૬. દુતિયસન્દિટ્ઠિકસુત્તં

૪૮. અથ ખો અઞ્ઞતરો બ્રાહ્મણો યેન ભગવા તેનુપસઙ્કમિ; ઉપસઙ્કમિત્વા ભગવતા સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો સો બ્રાહ્મણો ભગવન્તં એતદવોચ – ‘‘‘સન્દિટ્ઠિકો ધમ્મો, સન્દિટ્ઠિકો ધમ્મો’તિ, ભો ગોતમ, વુચ્ચતિ. કિત્તાવતા નુ ખો, ભો ગોતમ, સન્દિટ્ઠિકો ધમ્મો હોતિ અકાલિકો એહિપસ્સિકો ઓપનેય્યિકો પચ્ચત્તં વેદિતબ્બો વિઞ્ઞૂહી’’તિ?

‘‘તેન હિ, બ્રાહ્મણ, તઞ્ઞેવેત્થ પટિપુચ્છિસ્સામિ. યથા તે ખમેય્ય તથા નં બ્યાકરેય્યાસિ. તં કિં મઞ્ઞસિ, બ્રાહ્મણ, સન્તં વા અજ્ઝત્તં રાગં ‘અત્થિ મે અજ્ઝત્તં રાગો’તિ પજાનાસિ, અસન્તં વા અજ્ઝત્તં રાગં ‘નત્થિ મે અજ્ઝત્તં રાગો’તિ પજાનાસી’’તિ? ‘‘એવં, ભો’’. ‘‘યં ખો ત્વં, બ્રાહ્મણ, સન્તં વા અજ્ઝત્તં રાગં ‘અત્થિ મે અજ્ઝત્તં રાગો’તિ પજાનાસિ, અસન્તં વા અજ્ઝત્તં રાગં ‘નત્થિ મે અજ્ઝત્તં રાગો’તિ પજાનાસિ – એવમ્પિ ખો, બ્રાહ્મણ, સન્દિટ્ઠિકો ધમ્મો હોતિ…પે….

‘‘તં કિં મઞ્ઞસિ, બ્રાહ્મણ, સન્તં વા અજ્ઝત્તં દોસં…પે… સન્તં વા અજ્ઝત્તં મોહં…પે… સન્તં વા અજ્ઝત્તં કાયસન્દોસં…પે… સન્તં વા અજ્ઝત્તં વચીસન્દોસં…પે… સન્તં વા અજ્ઝત્તં મનોસન્દોસં ‘અત્થિ મે અજ્ઝત્તં મનોસન્દોસો’તિ પજાનાસિ, અસન્તં વા અજ્ઝત્તં મનોસન્દોસં ‘નત્થિ મે અજ્ઝત્તં મનોસન્દોસો’તિ પજાનાસી’’તિ? ‘‘એવં, ભો’’. ‘‘યં ખો ત્વં, બ્રાહ્મણ, સન્તં વા અજ્ઝત્તં મનોસન્દોસં ‘અત્થિ મે અજ્ઝત્તં મનોસન્દોસો’તિ પજાનાસિ, અસન્તં વા અજ્ઝત્તં મનોસન્દોસં ‘નત્થિ મે અજ્ઝત્તં મનોસન્દોસો’તિ પજાનાસિ – એવં ખો, બ્રાહ્મણ, સન્દિટ્ઠિકો ધમ્મો હોતિ અકાલિકો એહિપસ્સિકો ઓપનેય્યિકો પચ્ચત્તં વેદિતબ્બો વિઞ્ઞૂહી’’તિ.

‘‘અભિક્કન્તં, ભો ગોતમ, અભિક્કન્તં, ભો ગોતમ…પે… ઉપાસકં મં ભવં ગોતમો ધારેતુ અજ્જતગ્ગે પાણુપેતં સરણં ગત’’ન્તિ. છટ્ઠં.