકપ્પં જેતવનં ઓભાસેત્વા યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં અટ્ઠાસિ. એકમન્તં ઠિતા ખો સા દેવતા ભગવન્તં એતદવોચ – ‘‘છયિમે, ભન્તે, ધમ્મા ભિક્ખુનો અપરિહાનાય સંવત્તન્તિ. કતમે છ? સત્થુગારવતા, ધમ્મગારવતા, સઙ્ઘગારવતા, સિક્ખાગારવતા, સોવચસ્સતા, કલ્યાણમિત્તતા – ઇમે ખો, ભન્તે, છ ધમ્મા ભિક્ખુનો અપરિહાનાય સંવત્તન્તી’’તિ. ઇદમવોચ સા દેવતા. સમનુઞ્ઞો સત્થા અહોસિ. અથ ખો સા દેવતા ‘‘સમનુઞ્ઞો મે સત્થા’’તિ ભગવન્તં અભિવાદેત્વા પદક્ખિણં કત્વા તત્થેવન્તરધાયિ.

અથ ખો ભગવા તસ્સા રત્તિયા અચ્ચયેન ભિક્ખૂ આમન્તેસિ – ‘‘ઇમં, ભિક્ખવે, રત્તિં અઞ્ઞતરા દેવતા અભિક્કન્તાય રત્તિયા અભિક્કન્તવણ્ણા કેવલકપ્પં જેતવનં ઓભાસેત્વા યેનાહં તેનુપસઙ્કમિ; ઉપસઙ્કમિત્વા મં અભિવાદેત્વા એકમન્તં અટ્ઠાસિ. એકમન્તં ઠિતા ખો, ભિક્ખવે, સા દેવતા મં એતદવોચ – ‘છયિમે, ભન્તે, ધમ્મા ભિક્ખુનો અપરિહાનાય સંવત્તન્તિ. કતમે છ? સત્થુગારવતા, ધમ્મગારવતા, સઙ્ઘગારવતા, સિક્ખાગારવતા, સોવચસ્સતા, કલ્યાણમિત્તતા – ઇમે ખો, ભન્તે, છ ધમ્મા ભિક્ખુનો અપરિહાનાય સંવત્તન્તી’તિ. ઇદમવોચ, ભિક્ખવે, સા દેવતા. ઇદં વત્વા મં અભિવાદેત્વા પદક્ખિણં કત્વા તત્થેવન્તરધાયી’’તિ.

એવં વુત્તે આયસ્મા સારિપુત્તો ભગવન્તં અભિવાદેત્વા એતદવોચ – ‘‘ઇમસ્સ ખો અહં, ભન્તે, ભગવતા સંખિત્તેન ભાસિતસ્સ એવં વિત્થારેન અત્થં આજાનામિ. ઇધ, ભન્તે, ભિક્ખુ અત્તના ચ સત્થુગારવો હોતિ સત્થુગારવતાય ચ વણ્ણવાદી. યે ચઞ્ઞે ભિક્ખૂ ન સત્થુગારવા તે ચ સત્થુગારવતાય સમાદપેતિ. યે ચઞ્ઞે ભિક્ખૂ સત્થુગારવા તેસઞ્ચ વણ્ણં ભણતિ ભૂતં તચ્છં કાલેન. અત્તના ચ ધમ્મગારવો હોતિ…પે… સઙ્ઘગારવો હોતિ… સિક્ખાગારવો હોતિ … સુવચો હોતિ… કલ્યાણમિત્તો હોતિ કલ્યાણમિત્તતાય ચ વણ્ણવાદી. યે ચઞ્ઞે ભિક્ખૂ ન કલ્યાણમિત્તા તે ચ કલ્યાણમિત્તતાય સમાદપેતિ. યે ચઞ્ઞે ભિક્ખૂ કલ્યાણમિત્તા તેસઞ્ચ વણ્ણં ભણતિ ભૂતં તચ્છં કાલેન. ઇમસ્સ ખો અહં, ભન્તે, ભગવતા સંખિત્તેન ભાસિતસ્સ એવં વિત્થારેન અત્થં આજાનામી’’તિ.

