૫. પઠમસન્દિટ્ઠિકસુત્તં

૪૭. અથ ખો મોળિયસીવકો [મોલિયસીવકો (સી. પી.), મોળિસીવકો (ક.)] પરિબ્બાજકો યેન ભગવા તેનુપસઙ્કમિ; ઉપસઙ્કમિત્વા ભગવતા સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો મોળિયસીવકો પરિબ્બાજકો ભગવન્તં એતદવોચ – ‘‘‘સન્દિટ્ઠિકો ધમ્મો, સન્દિટ્ઠિકો ધમ્મો’તિ, ભન્તે, વુચ્ચતિ. કિત્તાવતા નુ ખો, ભન્તે, સન્દિટ્ઠિકો ધમ્મો હોતિ અકાલિકો એહિપસ્સિકો ઓપનેય્યિકો પચ્ચત્તં વેદિતબ્બો વિઞ્ઞૂહી’’તિ?

‘‘તેન હિ, સીવક, તઞ્ઞેવેત્થ પટિપુચ્છામિ. યથા તે ખમેય્ય તથા નં બ્યાકરેય્યાસિ. તં કિં મઞ્ઞસિ, સીવક, સન્તં વા અજ્ઝત્તં લોભં ‘અત્થિ મે અજ્ઝત્તં લોભો’તિ પજાનાસિ, અસન્તં વા અજ્ઝત્તં લોભં ‘નત્થિ મે અજ્ઝત્તં લોભો’તિ પજાનાસી’’તિ? ‘‘એવં, ભન્તે’’. ‘‘યં ખો ત્વં, સીવક, સન્તં વા અજ્ઝત્તં લોભં ‘અત્થિ મે અજ્ઝત્તં લોભો’તિ પજાનાસિ, અસન્તં વા અજ્ઝત્તં લોભં ‘નત્થિ મે અજ્ઝત્તં લોભો’તિ પજાનાસિ – એવમ્પિ ખો, સીવક, સન્દિટ્ઠિકો ધમ્મો હોતિ…પે….

‘‘તં કિં મઞ્ઞસિ, સીવક, સન્તં વા અજ્ઝત્તં દોસં…પે… સન્તં વા અજ્ઝત્તં મોહં…પે… સન્તં વા અજ્ઝત્તં લોભધમ્મં…પે… સન્તં વા અજ્ઝત્તં દોસધમ્મં…પે… સન્તં વા અજ્ઝત્તં મોહધમ્મં ‘અત્થિ મે અજ્ઝત્તં મોહધમ્મો’તિ પજાનાસિ, અસન્તં વા અજ્ઝત્તં મોહધમ્મં ‘નત્થિ મે અજ્ઝત્તં મોહધમ્મો’તિ પજાનાસી’’તિ? ‘‘એવં, ભન્તે’’. ‘‘યં ખો ત્વં, સીવક, સન્તં વા અજ્ઝત્તં મોહધમ્મં ‘અત્થિ મે અજ્ઝત્તં મોહધમ્મો’તિ પજાનાસિ, અસન્તં વા અજ્ઝત્તં મોહધમ્મં ‘નત્થિ મે અજ્ઝત્તં મોહધમ્મો’તિ પજાનાસિ – એવં ખો, સીવક, સન્દિટ્ઠિકો ધમ્મો હોતિ અકાલિકો એહિપસ્સિકો ઓપનેય્યિકો પચ્ચત્તં વેદિતબ્બો વિઞ્ઞૂહી’’તિ.

‘‘અભિક્કન્તં, ભન્તે, અભિક્કન્તં, ભન્તે…પે… ઉપાસકં મં, ભન્તે, ભગવા ધારેતુ અજ્જતગ્ગે પાણુપેતં સરણં ગત’’ન્તિ. પઞ્ચમં.