૪. મહાચુન્દસુત્તં

૪૬. એવં મે સુતં – એકં સમયં આયસ્મા મહાચુન્દો ચેતીસુ વિહરતિ સયંજાતિયં [સહજાતિયં (સી. પી.), સઞ્જાતિયં (સ્યા. કં.)]. તત્ર ખો આયસ્મા મહાચુન્દો ભિક્ખૂ આમન્તેસિ – ‘‘આવુસો ભિક્ખવે’’તિ. ‘‘આવુસો’’તિ ખો તે ભિક્ખૂ આયસ્મતો મહાચુન્દસ્સ પચ્ચસ્સોસું. આયસ્મા મહાચુન્દો એતદવોચ –

‘‘ઇધાવુસો, ધમ્મયોગા ભિક્ખૂ ઝાયી ભિક્ખૂ અપસાદેન્તિ – ‘ઇમે પન ઝાયિનોમ્હા, ઝાયિનોમ્હાતિ ઝાયન્તિ પજ્ઝાયન્તિ નિજ્ઝાયન્તિ અવજ્ઝાયન્તિ [અપજ્ઝાયન્તિ (મ. નિ. ૧.૫૦૮)]. કિમિમે [કિં હિમે (સી. સ્યા. કં. પી.)] ઝાયન્તિ, કિન્તિમે ઝાયન્તિ, કથં ઇમે ઝાયન્તી’તિ? તત્થ ધમ્મયોગા ચ ભિક્ખૂ નપ્પસીદન્તિ, ઝાયી ચ ભિક્ખૂ નપ્પસીદન્તિ, ન ચ બહુજનહિતાય પટિપન્ના હોન્તિ બહુજનસુખાય બહુનો જનસ્સ અત્થાય હિતાય સુખાય દેવમનુસ્સાનં.

‘‘ઇધ પનાવુસો, ઝાયી ભિક્ખૂ ધમ્મયોગે ભિક્ખૂ અપસાદેન્તિ – ‘ઇમે પન ધમ્મયોગમ્હા, ધમ્મયોગમ્હાતિ ઉદ્ધતા ઉન્નળા ચપલા મુખરા વિકિણ્ણવાચા મુટ્ઠસ્સતી અસમ્પજાના અસમાહિતા વિબ્ભન્તચિત્તા પાકતિન્દ્રિયા. કિમિમે ધમ્મયોગા, કિન્તિમે ધમ્મયોગા, કથં ઇમે ધમ્મયોગા’તિ? તત્થ ઝાયી ચ ભિક્ખૂ નપ્પસીદન્તિ, ધમ્મયોગા ચ ભિક્ખૂ નપ્પસીદન્તિ, ન ચ બહુજનહિતાય પટિપન્ના હોન્તિ બહુજનસુખાય બહુનો જનસ્સ અત્થાય હિતાય સુખાય દેવમનુસ્સાનં.

‘‘ઇધ પનાવુસો, ધમ્મયોગા ભિક્ખૂ ધમ્મયોગાનઞ્ઞેવ ભિક્ખૂનં વણ્ણં ભાસન્તિ, નો ઝાયીનં ભિક્ખૂનં વણ્ણં ભાસન્તિ. તત્થ ધમ્મયોગા ચ ભિક્ખૂ નપ્પસીદન્તિ, ઝાયી ચ ભિક્ખૂ નપ્પસીદન્તિ, ન ચ બહુજનહિતાય પટિપન્ના હોન્તિ બહુજનસુખાય બહુનો જનસ્સ અત્થાય હિતાય સુખાય દેવમનુસ્સાનં.

‘‘ઇધ પનાવુસો, ઝાયી ભિક્ખૂ ઝાયીનઞ્ઞેવ ભિક્ખૂનં વણ્ણં ભાસન્તિ, નો ધમ્મયોગાનં ભિક્ખૂનં વણ્ણં ભાસન્તિ. તત્થ ઝાયી ચ ભિક્ખૂ નપ્પસીદન્તિ, ધમ્મયોગા ચ ભિક્ખૂ નપ્પસીદન્તિ, ન ચ બહુજનહિતાય પટિપન્ના હોન્તિ બહુજનસુખાય બહુનો જનસ્સ અત્થાય હિતાય સુખાય દેવમનુસ્સાનં.

‘‘તસ્માતિહાવુસો, એવં સિક્ખિતબ્બં – ‘ધમ્મયોગા સમાના ઝાયીનં ભિક્ખૂનં વણ્ણં ભાસિસ્સામા’તિ. એવઞ્હિ વો, આવુસો, સિક્ખિતબ્બં. તં કિસ્સ હેતુ? અચ્છરિયા હેતે, આવુસો, પુગ્ગલા દુલ્લભા લોકસ્મિં, યે અમતં ધાતું કાયેન ફુસિત્વા વિહરન્તિ. તસ્માતિહાવુસો, એવં સિક્ખિતબ્બં – ‘ઝાયી સમાના ધમ્મયોગાનં ભિક્ખૂનં વણ્ણં ભાસિસ્સામા’તિ. એવઞ્હિ વો, આવુસો, સિક્ખિતબ્બં. તં કિસ્સ હેતુ? અચ્છરિયા હેતે, આવુસો, પુગ્ગલા દુલ્લભા લોકસ્મિં યે ગમ્ભીરં અત્થપદં પઞ્ઞાય અતિવિજ્ઝ પસ્સન્તી’’તિ. ચતુત્થં.