‘‘સાધુ સાધુ, સારિપુત્ત! સાધુ ખો ત્વં, સારિપુત્ત, ઇમસ્સ મયા સંખિત્તેન ભાસિતસ્સ એવં વિત્થારેન અત્થં આજાનાસિ. ઇધ, સારિપુત્ત, ભિક્ખુ અત્તના ચ સત્થુગારવો હોતિ સત્થુગારવતાય ચ વણ્ણવાદી. યે ચઞ્ઞે ભિક્ખૂ ન સત્થુગારવા તે ચ સત્થુગારવતાય સમાદપેતિ. યે ચઞ્ઞે ભિક્ખૂ સત્થુગારવા તેસઞ્ચ વણ્ણં ભણતિ ભૂતં તચ્છં કાલેન. અત્તના ચ ધમ્મગારવો હોતિ…પે… સઙ્ઘગારવો હોતિ… સિક્ખાગારવો હોતિ… સુવચો હોતિ… કલ્યાણમિત્તો હોતિ કલ્યાણમિત્તતાય ચ વણ્ણવાદી. યે ચઞ્ઞે ભિક્ખૂ ન કલ્યાણમિત્તા તે ચ કલ્યાણમિત્તતાય સમાદપેતિ. યે ચઞ્ઞે ભિક્ખૂ કલ્યાણમિત્તા તેસઞ્ચ વણ્ણં ભણતિ ભૂતં તચ્છં કાલેન. ઇમસ્સ ખો, સારિપુત્ત, મયા સંખિત્તેન ભાસિતસ્સ એવં વિત્થારેન અત્થો દટ્ઠબ્બો’’તિ. પઞ્ચમં.

૬. સમાધિસુત્તં

૭૦. ‘‘‘સો વત, ભિક્ખવે, ભિક્ખુ ન સન્તેન સમાધિના ન પણીતેન ન પટિપ્પસ્સદ્ધિલદ્ધેન [ન પટિપ્પસ્સદ્ધલદ્ધેન (સી.)] ન એકોદિભાવાધિગતેન અનેકવિહિતં ઇદ્ધિવિધં પચ્ચનુભવિસ્સતિ – એકોપિ હુત્વા બહુધા ભવિસ્સતિ, બહુધાપિ હુત્વા એકો ભવિસ્સતિ…પે… યાવ બ્રહ્મલોકાપિ કાયેન વસં વત્તેસ્સતી’તિ નેતં ઠાનં વિજ્જતિ. ‘દિબ્બાય સોતધાતુયા વિસુદ્ધાય અતિક્કન્તમાનુસિકાય ઉભો સદ્દે સુણિસ્સતિ – દિબ્બે ચ માનુસે ચ યે દૂરે સન્તિકે ચા’તિ નેતં ઠાનં વિજ્જતિ. ‘પરસત્તાનં પરપુગ્ગલાનં ચેતસા ચેતો પરિચ્ચ પજાનિસ્સતિ – સરાગં વા ચિત્તં સરાગં ચિત્તન્તિ પજાનિસ્સતિ …પે… વિમુત્તં વા ચિત્તં વિમુત્તં ચિત્તન્તિ પજાનિસ્સતી’તિ નેતં ઠાનં વિજ્જતિ. ‘અનેકવિહિતં પુબ્બેનિવાસં અનુસ્સરિસ્સતિ, સેય્યથિદં – એકમ્પિ જાતિં, દ્વેપિ જાતિયો…પે… ઇતિ સાકારં સઉદ્દેસં અનેકવિહિતં પુબ્બેનિવાસં અનુસ્સરિસ્સતી’તિ નેતં ઠાનં વિજ્જતિ. ‘દિબ્બેન ચક્ખુના વિસુદ્ધેન અતિક્કન્તમાનુસકેન સત્તે પસ્સિસ્સતિ…પે… યથાકમ્મૂપગે સત્તે પજાનિસ્સતી’તિ નેતં ઠાનં વિજ્જતિ. ‘આસવાનં ખયા…પે… સચ્છિકત્વા ઉપસમ્પજ્જ વિહરિસ્સતી’તિ નેતં ઠાનં વિજ્જતિ.

