૧૧. અપ્પમાદસુત્તં

૫૩. અથ ખો અઞ્ઞતરો બ્રાહ્મણો યેન ભગવા તેનુપસઙ્કમિ; ઉપસઙ્કમિત્વા ભગવતા સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો સો બ્રાહ્મણો ભગવન્તં એતદવોચ –

‘‘અત્થિ નુ ખો, ભો ગોતમ, એકો ધમ્મો ભાવિતો બહુલીકતો યો ઉભો અત્થે સમધિગ્ગય્હ તિટ્ઠતિ – દિટ્ઠધમ્મિકઞ્ચેવ અત્થં, યો ચ અત્થો સમ્પરાયિકો’’તિ? ‘‘અત્થિ ખો, બ્રાહ્મણ, એકો ધમ્મો ભાવિતો બહુલીકતો યો ઉભો અત્થે સમધિગ્ગય્હ તિટ્ઠતિ – દિટ્ઠધમ્મિકઞ્ચેવ અત્થં, યો ચ અત્થો સમ્પરાયિકો’’તિ.

‘‘કતમો પન, ભો ગોતમ, એકો ધમ્મો ભાવિતો બહુલીકતો યો ઉભો અત્થે સમધિગ્ગય્હ તિટ્ઠતિ – દિટ્ઠધમ્મિકઞ્ચેવ અત્થં, યો ચ અત્થો સમ્પરાયિકો’’તિ? ‘‘અપ્પમાદો ખો, બ્રાહ્મણ, એકો ધમ્મો ભાવિતો બહુલીકતો ઉભો અત્થે સમધિગ્ગય્હ તિટ્ઠતિ – દિટ્ઠધમ્મિકઞ્ચેવ અત્થં, યો ચ અત્થો સમ્પરાયિકો’’.

‘‘સેય્યથાપિ, બ્રાહ્મણ, યાનિ કાનિચિ જઙ્ગલાનં [જઙ્ગમાનં (સી. પી.) અ. નિ. ૧૦.૧૫; મ. નિ. ૧.૩૦૦] પાણાનં પદજાતાનિ, સબ્બાનિ તાનિ હત્થિપદે સમોધાનં ગચ્છન્તિ; હત્થિપદં તેસં અગ્ગમક્ખાયતિ, યદિદં મહન્તત્તેન. એવમેવં ખો, બ્રાહ્મણ, અપ્પમાદો એકો ધમ્મો ભાવિતો બહુલીકતો ઉભો અત્થે સમધિગ્ગય્હ તિટ્ઠતિ – દિટ્ઠધમ્મિકઞ્ચેવ અત્થં, યો ચ અત્થો સમ્પરાયિકો.

‘‘સેય્યથાપિ, બ્રાહ્મણ, કૂટાગારસ્સ યા કાચિ ગોપાનસિયો સબ્બા તા કૂટઙ્ગમા કૂટનિન્ના કૂટસમોસરણા, કૂટં તાસં અગ્ગમક્ખાયતિ; એવમેવં ખો, બ્રાહ્મણ …પે….

‘‘સેય્યથાપિ, બ્રાહ્મણ, પબ્બજલાયકો પબ્બજં [બબ્બજલાયકો બબ્બજં (સી. પી.)] લાયિત્વા અગ્ગે ગહેત્વા ઓધુનાતિ નિધુનાતિ નિચ્છાદેતિ; એવમેવં ખો, બ્રાહ્મણ…પે….

‘‘સેય્યથાપિ, બ્રાહ્મણ, અમ્બપિણ્ડિયા વણ્ટચ્છિન્નાય યાનિ કાનિચિ અમ્બાનિ વણ્ટૂપનિબન્ધનાનિ સબ્બાનિ તાનિ તદન્વયાનિ ભવન્તિ; એવમેવં ખો, બ્રાહ્મણ…પે….

‘‘સેય્યથાપિ, બ્રાહ્મણ, યે કેચિ ખુદ્દરાજાનો [કુડ્ડરાજાનો (સી. સ્યા. અટ્ઠ.), કુદ્દરાજાનો (પી.) અ. નિ. ૧૦.૧૫] સબ્બેતે રઞ્ઞો ચક્કવત્તિસ્સ અનુયન્તા [અનુયુત્તા (સી. સ્યા. કં. પી.)] ભવન્તિ, રાજા તેસં ચક્કવત્તી અગ્ગમક્ખાયતિ; એવમેવં ખો, બ્રાહ્મણ…પે….

‘‘સેય્યથાપિ, બ્રાહ્મણ, યા કાચિ તારકરૂપાનં પભા સબ્બા તા ચન્દસ્સ પભાય કલં નાગ્ઘન્તિ સોળસિં, ચન્દપ્પભા તાસં અગ્ગમક્ખાયતિ. એવમેવં ખો, બ્રાહ્મણ, અપ્પમાદો એકો ધમ્મો ભાવિતો બહુલીકતો ઉભો અત્થે સમધિગ્ગય્હ તિટ્ઠતિ – દિટ્ઠધમ્મિકઞ્ચેવ અત્થં યો ચ અત્થો સમ્પરાયિકો.

‘‘અયં ખો, બ્રાહ્મણ, એકો ધમ્મો ભાવિતો બહુલીકતો ઉભો અત્થે સમધિગ્ગય્હ તિટ્ઠતિ – દિટ્ઠધમ્મિકઞ્ચેવ અત્થં, યો ચ અત્થો સમ્પરાયિકો’’તિ.

‘‘અભિક્કન્તં, ભો ગોતમ, અભિક્કન્તં, ભો ગોતમ…પે… ઉપાસકં મં ભવં ગોતમો ધારેતુ અજ્જતગ્ગે પાણુપેતં સરણં ગત’’ન્તિ. એકાદસમં.