‘‘‘સો વત, ભિક્ખવે, ભિક્ખુ સન્તેન સમાધિના પણીતેન પટિપ્પસ્સદ્ધિલદ્ધેન એકોદિભાવાધિગતેન અનેકવિહિતં ઇદ્ધિવિધં પચ્ચનુભવિસ્સતિ…પે… યાવ બ્રહ્મલોકાપિ કાયેન વસં વત્તેસ્સતી’તિ ઠાનમેતં વિજ્જતિ. ‘દિબ્બાય સોતધાતુયા વિસુદ્ધાય અતિક્કન્તમાનુસિકાય ઉભો સદ્દે સુણિસ્સતિ – દિબ્બે ચ માનુસે ચ યે દૂરે સન્તિકે ચા’તિ ઠાનમેતં વિજ્જતિ. ‘પરસત્તાનં પરપુગ્ગલાનં ચેતસા ચેતો પરિચ્ચ પજાનિસ્સતિ – સરાગં વા ચિત્તં સરાગં ચિત્તન્તિ પજાનિસ્સતિ…પે… વિમુત્તં વા ચિત્તં વિમુત્તં ચિત્તન્તિ પજાનિસ્સતી’તિ ઠાનમેતં વિજ્જતિ. ‘અનેકવિહિતં પુબ્બેનિવાસં અનુસ્સરિસ્સતિ, સેય્યથિદં – એકમ્પિ જાતિં, દ્વેપિ જાતિયો…પે… ઇતિ સાકારં સઉદ્દેસં અનેકવિહિતં પુબ્બેનિવાસં અનુસ્સરિસ્સતી’તિ ઠાનમેતં વિજ્જતિ. ‘દિબ્બેન ચક્ખુના વિસુદ્ધેન અતિક્કન્તમાનુસકેન સત્તે પસ્સિસ્સતિ ચવમાને ઉપપજ્જમાને હીને પણીતે સુવણ્ણે દુબ્બણ્ણે, સુગતે દુગ્ગતે યથાકમ્મૂપગે સત્તે પજાનિસ્સતી’તિ ઠાનમેતં વિજ્જતિ. ‘આસવાનં ખયા અનાસવં ચેતોવિમુત્તિં…પે… સચ્છિકત્વા ઉપસમ્પજ્જ વિહરિસ્સતી’તિ ઠાનમેતં વિજ્જતી’’તિ. છટ્ઠં.

૭. સક્ખિભબ્બસુત્તં

૭૧. ‘‘છહિ, ભિક્ખવે, ધમ્મેહિ સમન્નાગતો ભિક્ખુ અભબ્બો તત્ર તત્રેવ સક્ખિભબ્બતં પાપુણિતું સતિ સતિ આયતને. કતમેહિ છહિ? ઇધ, ભિક્ખવે, ભિક્ખુ ‘ઇમે હાનભાગિયા ધમ્મા’તિ યથાભૂતં નપ્પજાનાતિ, ‘ઇમે ઠિતિભાગિયા ધમ્મા’તિ યથાભૂતં નપ્પજાનાતિ, ‘ઇમે વિસેસભાગિયા ધમ્મા’તિ યથાભૂતં નપ્પજાનાતિ, ‘ઇમે નિબ્બેધભાગિયા ધમ્મા’તિ યથાભૂતં નપ્પજાનાતિ, અસક્કચ્ચકારી ચ હોતિ, અસપ્પાયકારી ચ. ઇમેહિ ખો, ભિક્ખવે, છહિ ધમ્મેહિ સમન્નાગતો ભિક્ખુ અભબ્બો તત્ર તત્રેવ સક્ખિભબ્બતં પાપુણિતું સતિ સતિ આયતને.

‘‘છહિ, ભિક્ખવે, ધમ્મેહિ સમન્નાગતો ભિક્ખુ ભબ્બો તત્ર તત્રેવ સક્ખિભબ્બતં પાપુણિતું સતિ સતિ આયતને. કતમેહિ છહિ? ઇધ, ભિક્ખવે, ભિક્ખુ ‘ઇમે હાનભાગિયા ધમ્મા’તિ યથાભૂતં પજાનાતિ, ‘ઇમે ઠિતિભાગિયા ધમ્મા’તિ યથાભૂતં પજાનાતિ, ‘ઇમે વિસેસભાગિયા ધમ્મા’તિ યથાભૂતં પજાનાતિ, ‘ઇમે નિબ્બેધભાગિયા ધમ્મા’તિ યથાભૂતં પજાનાતિ, સક્કચ્ચકારી ચ હોતિ, સપ્પાયકારી ચ. ઇમેહિ ખો, ભિક્ખવે, છહિ ધમ્મેહિ સમન્નાગતો ભિક્ખુ ભબ્બો તત્ર તત્રેવ સક્ખિભબ્બતં પાપુણિતું સતિ સતિ આયતને’’તિ. સત્તમં.

૮. બલસુત્તં

૭૨. ‘‘છહિ, ભિક્ખવે, ધમ્મેહિ સમન્નાગતો ભિક્ખુ અભબ્બો સમાધિસ્મિં [સમાધિમ્હિ (ક.)] બલતં પાપુણિતું. કતમેહિ છહિ? ઇધ, ભિક્ખવે, ભિક્ખુ ન સમાધિસ્સ સમાપત્તિકુસલો હોતિ, ન સમાધિસ્સ ઠિતિકુસલો હોતિ, ન સમાધિસ્સ [ન સમાધિમ્હા (ક.) ઉપરિસત્તકનિપાતે દેવતાવગ્ગે પન સબ્બત્થપિ ‘‘સમાધિસ્સ’’ઇત્વેવ દિસ્સતિ] વુટ્ઠાનકુસલો હોતિ, અસક્કચ્ચકારી ચ હોતિ, અસાતચ્ચકારી ચ, અસપ્પાયકારી ચ. ઇમેહિ ખો, ભિક્ખવે, છહિ ધમ્મેહિ સમન્નાગતો ભિક્ખુ અભબ્બો સમાધિસ્મિં બલતં પાપુણિતું.

‘‘છહિ, ભિક્ખવે, ધમ્મેહિ સમન્નાગતો ભિક્ખુ ભબ્બો સમાધિસ્મિં બલતં પાપુણિતું. કતમેહિ છહિ? ઇધ, ભિક્ખવે, ભિક્ખુ સમાધિસ્સ સમાપત્તિકુસલો હોતિ, સમાધિસ્સ ઠિતિકુસલો હોતિ, સમાધિસ્સ વુટ્ઠાનકુસલો હોતિ, સક્કચ્ચકારી ચ હોતિ, સાતચ્ચકારી ચ, સપ્પાયકારી ચ. ઇમેહિ ખો, ભિક્ખવે, છહિ ધમ્મેહિ સમન્નાગતો ભિક્ખુ ભબ્બો સમાધિસ્મિં બલતં પાપુણિતુ’’ન્તિ. અટ્ઠમં.

૯. પઠમતજ્ઝાનસુત્તં

૭૩. ‘‘છ, ભિક્ખવે, ધમ્મે અપ્પહાય અભબ્બો પઠમં ઝાનં ઉપસમ્પજ્જ વિહરિતું. કતમે છ? કામચ્છન્દં, બ્યાપાદં, થિનમિદ્ધં, ઉદ્ધચ્ચકુક્કુચ્ચં, વિચિકિચ્છં. કામેસુ ખો પનસ્સ આદીનવો ન યથાભૂતં સમ્મપ્પઞ્ઞાય સુદિટ્ઠો હોતિ. ઇમે ખો, ભિક્ખવે, છ ધમ્મે અપ્પહાય અભબ્બો પઠમં ઝાનં ઉપસમ્પજ્જ વિહરિતું.

‘‘છ, ભિક્ખવે, ધમ્મે પહાય ભબ્બો પઠમં ઝાનં ઉપસમ્પજ્જ વિહરિતું. કતમે છ? કામચ્છન્દં, બ્યાપાદં, થિનમિદ્ધં, ઉદ્ધચ્ચકુક્કુચ્ચં, વિચિકિચ્છં, કામેસુ ખો પનસ્સ આદીનવો ન યથાભૂતં સમ્મપ્પઞ્ઞાય સુદિટ્ઠો હોતિ. ઇમે ખો, ભિક્ખવે, છ ધમ્મે પહાય ભબ્બો પઠમં ઝાનં ઉપસમ્પજ્જ વિહરિતુ’’ન્તિ. નવમં.

૧૦. દુતિયતજ્ઝાનસુત્તં

૭૪. ‘‘છ, ભિક્ખવે, ધમ્મે અપ્પહાય અભબ્બો પઠમં ઝાનં ઉપસમ્પજ્જ વિહરિતું. કતમે છ? કામવિતક્કં, બ્યાપાદવિતક્કં, વિહિંસાવિતક્કં, કામસઞ્ઞં, બ્યાપાદસઞ્ઞં, વિહિંસાસઞ્ઞં – ઇમે ખો, ભિક્ખવે, છ ધમ્મે અપ્પહાય અભબ્બો પઠમં ઝાનં ઉપસમ્પજ્જ વિહરિતું.

‘‘છ, ભિક્ખવે, ધમ્મે પહાય ભબ્બો પઠમં ઝાનં ઉપસમ્પજ્જ વિહરિતું. કતમે છ? કામવિતક્કં, બ્યાપાદવિતક્કં, વિહિંસાવિતક્કં, કામસઞ્ઞં, બ્યાપાદસઞ્ઞં, વિહિંસાસઞ્ઞં – ઇમે ખો, ભિક્ખવે, છ ધમ્મે પહાય ભબ્બો પઠમં ઝાનં ઉપસમ્પજ્જ વિહરિતુ’’ન્તિ. દસમં.

દેવતાવગ્ગો સત્તમો. [દુતિયો (સ્યા. ક.)]